PĀ YĀ BALSÁÁ KƏ́ MƏTÁ GƏ̄ 3
3
Ndɔ̄ȳ yā Ajariya
1 Nin̄ njə̄rān̄ kum hor tə́ ɔsənə̄ń go̰n Nə́ɓā ō, ɓōkə́nəń Kɔ́ɔ̄ɓē tɔ̄ȳ ō. 2 Ajariya ra kə njan kə́ dɔɔ́ kum hor tə́ ndɔ̄yń Nə́ɓā, əda na:
3 Kɔ́ɔ̄ɓē, Nə́ɓā yā kaají gə̄, ādə̄ de gə̄ rāāīn̄ kə́ra ō, ɓōkíīn̄ tɔ̄ȳ ō, ādə̄ de gə̄ ɔsən̄ go̰nií mbóńg kə̄ no tə́ ō! 4 Tɔdɔ̄ ḭ̄ i de kə́ gōtə́ tū yá̰a̰ rāāí gə̄ tə́ malang. Kəla rāāí gə̄ malang i kəla kə́ rɔ̄kum gə̄ ō, róbə yāí gə̄ i róbə́ kə́ súūmú gə̄ ō, sarya rāāí gə̄ malang i sarya kə́ rɔ̄kum gə̄ ō. 5 Yá̰a̰ malang kə́ tōr̄ gə̄ ń ī-rāā sejí najə̄ yá̰a̰ rāājí gə̄ kə́ gōtə́ aĺ gə̄ tə́ ní, i sarya kə́ gōtə́ n ī-gān̄g dɔjí tə́ ō, dɔ Jerusalem ń i ɓē yā kaají gə̄ ní tə́ ō. Tɔdɔ̄ ī-rāājí yá̰á̰ kə́ tōr̄ gə̄ ń nuū malang i kə gō najə̄ kə́ rɔ̄kum ō, yá̰á̰ kə́ súūmú ō, sɔɔ̄ń i majaĺ yājí gə̄. 6 Tɔdɔ̄ jə-rāā majaĺ ō, jə-rāā yá̰a̰ i kə́ ngé taā kem gə̄ tə́ aĺ ō, j-aw̄ bátə́ j-ɔr̄ rɔ̄jí kɔ̄ɔ́ rɔ̄í tə́ ō, j-əsō kɔ̄ɔ́ tū yá̰a̰ gə̄ tə́ malang ō. 7 Jə-rāā yá̰a̰ gə̄ ń ə́dájí kadə̄ jə-rāā ní alé. J-əndā kumjí gíŕdə́ tə́ aĺ ō, jə-rāādə́ tītə̄ ń ə́dańjí kadə̄ jə-rāā tām̄ yā majə yājí tə́ ní aĺ ō. 8 A̰á̰ā̰, yá̰a̰ malang ń ī-rāā sejí ní i yá̰á̰ kə́ gōtə́, ndéý ń ə́ndájí ní, i ndéý kə́ gōtə́. 9 Ḭ̄ ə́lájí kem jī madə̄ ba̰ā̰jí gə̄ kə́ ngé rāā yá̰a̰ kə gō kem ndigə yā Nə́ɓāá aĺ tə́ ō, kə́ majən̄ aĺ ngá̰ý kə́ ngé kəsō wūn̄g taí tə́ gə̄ tə́ ō, ə́lájí kem jī mban̄g kə́ nge rāā yá̰á̰ kə́ gōtə́ aĺ tə́ ō, ni ń i kə́ majə aĺ ngá̰ý tɔȳ de gə̄ malang kə́ dɔ nang tə́ ní. 10 Adə̄ ngɔlaā ní, lo kadə̄ jə-teē tají j-ɔrə̄ń najə̄ tṵ ní gətóo. Adə̄ ngé kəla yāí gə̄ ō, ngé rɔyī gə̄ ō ní, əlan̄ rɔ̄sɔl̄ dɔdə́ tə́ ō, tájə̄n̄də́ ō. 11 Sɔɔ̄ń rīí ní, ī-lōō kəya̰jí kɔ̄ɔ́ kə́ njɔ́ḿ gə̄ tə́! Ndūí ń ə̄nī adə̄jí ní, ī-ra dɔ tə́ ō, 12 ī-lōō kɔgə̄jí kem majə yāí ō, najə̄ yā Abəraham ń i madí tə́ ní ō, Ijaak ń i nge kəla yāí tə́ ní ō, Israel ń i de kə́ táĺ yāí tə́ ní ō. 13 I nin̄ n ḭ̄ ɔ̄r̄ najə̄ sedə́ ə́dádə́ na ā ī-rāā kadə̄ ngán kaadə́ gə̄ na a ton̄ tītə̄ tíyō̰ gə̄ kə́ dɔ rā̰ tə́ ō, nán̄g ngárə̄ḿnjēý kə́ ta bā bo tə́ ō ní. 14 Tɔdɔ̄ ngoljí, jə-téĺ gír de gə̄ kə́ dūú ngá̰ý tɔȳ gír de gə̄ malang ō, ɓōólaā əlan̄ rɔ̄sɔl̄ dɔjí tə́ dɔ nang tə́ malang sɔɔ̄ń majaĺ yājí gə̄ ō. 15 Kum mbang ń toō tə́ ní, ngōn̄ mban̄g gətóo ō, nge koō taa gətóo ō, ngār gətóo ō, yá̰a̰ tun̄ kə́ róō horoó gətóo ō, yá̰a̰ ndējə̄ gətóo ō, róō ndujə̄ yá̰á̰ kə́ otə majə gətóo ō, loo kə́ yā ndējīiń dɔ yá̰á̰ kə́ teē ta kəga dɔ gə̄ tū tə́ yā kəngeń kem majə jīí tə́ gətóo ō. 16 Ɓá tā ba ə́hɔ́jí kə̄ rɔ̄í tə́ sɔɔ̄ń kə̄ngājí kə́ tétə̄ rárák kɔ̄ɔ́ ō, rɔ̄sɔl̄ kə́ əlan̄ dɔjí tə́ ō, 17 tītə̄ kə́ jə-ndējī i bal batə̄ gə̄ kə́ róōdə́ horoó ō, man̄g kə́ bəra gə̄ kə́ róōdə́ horoó ō, tītə̄ kə́ jə-ndējī i ngán batə̄ kə́ yḛmbə gə̄ dūbú ngá̰ý ō. Ādə̄ yá̰a̰ tun̄ yājí kə́ ɓōólaā to ta kumií tə́ i tītə̄ ń nuū. Ādə̄ jə-naa kə̄ lo kun gōí tə́, tɔdɔ̄ ngé gə̄ ń ənīn̄ kemdə́ adīn̄ mák mák ní, a əngen̄ rɔ̄sɔl̄ alé! 18 Ba ngɔlaā ní, j-un gōí i kə ngarā̰ kemjí gēé malang, jə-ɓōĺ ndílí ō, jə-sāā ka̰a̰ ta kumií ō. 19 Ī-lōō kəla rɔ̄sɔl̄ dɔjí tə́, banī ī-rāā sejí kə gō kem majə yāí ō, kə gō kem ndaa yāí kə́ al̄naā ō! 20 Ī-gān̄g dɔjí kə ta kūl̄ kəla rāāí kə́ majə ngá̰ý gə̄ ō. Kɔ́ɔ̄ɓē, ī-rāā ādə̄ rīí ənge kɔsə go̰n! 21 Ādə̄ ngé gə̄ malang ń ɔjən̄ rāā yá̰á̰ kə́ majə aĺ kə ngé kəla yāí gēé ní, ndə̄ngān̄ rɔ̄də́ ō, rɔ̄də́ sɔl̄də́ ō! Ādə̄ əlan̄ rɔ̄sɔl̄ dɔdə́ tə́ ō, ɔgə̄n̄də́ kṵ ɓē ō. Ādə̄ tétə̄n̄ kə̄ngādə́ rárák kɔ̄ɔ́! 22 Ādə̄ nin̄ gerə̄n̄ kadə̄ i ḭ̄ kal kógə̄ḿ beē ngóy n i Kɔ́ɔ̄ɓē Nə́ɓā kə́ kɔsə go̰n yāí taā lo malang dɔ nang tə́ ní!
Pā yā madə̄ Daniyel kə́ mətá gə̄
23 Ngé kəla yā mban̄g gə̄ ń ɓōkə́n̄ madə̄ Daniyel kə́ mətá gə̄ kum hor tə́ ní, asədə́ kɔsə gír hor alé: ɓōkə́n̄ gudərō̰o̰ ō, nuū kāgə̄ ō, kəlā ndúndá kə́ ndo̰ō̰ huyuyu ō, kīr̄ gə̄ ō, kum tə́. 24 Ta ndo̰ hor ní ḭḭ dɔ púŕ tə́ asə ngāl̄ métər kutə jōó gidə i sɔ́ kum kə̄ dɔɔ́. 25 Ta ndo̰ hor ní aw̄ kə̄ lo gə̄ tə́, adə̄ ṵṵ Babilon gə̄ ń ran̄ gidə púŕ tə́ ní. 26 Banī de kə́ dɔ rā̰ tə́ yā Kɔ́ɔ̄ɓē risə kum hor kə́ ngá̰ý ní tə́ kə Ajariya, naā tə́ kə madə̄ tan gə̄, ba rāā adə̄ ta ndo̰ hor ní gətóo kɔ̄ɔ́ kem púŕ ní tə́. 27 Hor kə́ ṵṵ biləm biləm ní tél sɔl̄ kṵy tītə̄ kūl̄ kə́ ṵṵ kə nélé beé: hor ɔdə rɔ̄də́ aĺ bátə́ ō, rāā yá̰á̰ kógə̄ḿ sedə́ aĺ ō. 28 Lo ń nuū tə́ nin̄ mətá mbak ní, ndūdə́ i kógə̄ḿ beē lo kənī pā tə́ ɔsənə̄ń go̰n Nə́ɓā ō, ɓōkə́nəń Nə́ɓā tɔ̄ȳ ō, kum hor tə́ ədan̄ na:
29 Kɔ́ɔ̄ɓē Nə́ɓā yā kaají gə̄, ādə̄ de gə̄ rāāīn̄ kə́ra ō,
ɓōkíīn̄ tɔ̄ȳ ō, ədaīn̄ na ḭ̄ i kə́ bo ngándáńg ō!
Kɔ́ɔ̄ɓē kə́ rīí i kə́ táĺ ō, to kɔsə go̰n ō, kə́ra yāí!
Ādə̄ de gə̄ ɓōkíīn̄ tɔ̄ȳ ō, ədaīn̄ na ḭ̄ i kə́ bo ngándáńg ō!
30 Ādə̄ de gə̄ rāāīn̄ kə́ra kem kújə kɔsə go̰n yāí kə́ táĺ tə́ ō,
ənīn̄ pā ɔsənə̄ń go̰nií ō, kə́ njɔ́ḿ gə̄ tə́!
31 Ḭ̄ ń i nge ndi dɔ de kə́ dɔ rā̰ tə́ kə́ ngé ngɔ̄m̄ lo gə̄ tə́ kəndāń ma̰ȳ bəlo kə́ bo gə̄ ní, ādə̄ de gə̄ rāāīn̄ kə́ra ō,
ɓōkíīn̄ tɔ̄ȳ ō, ədaīn̄ na ḭ̄ i kə́ bo ngándáńg ō!
32 Ḭ̄ ń ī-ndi dɔ kōr̄ kāgə̄ mbang yāí tə́ ní, adə̄ de gə̄ rāāīn̄ kə́ra ō,
ənīn̄ pā ɔsənə̄ń go̰nií ō, ədaīn̄ na ḭ̄ i kə́ bo ngándáńg ō!
33 Ḭ̄ ń ī-ndi ɓōdə̄ rā̰ tə́ dɔɔ́ ní, ādə̄ de gə̄ rāāīn̄ kə́ra ō,
ənīn̄ pā ɔsənə̄ń go̰nií ō, ədaīn̄ na ḭ̄ i kə́ bo ngándáńg ō!
34 Sḭḭ̄ yá̰a̰ gə̄ malang ń Kɔ́ɔ̄ɓē rāāsí ní, ī-rāāī Kɔ́ɔ̄ɓē kə́ra.
Ə̄nīī pā ɔ́siīń go̰nən ō, ə́daī na ni i kə́ bo ngándáńg ō!
35 Dɔ rā̰ kə taá malang, ī-rāāī Kɔ́ɔ̄ɓē kə́ra.
Ə̄nīī pā ɔ́siīń go̰nən ō, ə́daī na ni i kə́ bo ngándáńg ō!
36 De kə́ dɔ rā̰ tə́ gə̄ yā Kɔ́ɔ̄ɓē, ī-rāāī Kɔ́ɔ̄ɓē kə́ra.
Ə̄nīī pā ɔ́siīń go̰nən ō, ə́daī na ni i kə́ bo ngándáńg ō!
37 Man̄ gə̄ malang kə́ dɔɔ́ dɔ rā̰ tə́ gə̄, ī-rāāī Kɔ́ɔ̄ɓē kə́ra.
Ə̄nīī pā ɔ́siīń go̰nən ō, ə́daī na ni i kə́ bo ngándáńg ō!
38 Ngé rɔ̄ɔ̄ gə̄ malang yā Kɔ́ɔ̄ɓē, ī-rāāī Kɔ́ɔ̄ɓē kə́ra.
Ə̄nīī pā ɔ́siīń go̰nən ō, ə́daī na ni i kə́ bo ngándáńg ō!
39 Mbang ō, nāā ō, ī-rāāī Kɔ́ɔ̄ɓē kə́ra.
Ə̄nīī pā ɔ́siīń go̰nən ō, ə́daī na ni i kə́ bo ngándáńg ō!
40 Tíyō̰ kə́ dɔ rā̰ tə́ gə̄, ī-rāāī Kɔ́ɔ̄ɓē kə́ra.
Ə̄nīī pā ɔ́siīń go̰nən ō, ə́daī na ni i kə́ bo ngándáńg ō!
41 Man̄ kə́ edə ō, tal ō, ī-rāāī Kɔ́ɔ̄ɓē kə́ra.
Ə̄nīī pā ɔ́siīń go̰nən ō, ə́daī na ni i kə́ bo ngándáńg ō!
42 Nél gə̄ malang, ī-rāāī Kɔ́ɔ̄ɓē kə́ra.
Ə̄nīī pā ɔ́siīń go̰nən ō, ə́daī na ni i kə́ bo ngándáńg ō!
43 Hor ō, yá̰á̰ kə́ hor ṵṵ ō, ī-rāāī Kɔ́ɔ̄ɓē kə́ra.
Ə̄nīī pā ɔ́siīń go̰nən ō, ə́daī na ni i kə́ bo ngándáńg ō!
44 Kūl̄ ō, lo təngā ō, ī-rāāī Kɔ́ɔ̄ɓē kə́ra.
Ə̄nīī pā ɔ́siīń go̰nən ō, ə́daī na ni i kə́ bo ngándáńg ō!
45 Tal ō, man̄ kə́ tetə edə kə kɔ̄sɔ̄ɔ́ ō, ī-rāāī Kɔ́ɔ̄ɓē kə́ra.
Ə̄nīī pā ɔ́siīń go̰nən ō, ə́daī na ni i kə́ bo ngándáńg ō!
46 Lo kə́ ndɔ̄ɔ́ ō, lo kə́ kadaá ō, ī-rāāī Kɔ́ɔ̄ɓē kə́ra.
Ə̄nīī pā ɔ́siīń go̰nən ō, ə́daī na ni i kə́ bo ngándáńg ō!
47 Lo kə́ unjə̄ kow ō, lo kə́ risə til nding ō, ī-rāāī Kɔ́ɔ̄ɓē kə́ra.
Ə̄nīī pā ɔ́siīń go̰nən ō, ə́daī na ni i kə́ bo ngándáńg ō!
48 Saa dɔ man̄ ō, díḿsir ō, ī-rāāī Kɔ́ɔ̄ɓē kə́ra.
Ə̄nīī pā ɔ́siīń go̰nən ō, ə́daī na ni i kə́ bo ngándáńg ō!
49 Kɔ̄sə̄ ō, néjə ō, ī-rāāī Kɔ́ɔ̄ɓē kə́ra.
Ə̄nīī pā ɔ́siīń go̰nən ō, ə́daī na ni i kə́ bo ngándáńg ō!
50 Tel̄ man̄ gə̄ ō, kil̄ man̄ gə̄ ō, ī-rāāī Kɔ́ɔ̄ɓē kə́ra.
Ə̄nīī pā ɔ́siīń go̰nən ō, ə́daī na ni i kə́ bo ngándáńg ō!
51 Ādə̄ dɔ nang rāā Kɔ́ɔ̄ɓē kə́ra!
Ādə̄ ənī pā ɔsəń go̰nən ō, əda na ni i kə́ bo ngándáńg ō!
52 Mbal̄ bo gə̄ ō, ngán mbal̄ gə̄ ō, ī-rāāī Kɔ́ɔ̄ɓē kə́ra.
Ə̄nīī pā ɔ́siīń go̰nən ō, ə́daī na ni i kə́ bo ngándáńg ō!
53 Yá̰á̰ kə́ kəɓa dɔ nang tə́ gə̄ malang, ī-rāāī Kɔ́ɔ̄ɓē kə́ra.
Ə̄nīī pā ɔ́siīń go̰nən ō, ə́daī na ni i kə́ bo ngándáńg ō!
54 Bā bo gə̄ ō, man̄ bā gə̄ ō, ī-rāāī Kɔ́ɔ̄ɓē kə́ra.
Ə̄nīī pā ɔ́siīń go̰nən ō, ə́daī na ni i kə́ bo ngándáńg ō!
55 Ta kəɓa man̄ gə̄, ī-rāāī Kɔ́ɔ̄ɓē kə́ra.
Ə̄nīī pā ɔ́siīń go̰nən ō, ə́daī na ni i kə́ bo ngándáńg ō!
56 Kānjə̄ kə́ bo gə̄ ō, dā̰ kə́ maná gə̄ ō, ī-rāāī Kɔ́ɔ̄ɓē kə́ra.
Ə̄nīī pā ɔ́siīń go̰nən ō, ə́daī na ni i kə́ bo ngándáńg ō!
57 Yel̄ gə̄ malang kə́ no rā̰ tə́, ī-rāāī Kɔ́ɔ̄ɓē kə́ra.
Ə̄nīī pā ɔ́siīń go̰nən ō, ə́daī na ni i kə́ bo ngándáńg ō!
58 Dā̰ kə́ bembeé gə̄ ō, ngán kur̄ gə̄ ō, ī-rāāī Kɔ́ɔ̄ɓē kə́ra.
Ə̄nīī pā ɔ́siīń go̰nən ō, ə́daī na ni i kə́ bo ngándáńg ō!
59 Ngán de gə̄, ī-rāāī Kɔ́ɔ̄ɓē kə́ra.
Ə̄nīī pā ɔ́siīń go̰nən ō, ə́daī na ni i kə́ bo ngándáńg ō!
60 Israel gə̄, ī-rāāī Kɔ́ɔ̄ɓē kə́ra.
Ə̄nīī pā ɔ́siīń go̰nən ō, ə́daī na ni i kə́ bo ngándáńg ō!
61 Ngé tun̄ yá̰a̰ gə̄, ī-rāāī Kɔ́ɔ̄ɓē kə́ra.
Ə̄nīī pā ɔ́siīń go̰nən ō, ə́daī na ni i kə́ bo ngándáńg ō!
62 Ngé kəla gə̄ yā Kɔ́ɔ̄ɓē, ī-rāāī Kɔ́ɔ̄ɓē kə́ra.
Ə̄nīī pā ɔ́siīń go̰nən ō, ə́daī na ni i kə́ bo ngándáńg ō!
63 Ndíl de kə́ gōtə́ gə̄ ō, dā̰ rɔ̄ de kə́ gōtə́ gə̄ ō, ī-rāāī Kɔ́ɔ̄ɓē kə́ra.
Ə̄nīī pā ɔ́siīń go̰nən ō, ə́daī na ni i kə́ bo ngándáńg ō!
64 De kə́ táĺ gə̄ ō, de kə́ kɔjə rɔ̄ gətóo kemdə́ tə́ gə̄ ō, ī-rāāī Kɔ́ɔ̄ɓē kə́ra.
Ə̄nīī pā ɔ́siīń go̰nən ō, ə́daī na ni i kə́ bo ngándáńg ō!
65 Hananiya ō, Ajariya ō, Misayel ō, ī-rāāī Kɔ́ɔ̄ɓē kə́ra.
Ə̄nīī pā ɔ́siīń go̰nən ō, ə́daī na ni i kə́ bo ngándáńg ō!
Tɔdɔ̄ ni teē sejí kɔ̄ɔ́ lo kə́ ɓádá tə́,
ni taājí jī yo tə́ ō,
teē sejí kɔ̄ɔ́ kum hor ngo̰ kə́ təngā ngá̰ý kə́ ṵṵ biləm biləm tə́,
unjí kɔ̄ɔ́ kum hor tə́.
66 Ī-tɔ̄yī Kɔ́ɔ̄ɓē, tɔdɔ̄ ni i de kə́ majə.
Tām̄ ta ngóy kem ndaa yān gətóo.
67 Ngé rɔȳ Kɔ́ɔ̄ɓē gə̄ malang, ī-rāāī Nə́ɓā kə́ dɔ nə́ɓā gə̄ tə́ kə́ra.
Ə̄nīī pā ɔ́siīń go̰nən ō, ī-ɓōkíin̄ tɔ̄ȳ ō,
tɔdɔ̄ kem ndaa yān i kə́ ta ngóyn gətóo!
Currently Selected:
PĀ YĀ BALSÁÁ KƏ́ MƏTÁ GƏ̄ 3: SARDC
Highlight
Copy
Compare
Share
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.