ƁESƏ̄ BEL 14
14
Daniyel ō, ngé tun̄ yá̰a̰ gə̄ yā Bel ō
1Mban̄g Astiyage oy aw̄ gō kaan gə̄ tə́, anī Sirus ń i de kə́ Persə ní ṵṵ ɓē gotən tə́. 2Daniyel i madə̄ njə̄rā mban̄g ō, rīn ɓār̄ tɔȳ yā madə̄ ta mban̄g gə̄ malang ō.
3Tá Babilon gə̄ aw̄n̄ kə ɓesə̄ kógə̄ḿ kə́ rīn na i Bel. Kə dɔ ndɔ̄ lo gə̄ ń a tīī nuú ní, a adə̄nən̄ i ndujə̄ kə́ kɔȳn asə kəlōo ɓú mí ngɔr ō, batə̄ kutə sɔ́ ō, kasə nduú kə́ asə lítər ɓú jōó kə kutə mí ń nuū ō. 4Mban̄g a ndɔ̄ȳn ō, kə dɔ ndɔ̄ gə̄ reē a rɔȳn ō. Daniyel tā anī ni a rɔȳ i Nə́ɓā yān. Mban̄g ədan na: Ī-rɔȳ Bel aĺ i tām̄ rí tə́? 5Anī ni əda na: I tɔdɔ̄ mā m̄-ndɔ̄ȳ ɓesə̄ kə́ deē rāā kə jīneé alé, banī i Nə́ɓā kə́ ndi kə kumneé ń rāā dɔ rā̰ ō, dɔ nang ō, aw̄ kə tɔ́gə dɔ de gə̄ tə́ malang ō ní tá ngóy. 6Mban̄g ədan na: Ní ī-gír̄ kadə̄ Bel i nə́ɓā kə́ ndi kə kumneé aĺ a? Yá̰a̰ malang ń ni a əsa ō, a a̰ȳ ō, kə dɔ ndɔ̄ gə̄ ní ḭ̄ á̰a̰ā̰ aĺ a? 7Daniyel əgō ba əda na: Mban̄g, ādə̄ nge ń nuū síndī alé! Kemən i nánjə ō, gidən kə́ ndágá i nə̄ngá kasə ō, ni əsa yá̰a̰ aĺ ō, a̰ȳ yá̰a̰ aĺ ō.
8Wūn̄g rāā mban̄g, adə̄ ɓāŕ ngé tun̄ yá̰a̰ yān gə̄ ba ədadə́ na: Ré ə́damī dɔ deē ń əsa sádə̄ gə̄ ń toō ní aĺ anī ā óyiī. 9Ba ré ɔ́jəmī kadə̄ i Bel n i nge kəsadə́ anī, Daniyel a oy. Tɔdɔ̄ ni ngonjə̄ i dɔ Bel tə́. Anī Daniyel əda mban̄g na: Ādə̄ rāān̄ yá̰á̰ ń taí əda ní! 10Ngé tun̄ yá̰a̰ gə̄ yā Bel i deē kutə sīrí, tá nə̄yá̰də́ gə̄ ō, ngáńdə́ gə̄ ō, i sedə́ ɓáý tṵ. Lo ń nuū tə́ mban̄g aw̄ kə Daniyel kem kújə yā Bel tə́. 11Ngé tun̄ yá̰a̰ gə̄ yā Bel ədan̄ na: Ń toō ní jḭḭ j-a jə-teē i mbée. Ba ḭ̄ mban̄g tā a ādə̄ əndān̄ yá̰a̰ kəsa ō, kasə nduú kə́ kur man̄ ta tə́ ō, kem kújə ɓesə̄ tə́. Gō tə́ anī ūtə̄ ta ō, ɔ́sə tambō̰o̰ yāí tū tə́ ō. 12Bírí dəloí ré ī-reē ba á̰a̰ā̰ kadə̄ Bel əsa yá̰á̰ ń nuū malang kɔ̄ɔ́ aĺ anī, j-a j-oy. Aĺ ɓáa i Daniyel ń sor̄ dɔjí tə́ ní n a oy. 13Nin̄ ɔjən̄ kə̄ ndágá kadə̄ nin̄ i ngé kídə̄ lo gə̄. Tɔdɔ̄ nin̄ ndērə̄n̄ bəlo kógə̄ḿ ndágá adə̄ teē gíŕ tábəl tə́ kem kújə ɓesé, yā kudəń jəke kɔyń sádə̄ gə̄ kə́ dɔ tábəl tə́ kə dɔ ndɔ̄ gə̄.
14Dan ń nin̄ teēn̄ kɔ̄ɔ́ ō, mban̄g ndējə̄ Bel yá̰a̰ kəsa oy ō anī, Daniyel əda ngé kəla yā mban̄g gə̄ kadə̄ reēn̄ kə būú ba kə selə́n̄ kem kújə ɓesé malang ta kum mban̄g tə́ kə kérneé. Ngé kəla gə̄ rāān̄ tītə̄ ń Daniyel ədań ní. Dan ń nin̄ teēn̄ anī, utə̄n̄ ta róbə ba ɔsən̄ tambō̰o̰ yā mban̄g tū tə́, banī ɔtə aw̄n̄. 15Ngé tun̄ yá̰a̰ gə̄ reēn̄ ndɔ̄ɔ́ tītə̄ ń i jī bēl̄ lo rāādə́ ní, naā tə́ kə nə̄yá̰də́ gə̄ ō, ngáńdə́ gə̄ ō, ba əsan̄ yá̰a̰ ō, a̰ȳn̄ yá̰a̰ malang kɔ̄ɔ́ ō.
16Mban̄g ḭḭ dɔɔ́ kə gír loí ɓatə aw̄ kújə ɓesé, ba Daniyel i seneé. 17Ni əda na: Daniyel, tambō̰o̰ i kə́ to i kə taá kanjə̄ kadə̄ deē ɔdə rɔ̄ a? Anī Daniyel əda na: Mban̄g, deē ɔdə rɔ̄ alé! 18Ba lo ń teēn̄ ta róbə gə̄ á mban̄g a̰a̰ tábəl anī, əga kɔŕ kə tɔ́gəneé əda na: Bel, ḭ̄ i kə́ bo ō, gól̄ lo gətóo kemií tə́ ō! 19Daniyel əgō ō, ɔgə̄ mban̄g kudə kújú kɔ̄ɔ́ ō, ba əda na: Á̰a̰ lo kə̄ nang tə́, ī-ger̄ kadə̄ i nja náā gə̄ n nuú. 20Mban̄g əda na: M-á̰a̰ i nja de kə́ dəngam gə̄ ō, nja dəyá̰ gə̄ ō, nja ngáń gə̄ ō.
21Wūn̄g rāā mban̄g adə̄ mēr̄ kəhɔ ngé tun̄ yá̰a̰ gə̄, naā tə́ kə nə̄yá̰də́ gə̄ kə ngáńdə́ gə̄. Nin̄ ɔjənən̄ ta bəlo kə́ to lo mundə̄ tə́ ń a udə a ɔynə̄ń yá̰á̰ kə́ dɔ tábəl tə́ ní. 22Mban̄g adə̄ tɔ̄lə̄n̄də́ kɔ̄ɔ́ ō, adə̄ Daniyel ɓesə̄ Bel kadə̄ nujəń kɔ̄ɔ́ jəke lo mundə̄ tə́ ō. Daniyel nujə kújə ɓesə̄ Bel ní kɔ̄ɔ́ ō.
Daniyel ō, lī kə́ bo ō
23Lī kógə̄ḿ kə́ bo i nuú ō, kə́ de kə́ Babilon gə̄ a rɔȳn̄. 24Mban̄g əda Daniyel na: Ḭ̄ ásə kədam̄ na nə́ɓā kə́ ndi kə kumneé na gətóo alé. I beé ní, ī-rɔȳn tā! 25Daniyel əda na: I Kɔ́ɔ̄ɓē Nə́ɓā yāḿ n m-ā m̄-rɔȳn ní. Tɔdɔ̄ i ni kal kógə̄ḿ beē ngóy n ndi kə kumneé ní. 26Ba ḭ̄ mban̄g ādə̄m̄ ta róbə, anī m-ā m̄-tɔ̄l̄ lī kə́ bo ní kanjə̄ kaskar ō, kanjə̄ sálang kāgə̄ ō. Anī mban̄g əda na: M-ādī ta róbə. 27Daniyel un nūū kāgə̄ ō, yibə̄ dā̰ ō, bḭḭ̄ dā̰ ō. Ni adə̄ ɓoon̄də́ naā tə́ malang ba ndīrə̄n̄ ō, əɓādə́ ɓegəre ɓegəre ba tə́nī nga̰ā̰ lī kə́ bo tə́ ō. Lī kə́ bo ní əsa ō, oy ō. Anī Daniyel əda na: á̰a̰ī yá̰á̰ ń ā ī-rɔyī ní!
28Ba dan ń de kə́ Babilon gə̄ oōn̄ najə̄ ń nuū ní, wūn̄g asədə́ nák. Nin̄ ɔsən̄ dɔdə́ naā tə́ ō, mbātə́n̄ najə̄ gō mban̄g tə́ ō, ba ədan̄ na mban̄g na tél Jipə kɔ̄ɔ́: Ni tɔ̄l̄ Bel kɔ̄ɔ́ ō, tɔ̄l̄ lī kə́ bo ō, tɔ̄l̄ ngé tun̄ yá̰a̰ gə̄ malang kɔ̄ɔ́ ō. 29Gō tə́ anī aw̄n̄ rɔ̄ mban̄g tə́, ba ədanən̄ na kə adə̄də́ Daniyel, aĺ ɓáa n-a n-tɔ̄l̄nən̄ naā tə́ kə de kə́ kem kújə yān tə́ gə̄. 30Dan ń mban̄g a̰ā̰ kadə̄ ran̄ seneé ngá̰ý ō, i gáŕ tā ní, adə̄də́ kə Daniyel. 31Nin̄ ənīn̄ Daniyel gō ɓɔl gə̄ tə́ bəloó ō, ni to nuú ndɔ̄ mehḛ́ ō. 32Ɓɔl gə̄ i sīrí kem bəlo ní tə́. Kə dɔ ndɔ̄ gə̄ a adə̄n̄də́ nīń de gə̄ jōó ō, batə̄ gə̄ jōó ō. Banī dan ngeé ń nuū tə́ ní, adə̄n̄də́ yá̰á̰ kógə̄ḿ alé kadə̄ əsan̄ Daniyel.
33Dan ngeé ń nuū tə́ ní, Habakuk nge koō taa i dɔ nang kə́ Jude tə́. Ni adə̄ ndīrə̄n̄ yá̰a̰ ō, adə̄ gángə̄n̄ mápa bét bét naā tə́ kem bay kógə̄ḿ tə́ ō, ba aw̄ń kadə̄ ngé sāā kōō gə̄ tə́ bembeé. 34Nge kəla kə́ dɔ rā̰ tə́ yā Kɔ́ɔ̄ɓē əda Habakuk na: Āw̄ kə yá̰a̰ kəsa ń jīí tə́ nuū Babilon ādə̄ Daniyel kem bəlo yā ɓɔl gə̄ tə́. 35Habakuk əda na: Kɔ́ɔ̄ɓē, m-á̰a̰ ɓē kə́ Babilon ndɔ̄ kógə̄ḿ aĺ ɓáý ō, m̄-ger̄ lo ń bəlo yā ɓɔl gə̄ i tū tə́ ní aĺ ō.
36De kə́ dɔ rā̰ tə́ yā Kɔ́ɔ̄ɓē əhɔn nənga dɔn tə́, ba aw̄ seneé kə ngɔ̄də̄ kə́ tɔȳ nél udən Babilon, dɔ bəlo yā ɓɔl gə̄ tə́. 37Habakuk əga kɔŕ, əda na: Daniyel! Daniyel! Ī-taā yá̰a̰ kəsa ń Nə́ɓā əlań adī ní. 38Anī Daniyel əda na: Nə́ɓā, əga kemií dɔḿ tə́ ō, ḭ̄ ə́yá̰ ngé gə̄ ń táriīn̄ ní kɔ̄ɔ́ aĺ ō! 39Daniyel ḭḭ dɔɔ́ ba əsa yá̰a̰. Nge kəla kə́ dɔ rā̰ tə́ yā Kɔ́ɔ̄ɓē tél kə Habakuk kə̄ ta jī tə́ nuū aw̄ seneé gogə́ ɓēé.
40Kə ndɔ̄ kə́ nge kṵ sīrí anī, mban̄g reē nūū Daniyel tə́. Reē ta bəlo tə́ ba a̰a̰ lo kə̄ bəloó anī, a̰a̰ Daniyel ndi dɔɔ́. 41Mban̄g əga kɔŕ kə tɔ́gəneé əda na: Kɔ́ɔ̄ɓē Nə́ɓā yā Daniyel, ḭ̄ i Nə́ɓā kə́ bo ō, Nə́ɓā kə́ rang kə́ tītīí gətóo ō. 42Ni adə̄ ɔrə̄n̄ Daniyel bəloó kɔ̄ɔ́. Ba ngé gə̄ ń sāān̄ tḭ̄ḭ̄ ta Daniyel ní tāa, adə̄ ɓōkə́n̄də́ bəlo yā ɓɔl gə̄ tə́. Anī, ɓɔl gə̄ əsan̄də́ kə̄ ta jī tə́ nuū ta kumən tə́.
Currently Selected:
ƁESƏ̄ BEL 14: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.