JEJU KƏ́ NGŌN̄ SIRAK 33
33
Ndɔ̄ȳ kə́ tām̄ yā gír de gə̄ yā Nə́ɓā tə́
1Ngoljí, Nə́ɓā nge kəndā yá̰a̰ malang, á̰a̰ kum tō ndoō yājí tə́.
2Ī-rāā ādə̄ gíŕ nápar de gə̄ malang ɓōlə́n̄ ndílí.
3Ún jīí dɔɔ́ ī-rɔ̄ɔń gíŕ nápar de gə̄ ń i tə̄rā gə̄ ní,
ādə̄ a̰a̰n̄ tɔ́gí.
4Ḭ̄ ə́ndájí ɔ́jəńdə́ kadə̄ ḭ̄ i de kə́ táĺ ní,
ə́ndádə́ ɔ́jəńjí kadə̄ ḭ̄ i de kə́ bo ō.
5Ādə̄ nin̄ gerīīn̄ tītə̄ ń jḭḭ jə-gerīiń ní ō.
Tām̄ jḭḭ jə-ger̄ kadə̄ Nə́ɓā kə́ rang gətóo, i ḭ̄ ngóy n i Nə́ɓā ní Kɔ́ɔ̄ɓē!
6Yá̰a̰ rāāí kə́ to tayā gə̄ ní, ī-tél ī-rāādə́ gogə́ ɓáý tṵ, ī-rāā yá̰á̰ kə́ rang kə́ to kɔr kum gə̄!
7Ī-rāā yá̰a̰, ɔ́sə go̰n jī kṵṵí.
8Ī-ndól̄ wūn̄g yāí kə́ ngá̰ý dɔ ɓīī tə́, ba ī-bə̄gān kə̄ dɔ madə̄ ba̰ā̰jí gə̄ tə́.
9Ī-nujə madə̄ ba̰ā̰jí gə̄ kɔ̄ɔ́, ī-rējə̄ ngé rɔ̄jí gə̄.
10Ī-rāā ādə̄ kum mbang mān̄ láẃ, kum mbang ń ɔ́jə́ ní ādə̄ əga kemií dɔ tə́.
Lo ń nuū tə́ de gə̄ a ənīn̄ gotə yá̰a̰ rāāí kə́ to kɔsə go̰n gə̄.
11Ngé gə̄ ń teēn̄ ta yo tə́ ní, ādə̄ hor wūn̄g yāí ṵṵdə́ ō,
ngé gə̄ ń rāān̄ gír deē yāí gə̄ adə̄ a̰a̰n̄ tápə̄ ní, ādə̄ nujən̄ sedə́ sák sák kɔ̄ɔ́ ō.
12Ngār gə̄ yā madə̄ ba̰ā̰jí gə̄ ń i ngé kəda na de kə́ tītə̄də́ na gətóó ní,
ī-tɔ̄ɔ̄ dɔdə́ yɔ́k yɔ́k kɔ̄ɔ́!
13Gír ɓē gə̄ malang yā ngán Jakob ní, ɔ́sə dɔdə́ naā tə́. #36.13 Kem makətūbə̄ kə́ ngá̰ý gə̄ tə́ ní, kəlān kə́ nge kṵ kutə gidə i sɔ́ ō, mí ō gətóo tū tə́.
16Ɓē ń ādə̄də́ ta kəla gíŕ tə́ ní, ī-téləń ādə̄də́ gogə́.
17Kɔ́ɔ̄ɓē, gír de gə̄ ń rīí ɓār̄ dɔdə́ tə́ ní, á̰a̰ kum tō ndoō yādə́ ō,
Israel ń ī-rāan ngōn̄ hágí tə́ ní, á̰a̰ kum tō ndoō yān ō.
18Ādə̄ kumií ṵṵī kə ɓē ń kújə yāí kə́ táĺ i tū tə́ ní.
19Ādə̄ ngé ɓōkíī tɔ̄ȳ gə̄ taān̄ lo kem ɓē kə́ Siyo̰ tə́ ō,
ādə̄ kɔsə go̰n yāí taā lo kem kújə yāí tə́ ō.
20Ɔ́jə kə̄ ndágá kadə̄ ngáń Israel gə̄ i gír deē yāí gə̄, nin̄ ń ī-rāādə́ i ta kəla gíŕ tə́ ní.
Najə̄ ń ə̄ndā ta ngé koō taa gə̄ tə́ adə̄ ədan̄ kə rīí ní, ī-rāā ādə̄ reē udə gíŕ kə́ rɔ̄ tə́.
21Ngé gə̄ ń ndi a ngóōīn̄ ní, ādə̄də́ yá̰á̰ ń ə̄nī ndūí yā kadə̄də́ ní.
Lo ń nuū tə́ de gə̄ a a̰a̰n̄ kadə̄ ngé koō taa yāí gə̄ i ngé kəda najə̄ kə́ rɔ̄kum gə̄.
22Kɔ́ɔ̄ɓē, yá̰á̰ ń ngé kəla yāí gə̄ dəjeīn̄ ní, ādə̄də́
sɔɔ̄ń kem majə yāí kə́ tām̄ yā gír deē yāí gə̄ tə́.
Lo ń nuū tə́ de gə̄ malang kə́ dɔ nang tə́ a gerə̄n̄ kadə̄
ḭ̄ i Kɔ́ɔ̄ɓē, Nə́ɓā kə́ ndi kə dɔ ɓāl̄ gə̄ ɓāl̄ gə̄.
Ka̰a̰ yá̰á̰ kə́ majə tɔȳ madə̄ gə̄ ger̄
23Jodə bo deē i yá̰á̰ kə́ a njíw̄ yá̰a̰ malang ń deē əsa ní,
banī yá̰a̰ kəsa kə́ majə tɔȳ madə̄ gə̄ i nuú.
24Tītə̄ ń kem ta deē gerə̄ń nel̄ dā̰ gə̄ kógə̄ḿ kógə̄ḿ ní,
deē ń ger̄ najə̄ ní, a̰a̰ najə̄ kə́ sor̄ a ger̄ ō.
25De kə́ kemən i súūmú alé, i nge rāā deē kadə̄ wūn̄g rāan.
Ba yá̰á̰ ń ni rāā kə deé ní, de kə́ ger̄ yá̰a̰ majə a ger̄ lo tél rāā seneé kum gotə kə̄rā.
Gə̄rā dəyá̰ yā taā
26Ká i dəngam kə́ rá gə̄gē anī dəyá̰ a taā i mbé ngóy,
banī ngáń kə́ dəyá̰ gə̄ kə́ yā gḛydə́ tɔȳ madə̄ gə̄ i nuú.
27Mandə kə́ dəyá̰ mandə ngá̰ý rāā adə̄ dɔ kum ngaan i kə rɔ̄nelé ō,
dəngam gḛy mandə nə̄yá̰n tɔȳ yá̰a̰ malang ō.
28Ré dəyá̰ ní i dəyá̰ kə́ tan majə ō, najə̄ kə́ tan tə́ nel̄ ō anī,
ngaan i nge rɔ̄nel̄ kə́ tɔȳ yā dəngam gə̄ malang.
29Dəngam ń taā dəyá̰ ní, ənge i yá̰a̰ kənge kə́ ta kəga dɔ.
Ni ənge i nge rāā seneé kə́ to tītə̄n beé ō, ənge i yá̰a̰ ndə̄nā rɔ̄ kə́ ngan̄g ō.
30Lo kə́ kəga yá̰a̰ dɔ tə́ aĺ, i lo kə́ de gə̄ a ɓogən̄ yá̰á̰ kə́ tū tə́ malang kɔ̄ɔ́.
Dəngam kə́ taā dəyá̰ alé a dáȳ i mbée ō, a nuū i rɔ̄n ō.
31Nge ɓogə kə́ kumən edə̄ ngá̰ý ō,
a njə̄rā i kə gō ɓē gə̄ ō ní, i náā n a taā kemən ní?
De kə́ dəngam kə́ lo ndi yān gətóo,
adə̄ a ɓīī i kə̄ lo ń lo tíbən tū tə́ tə́ ní, deē a taā kemən aĺ ō.
Currently Selected:
JEJU KƏ́ NGŌN̄ SIRAK 33: SARDC
Highlight
Copy
Compare
Share
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.