JEJU KƏ́ NGŌN̄ SIRAK 35
35
Háĺ kə́ yā rāā lo yá̰a̰ kəsa kə́ ngá̰ý tə́
1Ré əndān̄ kəla kɔr no de gə̄ dɔí tə́ lo yá̰a̰ kəsa kə́ rāā ngá̰ý tə́ anī, ī-lōō kɔjə rɔ̄í dɔ de gə̄ tə́.
Ba ī-rāā yá̰a̰ tītə̄ yā madí gə̄ ń ɓārə́n̄də́ ní ō.
Adə̄ á̰a̰ gōdə́ pá tá āw̄ ī-ndi nang tə́ ɓáý.
2Dan ń ī-rāā kəla yāí malang oy anī, āw̄ ī-ndi nang tə́ gotií tə́,
ba ī-rāā rɔ̄nel̄ najə̄ rāā kə́ ḭ̄ ī-rāā yá̰a̰ adə̄ asə kumdə́ tə́ ō,
ī-taā jākā ń a əndānəń nja nge rāā yá̰a̰ adə̄ majə ɔtə̄ kə taá ní ō.
3Ré i ḭ̄ n i de kə́ tɔgə ngá̰ý anī, ún najə̄ ɔ̄r̄. Tām̄ kɔr̄ najə̄ i yāí ḭ̄.
Ī-sɔɔ̄ dɔ yá̰á̰ ń ī-ger̄ ní ə́da,
ba ī-lōō kɔgə̄ kadə̄ əndan̄ yá̰á̰ kə́ ɓār̄ gōsə̄ gō tə́.
4Dan ń a ōōn̄ najə̄ kɔrí anī, ī-lōō kun gidə najə̄ kə̄ gogə́ gogə́ ō,
ī-lōō kɔjə kum kedə̄ yāí malang kum mbang kə́ majə aĺ tə́ ō.
5Yá̰á̰ kə́ ɓār̄ gōsə̄ kə́ kənda lo yá̰a̰ kəsa kə́ rāā ngá̰ý kadə̄ de gə̄ əsan̄ tə́ ní,
to i tītə̄ mbal̄ kə́ gātən i ngá̰ý kə́ kəla tū kulúm kə́ yā kəla jī tə́ kə́ rāā kə lɔ́rɔ́ beē.
6Yá̰á̰ kə́ ɓār̄ gōsə̄ majə kə́ kənda lo ka̰ȳ kasə nduú kə́ nel̄ tə́,
to i tītə̄ tambō̰o̰ kə́ rāā kə mbal̄, ba kəla tū kāgə̄n kə́ rāā kə́ lɔ́rɔ́ tə́ beē.
7Balsáa, ré i gáŕ kadə̄ ɔ̄r̄ najə̄ anī ɔ̄r̄.
Ré i ngá̰ý anī, ādə̄ i nja jōó ngóy ō, i lo ń ré dəjeīn̄ najə̄ ní tá ō.
8Ɔ̄r̄ najə̄ ādə̄ gīndə̄ dɔp, ba ādə̄ kumən i ngá̰ý.
Ɔ́jə kadə̄ ḭ̄ i deē kə́ ī-ger̄ gō yá̰a̰ gə̄ ń rāān̄ yá̰á̰ ní ō, ba ī-ndi i kə taí kə́ mbóó.
9Lo ń ré ī-ndi dan de kə́ bo gə̄ tə́ anī, ī-lōō sāā kadə̄ oōn̄ i yāí ḭ̄ tá ō,
lo ń de kə́ tɔgə ɓə́ga gə̄ i tū tə́ ní, ī-lōō kɔr̄ najə̄ ngá̰ý ō.
10Tītə̄ ń man̄ tel̄ pá tá kōon ɓār̄ gō tə́ ní,
kem majə i kété no nge ger̄ ngɔ̄m̄ tan dɔ najə̄ tə́ ō.
11Ré kum mbang asə anī, ḭ́ḭ dɔɔ́ ba ī-lōō kəndi gogə́.
Ā̰ȳ kə̄ ɓēé kanjə̄ dáȳ róbó kə̄ lo gə̄ tə́.
12Ī-kógə̄ naā ō, ī-rāā yá̰á̰ ń nelī ní ō lo ń nuū tə́,
ba ī-lōō rāā majaĺ kə kɔr̄ najə̄ waá.
13Gō tə́ anī, nge kəndāí ō kadī yá̰á̰ kə́ majə gə̄ ngá̰ý ō ní, ī-ndadə̄ ādən.
Makətūbə̄ kə́ nge kṵ sɔ́ yā yá̰á̰ ndóō gə̄
Ɓōĺ ndíĺ Nə́ɓā
14Nge ɓōĺ ndíĺ Kɔ́ɔ̄ɓē i nge ndigə kadə̄ ndóōnən̄ yá̰a̰ ō,
ngé sāā Kɔ́ɔ̄ɓē kə gír loí gə̄ a əngen̄ kem majə yān ō.
15Deē ń ndóō ndū najə̄ yā Kɔ́ɔ̄ɓē ní, a ənge yá̰a̰ tū tə́ kadə̄ mān̄ dɔ nge ń ni sāā ní.
Banī deē ń a gól̄ i lo ní, ndū najə̄ a tél i gūmbə̄ tām̄ yān tə́.
16Ngé ɓōĺ ndíĺ Kɔ́ɔ̄ɓē gə̄ a̰a̰n̄ yá̰á̰ kə́ gōtə́ anī gerə̄n̄ ō,
yá̰a̰ rāādə́ kə́ majə gə̄ ndə́lēn̄ tītə̄ lo kə́ unjə̄ kow beé ō.
17Nge rāā majaĺ ndigə kadə̄ deē kɔ̄l̄ seneé aĺ ō,
ni ənge najə̄ kə́ yā kəga rɔ̄n gidə tə́ rāań yá̰á̰ ń kemən ndigə ní ō.
18De kə́ nge kadə̄ kɔjə̄ majə i de kə́ dɔn ndígə̄nal gír̄ yá̰a̰ alé.
Banī nge ɓōĺ gidə deē aĺ ō, nge kɔjə rɔ̄ ō, ɓōlə́n̄ yá̰a̰ alé.
19Ī-lōō rāā yá̰á̰ kógə̄ḿ kanjə̄ gír̄ yá̰a̰,
lo ń nuū tə́ ā ī-ndə̄ngā rɔ̄í najə̄ yá̰a̰ rāāí tə́ alé.
20Ī-lōō kun róbə́ kə́ majə aĺ,
na sōgə́ mbal̄ əga njaí.
21Ré ḭ̄ i dɔ róbə́ kə́ gidə asə naā tə́ anī, ī-lōō kɔjəń na yá̰a̰ a rāāī alé.
22Ngán kemií gə̄ gə̄gē, ī-ndi dɔ rɔ̄í tə́ najə̄ yādə́ tə́.
23Ḭ̄kɔ́ ə̄ndā kumií gír rɔ̄í tə́ tū yá̰a̰ malang ń ā ī-rāā tə́ ní.
Nge ń nuū i kun gō ndū Kɔ́ɔ̄ɓē ō.
24Nge kəra dɔ ndū najə̄ tə́ i nge kun gō ndū Kɔ́ɔ̄ɓē ō,
deē ń ənī kemən adə̄ Kɔ́ɔ̄ɓē ní, deē a rāā yá̰á̰ kə́ majə aĺ seneé aĺ ō.
Currently Selected:
JEJU KƏ́ NGŌN̄ SIRAK 35: SARDC
Highlight
Copy
Compare
Share
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.