JEJU KƏ́ NGŌN̄ SIRAK 6
6
1Ī-lōō tél madə̄ ba̰ā̰ madə̄ taí,
tām̄ rī ɓār̄ kə́ majə aĺ a reē i kə rɔ̄sɔlɔ́ ō, i kə kibə deē kə́ yā kəlań rɔ̄sɔl̄ dɔn tə́ ō.
Yá̰á̰ ń a rāā nge rāā majaĺ kə́ nge míndə jōó ní n nuú.
2Ī-lōō kadə̄ ngur yá̰á̰ kə́ majə aĺ ndɔ́rī gōn tə́,
na sōgə́ ɔr̄ tɔ́gí kɔ̄ɔ́ gidə kógə̄ḿ tītə̄ lo tɔ́r̄ dā̰ mang beé.
3Lo ń nuū tə́ a ī-to tītə̄ kāgə̄ kə́ mbīn gətóo ō, kanə̄n gətóo ō,
ba i kāgə̄n kə́ tutə tá njəngay ngóy.
4Ɓōō yá̰á̰ kə́ majə aĺ a nujə deē ń aw̄ń ní sák sák kɔ̄ɔ́,
a rāan kadə̄ a tél i kur̄ kəgō yā madə̄ ba̰ā̰n gə̄.
Madí kə́ rɔ̄kum ō, kə́ rɔ̄kum aĺ ō
5Najə̄ kə́ taí tə́ kə́ majə a rāā kadə̄ madə̄ taí gə̄ i ngá̰ý.
Taa kə́ nel̄ a ojə i najə̄ kə́ nel̄ gə̄.
6Ādə̄ ngé rāāí lápə́ya gə̄ i ngá̰ý,
banī ī-taā kɔjə̄ yā de kə́ kógə̄ḿ beē dan ngé kadī kɔjə̄ kə́ dūbú gə̄ tə́!
7Ī-nāā deē pá tá ī-rāan madə̄ taí tə́ ɓáý,
ī-lōō taā kemən láẃ ngá̰ý.
8De kógə̄ḿ i nuú kə́ ni i madə̄ taí dan ń kum mbang i yān ní,
ba ré ndɔ̄ kə́ majaĺ tə́ anī, ni i madə̄ taí tṵ alé.
9Madə̄ taí kə́ a tél a tūr̄ rɔ̄n madə̄ ba̰ā̰í tə́ i nuú,
ni a ənī gotə kɔ̄l̄ naā yāsí yā kəlań rɔ̄sɔl̄ dɔí tə́.
10Madə̄ taí kə́ a əsa yá̰a̰ seí i nuú,
ba ré yá̰á̰ kə́ tōr̄ teē dɔí tə́ anī, ni a ndi alé.
11Dan ń ī-ndi majə anī, ni i tītə̄ ngarā̰ kumií ḭ̄kɔ́ beē,
adə̄ a ṵṵ ɓē dɔ ngé kəla yāí gə̄ tə́ kanjə̄ sōl̄ yá̰á̰ kógə̄ḿ.
12Ba ré yá̰á̰ kə́ to rɔ̄sɔl̄ teē dɔí tə́ anī, a mbātə́ najə̄ gōí tə́ ō,
a ɓɔ̄ɔ̄ rɔ̄n kɔ̄ɔ́ ō. 13Ə́ya̰ madə̄ ba̰ā̰í gə̄ ba āw̄ sa̰y ō,
ī-ngɔ̄m̄ rɔ̄í najə̄ yā madī kə́ rɔ̄kum aĺ gə̄ tə́ ō.
14Madə̄ ta deē kə́ nge ra dɔ ndūn tə́, i tītə̄ loo kə́ deē əla dɔn tū tə́ anī sōl̄ yá̰á̰ kógə̄ḿ aĺ beé.
Deē ń ənge madə̄ tan kə́ beé ní, ənge i yá̰á̰ kə́ gātən i ngá̰ý.
15Madə̄ ta deē kə́ nge ra dɔ ndūn tə́, i yá̰á̰ kə́ deē a mang alé,
tām̄ gātən tɔȳ yá̰a̰ malang ń deē asə gír̄ ní.
16Madə̄ ta deē kə́ nge ra dɔ ndūn tə́, i dáwá kə́ nge rāā kadə̄ deē ndi kə kumneé.
Ngé ɓōĺ ndíĺ Kɔ́ɔ̄ɓē gə̄ a əngen̄ madə̄ tadə́ kə́ beé gə̄.
17Nge ɓōĺ ndíĺ Kɔ́ɔ̄ɓē ger̄ gə̄rā madə̄ tan majə ngá̰ý,
tām̄ madə̄ njə̄rān to i tītə̄n nəkɔ́ beē.
Ndóō kum kedə̄
18Ngōnə̄ḿ, dan ń ḭ̄ i balsáá ɓáý ní, ādə̄ nelī ndóō yá̰a̰.
Dan ń dɔí a ndaa anī, ā ə́nge kum kedə̄.
19Ī-ndɔ́tə̄ ngɔr kə̄ rɔ̄ kum kedə̄ tə́ tītə̄ yā nge ndɔr̄ ō, nge dubə̄ kōō ō,
ba ī-ngóō kanə̄n kə́ majə gə̄.
Tɔdɔ̄ i gáŕ kadə̄ ā á̰á̰ tápə̄ sḛ́ý lo ndɔrə̄n tə́,
banī sḛ́ý laā anī, ā ə́sa kanə̄n gə̄.
20De gə̄ ń gerə̄n̄ yá̰a̰ aĺ ní, kum kedə̄ i yá̰á̰ kə́ ngan̄g ngá̰ý tām̄ yādə́ tə́.
Deē ń kur̄ dɔn gətóó ní, a tə́gā tan alé.
21Tām̄ yān tə́ ɓáa kum kedə̄ to i tītə̄ mbal̄ kə́ yā kadə̄ deē un kə̄ dɔɔ́ nāań tɔ́gən beé,
adə̄ a ɔr bā̰ā̰ lo kənīn kɔ̄ɔ́ tə́ alé.
22Tɔdɔ̄ rī kum kedə̄ əhɔ dɔ kum kedə̄ majə ngá̰ý.
Adə̄ i de kə́ kutədə́ i ngá̰ý aĺ gə̄ n i ngé ka̰a̰n gə̄ ní.
23Ngōnə̄ḿ, ōō gír̄ yāḿ ō, ī-ndigə gír̄ yāḿ kə́ dɔ yá̰á̰ tə́ ō.
Ī-lōō mbātə́ kɔjə̄ yāḿ.
24Ə̄nī kángə́lá yā kum kedə̄ njaí tə́ ō,
ə̄nī njúkə yān míndí tə́ ō.
25Úń yá̰a̰ kətō yān ə̄nī bɔ̄gīí tə́ ō,
kəlā yān gə̄ ń dṵṵ̄iń ní, ī-tə́gā taí gírí ō.
26Āw̄ rɔ̄n tə́ kə ngarā̰ kemií gēé malang ō,
ún gō tóon kə tɔ́gí gēé malang ō.
27Ún gō tóon ō, ī-ndəlen ō, anī ni a rāā kadə̄ ā ī-gerə̄n.
Ré ə́hɔn anī, ī-lōō kəya̰n dɔɔ́.
28Na ta tɔ̄l̄ ta anī, ā ə́nge lo kɔr̄ koō rɔ̄n tə́.
Ni a tél i rɔ̄nel̄ tām̄ yāí tə́.
29Lo ń nuū tə́ kángə́lá yān kə́ njaí tə́ a tél i nge ngɔ̄mī kə́ tɔ́gən i ngá̰ý ō,
njúkə yān kə́ míndí tə́ a tél i məde kə́ gātə̄n i ngá̰ý ō.
30Njúkə yān i yá̰á̰ súū rɔ̄ kə́ rāā kə lɔ́rɔ́ ō,
kəlā dṵṵ̄ yá̰a̰ yān a tél i ta kūbə̄ súū rɔ̄ kə́ kərē kə́ majə ngá̰ý ō.
31Ā ī-tə́ládə́ rɔ̄í tə́ tītə̄ kūbə̄ kə́ to kɔsə go̰n beé ō,
ā ṵ̄ṵ̄də́ tītə̄ jākā mbang kə́ to rɔ̄nel̄ beé ō.
32Ngōnə̄ḿ, ré ī-ndigə anī, ā ī-ger̄ yá̰a̰ ō,
ré ə́hɔ rɔ̄í tɔgə anī, ā ī-tél de kə́ ger̄ kəla ō.
33Ré nelī koō najə̄ anī, ā ī-ndóō yá̰a̰.
Ré ī-nēl̄ mbīí anī, ā ī-tél de kə́ nge kum kedə̄.
34Ī-ndi lo kɔsə dɔ naā tə́ yā de kə́ tɔgə ɓə́ga gə̄ tə́,
ə́hɔ gō kum kedə̄ ń ɔjən̄ ní.
35Najə̄ malang ń Nə́ɓā əndā ta deē tə́ ní, ādə̄ nelī koō.
Ī-lōō kəya̰ kāgə̄ najə̄ kógə̄ḿ kə́ kum kedə̄ i tū tə́ kadə̄ mān̄ karī kanjə̄ ger̄ kum.
36Ré á̰a̰ de kógə̄ḿ kə́ kur̄ dɔn to nuú anī, āw̄ rɔ̄n tə́ dəloí ɓatə.
Ādə̄ njaí edə̄ rék rék ta kújə yān tə́.
37Yá̰a̰ gə̄ ń Kɔ́ɔ̄ɓē əda kadə̄ yā rāā ní, ī-gír̄ yá̰a̰ dɔ tə́.
Ə̄ndā rɔ̄í ta yá̰á̰ gə̄ ń ni əda kadə̄ yā rāā tə́ ní kanjə̄ kəya̰ ta.
Nəkɔ́ a mbūsī kadə̄ ī-ra ngan̄g ō,
a adī kum kedə̄ ń ā ī-sāā ní ō.
Currently Selected:
JEJU KƏ́ NGŌN̄ SIRAK 6: SARDC
Highlight
Copy
Compare
Share
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.