JEJU KƏ́ NGŌN̄ SIRAK 5
5
Kəndā tɔ́gə dɔ ndi majə kə́ gōtə́ aĺ tə́
1Ī-lōō kəndā tɔ́gí dɔ yá̰a̰ kənge yāí gə̄ tə́ ō,
kəda na deē i yá̰á̰ aĺ tām̄ yāí tə́ ō!
2Kḭḭ rétə́ rāā yá̰a̰ ō tɔ́gí ō ní, ī-lōō kəya̰də́ kadə̄ ndɔ́rīn̄ gōdə́ tə́ aw̄n̄ seí
kadə̄ āw̄ ī-rāā yá̰á̰ kə́ majə aĺ kə́ to kemií tə́.
3Ī-lōō kəda na: I náā n asə kṵ ɓē dɔḿ mā tə́ ní?
Tām̄ Kɔ́ɔ̄ɓē a əndaī tām̄ majaĺ yāí tə́ gáŕ.
4Ī-lōō kəda na: M̄-rāā majaĺ banī yá̰á̰ kógə̄ḿ rāām̄ alé!
Tām̄ tə́gā ta yā Kɔ́ɔ̄ɓē i yá̰á̰ kə́ dan ngāl̄ ngá̰ý.
5Ī-lōō kəndā kemií dɔ māȳ kə́ a māȳn̄ rɔ̄də́ dɔí tə́ tə́
ba rāań majaĺ kə̄ dɔ naā tə́.
6Ī-lōō kəda na: Kem majə yān i ngá̰ý,
adə̄ a māȳ rɔ̄n dɔ majaĺ yāḿ gə̄ kə́ dūbú ngá̰ý tə́.
Tām̄ ka̰a̰ kum tō ndoō ō, wūn̄g ō, i yá̰a̰ yān gə̄ jōó mbak.
Wūn̄g yān kə́ ngá̰ý a əsō dɔ ngé rāā majaĺ gə̄ tə́.
7Ī-téĺ láẃ ī-reē rɔ̄ Kɔ́ɔ̄ɓē tə́ kanjə̄ kɔjə kum mbang kə́ yā tél reēń.
Ī-lōō ndɔ́tə̄ kə ndɔ̄ télí kə̄ rɔ̄ Kɔ́ɔ̄ɓē tə́ kə̄ gogə́ gogə́,
tām̄ wūn̄g yā Kɔ́ɔ̄ɓē a ḭḭ seneé i gidə kógə̄ḿ ō,
ndɔ̄ kənda ndéý kə́ tām̄ yā majaĺ tə́ anī, a nujən̄ seí kɔ̄ɔ́ ō.
8Yá̰a̰ kənge kə́ lo kəngen i kə ta róbə́ kə́ gōtə́ aĺ ní, ī-lōō kəndā tɔ́gí dɔ tə́,
tām̄ ndɔ̄ kə́ majə aĺ tə́ anī, a rāā yá̰á̰ kógə̄ḿ tām̄ yāí tə́ alé.
Kɔr̄ najə̄ kə́ lo kɔ́ɔ̄ yá̰á̰ tə́
9Ī-lōō tóo kōō yāí kə néĺ malang ń a əla ní ō,
kun ngōn̄ róbə kə̄ nuú ō.
I nge kɔr̄ najə̄ míndə jōó n i nge rāā yá̰á̰ kə́ tītə̄ ń nuū ní.
10Yá̰á̰ ń ī-gír̄ ní ī-ra dɔ tə́ ngan̄g ō,
ādə̄ najə̄ kɔrí i kógə̄ḿ beē ō.
11Ōō najə̄ láẃ,
banī i lo tūr̄ najə̄ láẃ kəda deē.
12Ré āw̄ kə gír̄ kógə̄ḿ anī ə́da madí,
ba ré āwń aĺ anī ə̄ndā jīí taí tə́.
13Kɔsə go̰n ō rɔ̄sɔl̄ ō i tū najə̄ kə́ kɔr̄ kə naá tə́ ō,
ta ndo̰ deē asə nujə seneé sák sák kɔ̄ɔ́ ō.
14Ī-lōō kadə̄ najə̄ kə́ majə aĺ kə́ kəda dɔ deē tə́ tél i rī ɓār̄ yāí ō,
ī-lōō kəyā gūmbə̄ kə ta ndo̰í ō.
Tɔdɔ̄ ré rɔ̄sɔl̄ i dɔ nge ɓogə tə́ anī,
a gāngə̄n̄ sarya kə́ ngan̄g dɔ nge lur lo tə́.
15Yá̰a̰ rāā kə́ gōtə́ aĺ kə́ sḛ́ý beē gə̄ ō, kə́ bo gə̄ ō ní, ī-lōō rāā.
Currently Selected:
JEJU KƏ́ NGŌN̄ SIRAK 5: SARDC
Highlight
Copy
Compare
Share
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.