JEJU KƏ́ NGŌN̄ SIRAK 31
31
Nīī gə̄
1Kəndā kem dɔ tə́ kə́ kanjə̄ kumən gól̄ de kə́ nge kur̄ dɔ gətóo ō,
nīī i yá̰á̰ kə́ əla go̰ kem de kə́ mbóó tə́ ō.
2Kəhɔ gō nīī
i kəhɔ ndíĺ yá̰a̰ ō, ka̰ȳ ngɔ̄də̄ gō néĺ tə́ ō.
3Yá̰á̰ ń deē á̰a̰ kem nīī tə́ ní, i ndíĺ yá̰á̰ ngóy:
adə̄ deē a̰a̰ i ndílən nəkɔ́.
4Yá̰á̰ kə́ unjə̄ majə njáý njáý a teē tū yá̰á̰ kə́ yḛr tə́ a?
5Najə̄ kɔr̄ kɔdə̄ sāā gə̄ ō, yá̰á̰ kə́ ɔjə kadə̄ yá̰a̰ a rāā yā reē ɓáý ō, nīī ō ní, yá̰a̰ gə̄ ń nuū malang i yá̰á̰ kə́ kanjə̄ kumən gə̄ ō,
i yīngā kə́ to tītə̄ yīngā yā dəyá̰ kə́ a rāā kem yā kojə beé ō.
6Ī-lōō kaw̄ gírí,
ba ré i Nge Ndi dɔ rā̰ tə́ n əlan tá.
7Tām̄ nīī gə̄ tḭ̄ḭ̄n̄ ta de gə̄ ngá̰ý ō,
ngé kəndā kemdə́ dɔ nīī gə̄ tə́ téē tə́sōn̄ ō.
8Ndū najə̄ yā Kɔ́ɔ̄ɓē i yá̰á̰ kə́ majə ɔtə̄ kə taá, ni gḛy sor̄ kə́ tītə̄ ń nuū gə̄ alé.
Kum kedə̄ kə́ teē ta de kə́ nge ra dɔ ndūn tə́, i yá̰á̰ kə́ majə ɔtə̄ kə taá.
Njə̄rā mbā
9Deē ń njə̄rā mbā ní, ndóō yá̰a̰ i ngá̰ý ō,
de kə́ ger̄ yá̰a̰ majə a əda i yá̰á̰ ń ni ger̄ gír majə ní ō.
10Deē ń yá̰a̰ nāā nāan aĺ ní, yá̰a̰ ger̄ yān i sḛ́ý beē.
11Banī deē ń njə̄rā mbā ní, yá̰a̰ gə̄ ń ni ger̄ rāā ní, gíŕdə́ i ngá̰ý.
12Dan njə̄rā mbā yāḿ tə́ ní m-á̰á̰ yá̰á̰ ngá̰ý ō,
kum yá̰á̰ ń m̄-ger̄ ní mān̄ nge ń m-ə́dá ní ō.
13Yá̰á̰ kə́ to yo gə̄ teēn̄ dɔḿ tə́ nja i ngá̰ý,
ba m̄-teē ta tə́ i kə ta kūl̄ yá̰á̰ kə́ m̄-ger̄ majə.
Ɓōĺ ndíĺ Kɔ́ɔ̄ɓē
14Ngé ɓōĺ ndíĺ Kɔ́ɔ̄ɓē gə̄ a ndin̄ kə kumdə́ dan i ngá̰ý.
15Tām̄ əndān̄ kemdə́ i dɔ deē kə́ asə kajədə́ tə́.
16Yá̰á̰ kə́ yā rāā nge ɓōĺ ndíĺ Kɔ́ɔ̄ɓē gətóo.
Ni ɓōĺ yá̰á̰ kógə̄ḿ alé, tām̄ əndā kemən i dɔ Kɔ́ɔ̄ɓē tə́.
17Nge rɔ̄nel̄ i nge ɓōĺ ndíĺ Kɔ́ɔ̄ɓē!
18Ni əndā tɔ́gən i dɔ náā tə́? I náā n i nge kɔsə kílən ní?
19Kɔ́ɔ̄ɓē əndā kumən i dɔ ngé tárən gə̄ tə́.
Ni i der yādə́ kə́ ngan̄g ngá̰ý ō, nge kɔsə kíĺdə́ kə tɔ́gəneé ō.
Ni i yá̰á̰ kə́ deē ndi gírí anī néĺ kə́ təngā ɔdə rɔ̄n aĺ ō,
i ndíĺ kə́ dɔ deē tə́ najə̄ yā kəngā mbang kə́ dan kadaá tə́ ō.
Ni i nge ngɔ̄m̄ deē ta yá̰á̰ kə́ a əga deē bə̄dē tə́ ō, nge kɔgə̄ deē kəsō ō.
20Kɔ́ɔ̄ɓē i nge kɔsə deē kə̄ dɔɔ́ ō, nge rāā kadə̄ kum deē ndə́lē ō.
Tɔdɔ̄ ni i nge rāā kadə̄ rɔ̄ deē ngáā ō, kadə̄ deē ndi kə kumneé ō, i nge rāā majə kə deé ō.
Yá̰á̰ kə́ rāā tām̄ yā Nə́ɓā tə́
21Yá̰á̰ ndējə̄ kə́ kənge kə ta róbə́ kə́ gōtə́ aĺ i yá̰a̰ ndējə̄ kə́ majə aĺ ō,
22Nə́ɓā a ndigə kadə̄ karī gə̄ yā ngé mān̄ dɔ ndū najə̄ gə̄ aĺ ō.
23Yá̰a̰ ndējə̄ gə̄ yā ngé rāā yá̰a̰ kə gō kem ndigə yā Nge Ndi dɔ rā̰ tə́ aĺ ní, nelə̄n aĺ ō,
ni a māȳ rɔ̄n dɔ majaĺ yā deē tə́ i najə̄ kutə dā̰ kə́ tɔ̄l̄ tə́ aĺ ō.
24Kɔy yá̰a̰ kənge yā nge ndoō, ndējə̄ kadə̄ tun̄ adə̄n̄ Nə́ɓā,
to i tītə̄ kəja míndə ngōn̄ ta kum bɔbə̄n tə́ beē.
25Yá̰á̰ kə́ yā kadə̄ nge ndoō əsa tá ndiń kə kumneé ní, lo kəngen tōr̄ rɔ̄n ngá̰ý.
Nge kɔgə̄ nge ndoō yá̰a̰ kəsa i nge tɔ̄l̄ deē.
26Yá̰á̰ ń kadə̄ madə̄ ɓēí əsa tá ndiń kə kumneé ní, ré ī-taā jīn tə́ kɔ̄ɔ́ anī ī-tɔ̄lən i mbée ō,
27kɔgə̄ nge kəla nar yān i ɓōkə́ mósən nang tə́ ō.
28De kógə̄ḿ i nge rāā kújə ō, madə̄n i nge nujəń ō.
Ní, yá̰á̰ ń nin̄ əngen̄ gírí ní i rí? I ka̰a̰ tápə̄ ngóy.
29De kógə̄ḿ i nge tɔ́r̄ tan dɔ deē tə́ ō, madə̄n i nge ndɔ̄ĺ deē ō.
Dan de kə́ jōó gə̄ ń nuū tə́ ní, kɔ́ɔ̄də́ a oō i yā náā?
30Deē ń ndogə̄ man̄ najə̄ nīń kə́ ɔdə rɔ̄ tə́ ní, ré tél ɔdə nīń ní ɓáý tṵ anī,
kum ndogə̄ man̄ yān ní to i rá?
31Deē ń ndi ɓōō tām̄ majaĺ yān gə̄ tə́,
ba tél rāā majaĺ gə̄ ní gogə́ ɓáý ní, yān i tītə̄ ń nuū ō.
I náā n a nēl̄ mbīn yā koōń ndɔ̄ȳ yān ní?
Ndi ɓōō yān ní kumən na i rí?
Currently Selected:
JEJU KƏ́ NGŌN̄ SIRAK 31: SARDC
Highlight
Copy
Compare
Share
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.