JEJU KƏ́ NGŌN̄ SIRAK 32
32
Madə̄ ɓē deē ō, yá̰á̰ kə́ rāā tām̄ yā Nə́ɓā tə́ ō
1Rāā yá̰á̰ ń ndū najə̄ əda ní ō, ndējə̄ yá̰á̰ kə́ kə gō róbəneé ō, i yá̰a̰ gə̄ kə́ asən̄ naā.
2Kəhɔ gō yá̰a̰ gə̄ ń ndū najə̄ əda kadə̄ yā rāā ní, to i tītə̄ ndējə̄ yá̰a̰ tun̄ gə̄ kə́ tām̄ yā kem kógə̄ḿ tə́ beē.
3Ger̄ majə kə́ Nə́ɓā rāā seí to i tītə̄ ndējə̄ Nə́ɓā ndujə̄ kə́ lándə̄ beé ō,
4kadə̄ nge ndoō kadə̄ karī to i tītə̄ ndējə̄ yá̰a̰ tun̄ kə́ yā ɓōkə́nń Nə́ɓā tɔ̄ȳ beé ō.
5Yá̰á̰ ń nel̄ Kɔ́ɔ̄ɓē ní i kadə̄ deē ra sa̰y rɔ̄ majaĺ tə́ ō,
kəra sa̰y rɔ̄ yá̰a̰ rāā kə́ gōtə́ aĺ tə́, to i tītə̄ yá̰a̰ tun̄ kə́ tām̄ yā māȳ rɔ̄ dɔ majaĺ tə́ beē ō.
6Ɓá tā ba ī-lōō kaw̄ ra ta kum Kɔ́ɔ̄ɓē tə́ jīí karī.
7Tām̄ yá̰á̰ kə́ yā tun̄ gə̄ ń nuū malang ní, i yá̰a̰ gə̄ kə́ ədan̄jí kadə̄ jə-rāāī.
8Yá̰a̰ ndējə̄ yā nge rāā yá̰á̰ kə́ gōtə́ i yibə̄ dā̰ kə́ ndējə̄ dɔ dabə tun̄ yá̰á̰ tə́ ō,
sēen kə́ otə majə aw̄ bátə́ ugə̄ rɔ̄ Nge Ndi dɔ rā̰ tə́ tə́ ō.#35.8 Á̰a̰ī: Ngán Lebi gə̄ 3:14-16.
9Nə́ɓā ndigə yá̰a̰ tun̄ yā de kə́ nge rāā yá̰á̰ kə́ gō tə́ ō,
yá̰a̰ tun̄ yān kə́ yā kadə̄ əgań kem Nə́ɓā dɔn tə́ ní, dɔ Nə́ɓā a ndígə̄nal aĺ ō.
10Ādə̄ kemií ndaa lo ń ā ɔ́sə go̰n Kɔ́ɔ̄ɓē ní ō,
ré ā ī-ndējə̄ kan̄ kəla yāí kə́ ta kəga dɔ anī, ī-lōō kēgə̄ núsən ngɔ̄m̄ tām̄ yāí tə́ ō.
11Kə dɔ kadií yá̰a̰ ndējə̄ gə̄ malang ń nuū ādə̄ dɔ kumií i kə rɔ̄nelé ō,
ɔ̄r̄ dɔ yá̰á̰ kə́ nge kṵ kutə ādə̄ kə rɔ̄nelé ō.
12Ādə̄ Nge Ndi dɔ rā̰ tə́ yá̰a̰ ādə̄ asə kə gō yá̰á̰ ń ni adī karī ní,
kə kem ndaá ō, kə gō tɔ́gí ō.
13Tām̄ Kɔ́ɔ̄ɓē i nge kadə̄ deē yá̰a̰ gíŕ yá̰á̰ kə́ deē adə̄n tə́ ō,
ni a téləń yā kadī gogə́ nja sīrí ō.
Nge gān̄g sarya kə́ gōtə́
14Ī-lōō nāā gól̄ kum Nə́ɓā kə kadə̄ karī yāí, na a mbātə́.
15Ī-lōō kəndā tɔ́gí dɔ yá̰a̰ tun̄ kə́ kənge kə ta róbə́ kə́ gōtə́ aĺ,
tɔdɔ̄ Kɔ́ɔ̄ɓē i nge gān̄g sarya ō,
i nge rāā yá̰a̰ tām̄ ta kum deē aĺ ō.
16Ni i nge rāā yá̰á̰ kə́ gōtə́ aĺ kə nge ndoó alé,
banī deē ń de gə̄ rāānən̄ gōtə́ aĺ ní, ni oō ndɔ̄ȳ yān.
17Ni kídə̄ ngōn̄ hal kə́ nge rāan ɓɔ́ nja kógə̄ḿ aĺ ō,
kídə̄ dəyá̰ kə́ ngaa koy kə́ nge nūū rɔ̄n nja kógə̄ḿ aĺ ō.
18Man̄ kum dəyá̰ kə́ ngaa koy ō,
19kɔŕ yān ō, əndā najə̄ dɔ nge rāan kadə̄ əga kɔŕ tə́ aĺ a?
20Deē ń rāā kəla adə̄ Kɔ́ɔ̄ɓē ní, Kɔ́ɔ̄ɓē ndigən ō,
yá̰á̰ ń dəje ní, a aw̄ bátə́ yā kugə̄ dɔ rā̰ tə́ ō.
21Ndɔ̄ȳ yā nge tél kə rɔ̄neé kə̄ nang tə́ aw̄ bátə́ ugə̄ dɔ rā̰ tə́.
Ré rāā yá̰á̰ ń aw̄ kə rīí ní pá tá a taā koō ɓáý.
Ré Nge Ndi dɔ rā̰ tə́ dal pá tá ni a dəba ɓáý.
22Ré Kɔ́ɔ̄ɓē gān̄g sarya kə́ gōtə́ yā ngé rāā yá̰á̰ kə́ gōtə́ gə̄ pá tá ni a dəba ɓáý.
Kɔ́ɔ̄ɓē a ɔr bā̰ā̰ alé,
a tə́gā tan dɔdə́ tə́ alé,
bátə́ kadə̄ ré tétə̄ kə̄ngā de gə̄ kə́ kumdə́ ṵṵdə́ aĺ pá tá.
23Ni a dal ba̰ā̰ dɔ gíŕ nápar de kə́ rang gə̄ tə́,
bátə́ kadə̄ kósə́ ngé kɔjə rɔ̄də́ gə̄ ń nuū gətóon̄ kɔ̄ɔ́ ō,
kṵ ɓē yā ngé rāā yá̰a̰ gōtə́ aĺ gə̄ i kə́ nujə kɔ̄ɔ́ ō.
24Bátə́ kadə̄ əgā de gə̄ kógə̄ḿ kógə̄ḿ tām̄ kəla rāādə́ gə̄ tə́ ō,
əhɔ gíŕ gír̄ kə́ kem de gə̄ tə́ yā rāań sarya sedə́ tām̄ kəla rāādə́ gə̄ tə́ ō.
25Bátə́ kadə̄ gān̄g sarya kə́ gōtə́ adə̄ gír deē yān gə̄ ō,
rāādə́ adə̄ rɔ̄də́ nel̄də́ kə ta kūl̄ kem majə yān ō.
26Dan kə́ tōr̄ tə́ anī kem majə yān reē ugə̄ i kə kum mbang kə́ majaá,
tītə̄ kil̄ man̄ gə̄ kə́ reēn̄ dan yā man̄ kə́ əhɔ laa tə́ beē.
Currently Selected:
JEJU KƏ́ NGŌN̄ SIRAK 32: SARDC
Highlight
Copy
Compare
Share
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.