JEJU KƏ́ NGŌN̄ SIRAK 26
26
Rɔ̄nel̄ yā dəngam kə́ taā dəyá̰ kə́ majə
1Dəngam ń taā dəyá̰ kə́ majə ní rɔ̄n nelə̄n ō,
a ndi dan i ngá̰ý nja jōó ō. 2Dəyá̰ kə́ əhɔ rɔ̄n tɔgə i rɔ̄nel̄ yā ngaan.
Ngaan a ndi i kə kem sɔlɔ́ kə dɔ ɓāl̄ gə̄ malang bátə́ kadə̄ oyń.
3Dəyá̰ kə́ majə i kadə̄ karī kə́ gātən i ngá̰ý,
kə́ adə̄n̄ nge ɓōĺ ndíĺ Kɔ́ɔ̄ɓē.
4Ká dəngam ní i nge kənge yá̰a̰, aláa i nge ndoō gə̄gē anī,
kemən nelə̄n ō, dɔ kumən i kə rɔ̄nelé ngándáńg ō.
Deē taā kem de kə́ dəyá̰ alé
5Yá̰a̰ gə̄ i mətá kə́ m̄-ɓōĺdə́ ō,
kə́ nge kṵ sɔ́ rāām̄ kə́ ɓōĺ kə́ ngá̰ý ō:
adə̄ i sor̄ kə́ kem ɓēé ō, i kósə de gə̄ kə́ kánə̄n̄ naā ō,
i najə̄ kə́ sor̄ kə́ tetə sip kəndā dɔ deē tə́ ō. Yá̰a̰ gə̄ ń nuū malang ní, majən̄ aĺ ngá̰ý tɔȳ yo.
6Banī dəyá̰ kə́ rāā nii dɔ ngaan tə́ kə dəyá̰ madə̄neé, i yá̰á̰ kə́ tōr̄ kə́ tɔȳ yá̰á̰ kə́ tōr̄ kə́ rang gə̄ ō i wur kɔl ō,
i ta ndo̰ dəyá̰ ní n rāā yá̰á̰ kə́ tōr̄ gə̄ ń nuū malang ní ō.
7Dəyá̰ kə́ nge kem ndul i njúkə́ kə́ míndə man̄g gə̄ tə́ kə́ a wél̄.#26.7 Njúkə́ kə́ a wél̄: i njúkə́ kə́ a adə̄ i man̄g gə̄ do.
Deē ń sāā tetə dɔn ní, sāā i kəhɔ kókə́rang kə jīneé.
8Dəyá̰ kə́ kasə rāan i nge rāā deē kadə̄ wūn̄g rāan ngá̰ý ō,
asə ɓɔ̄ɔ̄ dɔ rɔ̄sɔl̄ yān kə́ ngá̰ý aĺ ō.#26.8 Rɔ̄sɔl̄ yān: kumən na asə ngɔ̄m̄ hɔ̄r̄mō̰ yān alé, aláa asə kán̄ gō rɔ̄n alé.
9Deē a ger̄ dəyá̰ kə́ nge nung i lo ka̰a̰ lo yān tə́ ō,
i dɔ kumən tə́ ō.
10Ré ngōnīí kə́ dəyá̰ ger̄ lo kəhɔ rɔ̄n dɔ yá̰a̰ tə́ aĺ anī, ə̄ndā kumií gírən tə́ ādə̄ tɔȳ kə́ kété.
Na sōgə́ ənge ta róbə anī, a rāā yá̰á̰ ń kemən gḛy ní.
11Ə̄ndā kumií gír ka̰a̰ lo yān kə́ kə ɓōló aĺ tə́ ō,
ré gólī anī, ādə̄ ɔr kumií aĺ ō.
12Ni i tītə̄ nge njə̄rā mbā kə́ kəndā rāan ngá̰ý kə́ teē tan
a̰ȳń man̄ kə́ ta kəga dɔ ń ənge ní beē.
Adə̄ dəngam gə̄ malang ń a sāān̄ kəhɔn yā ɓirə̄n dagə kə̄ rɔ̄də́ tə́ ní, a əya̰ rɔ̄n i kə̄ kem jīdə́ tə́ ō,
kum gərā gə̄ malang ń nuū ní, a teē ta ngong gərā yān yā kadə̄də́ ō.
Ɓōkə́n̄ dəyá̰ kə́ majə ɔtə̄ kə taá tɔ̄ȳ
13Majə dəyá̰ i rɔ̄nel̄ yā ngaan ō,
ger̄ rāā yá̰a̰ yān rāā adə̄ ni ngɔ̄m̄ ngaan adə̄ ndi kə rɔ̄ ngangá ō.
14Dəyá̰ kə́ ɔr̄ najə̄ ngá̰ý aĺ i kadə̄ karī yā Kɔ́ɔ̄ɓē ō,
deē ń ɔjə̄nən̄ majə ní, yá̰á̰ kə́ asə seneé gətóo ō.
15Dəyá̰ kə́ ngɔ̄m̄ hálən i kadə̄ karī kə́ majə tɔȳ gotə kadə̄ karī gə̄ ō,
dəyá̰ kə́ ngɔ̄m̄ rɔ̄n i dəyá̰ kə́ gātən i ngá̰ý ō.
16Dəyá̰ kə́ majə ɔtə̄ kə taá kə́ ndi kem kújə yān kə́ yá̰á̰ kə́ kemeé gə̄ i kə́ tə́ndādə́ kə gōó gōó ní,
majən to i tītə̄ mbang kə́ ḭḭ kə̄ dɔɔ́ tul beé.
17Deē ń kāgə̄ rɔ̄n majə ní,
ta kumən to i tītə̄ hor kə́ ta bay tə́ kə́ unjə̄ kow kem kújə yā Kɔ́ɔ̄ɓē tə́ beē.
18Kāsə̄ deē kə́ majə kə́ ndi ta kúkə̄lú njan kə́ ngān̄g tə́,
to i tītə̄ lɔ́ŕ kə́ to kə ngālāá ɓururu kə́ əlan̄ tū njan kə́ rāā kə gində̄ arjā̰a̰á̰ tə́ beē.#26.18 Kem makətūbə̄ kə́ ngá̰ý gə̄ tə́ ní, kəlān kə́ nge kṵ kutə gidə i ndōhó bátə́ kutə jōó gidə i sīrí ní gətóo tū tə́.
Yá̰á̰ kə́ tōr̄ ngá̰ý gə̄ mətá kə́ rāān̄ yá̰a̰
28Yá̰á̰ kə́ adə̄m̄ rɔ̄nel̄ aĺ gə̄ i jōó ō,
kə́ nge kṵ mətá rāām̄ adə̄ wūn̄g rāām̄ ō:
i áskar kə́ nal̄ yá̰a̰ sɔɔ̄ń ndoō kə́ rāan ō,
i de gə̄ kə́ kur̄ dɔdə́ ger̄ yá̰a̰ gə̄ kə́ de gə̄ kídə̄n̄də́ kɔ̄ɔ́ ō,
i deē kə́ əya̰ rāā yá̰á̰ kə́ gōtə́ kɔ̄ɔ́ ba rāań majaĺ ō:
Kɔ́ɔ̄ɓē əndān i kə rī kadə̄ oy yo kaskar.
Yá̰a̰ gə̄ ń nāān̄ nge gātə̄ yá̰á̰ ní
29Kadə̄ nge kigə yá̰a̰ gōn̄g yá̰a̰ rāā kə́ gōtə́ aĺ ní, i yá̰á̰ kə́ ngan̄g ngá̰ý ō,
nge gātə̄ yá̰a̰ a ndi kanjə̄ rāā majaĺ aĺ ō.
Currently Selected:
JEJU KƏ́ NGŌN̄ SIRAK 26: SARDC
Highlight
Copy
Compare
Share
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.