JEJU KƏ́ NGŌN̄ SIRAK 2
2
Nāān̄ nge kəhɔ gō Kɔ́ɔ̄ɓē
1Ngōnə̄ḿ, ré ī-ndigə rāā kəla kadə̄ Kɔ́ɔ̄ɓē anī,
ə̄ndā dɔ rɔ̄í danaá tām̄ yā yá̰á̰ kə́ ngan̄g gə̄ kə́ ā teēn̄ dɔí tə́.
2Ə́hɔ rɔ̄í tɔgə ō, ī-ra ngan̄g dɔ yá̰á̰ ń ī-sāā rāā tə́ ní ō,
ré kum mbang kə́ majə aĺ teē dɔí tə́ anī, ī-lōō sōl̄ ō.
3Ə́hɔ gō Kɔ́ɔ̄ɓē ādə̄ ngan̄g, ī-lōō kɔr̄ rɔ̄í kɔ̄ɔ́ rɔ̄n tə́.
Ta tɔ̄l̄ ta anī, ā ə́ngé yá̰a̰ tū tə́.
4Ī-ndigə yá̰a̰ malang ń teē dɔí tə́ ní ō,
ré yá̰á̰ kə́ to rɔ̄sɔl̄ teē dɔí tə́ anī, ī-tə́gā taí ō.
5Tɔdɔ̄ a nāān̄ lɔ́r i kum hor tə́ ō,
a nāān̄ ngé gə̄ ń Nə́ɓā ndigədə́ ní i kum hor tápə̄ tə́ ō.
6Ə̄nī kemií ādə̄ Nə́ɓā, anī a reē yā rāā seí.
Úń róbə́ kə́ súūmú ba ə̄ndā kemií dɔn tə́.
7Sḭḭ̄ ngé ɓōĺ ndíĺ Kɔ́ɔ̄ɓē gə̄, ə̄ndāī kemsí dɔ kem majə yān tə́.
Ī-lōōī tūr̄ gidəsí kɔ̄ɔ́ tan tə́ na sōgə́ ə̄sōī.
8Sḭḭ̄ ngé ɓōĺ ndíĺ Kɔ́ɔ̄ɓē gə̄, ə̄nīī kemsí ādī Kɔ́ɔ̄ɓē,
na ā ī-nalī yá̰a̰ kəndā nja yāsí alé.
9Sḭḭ̄ ngé ɓōĺ ndíĺ Kɔ́ɔ̄ɓē gə̄, ə̄ndāī kemsí dɔ majə kə́ ni a rāā sesí tə́ ō,
dɔ rɔ̄nel̄ kə́ dan gān̄g aĺ kə́ ni a adə̄sí tə́ ō, dɔ kem majə yān tə́ ō.
10Á̰a̰ī gír kojə gə̄ ń mānə̄n̄ kété ní,
i náā kə́ dandə́ tə́ n adə̄ Kɔ́ɔ̄ɓē kemən, anī Kɔ́ɔ̄ɓē əla rɔ̄sɔl̄ dɔn tə́ ní?
I náā kə́ dandə́ tə́ n əhɔ gō ɓōĺ ndíĺ Kɔ́ɔ̄ɓē, anī Kɔ́ɔ̄ɓē əya̰n kɔ̄ɔ́ ní?
I náā kə́ dandə́ tə́ n ɓāŕ Kɔ́ɔ̄ɓē, anī Kɔ́ɔ̄ɓē kídə̄n ní?
11Tɔdɔ̄ Kɔ́ɔ̄ɓē i de kə́ kumən a ṵṵn ō, i de kə́ nge kem majə ō.
Ni māȳ rɔ̄n dɔ majaĺ gə̄ tə́ ō, kum mbang kə́ majə aĺ tə́ anī, ni ajə deē ō.
12Ngé gə̄ ń ɓōĺ i kemdə́ tə́ ō, tɔ́gə jīdə́ gətóo ō,
ngé rāā majaĺ gə̄ ń róbə kundə́ i jōó jōó ō ní, yá̰á̰ kə́ to kum kaȳ aĺ a teē dɔdə́ tə́.
13Deē ń əhɔ kemən ngan̄g aĺ ō, adə̄ Kɔ́ɔ̄ɓē kemən aĺ ō ní, yá̰á̰ kə́ to kum kaȳ aĺ a teē dɔn tə́,
i tām̄ najə̄ ń nuū tə́ n Kɔ́ɔ̄ɓē a ngɔ̄mən aĺ ní.
14Sḭḭ̄ ń ī-tḭ̄ḭ̄ ta kəhɔ tɔgə yāsí kɔ̄ɔ́ ní, yá̰á̰ kə́ to kum kaȳ aĺ a teē dɔsí tə́!
Dan ń Kɔ́ɔ̄ɓē a əndā maȳsí ní, ā ī-rāāī i ba̰ý?
15Ngé ɓōĺ ndíĺ Kɔ́ɔ̄ɓē gə̄ mbātə́n̄ najə̄ yān ndɔ̄ kógə̄ḿ alé.
Ngé tárən gə̄ unən̄ gō róbə yān gə̄.
16Ngé ɓōĺ ndíĺ Kɔ́ɔ̄ɓē gə̄ a sāān̄ i rāā yá̰á̰ kə́ nelə̄n.
Ngé tárən gə̄ ní, yá̰a̰ kəsa yādə́ i ndū najə̄ yān.
17Ngé ɓōĺ ndíĺ Kɔ́ɔ̄ɓē gə̄ ndin̄ dɔ rɔ̄də́ tə́ ngándáńg tām̄ yān tə́,
nin̄ télən̄ kə rɔ̄də́ kə̄ nang tə́ non tə́ ba ədan̄ na:
18J-a j-əsō i kem jī Kɔ́ɔ̄ɓē tə́ tá,
ba i kem jī de gə̄ tə́ alé.
Tɔdɔ̄ ni i de kə́ tɔ́gən i ngá̰ý ō,
i de kə́ kem majə yān i ngá̰ý ō.
Currently Selected:
JEJU KƏ́ NGŌN̄ SIRAK 2: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.