JEJU KƏ́ NGŌN̄ SIRAK 34
34
Yá̰á̰ kə́ ngan̄g ń a utə̄ gō yá̰a̰ kənge ní
1Kənī ɓīī kum tə́ alé najə̄ yā yá̰a̰ kənge tə́ i yá̰á̰ kə́ a ungə̄ deē ō,
a ɔgə̄ deē ɓīī ō.
2Gír̄ yá̰á̰ kə́ kum mbang ń deē ənīń ɓīī kumən tə́ aĺ ní, i yá̰á̰ kə́ a ɔgə̄ deē ɓīī
tītə̄ moy kə́ ngan̄g ngá̰ý kə́ ɔgə̄ deē ɓīī beé.
3Dūn̄ nge yá̰a̰ kənge tōrən lo kán̄ yá̰a̰ kənge tə́ kə̄ dɔ naā tə́ ō,
ré ni ɔr̄ koō anī, i yā rāań rɔ̄nel̄ kadə̄ asən ō.
4Dūn̄ nge ndoō tōrən lo rāā kəla tə́, ba yá̰á̰ ń ənge gírí ní i yá̰á̰ kə́ sḛ́ý beē ō,
ré ɔr̄ koō anī, yá̰á̰ ń sāā ní lo kəngen gətóo ō.
5Nge gḛy lɔ́r i nge rāā yá̰á̰ kə́ gōtə́ aĺ ō,
nge ka̰ȳ ngɔ̄də̄ gō nar tə́ i nge kəya̰ rɔ̄n kadə̄ nar gólə̄n ō.
6De gə̄ ngá̰ý tḭ̄ḭ̄n̄ ta yá̰a̰ yādə́ malang kɔ̄ɔ́ najə̄ yā lɔ́ŕ tə́ ō,
tḭ̄ḭ̄n̄ ta rɔ̄də́ ō.
7Tɔdɔ̄ lɔ́r i gūmbə̄ kə́ tām̄ yā ngé gə̄ ń a sāān̄ i lɔ́ŕ ngóý ní tə́ ō,
de kə́ mbóo gə̄ malang əsōn̄ kum gūmbə̄ ní tə́ ō.
8Nge rɔ̄nel̄ i nge yá̰a̰ kal̄ lo kə́ najə̄ gətóo dɔn tə́ ō,
ni a̰ȳ ngɔ̄də̄ gō lɔ́ŕ tə́ aĺ ō.
9Deē ní i náā á kadə̄ jə-ɓōkíin̄ tɔ̄ȳ ní?
Tām̄ ni rāā yá̰á̰ kə́ to tayā dan gír deē yān gə̄ tə́.
10I náā n nāānən̄ kə́ yá̰á̰ ń nuū ba teē kum tə́ karī ní?
Majə kadə̄ ɔjə rɔ̄n najə̄n tə́.
I náā n ənge ta róbə mbātə́ ndū najə̄ yā Kɔ́ɔ̄ɓē banī mbātə́ aĺ ní?
Aláa ənge ta róbə rāā yá̰á̰ kə́ majə aĺ banī mbātə́ rāā ní?
11Deē ngeé ń toō a a̰ā̰ kadə̄ mbūsə̄n̄ gír ndi majə yān adə̄ ngan̄g ō,
ngé kán̄ naā gə̄ a tə́dan̄ kutə yá̰á̰ kə́ majə gə̄ ń ni rāā ní ō.
Lo ń ré ī-ndi ta yá̰a̰ kəsa tə́ anī
12Ré ī-ndi ta yá̰a̰ kəsa kə́ rāān̄ ngá̰ý tə́ anī,
ī-lōō teē taí kədań najə̄ ń toō:
Wūu wúý, yá̰á̰ kəsa ní majə ngá̰ý!
13Ādə̄ əga kemií dɔ tə́ na kum ndaa yá̰a̰ i yá̰á̰ kə́ majə aĺ.
Dan yá̰a̰ gə̄ ń Nə́ɓā rāā tə́ ní, i rí n i kə́ majə aĺ ngá̰ý tɔȳ kum deē ní?
I tām̄ najə̄ ń nuū tə́ n ni a nūū i mbé ngándáńg ní.
14Adə̄ kūw̄rū dā̰ ń kum madí i dɔ tə́ ní, ī-lōō kəla jīí yā kunəń,
na sōgə́ jīí ɔsə gidə yān kem kārāá.
15Ḭ̄kɔ́ ī-gír̄ yá̰á̰ ń a nel̄ madə̄ ɓēí ní ō,
yá̰á̰ ń ā ī-rāā yā rāā ní, ī-gír̄ yá̰a̰ dɔ tə́ pá tá ō.
16Yá̰a̰ kəsa ń əndān̄ noí tə́ ní, ə́sa tītə̄ de kə́ ɔjə̄nən̄ majə ō,
ī-lōō rāā kadə̄ nel̄ de gə̄ seí aĺ ngá̰ý najə̄ kəsa yá̰a̰ yāí tə́ ō.
17Ɔ́jə kə̄ ndágá kadə̄ ḭ̄ i deē kə́ ɔjīn̄ majə: adə̄, ādə̄ asiī kəsa yá̰á̰ kété no madí gə̄ tə́.
Ī-lōō kɔjə kə̄ ndágá kadə̄ yá̰a̰ kəsa asə taí alé, na sōgə́ tōr̄ de gə̄ seí.
18Ré ī-ndi dan de kə́ ngá̰ý gə̄ tə́ anī,
ī-lōō kəla jīí kārāá kété no madí gə̄ tə́.
19Deē ń ɔjə̄nən̄ majə ní, ré ənge yá̰a̰ kəsa i sḛ́ý beē gə̄gē anī asən.
Adə̄ ré ni to kem tə̄rá yān tə́ anī, koō utə̄n aĺ bátə́:
20Nge kəsa yá̰a̰ kadə̄ al̄ kemən aĺ i nge ɓīī majə.
Ni ḭḭ dɔɔ́ ɓatə ō, rɔ̄n ngáā ō.
Banī ɓīī kə́ asə deē aĺ ō, wur deē kə́ rāan ō,
kem tōr̄ ō, i yá̰a̰ yā nge kəsa waa.
21Ré ran̄ seí adə̄ ə́sá yá̰a̰ adə̄ al̄ kemií anī,
ḭ́ḭ āw̄ gidə loó ī-tō̰mbə̄ kɔ̄ɔ́, lo ń nuū tə́ a i sóóí tə́.
22Ngōnə̄ḿ, ōō najə̄ yāḿ ba ī-lōō kídə̄m̄,
na ta tɔ̄l̄ ta tə́ anī ā ī-ger̄ kum najə̄ yāḿ ní.
Ādə̄ yá̰a̰ rāāí malang i kə́ al̄ ngandə̄ alé,
lo ń nuū tə́ moy a rāāī alé.
23Deē ń yá̰a̰ yān udə ngá̰ý gír kəhɔ de gə̄ kə̄ rɔ̄n tə́ ní, de gə̄ malang a ɓōkə́nən̄ tɔ̄ȳ.
Nge ń nuū ɔjə kadə̄ ni rāā kem ndaa ngá̰ý rɔ̄kum.
24Banī deē ń a mbɔ̄jə́ i yá̰a̰ kəsa yān tá a əhɔń de gə̄ kə̄ rɔ̄n tə́ ní, de gə̄ malang kə́ kem ɓēé a ɔrə̄n̄ najə̄ yān majə alé.
Nge ń nuū ɔjə kadə̄ ni i de kə́ suu rɔ̄kum.
Kasə nduú
25Ī-lōō kógə̄ naā kə kasə nduú kɔjəń na ḭ̄ na i de kə́ ngan̄g.
Tɔdɔ̄ kasə nduú tḭ̄ḭ̄ ta de kə́ ngan̄g gə̄ ngá̰ý.
26Tītə̄ ń hor miī kə́ təngā ngá̰ý nāań ngan̄g gində̄ ní,
kəla rāā kasə nduú i tītə̄ ń nuū ō: dan ń ngé kɔjə rɔ̄də́ gə̄ a rɔ̄ɔ̄n̄ naā anī, ni i nge teē kə háĺdə́ kə́ rɔ̄kum kə̄ ndágá.
27Tām̄ yā de kə́ dəngam gə̄ tə́ ɓáa, kasə nduú i yá̰á̰ kə́ ɔsə kum gotə ndi kə kumuú yā deē,
ba i lo ń deē a̰ȳn adə̄ mān̄ dɔ aĺ ní tá.
Deē ń nal̄ kasə nduú ní, a ndi i ndi kə́ ba̰ý?
Ta kəla gíŕ tə́ ní, Nə́ɓā rāā kasə nduú i yā kadə̄ń de gə̄ rɔ̄nel̄.
28Kasə nduú i yá̰á̰ kə́ a rāā kadə̄ dɔ kum deē i kə̄ rɔ̄nelé ō kemən nelə̄n ō,
lo ń deē a̰ȳn i kə kum mbangneé ō, kadə̄ asə loon tə́ ō ní.
29Kasə nduú kə́ ka̰ȳ kadə̄ mān̄ dɔ majən, i yá̰á̰ kə́ a rāā kadə̄ dɔ kum deē nelə̄n alé.
I yá̰á̰ kə́ a reē i kə sāā tāmāá ō, kə rɔ̄ɔ̄ naá ō.
30Kasə kə́ rāā deē, i yá̰á̰ kə́ rāā adə̄ wūn̄g yā de kə́ mbóo aw̄ kum kə̄ kété yā rāā majə aĺ seneé.
Kasə ní a taā tɔ́gən ō, a reē kə ndéý kə́ majə aĺ dɔn tə́ ō.
31Lo ń ré ī-ndi lo kə́ de gə̄ a əsan̄ yá̰a̰ tū tə́ ngá̰ý ba a a̰ȳn̄ kasə nduú gō tə́ anī, ī-lōō kɔ̄l̄ kə madí ń ndi kadií tə́ ní ō,
mbóo seneé dan ń rɔ̄n nelə̄n ní ō,
kədan najə̄ kə́ kadə̄ tōrən ō.
Currently Selected:
JEJU KƏ́ NGŌN̄ SIRAK 34: SARDC
Highlight
Copy
Compare
Share
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.