SUJAN 13
13
Kum kɔɔ̄ gə̄ jōó əndā kumdə́ rɔ̄ Sujan tə́
1Dəngam kógə̄ḿ ndi kem ɓē kə́ Babilon tə́ nuū, rīn na i Jəwakim. 2Ni taā dəyá̰ kógə̄ḿ kə́ rīn na i Sujan, i ngōn̄ Helkiyas. Dəyá̰ ní mandə ngá̰ý ō, ɓōĺ ndíĺ Kɔ́ɔ̄ɓē ō. 3Ngé kojən gə̄ i de ngé rāā yá̰a̰ kə gō ń Nə́ɓā ndigə ní gə̄, ndóōn̄ ngōn̄də́ kə́ dəyá̰ yá̰a̰ i kə gō ndū najə̄ yā Moyijə ō. 4Jəwakim i de kə́ ənge yá̰á̰ ngá̰ý ō, aw̄ kə gong kógə̄ḿ kadə̄ kújə yān tə́ ō. Jipə gə̄ ngá̰ý aw̄n̄ ɓē yān tə́, tɔdɔ̄ i de kə́ rīn ɓār̄ tɔȳdə́ malang.
5Ɓāl̄ kógə̄ḿ tə́ gə̄rān̄ kum kɔɔ̄ gə̄ jōó dan gír deē yā Jipə gə̄ tə́, kadə̄ nin̄ i ngé gān̄g sarya gə̄. I nin̄ n Kɔ́ɔ̄ɓē ɔr̄ najə̄ yādə́ ní, əda na: Yá̰a̰ rāā kə́ gōtə́ aĺ teē i Babilon, rɔ̄ kum kɔɔ̄ gə̄ tə́, rɔ̄ ngé sarya gə̄ tə́, de gə̄ ń nuū ń rāān̄ rɔ̄də́ tītə̄ kə́ nin̄ i ngé kṵ ɓē dɔ de gə̄ tə́ beē ní. 6Nin̄ kɔ́ gə̄ gə̄gē anī, a aw̄n̄ i ɓē Jəwakim ō, de gə̄ malang ń kadə̄ gāngə̄n̄ sarya yādə́ ní, a aw̄n̄ i gōdə́ tə́ ō. 7Tá dan ń kadaá á de gə̄ tél aw̄n̄ kɔ̄ɔ́ ní anī, Sujan udə kem gong yā ngaan tə́ ba a dáȳ kemeé. 8Kum kɔɔ̄ kə́ jōó gə̄ ní a̰a̰nən̄ kə dɔ ndɔ̄ gə̄ lo kudə tə́ ō, lo dáȳ tə́ ō kemeé. Lo ń nuū tə́ ngur sāan rāādə́. 9Dɔdə́ oy mák mák kɔ̄ɔ́ ō, mbātə́n̄ gír̄ dɔ Nə́ɓā kə́ dɔ rā̰ tə́ tə́ ō, əga kemdə́ dɔ sarya kə́ gōtə́ yā Nə́ɓā tə́ aĺ ō.
10Nin̄ jōó mbak ní, dəyá̰ ní sə̄ngā kumdə́ ngá̰ý. Banī yá̰á̰ ń tōr̄ rɔ̄də́ mbak ní, ɔjən̄ naā alé. 11Tɔdɔ̄ rɔ̄də́ sɔl̄də́ lo kɔjə ngur yá̰á̰ ń rāādə́ ní tə́ kə̄ ndágá, tām̄ nin̄ gḛyn̄ ɓīī seneé. 12Adə̄ kə dɔ ndɔ̄ gə̄ ń nuū nin̄ a umnən̄ i mbée yā ka̰a̰n. 13Nin̄ ədan̄ naā na: j-aw̄ ɓēé na kum mbang kəsa yá̰a̰ asə kɔ̄ɔ́. Dan ń teēn̄ anī, əya̰n̄ naā. 14Gō tə́ anī, əhɔn̄ tadə́ tūrə̄n̄. Nin̄ télən̄ dɔ tə́ anī, əngen̄ naā lo kə́ kógə̄ḿ beē tə́. Anī dəjen̄ naā gíŕ yá̰á̰ ń rāā yá̰á̰ á tél əngenə̄ń naā gogə́ ní. Lo ń nuū tə́ nin̄ ədan̄ naā ngur sāā Sujan kə́ kemdə́ tə́. Anī oōn̄ naā dɔ kum mbang kə́ yā kəngenəń tə́ kə kérneé.
15Dan ń ndi a ngóōn̄ ndɔ̄ kə́ majə anī, Sujan udə kem go̰ngɔɔ́ tītə̄ kə́ kété gə̄. Ngámandə kə́ seneé gə̄ i jōó ngóy ō, ɓōō ndogə̄ man̄ kem go̰ngɔɔ́ rāan ō, tɔdɔ̄ lo təngā ngá̰ý. 16De kə́ rang gətóo lo ní tə́, ba i kum kɔɔ̄ kə́ jōó gə̄ ń ɓɔ̄ɔ̄n̄ rɔ̄də́ ba a umnən̄ ní tá ngóy. 17Sujan əda ngámandə gə̄ ní na: ī-reēī kə yibə̄ ndum ō ítər ō ādə̄mī, ba ūtī ta gong na m-ā m̄-ndogə̄ i man̄. 18Nin̄ rāān̄ tītə̄ ń ədańdə́ ní: utə̄n̄ ta gong ba teēn̄ kə ta róbə́ kə́ kadə gong kə́ dām̄ kə́rēý tə́, yā reēń kə yá̰á̰ ń Sujan ədadə́ kadə̄ reēnəń ní. Nin̄ a̰a̰n̄ kum kɔɔ̄ gə̄ ní alé, tɔdɔ̄ ɓɔ̄ɔ̄n̄ rɔ̄də́ kɔ̄ɔ́. 19Dan ń ngámandə gə̄ ní teēn̄ kɔ̄ɔ́ anī, kum kɔɔ̄ gə̄ ní ḭḭn̄ dɔɔ́, a̰ȳn̄ ngɔ̄də̄ kum kə̄ rɔ̄ Sujan tə́, ba ədanən̄ na: 20Ń toō ní ta gong i kə́ kutə̄ kɔ̄ɔ́ ō, deē gətóo ō, ngurií rāājí ō ní, ādə̄ jə-sāāī. 21Ré i beé aĺ anī, j-a j-əda kə́ kum tə́ yājí dɔí tə́ na i balsáá kógə̄ḿ n i seí á ī-tə̄ɓań ngámandə gə̄ kɔ̄ɔ́ ní.
22Lo ń nuū tə́ Sujan to̰ō̰ ba əda na: De gə̄ gīr̄mə̄n̄ kə̄ taa gə̄ tə́. Ré m̄-rāā nge ń nuū anī, yāḿ i yo. Ba ré m̄-rāā nge ń nuū aĺ anī, m-ā m̄-teē jīsí tə́ alé. 23Kəsōḿ jīsí tə́ kanjə̄ rāā nge ń nuū i sóótə́, tɔȳ kadə̄ m̄-rāā majaĺ ta kum Kɔ́ɔ̄ɓē tə́. 24Lo ń nuū tə́ Sujan əga kɔŕ ngá̰ý kə tɔ́gəneé, banī kum kɔɔ̄ kə́ jōó gə̄ əgań kɔŕ yādə́ dɔn tə́ ō. 25Nge kə́ kógə̄ḿ a̰ȳ ngɔ̄də̄ aw̄ teē ta gong. 26Dan ń de kə́ kújú gə̄ oōn̄ kōō kɔŕ kə́ go̰ngɔɔ́ anī, teēn̄ láẃ kə ta róbə́ kə́ kadə gong tə́ yā reē ka̰a̰ yá̰á̰ ń rāā Sujan ní. 27Dan ń kum kɔɔ̄ gə̄ ɔjən̄ gotə najə̄ yādə́ anī, rɔ̄ ngé kəla gə̄ sɔl̄də́ ngá̰ý, tɔdɔ̄ najə̄ kə́ beē deē əda dɔ Sujan tə́ aĺ ɓáý.
28Teē kə ndɔ̄ kə́ nuū, dan ń de gə̄ ɔsən̄ dɔdə́ naā tə́ ɓē ngaan Jəwakim anī, kum kɔɔ̄ kə́ jōó gə̄ ní reē ugə̄n̄, gír̄ yādə́ i gír̄ kə́ majə aĺ ngá̰ý kə Sujan. Nin̄ sāān̄ tɔ̄lən adə̄ ədan̄ ta kum de gə̄ tə́ na: 29Ə́laī gō Sujan kə́ ngōn̄ Helkiyas kə́ nə̄yá̰ Jəwakim tə́ ādə̄ reē! Anī əlan̄ gōn tə́. 30Sujan reē i kə ngé kojən gə̄ ō, ngánən gə̄ ō, ngéen gə̄ ō malang. 31Ni majə deē ō, mandə ngá̰ý ō. 32Ngé tɔ̄l̄ de gə̄ ngeé ń toō ədan̄ kadə̄ ɔrə̄n̄ yá̰a̰ ta kumən tə́ kɔ̄ɔ́, kadə̄ n-a̰a̰nə̄ń mandən kadə̄ asədə́ tɔdɔ̄ kété ní ni seĺ yá̰a̰ ta kumən tə́ kɔ̄ɔ́. 33De gə̄ yān gə̄ malang a nūūn̄ i naā ō, ngé gə̄ malang ń a̰a̰nən̄ ní a nūūn̄ i mbée ō.
34Kum kɔɔ̄ kə́ jōó gə̄ ní, ḭḭn̄ dɔɔ́ dan de gə̄ tə́, ba əndān̄ jīdə́ dɔn tə́. 35Ni tā a dan ń a nūū ní a̰a̰ lo kum kə̄ dɔɔ́, tɔdɔ̄ ni ənī kemən mák mák adə̄ Kɔ́ɔ̄ɓē. 36Kum kɔɔ̄ kə́ jōó gə̄ ní ədan̄ na: J-a jə-njə̄rā i mbée kem go̰ngɔɔ́ kə kéŕjí, anī ni teē tū tə́ nuū reē udə kem go̰ngɔɔ́ kə ngé kəla kə́ dəyá̰ kə́ jōó gə̄ seneé. Ni utə̄ ta gong ba əya̰ ngé kəla kə́ dəyá̰ gə̄ adə̄ aw̄n̄. 37Lo ń nuū tə́ balsáá kógə̄ḿ kə́ ɓɔ̄ɔ̄ rɔ̄n teē reē rɔ̄n tə́ ba sāan. 38Dan ń jə-ra kíl lo tə́ kem go̰ngɔɔ́ j-a̰a̰ńdə́ lo rāā yá̰á̰ kə́ gōtə́ aĺ ń nuū tə́ ní, j-a̰ȳ jə-reē rɔ̄də́ tə́, 39anī j-a̰a̰də́ lo sāā naā tə́. Tām̄ yā dəngam tə́ ɓáa j-asə kəwan alé, tɔdɔ̄ ni ngan̄g tɔȳjí. Ni teē ta gong ba a̰ȳ aw̄ kɔ̄ɔ́. 40Ba dəyá̰ ɓáa j-əhɔn ō, jə-dəjen na ké balsáá ní ké i náā wa ō. 41Banī ni mbātə́ kəda dɔn kɔ̄ɔ́. Kə́ sɔɔ̄ dɔ najə̄ ń nuū ɓáa jḭḭ i kə́ kum tə́ gə̄. De gə̄ ń kánə̄n̄ naā ní taān̄ kemdə́, tɔdɔ̄ nin̄ i kum kɔɔ̄ gə̄ yā ngán Israel gə̄ ō, ngé gān̄g sarya gə̄ ō. Adə̄ nin̄ gāngə̄n̄ sarya yo dɔ Sujan tə́. 42Lo ń nuū tə́ Sujan əga kɔŕ kə tɔ́gəneé ba əda na: Nə́ɓā, nge ndi ngándáńg! Ḭ̄ ń ī-ger̄ yá̰á̰ kə́ to lo mundə̄ tə́ gə̄ ō, ī-ger̄ yá̰a̰ malang kété pá tá kadə̄ rāān̄də́ ō ní, 43ī-ger̄ majə kadə̄ najə̄ gə̄ ń tə́dan̄ dɔḿ tə́ ní i najə̄ kə́ rɔ̄kum alé. Ba ń toō m-ā m-oy i kanjə̄ rāā yá̰á̰ kógə̄ḿ kə́ dan yá̰a̰ gə̄ ń nin̄ tétə̄n̄ dɔḿ tə́ kə kem nduluú ní.
Daniyel ɔjə kadə̄ najə̄ gətóo dɔ Sujan tə́
44Kɔ́ɔ̄ɓē oō ndū Sujan. 45Dan ń a aw̄n̄ kə Sujan yā tɔ̄lən anī, Nə́ɓā əndā ter̄ kem balsáá kógə̄ḿ kə́ rīn na i Daniyel tə́. 46Ni əga kɔŕ kə tɔ́gəneé əda na: Mósə dəyá̰ ń toō najə̄n i dɔḿ mā tə́ alé! 47De gə̄ malang tūrə̄n̄ kumdə́ kə̄ dɔn tə́ ba ədan̄ na: Najə̄ ń ə́da toó kumən na i rí? 48Banī ni ra kə njan kə́ dɔɔ́ dandə́ tə́ ba əda na: Ngán Israel gə̄, kur̄ dɔsí gətóo asə beé a? Sḭḭ̄ ī-gāngī sarya dɔ ngōn̄ kə́ dəyá̰ kə́ Israel tə́ kanjə̄ ndo̰ gír najə̄ yān ō, kanjə̄ ger̄ kunjə̄ najə̄ yān ō. 49Ī-tél āwī gogə́ lo sarya tə́, tɔdɔ̄ de gə̄ ń toō tə́dan i najə̄ kə́ rɔ̄kum aĺ gə̄ dɔn tə́.
50De gə̄ malang télən̄ kə nāgá ta kaw̄ kə̄ gogə́ lo sarya tə́, anī kum kɔɔ̄ kə́ jōó gə̄ ní ədan̄ Daniyel na: Ī-reē ī-ndi danjí tə́ ba ɔ́jə́jí gír̄ yāí, tɔdɔ̄ i ḭ̄ ngóy n Nə́ɓā adī kum kedə̄ yā de kə́ tɔgə gə̄ ní. 51Daniyel əda de gə̄ na: Ɔ̄rīdə́ kadə naā tə́ kɔ̄ɔ́ ba ī-tə́ndāīdə́ sa̰y sa̰y kə kéŕdə́, anī m-ā m̄-rāā sarya sedə́. 52Dan ń ɔrə̄n̄də́ kadə naā tə́ kɔ̄ɔ́ anī, ni ɓāŕ nge kógə̄ḿ ba ədan na: Ḭ̄ ī-tɔgə i kem yá̰a̰ rāā kə́ majə aĺ tə́! Ngɔlaā ní, majaĺ gə̄ ń ī-rāā kété kété ní n toó. 53Kété ní ī-gān̄g sarya kə́ gōtə́ aĺ gə̄ dɔ de gə̄ kə́ najə̄ gətóo dɔdə́ tə́, ba ə́ya̰ de gə̄ kə́ najə̄ i dɔdə́ tə́ gə̄ dɔɔ́ adə̄ aw̄n̄. Tá Kɔ́ɔ̄ɓē əda na: Ī-lōō rāā kadə̄ de kə́ kanjə̄ najə̄ dɔn tə́ oy ō, de kə́ súūmú oy ō. 54Ɓáa kə́ ngɔr ń toō tə́ ní, ré á̰a̰ Sujan lo sāā naā tə́ kə balsáá ní rɔ̄kum anī, i gír kāgə̄ rí tə́ a ə́da. Kum kɔɔ̄ ní əda na: I gír kāgə̄ dīl̄ tə́. 55Daniyel əda na: Kə́ rɔ̄kum tə́ ní, ḭ̄ ī-sor̄ i mbée dɔ rɔ̄í ḭ̄kɔ́ tə́! Tɔdɔ̄ nge kəla kə́ dɔ rā̰ tə́ yā Nə́ɓā ń Nə́ɓā adə̄n ndūn kɔ̄ɔ́ ɓá ní, a njariī naā tə́.
56Ni əya̰n adə̄ aw̄, ba əda kadə̄ reēn̄ kə nge kə́ rangaá. Anī ni ədan na: Deē kə́ gír kaa yā Kanaan tə́ ba i yā Juda tə́ alé! Mandə dəyá̰ gólī ō, ngur dəyá̰ nujə kemií kɔ̄ɔ́ ō. 57Kété ní ā ī-rāāī i beé kə ngáń kə́ dəyá̰ kə́ Israel tə́ gēé, ba dan ń nin̄ ɓōlə́n̄sí ní, əya̰n̄ rɔ̄də́ adə̄ ī-sāāīdə́. Banī ngōn̄ kə́ dəyá̰ kə́ Juda tə́ tə́gā tan gíŕ yá̰a̰ rāāsí kə́ gōtə́ aĺ tə́ alé. 58Kə́ ngɔr ń toō tə́ ní, ə́dam̄: Ī-teē dɔdə́ tə́ lo sāā naā tə́ i gír kāgə̄ rí tə́? Kum kɔɔ̄ ní əda na: I gír kāgə̄ kə̄yā̰ tə́.#1.54,58 Dīl̄ ō, kə̄yā̰ ō: i yá̰á̰ kə́ tītə̄ naā alé, nge ń nuū ɔjə kadə̄ kum kɔɔ̄ kə́ jōó gə̄ ní sorə̄n̄ i mbée. 59Daniyel ədan na: Kə́ rɔ̄kum tə́ ní, ḭ̄ ī-sor̄ i mbée dɔ rɔ̄í ḭ̄kɔ́ tə́! Tɔdɔ̄ nge kəla kə́ dɔ rā̰ tə́ yā Nə́ɓā ra a ngóōī kə kaskaraá jīn tə́ yā njariī naā tə́ yā tɔ̄ɔń kōōsí kɔ̄ɔ́.
60Kósə Israel gə̄ ń ɔsən̄ dɔdə́ naā tə́ ní, əgan̄ kɔŕ kə tɔ́gə́də́ ō, rāān̄ Nə́ɓā ń i nge kajə ngé kəndā kemdə́ dɔn tə́ gə̄ ní kə́ra ō. 61Gō tə́ anī, tūrə̄n̄ tadə́ kə̄ dɔ kum kɔɔ̄ kə́ jōó gə̄ tə́. Daniyel ɔsə ngóýdə́ kadə̄ nin̄ i ngé kəda najə̄ kə́ kum tə́ kə́ rɔ̄kum aĺ gə̄, sɔɔ̄ń najə̄ kɔr̄də́ nin̄ kɔ́ gə̄. Kósə de gə̄ malang rāān̄ kum kɔɔ̄ gə̄ ní yá̰á̰ kə́ tōr̄. I yá̰á̰ kə́ tōr̄ ń kum kɔɔ̄ gə̄ ní sāān̄ rāā kə de kógə̄ḿ kə́ dan gír deē yādə́ tə́ kə kem nduluú ní. 62Nin̄ tɔ̄lə̄n̄ kum kɔɔ̄ gə̄ ní kə gō ndū najə̄ yā Moyijə. I beé n ajənə̄ń deē kə́ najə̄ gətóo dɔn tə́ ndɔ̄ ngeé ń nuū tə́ ní. 63Helkiyas nin̄ kə nə̄yá̰neé ɓōkə́n̄ Nə́ɓā tɔ̄ȳ najə̄ yā ngōn̄də́ Sujan tə́, naā tə́ kə ngaa ngōn̄də́ ń rīn na i Jəwakim ní ō, ngéédə́ gə̄ malang ō. Nin̄ tɔ̄ȳn̄ Nə́ɓā tɔdɔ̄ əngen̄ yá̰á̰ kógə̄ḿ kə́ to rɔ̄sɔl̄ rɔ̄n tə́ alé.
64Əla gír ndɔ̄ ń nuū tə́ ō, gotə ndɔ̄ gə̄ ń a reēn̄ tə́ ō ní, de gə̄ malang gḛyn̄ najə̄ yā Daniyel.
Currently Selected:
SUJAN 13: SARDC
Highlight
Copy
Compare
Share
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.