JEJU KƏ́ NGŌN̄ SIRAK 25
25
Yá̰á̰ kə́ majə gə̄ mətá ō, kə́ majə aĺ gə̄ mətá ō
1Yá̰a̰ gə̄ i mətá kə́ nelə̄m̄ sedə́ ngá̰ý.
Yá̰a̰ gə̄ ní majən̄ ngá̰ý ta kum Kɔ́ɔ̄ɓē tə́ ō, ta kum de gə̄ tə́ ō:
i ngákṵ́ṵ naā gə̄ kə́ oōn̄ ta naā majə ō, i madə̄ ɓē naā gə̄ kə́ ṵṵdə́ tɔdɔ̄ naā ō,
i dəyá̰ ō dəngam ō kə́ kemdə́ asə naā ō.
2De gə̄ i mətá kə́ nelə̄m̄ sedə́ aĺ ngá̰ý ō,
kə́ yá̰a̰ rāādə́ adə̄m̄ wūn̄g ngá̰ý ō:
i nge ndoō kə́ ɔjə rɔ̄n ō, nge kənge yá̰á̰ kə́ nge sor̄ ō,
de kə́ tɔgə ɓə́gá kə́ ger̄ najə̄ tṵ alé ba rāā rāȳ ō.
Yá̰a̰ yā deē kə́ ɓālən i ngá̰ý
3Lo ń ré ī-kán̄ yá̰a̰ kə̄ dɔ naā tə́ dan balsááí tə́ aĺ ní,
dan ń ā ī-tɔgə ɓə́gá ní, ā ə́nge i rí kógə̄ḿ?
4Gān̄g sarya i yá̰á̰ kə́ əhɔ i de kə́ dɔ ndaa ō,
ger̄ kadə̄ kɔjə̄ i yá̰á̰ kə́ əhɔ i kum kɔɔ̄ gə̄ ō!
5Kum kedə̄ i yá̰á̰ kə́ əhɔ i de kə́ tɔgə ɓə́gá kə́ dɔn ndaa ō,
gír̄ yá̰a̰ ō, kadə̄ kɔjə̄ ō, i yá̰á̰ kə́ əhɔ i de gə̄ kə́ de gə̄ rɔȳn̄də́ ō!
6Jākā mbang yā ɓə́ga gə̄ i yá̰a̰ gə̄ ń nin̄ gerə̄n̄ ngá̰ý ní ō,
yá̰a̰ kɔr ta rɔ̄ yādə́ i ɓōĺ ndíĺ Kɔ́ɔ̄ɓē ō.
Ndi majə kə́ ngá̰ý tɔȳ madə̄ gə̄
7Yá̰a̰ gə̄ i ndōhó kə́ m̄-gír̄ kemḿ tə́ kadə̄ i yá̰á̰ kə́ rɔ̄də́ nel̄də́ gə̄ ō,
m-ásə kəda rī nge kə́ kṵ kutə ō:
I deē kógə̄ḿ kə́ ngánən gə̄ rāānən̄ adə̄ rɔ̄n nelə̄n ō,
i deē ń ndi dan i ngá̰ý adə̄ a̰a̰ madə̄ ba̰ā̰n gə̄ lo kəsō tə́ ní ō.
8Nge rɔ̄nel̄ i deē ń ndi kə dəyá̰ kə́ kur̄ dɔn ger̄ yá̰á̰ ní ō,
i deē ń ta ndo̰o̰n ənīn̄ kɔ̄ɔ́ aĺ ní ō,
i deē ń nge kunən kəlaá asə kadə̄ ni rāā kəla adə̄n aĺ anī rāā kəla adə̄n aĺ ní ō.
9Nge rɔ̄nel̄ i de kə́ nge kəndā kum kedə̄ dɔ rɔ̄n tə́ ō,
i deē ń a ɔr̄ najə̄ anī de gə̄ nēlə̄n̄ mbīdə́ ní ō.
10Deē ń ənge kum kedə̄ ní, ni i de kə́ bo!
Ɓá tā banī de kə́ tɔȳ nge ɓōĺ ndíĺ Kɔ́ɔ̄ɓē gətóo.
11Ɓōĺ ndíĺ Kɔ́ɔ̄ɓē tɔȳ gotə yá̰a̰ gə̄ malang:
deē ń aw̄ń ní, de kə́ tītə̄n i náā? #25.11 Kem makətūbə̄ kə́ ngá̰ý gə̄ tə́ ní, kəlān kə́ nge kṵ kutə gidə i jōó gətóo tū tə́.
Dəyá̰ kə́ kemən ndul ngá̰ý
13Do kə́ majə aĺ tɔȳ do kə́ dan wur deē tə́ gətóo!
Kem ndul kə́ majə aĺ tɔȳ kem ndul yā de kə́ dəyá̰ gətóo! 14Wur kɔl kə́ majə aĺ tɔȳ kim̄ naā gətóo ō,
ba̰ā̰ kə́ majə aĺ tɔȳ ba̰ā̰ yā madə̄ ba̰ā̰ gətóo ō.
15Kung yá̰á̰ kə́ majə aĺ tɔȳ kung lī gətóo ō,
wūn̄g kə́ majə aĺ tɔȳ wūn̄g yā de kə́ dəyá̰ gətóo ō.
16Ndiḿ kə ɓɔlɔɔ́, aláa kə dərago̰ó̰#25.16 Dərago̰: i dā̰ kə́ majə aĺ ngá̰ý ba gətóo lojí laā. i sóótə́
tɔȳ ndiḿ kə dəyá̰ kə́ majə aĺ.
17Kem ndul yā dəyá̰ i yá̰á̰ kə́ a rāā adə̄ ta kum dəyá̰ tūr̄ kɔ̄ɔ́ ō,
dəyá̰ kə́ dɔ kumən síndə̄rī to i tītə̄ dā̰ úrsə#25.17 Dā̰ úrsə: i dā̰ kə́ to tītə̄ ɓetə̄ madə beé ba gətóo lojí laā. beé ō.
18Ngaan ndi dan madə̄ ɓēen gə̄ tə́ anī,
to̰ō̰ ɗus ɗus kə gō kem ndigə yāneé alé.
19Ká ré deē rāā ngam i ba̰ý gə̄gē anī, i yá̰á̰ kə́ sḛ́ý beē kadə̄ ngam yā de kə́ dəyá̰ tə́.
I beé ní, ādə̄ yá̰á̰ ń rāā nge rāā majaĺ ní rāan ō.
20Ngaa dəyá̰ ń ndi lo yān jəke ní, tām̄ yān tə́ ɓáa dəyá̰ kə́ nge najə̄ wa
i tītə̄ róbə́ kə́ əta tan kə̄ dɔɔ́ kə́ nán̄g i tū tə́, kə́ de kə́ tɔgə ɓə́ga a njə̄rā tū tə́ beē.
21Ī-lōō kadə̄ majə dəyá̰ ndɔ́rī aw̄ seí ō,
ī-lōō ndə̄ngā dəyá̰ ō.
22Dəngam ń nə̄yá̰n a̰a̰ gōn ní,
ādə̄ əndā kemən dɔ kɔ̄l̄ kə́ ɓo ɓo tə́ ō, yá̰á̰ kə́ rāā kanjə̄ ɓōlə́n ō, rɔ̄sɔl̄ kə́ ngá̰ý tə́ ō.
23Kɔr̄ tɔ́gə deē ō, rāā deē kadə̄ dɔ kumən nelə̄n aĺ ō,
kadə̄ kem deē do ō ní, i kəla rāā dəyá̰ kə́ nge kem ndul.
Dəyá̰ kə́ nge rāā ngaan kadə̄ rɔ̄n nelə̄n aĺ,
i nge rāan kadə̄ jīn ur̄ wak ō, kadə̄ kejən gə̄ sɔlə̄n̄ yḛ́lélé ō.
24I dəyá̰ n rāā yá̰á̰ á majaĺ toń ní ō,
jḭḭ̄ malang j-oyiī i najə̄ yān tə́ ō.
25Ī-lōō kəya̰ man̄ kadə̄ də̄yā̰ ō,
kəya̰ dəyá̰ kə́ nge kem ndul kadə̄ ɔr̄ najə̄ kə gō ndigə yāneé ō.
26Ré oō taí aĺ anī,
ɔ̄r̄ rɔ̄í kɔ̄ɔ́ rɔ̄n tə́ ō, ī-mbātə́n ō.
Currently Selected:
JEJU KƏ́ NGŌN̄ SIRAK 25: SARDC
Highlight
Copy
Compare
Share
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.