JEJU KƏ́ NGŌN̄ SIRAK 4
4
1Ngōnə̄ḿ, ī-lōō kɔgə̄ nge ndoō yá̰á̰ ń kadə̄ əsa tá ndiń kə kumneé ní.
Ī-lōō rāā kadə̄ nge ndoō ngóōī.
2Deē ń ɓōō rāan ní, ī-lōō rāan kadə̄ a̰a̰ tápə̄.
Ī-lōō rāā nge nal̄ yá̰a̰ kadə̄ wūn̄g rāan.
3Deē ń ənge wūn̄g ní, ī-lōō rāan kadə̄ wūn̄g rāan kə̄ dɔ madə̄ tə́.
Deē ń ndoō yá̰a̰ rāan ní, ī-lōō rāan kadə̄ ndi ngóō ta kadə̄ karī yāí gə̄.
4Deē ń yá̰a̰ tɔȳ dɔn á rāāī ɓɔ́ ní, ī-lōō kɔgə̄n yá̰á̰ ń dəjeī ní.
Ī-lōō tūr̄ gidií kɔ̄ɔ́ ta nge ndoō tə́.
5Ī-lōō kun kumií kɔ̄ɔ́ ta nge ndoō tə́.
Ī-lōō rāā yá̰á̰ kə́ yā kadə̄ ni əngeń ta róbə ndɔ̄líī.
6Tɔdɔ̄ ré ni ndɔ̄líī kə wurkatá anī,
nge kəndān a oō ndɔ̄ȳ yān.
7Ī-rāā ādə̄ ngé kán̄ naā gə̄ a̰a̰īn̄ kə kumdə́ kə́ majaá.
Ə́la dɔí nang tə́ no de kə́ bo tə́.
8Ī-nēl̄ mbīí ōoń najə̄ yā nge ndoō.
Ī-dalən najə̄ kə míndí kə́ sɔl̄ lɔmoó.
9Deē ń rāān̄ kumən ndoō tə́ ní, ī-taān jī nge rāā kumən ndoō tə́ ə́ya̰n dɔɔ́.
Dan ń ā ī-gān̄g sarya anī, ī-lōō ɓōĺ.
10Ī-rāā rɔ̄í bɔbə̄ ngán hal gə̄ tə́ ō,
á̰a̰ gō kṵ́ṵ́də́ kə yá̰á̰ kə́ jīí tə́ ō.
Lo ń nuū tə́ ā ī-to tītə̄ ngōn̄ Nge Ndi dɔ rā̰ tə́ beé ō,
ni a táriī tɔȳ kṵ́ṵ́í ō.
Kum kedə̄ ō, lo ndóō deē yá̰a̰ yān ō
11Kum kedə̄ ɔsə ngánən gə̄ kə̄ dɔɔ́ ō, a̰a̰ gō ngé ndəlen gə̄ ō.
12Tár kum kedə̄ i tár ndi kə kumuú.
Ngé gə̄ ń a ḭḭn̄ dɔɔ́ kə gír loí ɓatə tām̄ yān tə́ ní, rɔ̄nel̄ a rosə kemdə́.
13Deē ń aw̄ kə kum kedə̄ ní, a ənge kɔsə go̰n yá̰a̰ ndəbā tə́.
Kɔ́ɔ̄ɓē tɔ́r̄ tan dɔn tə́ lo ń ni a aw̄ kə̄ tū tə́ ní tə́.
14Nge rāā kəla kadə̄ kum kedə̄ rāā kəla adə̄ i Nə́ɓā kə́ táĺ.
Kɔ́ɔ̄ɓē táŕ ngé tár kum kedə̄ gə̄.
15Nge koō najə̄ yā kum kedə̄ a gān̄g sarya kə gōó ō,
nge kəhɔ gōn a asə ndi kanjə̄ sōl̄ yá̰á̰ kógə̄ḿ ō.
16Ré ni ənī kemən adə̄ kum kedə̄ anī, a ənge kum kedə̄ yá̰a̰ ndəbā tə́.
Ngōnən ō, ngōn̄ kaan ō, a ngɔ̄mə̄n̄ kum kedə̄ tām̄ yādə́ tə́ yā ger̄ nelə̄n.
17Kum kedə̄ a əla gír kɔrən ta róbə i dɔ róbə́ kə́ rúgə̄ rɔ̄n gə̄ tə́.
A reē kə sōlōó dɔn tə́ ō, kə ndíl kayā̰á̰ dɔn tə́ ō.
A rāā kumən ndoō tə́ kə yá̰á̰ ndóō yāneé,
bátə́ kadə̄ nge kəhɔ gōn ní adə̄n kemən.
Ni a nāan kə jī bēl̄ lo rāā yá̰a̰ yān gēé.
18Gō tə́ anī ni a tél yā reē súūmú kum kə̄ rɔ̄n tə́ yā rāan kadə̄ rɔ̄n nelə̄n ō,
yā kɔjən yá̰a̰ yān gə̄ kə́ ton̄ lo mundə̄ tə́ ō.
19Ba ré deē ní ndúm̄ aw̄ sa̰y anī a əya̰n kɔ̄ɔ́ ō,
a əya̰n kadə̄ a tḭ̄ḭ̄ ta rɔ̄n ō.
Rɔ̄sɔl̄ kə́ rɔ̄kum ō, kə́ rɔ̄kum aĺ ō
20Ī-ngóō kum mbang kə́ majə tá ī-rāań yá̰a̰ ō, ī-ngɔ̄m̄ rɔ̄í na sōgə́ yá̰á̰ kə́ majə aĺ tákī ō.
Ī-lōō kadə̄ rɔ̄í sɔlī kə rɔ̄í ḭ̄kɔ́.
21Tɔdɔ̄ rɔ̄sɔl̄ kógə̄ḿ kə́ a rāā deē kadə̄ rāā majaĺ i nuú ō,
rɔ̄sɔl̄ kə́ a rāā kadə̄ deē ənge kɔsə go̰n ō rajə ō i nuú ō.
22Ī-lōō ka̰a̰ rɔ̄í ḭ̄kɔ́ kə kumií kə́ majə aĺ.
Ī-lōō kadə̄ rɔ̄sɔl̄ ɔr̄ tɔ́gí kɔ̄ɔ́.
23Ī-lōō mbātə́ kɔr̄ najə̄ dan ń majə kadə̄ ɔ̄r̄ najə̄ ní.
24Tām̄ kum kedə̄ yāí a teē tū najə̄ kɔrí tə́ ō,
yá̰a̰ ger̄ yāí a teē tū yá̰á̰ ń ə́dá tə́ ní ō.
25Ī-lōō nējə̄ najə̄ kə́ rɔ̄kum,
ba ādə̄ rɔ̄í sɔlī tām̄ ger̄ yá̰a̰ aĺ yāí tə́.
26Ī-lōō kɔjəń na ásə kɔgə̄ bā nūgə́.
Ní, majaĺ ń ī-rāā ní ī-lōō kadə̄ rɔ̄í sɔlī lo kəda tə́.
27Ī-lōō laa nang tə́ no de kə́ sapə tə́ ō,
ī-lōō kadə̄ de kə́ nge tɔ́gə əla ɓōĺ kemií tə́ ō.
28Ī-rɔ̄ɔ̄ tām̄ yā najə̄ kə́ rɔ̄kum tə́ bátə́ kadə̄ óyń,
anī Kɔ́ɔ̄ɓē Nə́ɓā a rɔ̄ɔ̄ tām̄ yāí tə́.
29Ī-lōō kadə̄ ḭ̄ i de kə́ ɓōĺ kɔr̄ najə̄ alé,
ba ngōron̄g lo rāā yá̰á̰ tə́ ō, rāā yá̰a̰ kə njaneé jingling ō.
30Ī-lōō kadə̄ ḭ̄ i ɓɔl kem kújə yāí tə́,
ba dan ngé kəla yāí gə̄ tə́ anī ḭ̄ i nge ɓōĺ.
31Ī-lōō kadə̄ ré i yā taā yá̰a̰ anī, ə̄ndā jīí ta naā tə́ jōó ī-taāń,
ba ré i yā téləń gogə́ anī, ī-kótə̄ jīí dɔ tə́.
Currently Selected:
JEJU KƏ́ NGŌN̄ SIRAK 4: SARDC
Highlight
Copy
Compare
Share
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.