JEJU KƏ́ NGŌN̄ SIRAK 3
3
Ngé kojə ngán gə̄ ō, ngáńdə́ gə̄ ō
1Ngán gə̄, ōōī kɔjə̄ yā bɔbə̄sí.
Úniī gō kadə̄ ī-ndiīń kanjə̄ kadə̄ yá̰á̰ kógə̄ḿ rāāsí.
2Tɔdɔ̄, Kɔ́ɔ̄ɓē a ɔsə go̰n bɔbə̄ ngán gə̄ sɔɔ̄ń i ngán gə̄.
Ni mbūsə̄ gíŕ yá̰á̰ kə́ súūmú yā kṵ́ṵ́ ngán gə̄ adə̄ ra ngan̄g dɔ ngánən kə́ dəngam gə̄ tə́.
3Nge ń rɔȳ bɔbə̄n ní, un i majaĺ yān nəkɔ́ gə̄ kɔ̄ɔ́ dɔn tə́.
4Nge ń ɔsə go̰n kṵ́ṵn ní, ɔsə i dɔ yá̰a̰ kənge kə́ gātən i ngá̰ý kə̄ dɔ naā tə́.
5Nge ń rɔȳ bɔbə̄n ní, ngán kemən nəkɔ́ gə̄ a adə̄nən̄ rɔ̄nel̄.
Ndɔ̄ ndɔ̄ȳ yān tə́ anī, Kɔ́ɔ̄ɓē a oō ndɔ̄ȳ yān.
6Nge ń ɔsə go̰n bɔbə̄n ní, a ndi dan i ngá̰ý.
Nge ń oō ta Kɔ́ɔ̄ɓē ní, a nel̄ kṵ́ṵn seneé.
7Ni rāā kəla adə̄ ngé kojən gə̄ tītə̄ yā kɔ́ɔ̄n gə̄ beé.
8Ī-rɔȳ bɔbí kə yá̰a̰ rāāí ō, kə najə̄ kɔrí ō,
yā kadə̄ tɔ́rəń tan dɔí tə́.
9Tɔdɔ̄ tɔ́r̄ ta yā bɔbə̄ ngán gə̄ rāā adə̄ kújə yādə́ ra ngan̄g,
banī ndɔ̄ĺ yā kṵ́ṵ́də́ tetə ngəra kújə́ ní kɔ̄ɔ́.
10Ī-lōō kɔsə go̰n rɔ̄í najə̄ rɔ̄sɔl̄ kə́ əlan̄ dɔ bɔbí tə́ tə́.
Rɔ̄sɔl̄ ń əlan̄ dɔn tə́ ní, i kɔsə go̰n kə́ tām̄ yāí tə́ alé.
11Tām̄ kɔsə go̰n yā deē to i kə ta kūl̄ rɔȳ kə́ rɔȳn̄ bɔbə̄n ō,
rɔȳ ń rɔȳn̄ kṵ́ṵ́ ngán gə̄ aĺ ní i rɔ̄sɔl̄ kə́ ngá̰ý tām̄ yā ngánən gə̄ tə́ ō.
12Ngōnə̄ḿ, dan ń bɔbí tɔgə ɓə́ga anī á̰a̰ gōn ō,
dan ni ndi kə kumneé ɓáý ní, ī-lōō rāan kadə̄ wurən ɔlən ō.
13Ká ré dɔn ndi gōtə́ tṵ aĺ gə̄gē anī, ī-mā̰ȳ rɔ̄í dɔn tə́ ō,
ī-lōō tájə̄n tām̄ tɔ́gí kə́ i ngá̰ý ɓáý tə́ ō.
14Tɔdɔ̄ dɔ Nə́ɓā a ndígə̄nal yá̰á̰ kə́ majə gə̄ ń ī-rāā kə bɔbí ní alé.
Yá̰á̰ kə́ majə gə̄ ń ī-rāā seneé ní, a télən̄ i kújə́ kə́ kijə tām̄ yāí tə́ kum gotə majaĺ yāí gə̄.
15Dan ń yá̰á̰ kə́ majə aĺ a teē dɔí tə́ anī, a əga kem Kɔ́ɔ̄ɓē dɔí tə́.
Majaĺ yāí gə̄ a yḛḛ̄n̄ kɔ̄ɔ́ tītə̄ jíbər#3.15 Jíbər: i kum yá̰á̰ kə́ to tītə̄ kɔ̄sə̄ kə́ kídə̄ gə̄, kə́ a ḭḭn̄ i dɔ rā̰ tə́ n a tə́sōn̄. kə́ mbang əsō dɔ tə́ beē.
16Nge kəya̰ bɔbə̄n kɔ̄ɔ́ i nge tájə́ Kɔ́ɔ̄ɓē.
Nge rāā kṵ́ṵn kadə̄ wūn̄g rāan i deē kə́ Kɔ́ɔ̄ɓē ndɔ̄lə́n.
Yá̰á̰ kə́ majə ń deē a ənge tū kɔjə rɔ̄ aĺ tə́ ní
17Ngōnə̄ḿ ə̄nī rɔ̄í sɔl̄ lɔm ī-rāań yá̰a̰ malang,
lo ń nuū tə́ deē ń nel̄ Nə́ɓā seneé ní a táriī.
18Ré ḭ̄ i de kə́ bo ngá̰ý kə́ dɔ lo kəla tə́ anī, ī-tél kə rɔ̄í kə̄ nang tə́ ngá̰ý.
Lo ń nuū tə́ Kɔ́ɔ̄ɓē a rāā kem majə seí.#3.18 Kem makətūbə̄ kə́ ngá̰ý gə̄ tə́ ní, kəlān kə́ nge kṵ kutə gidə i ndōhó gətóo tū tə́.
20Tɔdɔ̄ tɔ́gə́ Kɔ́ɔ̄ɓē i ngá̰ý,
banī i ngé tél kə rɔ̄də́ kə̄ nang tə́ gə̄ n ɔsən̄ go̰nən ní.
21Ī-lōō sāā yá̰á̰ ń i yá̰á̰ kə́ ngan̄g ngá̰ý tām̄ yāí tə́ ní,
ī-lōō kəndā ma̰ȳ yá̰á̰ kə́ tɔȳ tɔ́gí.
22Ī-gír̄ yá̰a̰ dɔ yá̰á̰ kə́ yā rāā gə̄ ń ədaīn̄ tə́ ní ō,
yá̰á̰ kə́ to lo ɓɔ̄ɔ̄ rɔ̄ tə́ gə̄ ní, ādə̄ usiī dɔ tə́ aĺ ō.
23Ī-lōō kəndā rɔ̄í ta kəla gə̄ kə́ tɔyn̄ tɔ́gí tə́.
Yá̰á̰ ń ḭ̄ á̰a̰ā̰ kɔ̄ɔ́ ɓá ní, mān̄ yá̰á̰ ń deē asə gír̄ ní.
24Tɔdɔ̄ de gə̄ ngá̰ý ndúmə̄n̄, sɔɔ̄ń sāā kə́ nin̄ sāān̄ ger̄ kum yá̰a̰ malang.
Tetə kem yādə́ kə́ majə aĺ, rāā adə̄ gír̄ yādə́ gə̄ i gír̄ kə́ gōtə́ aĺ gə̄.#3.24 Kem makətūbə̄ kə́ ngá̰ý gə̄ tə́ ní, kəlān kə́ nge kṵ kutə jōó gidə mí gətóo tū tə́.
Dum̄ naā, aláa ger̄ kum yá̰a̰
26Kem kə́ ngan̄g ngóróró a udə dan yá̰á̰ kə́ majə aĺ tə́.
Deē ń nelə̄n kə yá̰á̰ kə́ to yo ngá̰ý ní, a oy tū tə́.
27Kem kə́ ngan̄g ngóróró ní, yá̰á̰ kə́ tōr̄ gə̄ a tɔyn̄ tɔ́gən.
Nge rāā majaĺ a rāā majaĺ kə́ rang kə́ majaĺ kə̄ dɔ madə̄ gə̄ tə́.
28Yá̰á̰ ń tōr̄ rɔ̄ nge kɔjə rɔ̄ ní, dáwán gətóo.
Tɔdɔ̄ kāgə̄ yá̰a̰ rāā kə́ gōtə́ aĺ əla ngəran kemən tə́.
29De kə́ ger̄ kum najə̄ gír̄ yá̰á̰ ngá̰ý dɔ gōsə̄ najə̄ gə̄ tə́.
Yá̰á̰ ń nge kum kedə̄ gḛy ní, i kadə̄ deē nēl̄ mbīn ngóy.
Rāā kə naá kə́ lo ngákṵ́ṵ naā gə̄ tə́
30Tītə̄ ń man̄ tɔ̄ləń hor kə́ a ṵṵ ní,
yá̰á̰ kə́ kadə̄ ngé ndoō gə̄ kə tárá un majaĺ kɔ̄ɔ́.
31Nge dal najə̄ kə yá̰a̰ rāā kə́ majə gēé gír̄ i dɔ ta kə́ bírí tə́.
Ré ni a rāā yā kəsō anī, a ənge nge kəhɔn kə̄ dɔɔ́ kógə̄ḿ.
Currently Selected:
JEJU KƏ́ NGŌN̄ SIRAK 3: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.