JEJU KƏ́ NGŌN̄ SIRAK 36
36
1Yá̰á̰ kə́ majə aĺ a teē dɔ nge ɓōĺ ndíĺ Kɔ́ɔ̄ɓē tə́ alé.
Ba ré yá̰a̰ nāā teē dɔn tə́ anī, a gāngə̄n̄ dɔn tū tə́ ngándáńg.
2Nge kum kedə̄ asə kim̄ ndū najə̄ aĺ bátə́.
Banī kem nge gól̄ lo a rāan tītə̄ too bo kə́ nél a bḭ́ḭ̄n dan bā bo tə́ beē.
3De kə́ kur̄ dɔn to nuú taā kem najə̄ kɔr̄ Kɔ́ɔ̄ɓē.
Ni taā kem ndū najə̄ tītə̄ lo taā kem najə̄ kə́ Nə́ɓā əndā ta nge koō taa tə́ beē.#33.3 Nge koō taa: a ɔr̄ najə̄ i kə ta kūl̄ Urim ō, Tumim ō: Á̰a̰ī Teē 28.30.
De kə́ mbóo ō, nge lur de gə̄ ō
4Ré ī-ndigə kadə̄ de gə̄ oōn̄ najə̄ kɔrí anī, najə̄ ń kadə̄ ā ɔ̄r̄ sedə́ ní ə̄ndā dɔ danaá kété.
Ɔ́sə dɔ yá̰a̰ gə̄ ń ī-ger̄də́ ní kə̄ naā tə́ pá tá ī-dal najə̄ ɓáý.
5Gír̄ kə́ kem de kə́ sapə tə́ i yá̰á̰ kə́ a tūr̄ tītə̄ nja púsə beé ō,
lo kɔr̄ najə̄ yān i yá̰á̰ kə́ a tūr̄ tītə̄ nja kamiyō̰ beé ō.
6De kə́ nge lur kə́ i madə̄ deē to i tītə̄ sə́ndá kə́
a nūū i mbée kə dɔ de gə̄ malang ń a alə̄n̄ gidən tə́ nuū beé.
Nə́ɓā i nge kɔr̄ kam̄ yá̰a̰ naā tə́
7I mbang n i nge kadə̄ ndɔ̄ gə̄ malang kə́ kem ɓāl̄ kə́ kógə̄ḿ beē tə́ lo kunjə̄ yān ní.
Ba i tām̄ rí tə́ á ndɔ̄ kə́rēý bo tɔȳ madə̄ ní?
8Kumən na gír̄ yā Kɔ́ɔ̄ɓē kə́ tām̄ yādə́ nin̄ tə́ i gír̄ kə́ tayā,
tɔdɔ̄ ni əndā ndɔ̄ gə̄ kə́ yā rāań nāā gə̄.
9Ni ɔsə ndɔ̄ kə́rēý gə̄ kə̄ dɔɔ́ ō, ɔr̄də́ tām̄ yān tə́ ō.
Ba gotə ndɔ̄ gə̄ ɓáa rāādə́ i ndɔ̄ kə́ karī tə́.
10Rāān̄ de gə̄ malang i kə nángāá ō,
rāān̄ Adam i kə nángāá ō.
11Ɓá tā ba Kɔ́ɔ̄ɓē ń kum kedə̄ yān i ngá̰ý ní, ndigə kadə̄ nin̄ ton̄ tayā ō,
rāādə́ adə̄ nin̄ njə̄rān̄ dɔ róbə gə̄ kə́ ton̄ tayā tə́ ō.
12Ni rāā majə kə ngé kə́rēý gə̄ ō ɔsədə́ kə̄ dɔ̄ɔ́ ō,
ɔr̄ kam̄ ngé kə́ rang gə̄ əndādə́ tām̄ yān tə́ ō,#33.12 Ɔr̄ kam̄ ngé kə́ rang gə̄ əndādə́ tām̄ yān tə́: Á̰a̰ī Ndū 32.9. adə̄ i ngán Israel gə̄.
Ni ndɔ̄ĺ ngé kə́ rang gə̄ ō, tél sedə́ kə̄ nang tə́ ō,
mbəredə́ lo yādə́ gə̄ tə́ tə́nīdə́ kɔ̄ɔ́ ō.
13Tītə̄ ń kɔdə̄ jóo a əɓāń nánjə́ kə́ jīn tə́
kadə̄ téĺ jóo i kə gō kem ndigə yāneé ní,
de gə̄ ton̄ kem jī nge rāādə́ tə́ i tītə̄ ń nuū ō,
ni a əndā njadə́ i kə gō sarya ń ni gān̄g ní ō.
14Yá̰á̰ kə́ majə i naā tə́ kə yá̰á̰ kə́ majə aĺ ō,
ndi kə kumuú i naā tə́ kə yoó ō.
I beé n nge rāā majaĺ nin̄ i naā tə́ kə nge rāā yá̰a̰ kə gō kem ndigə yā Nə́ɓāá ō ní.
15I beé ní, á̰a̰ majə kəla malang ń Nge Ndi dɔ rā̰ tə́ rāā ní.
Yá̰a̰ gə̄ ní əhɔn ta naā i jōó jōó, ba mbātə́n̄ naā.
Nge ndang makətūbə̄ gír̄ yá̰a̰ dɔ kəla yān tə́
16Mā i nge kəla kə́ nge reē gō gogə́ ō,
m̄-to i tītə̄ nge ɓur kan̄ nduú ō.
17M̄-reē i gō gogə́ ɓá tā, ba Kɔ́ɔ̄ɓē rāā seḿ adə̄ yá̰á̰ ń m̄-ɓur ní m-ə́ngé ngá̰ý ō,
kan̄ nduú ní rosə kem yá̰á̰ mbə́rē kan̄ nduú yāḿ, tītə̄ yā nge kəja kan̄ nduú kə́ rang ō.
18Á̰a̰ī, m̄-njə́ɓā rɔ̄ḿ i tām̄ yāḿ mə̄kɔ́ tə́ ngóy alé,
banī i tām̄ yā de gə̄ malang ń a sāān̄ yá̰a̰ ger̄ ní tə́ ō.
Ī-lōō ndi kə ta kūl̄ deé
19Sḭḭ̄ de kə́ bo gə̄ yā gír de gə̄ ōōī najə̄ yāḿ ō,
sḭḭ̄ ngār gə̄ kə́ dɔ ngé kán̄ naā gə̄ tə́ ī-nēlī mbīsí ō!
20Dan ń ī-ndi kə kumií ní, ādə̄ deē ṵṵ ɓē dɔí tə́ alé!
Ādə̄ ngōnīí, aláa nə̄yá̰í, aláa ngōkṵ́ṵ́í, aláa madə̄ taí, ṵṵ ɓē dɔí tə́ alé.
Ī-lōō kadə̄ deē yá̰a̰ kənge yāí karī,
na sōgə́ ī-ndə̄ngā rɔ̄í anī, ī-tél ī-dəje yá̰á̰ ní gogə́ yā taā.
21Dan ń ī-ndi kə kumií ō ā ī-taā koō ɓáý ō ní, ādə̄ de kógə̄ḿ ṵṵ ɓē dɔí tə́ alé.
22Kadə̄ ngání gə̄ dəjeīn̄ yá̰a̰ i sóótə́,
tɔȳ kadə̄ ī-ndi kə ta kūl̄ yá̰á̰ ń ngání gə̄ ndigən̄ rāā ní.
23Tū yá̰a̰ malang ń ā ī-rāā tə́ ní, ādə̄ hálí i hál de kə́ kɔ́ɔ̄ yá̰a̰,
na sōgə́ ī-nujə rī ɓār̄ yāí.
24Dan ń ta tɔ̄l̄ ta ndɔ̄í ugə̄ ō,
kum mbang kə́ yā kadə̄ óyń asə ō anī, ī-nə̄ɓō yá̰a̰ ndəbā yāí tā.
Najə̄ yā ɓəlo gə̄
25Mu kə́ tutə ō, ndéý sálang ō, yá̰a̰ kətō ō, ton̄ i tām̄ yā kərō tə́.
Banī yá̰a̰ kəsa ō, ndéy ō kəla ō, ton̄ i tām̄ yā ɓəlo tə́.
26Ré ə̄ndā dɔ ɓəlo yāí tə́ adə̄ rāā kəla anī, ā ə́nge lo taā koō.
Ré ə́ya̰n adə̄ rāā yá̰á̰ ń kemən ndigə ní anī, a sāā ta róbə teē ɓəloó.
27A tetən̄ dɔ man̄g i kə njúkú ō, i kə mərawaá ō.
A tetən̄ dɔ ɓəlo kə́ majə aĺ i kə rāan yá̰á̰ kə́ tōrōó ō, i kə dəjen najá ō.
28Yā kadə̄ ni ndiń karī aĺ ɓáa, ə̄ndān ta kəla tə́.
29Tām̄ ndi karī kanjə̄ rāā kəla i yá̰á̰ kə́ ndóō de gə̄ lo rāā yá̰á̰ kə́ majə aĺ gə̄ ngá̰ý.
30Ə̄ndān ta kəla kə́ majə tām̄ yān tə́ ādə̄ rāā.
Ba ré ni oō taí aĺ anī, ə̄nī kángə́lá njan tə́.
Banī ī-lōō rāā yá̰a̰ kadə̄ mān̄ dɔ loon kə de kógə̄ḿ ō,
ī-lōō rāā yá̰á̰ kə́ mbātə́ yá̰a̰ rāā kə́ gōtə́ ō.
31Lo ń ré ɓəlo yāí i kógə̄ḿ beē anī, ādə̄ to tītə̄ dā̰ rɔ̄í ḭ̄kɔ́ beē,
tām̄ ī-mangən i kə gātə̄ kə́ ngá̰ý.#33.31 Á̰a̰ī: Teē 21.6. Lo ń ré ɓəlo yāí i kógə̄ḿ beē anī, ī-rāan ngōkṵ́ṵ́í tə́,
tɔdɔ̄ ni majə tām̄ yāí tə́ i tītə̄ ndií kə kumií beē.
32Ré ī-rāan majə aĺ adə̄ a̰ȳ aw̄ kɔ̄ɔ́ anī,
33ā āw̄ sāan tə́ i kə róbə́ kə́ rá?
Currently Selected:
JEJU KƏ́ NGŌN̄ SIRAK 36: SARDC
Highlight
Copy
Compare
Share
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.