JEJU KƏ́ NGŌN̄ SIRAK 23
23
1Kɔ́ɔ̄ḿ ō, bɔbə́ḿ ō, ngoləḿ ō, ī-lōō kəya̰m̄ kadə̄ taḿ hɔɔ́lɔ̄ ō,
kadə̄ taḿ ənīm̄ kɔ̄ɔ́ ō.
2M̄-ndə̄ngā kadə̄ deē əndam̄ tām̄ gír̄ yāḿ gə̄ tə́ ō,
əndā dɔḿ tə́ kadə̄ kumḿ edə̄ ō,
kadə̄ ré m̄-ndúm̄ anī kɔ́ɔ̄ əya̰m̄ kanjə̄ kəndam̄ aĺ ō,
m̄-rāā yá̰á̰ kə́ gōtə́ aĺ gə̄ anī, əya̰m̄ kanjə̄ kəndam̄ najə̄n tə́ aĺ ō.
3Na sōgə́ yá̰a̰ rāāḿ kə́ gōtə́ aĺ gə̄ ojən̄ naā ngá̰ý ō,
majaĺ yāḿ gə̄ reēn̄ kə̄ dɔ naā tə́ ō.
I beé tá m-ā m-ə̄sō nang tə́ no madə̄ kɔ̄lə̄ḿ gə̄ tə́ aĺ ō,
madə̄ ba̰ā̰ḿ a tɔ̄ȳ jīn dɔḿ tə́ aĺ ō.
4Ɓɔ́ Kɔ́ɔ̄ɓē Nə́ɓā yāḿ ō bɔbə́ḿ ō,
ī-lōō kadə̄m̄ kum kə́ a a̰a̰ lo kə kɔjə rɔ̄ɔ́ ō,
5ī-lōō kadə̄ kum ndaa yá̰a̰ rāām̄ ō.
6Ādə̄ ɓōō sāā naā ń i yá̰á̰ kə́ nel̄ ta deē ní, tɔ́gən tɔȳ yāḿ alé.
Ī-lōō kəya̰m̄ kadə̄ ngur sāā naā lo kaya tə́ rāām̄.
Kubə
7Ngánə́ḿ gə̄ ōōī, ā ī-rāāī i ba̰ý n ā ī-ngɔ̄mīiń ta ndo̰o̰sí lo kɔr̄ najə̄ tə́ ní?
Deē ń əndā kumən gíŕ yá̰á̰ ndóō ń toō tə́ ní, najə̄ a əhɔn aĺ bátə́!
8Nge rāā majaĺ əya̰ rɔ̄n adə̄ tan nəkɔ́ əhɔn.
Nge mbóo kə deé ō, nge kɔjə rɔ̄n ō ní, tadə́ rāā rɔ̄n i bə̄dē kə́ əgadə́ adə̄ teē əsōn̄ tə́.
9Ī-lōō kadə̄ kubə tél i jī bēl̄ lo rāā yá̰á̰ kə́ əhɔ taí kɔ̄ɔ́ ō,
ī-lōō kadə̄ kəda rī nge kə́ táĺ #23.9 Nge kə́ táĺ: i Nə́ɓā. Rīn na i YHWH tél i jī bēl̄ lo rāā yá̰a̰ yāí ō!
10Ɓəlo ń əndān̄ kumdə́ gírən tə́ tḛ tḛ ní,
tə́ré ndéy a to rɔ̄n tə́ i ngándáńg.
Adə̄ deē ń ni a túbə i kə kum mbang gə̄ malang ō, a əda rī Nə́ɓā i kə kum mbang gə̄ malang ō ní,
majaĺ yān a to i ngándáńg tītə̄ ń nuū ō.
11Deē ń a túbə i mbée dejə ní, a kán̄ i yá̰a̰ rāā kə́ gō tə́ aĺ gə̄ kə̄ dɔ naā tə́ ō,
ndéy a to i kem ndogə̄ yān tə́ kə dɔ ndɔ̄ gə̄ ō.
Ré ni túbə i gō ger̄ aĺ tə́ anī, majaĺ yān a tél a əsō i dɔn nəkɔ́ tə́ ō,
ré ni túbə i túbə́ kə́ rɔ̄kum aĺ anī, majaĺ yān i majaĺ kə́ nja jōó ō.
Ré ni túbə i dɔ lám̄ tə́ anī, sarya a əhɔn ō,
yá̰á̰ kə́ tōr̄ a rāā de kə́ kem ndogə̄ yān tə́ gə̄ ngá̰ý ō.
Kɔjə̄ kə́ dɔ kɔr̄ najə̄ kə deé tə́
12Lo kɔr̄ najə̄ kə́rēý kə́ to tītə̄ yo i nuú:
ādə̄ deē oō najə̄ kə́ tītə̄ ń nuū gír kaa yā Jakob tə́ alé!
Tām̄ ngé rāā yá̰a̰ kə gō ń Nə́ɓā ndigə ní gə̄, i ngé ra sa̰y kadə yá̰á̰ kə́ beé gə̄ tə́ ō,
nin̄ ɓɔ́ɓə̄lɔ̄n̄ rɔ̄də́ kum majaĺ gə̄ tə́ aĺ bátə́ ō.
13Ī-lōō kadə̄ najə̄ kə́ dɔ sāā naā tə́ kə́ majə kɔr̄ aĺ əhɔ taí,
tām̄ i ta róbə rāā majaĺ kə najə̄ kə́ ta tə́.
14Ādə̄ əga kemií dɔ bɔbí tə́ ō kṵ́ṵ́í tə́ ō,
dan ń ā ī-ndi dan de kə́ bo gə̄ tə́ ní,
na sōgə́ dɔí ndígə̄nal kadə̄ ḭ̄ i dandə́ tə́,
adə̄ ḭ́ḭ ɔ̄r̄ mbóo najə̄ tām̄ əhɔī ta tə́ kɔ̄ɔ́.
Lo ń nuū tə́ ā ə́da na ké ojiīn̄ i tām̄ rí tə́ wa ō,
ā ī-ndɔ̄ĺ ndɔ̄ kojií ō.
15Deē ń najə̄ kə́ majə kɔr̄ aĺ əhɔ tan kɔ̄ɔ́ ní,
lo kɔjə̄n a gətóó bátə́ kadə̄ oyń.
Rāā kaya dəyá̰
16De kə́ ngé rāā majaĺ ngá̰ý gə̄ gíŕdə́ i jóo,
ba kə́ nge kṵ mətá a ndɔ́r̄ i wūn̄g yā Nə́ɓā kə̄ dɔn tə́.
Ngé kə́ ta kəga dɔ gə̄ i ngé gə̄ ń ngur sāā naā rāādə́ ngá̰ý tītə̄ hor kə́ a ṵṵ beé ní.
Yá̰á̰ ń ngurən rāādə́ ngá̰ý ní, ré əngen̄ pá tá kemdə́ tetə ɓáý.
Kutə̄ gō i dəngam kə́ nge ɓīī kə dəyá̰ kə́ rá nəkɔ́ ń əngen ní.
Ni a naa kə̄ lo rāā yá̰á̰ tə́ i tītə̄ ń nuū, bátə́ kadə̄ ngur kə́ kemən tə́ nujə seneé kɔ̄ɔ́ tītə̄ hor beé.
17Tām̄ yā dəngam kə́ nge ɓīī kə dəyá̰ kə́ rá nəkɔ́ ń əngen ní tə́ ɓáa, dəyá̰ malang i kə́ yā ɓīī seneé,
ré oy i mbé tá a asən ɓáý.
18Ta tɔ̄l̄ ta i dəngam kə́ nge ra dɔ ndūn tə́ kə nə̄yá̰neé alé.
Ni ɔr̄ najə̄ kə rɔ̄neé əda na: I náā n a asə ka̰a̰m̄ ní?
Loo kə́ ndɔ̄ɔ́ gīr̄ gidəḿ ō, ndogə̄ bɔr gə̄ utə̄n̄ gidəḿ kɔ̄ɔ́ ō,
adə̄ deē asə ka̰a̰m̄ alé. Ní, kə m̄-ɓōĺ i najə̄ rí tə́?
Yá̰a̰ rāāḿ kə́ gōtə́ aĺ gə̄ ní, a usə Nge Ndi dɔ rā̰ tə́ dɔ tə́ alé.
19Yá̰á̰ ń adə̄n ɓōĺ ngá̰ý ní, i kum de gə̄.
Banī kum Kɔ́ɔ̄ɓē ń
ndə́lē tɔȳ mbang ní, ni ger̄ alé.
Ni ger̄ kadə̄ kum Kɔ́ɔ̄ɓē a̰a̰ de gə̄ malang lo njə̄rā tə́ aĺ ō,
a̰a̰ gə́le lo gə̄ kə́ ton̄ lo ɓɔ̄ɔ̄ rɔ̄ tə́ tɔȳ gotə gə̄ malang aĺ ō.
20Yá̰a̰ malang ń ni rāā ní, ger̄də́ kété pá tá rāādə́ ɓáý ō,
dan ń rāādə́ oy anī, ger̄də́ malang ō.
21Deē ngeé ń toō a ənge ndéy i ndágə lo gə̄ kə́ kem ɓēé tə́ ō,
ni a rāā kadə̄ a əhɔnən̄ lo kə́ ni gír̄ kadə̄ a əhɔnən̄ tū tə́ aĺ bátə́ tə́ ō.
Dəyá̰ kə́ nge rāȳ
22Dəyá̰ ń sāā dəngam kə́ rang ojəń ngōn̄
kə́ kadə̄ ndɔ̄ń tə́ a kán̄ ta yá̰a̰ ndəbā yā ngaan ní, yān i tītə̄ ń nuū ō.
23Kə́ ta kəga dɔ ní, ni mbātə́ i ndū najə̄ yā Nge Ndi dɔ rā̰ tə́ ō,
kə́ nge kṵ jōó, rāā i yá̰á̰ kə́ gōtə́ aĺ kə ngaaneé ō,
kə́ nge kṵ mətá, rāȳ i mbée ō
n ojəń ngán gə̄ kə dəngam kə́ rangaá ní.
24A aw̄n̄ kə dəyá̰ ní no ngé kán̄ naā gə̄ tə́ ō,
a ndəlen̄ gír najə̄ yā ngánən gə̄ ní ō.
25Ngánən gə̄ a ton̄ i tītə̄ kāgə̄ kə́ əla ngəran nang tə́ aĺ ō,
kə́ ta jīn gə̄ a̰nə̄n̄ aĺ ō beé.
26Ndɔ̄ĺ i dɔ dəyá̰ ngeé ń toō tə́,
adə̄ ká ré ni oy kɔ̄ɔ́ gə̄gē anī, de gə̄ a ndɔ̄ĺnən̄ ɓáý lo ń əga kemdə́ dɔn tə́ ní.
27Ngé gə̄ ń a ndin̄ gotən tə́ ní,
i tītə̄ ń nuū n a ger̄nəń kadə̄ yá̰á̰ kə́ majə asə kə ɓōĺ ndíĺ Kɔ́ɔ̄ɓēé gətóo ō,
yá̰á̰ kə́ nel̄ tɔȳ rāā yá̰a̰ gə̄ ń Kɔ́ɔ̄ɓē əda kadə̄ yā rāā ní gətóo ō ní.
Currently Selected:
JEJU KƏ́ NGŌN̄ SIRAK 23: SARDC
Highlight
Copy
Compare
Share
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.