JEJU KƏ́ NGŌN̄ SIRAK 22
22
De kə́ yay
1De kə́ yay to i tītə̄ mbal̄ kə́ bɔr i gidə tə́ beē,
adə̄ nel̄ de gə̄ malang seneé aĺ ngá̰ý ō, a mbóon̄ i seneé ō.
2De kə́ yay to i tītə̄ bəra yedə̄ beé:
nge kunən a ɔl i jīn.
Ngáń kə́ nujə kɔ̄ɔ́ gə̄
3Kadə̄ deē i bɔbə̄ ngōn̄ kə́ kɔjə̄ dūún ní, i yá̰á̰ kə́ to rɔ̄sɔl̄ ō,
kojə ngōn̄ kə́ dəyá̰ i tḭ̄ḭ̄ ta deē ō, nar ō.
4Ngōn̄ kə́ dəyá̰ kə́ ngáā a ənge dəngam,
banī ngōn̄ kə́ dəyá̰ kə́ nge kəla rɔ̄sɔl̄ dɔ deē tə́ i nge kadə̄ bɔbə̄n wur kɔl.
5Dəyá̰ kə́ ɓōĺ ndíl deē aĺ i rɔ̄sɔl̄ yā bɔbə̄n ō, yā ngaan ō.
Nin̄ jōó mbak a idən̄ tadə́ gírən tə́.
6Kɔ̄l̄ kə́ kə kum mbangneé alé to i tītə̄ kɔdə rɔ̄nel̄ kə́ kənda ndɔ̄ yo tə́ beē.
Banī kənda deē kə sálangaá ō, ndóō deē yá̰a̰ kə ngangá kadə̄ ger̄ ō, i kum kedə̄ kə́ to i kə kum mbang gə̄ malang. #22.6 Kem makətūbə̄ kə́ ngá̰ý gə̄ tə́ ní, kəlān kə́ nge kṵ sīrí ō, sɔ́sɔ́ ō gətóo tū tə́.
Dáwá sapə gətóo
9Ndóō de kə́ sapə yá̰a̰ i tə́lá gájə́ jóó kə́ tɔ̄ɔ̄ kɔ̄ɔ́ ta naā tə́ gogə́,
aláa to i tītə̄ ndól̄ de kə́ ɓīī ənda gōn kɔ̄ɔ́ dɔ ɓīī tə́.
10Kɔr̄ najə̄ kə de kə́ sapaá to i tītə̄ kɔr̄ najə̄ kə de kə́ a ɓīī beé.
Ta tɔ̄l̄ ta anī a dəje na ké i rí n rāā yá̰a̰ wa.
11Ī-nūū de kə́ koy tām̄ əya̰ lo kunjə̄ kɔ̄ɔ́.
Ī-nūū de kə́ sapə tām̄ kur̄ dɔn gətóo.
Ī-nūū de kə́ koy kə wurkatá ngá̰ý alé, tām̄ ənge lo kɔr̄ koō.
Banī ndi kə kumuú yā de kə́ sapə majə aĺ tɔȳ yo.
12A əndān̄ yo de kə́ koy i ndɔ̄ sīrí,
banī yā de kə́ sapə ō, nge rāā yá̰a̰ kə gō kem ndigə yā Nə́ɓāá aĺ ō ní, i kə dɔ ndɔ̄ gə̄ malang ń ndinə̄ń kə kumdə́ ní.
13Ī-lōō kɔr̄ najə̄ kə́ rang gə̄ ngá̰ý kə de kə́ mbóó ō,
njə̄rā kə de kə́ kur̄ dɔn gətóó ō.
Ī-lōō kadə̄ ger̄ dɔ jīí na sōgə́ á̰á̰ tápə̄ ō,
yéȳ rɔ̄n anī yá̰á̰ kə́ yḛr ɔdə rɔ̄í ō.
Ré ī-ndigə kəndi lɔm anī, ī-gōngən ō,
ré ī-ndigə kadə̄ yá̰a̰ rāan kə́ lo de kə́ mbóó tə́ nujə kemií aĺ anī, ī-gōngən ō.
14Yá̰á̰ kə́ ɔȳ tɔȳ dɔrnō i rí?
I de kə́ sapə ngóy aĺ a?
15Kətō sákə̄ nán̄g, aláa sákə̄ katə̄, aláa gində̄ kə́ ngāl̄,
i sóótə́ tɔȳ tə́gā ta gír de kə́ dɔn nujə tə́.
16Kāgə̄ kújə́ kə́ tṵ́ṵ̄ ta naā tə́ adə̄ ngan̄g ní,
ká ré dɔ nang ndew gə̄gē anī, a ɔr̄ ta naā tə́ alé.
17Yá̰á̰ kə́ deē ra dɔ tə́ yā rāā gō gír̄ yá̰á̰ kə́ kə kum kedēé tə́ ní,
to i tītə̄ gidə kújə́ kə́ tə́ya̰ kadə̄ ngan̄g beé.
18Ngán kɔ̄sə̄ kə́ gidə ndə́lē gə̄ kə́ kán̄ dɔ naā tə́ lo kə́ ḭḭ kə̄ dɔɔ́ tə́ ní,
ré nél əla anī, a ton̄ gotə kógə̄ḿ alé.
Deē kə́ gír̄ kə́ to mbóo gə̄ əlan̄ ɓōĺ kemən tə́,
a asə ra gotoó no yá̰á̰ kə́ to ɓōĺ tə́ aĺ i tītə̄ ń nuū ō.
Yā kadə̄ madə̄ naā toń kum kə̄ kété
19Nge kənda kum deē i nge rāā kadə̄ kum deē a̰ā̰ man̄ ō,
nge sókə̄ kem deē i nge rāā kadə̄ gír̄ kə́ tū tə́ gə̄ teēn̄ ndágá ō.
20Nge tə́nī yel̄ gə̄ kə mbalá i nge rāādə́ kadə̄ a̰ȳn̄ naā ō,
nge kɔ̄l̄ kə madə̄ taneé a nujə madə̄ naā yādə́ ō.
21Ré ɔ̄r̄ kaskar yāí dɔ madə̄ taí tə́ anī,
ī-lōō kəda na lo rāan kə́ rang tṵ na gətóo. Tām̄ ā ī-téliī yā kəndā najə̄ naā tə́ karī.
22Ré ī-kɔ̄l̄ kə madə̄ taí anī,
ī-lōō sōl̄ yá̰á̰ kógə̄ḿ na ásiī tél kəndā najə̄ naā tə́ karī.
Banī tájə̄ ndū ō, ndájə̄ najə̄ ō, kɔr̄ gír naā ō, ndéý kə́ mān̄ dɔ ndū najə̄ ō,
i yá̰a̰ gə̄ ń nuū n a rāā kadə̄ ká ré i madə̄ taí kə́ ba̰ý gə̄gē anī, a əya̰ī kɔ̄ɔ́ ní.
23Lo ń ré deē madí ndoō anī, ī-rāā ādə̄ adī kemən,
yā kadə̄ ré ni ənge yá̰a̰ anī, ā ī-teē dɔɔ́ kə ta kūl̄neé.
Dan ń yá̰á̰ kə́ tōr̄ əsō dɔn tə́ anī, ə́ya̰n kɔ̄ɔ́ alé.
Lo ń nuū tə́ ní, ré ənge yá̰a̰ ndəbā anī, a adī tə́ sḛ́ý.
24Tītə̄ ń deē a̰a̰ kəngā hor ō saa hor ō anī əda na hor i nuú ní,
tájə̄ ndū i kété pá tá mósə a a̰ȳ gō tə́ ɓáý.
25Rɔ̄ḿ a sɔlə̄m̄ lo rɔ̄ɔ̄ tə́ dɔ madə̄ taḿ tə́ aĺ ō,
m-ā m-ə́ja rɔ̄ḿ kɔ̄ɔ́ tan tə́ aĺ ō.
26Ba ré yá̰á̰ kə́ majə aĺ rāām̄ najə̄ yān tə́ anī,
de gə̄ malang ń a oōn̄ gotə ní kemdə́ a taā yān alé.
Ndɔ̄ȳ kə́ yā kadə̄ deē ṵṵń ɓē dɔ rɔ̄n nəkɔ́ tə́
27I náā n a əndā deē kadə̄ ngɔ̄m̄ taḿ ō,
a əndā mbō̰ taḿ tə́ kadə̄ m-ɔ̄rəń kə̄ nuú aĺ ō,
yā kɔgə̄ń kadə̄ taḿ ənīm̄ kɔ̄ɔ́ ō,
kadə̄ ta ndo̰o̰ḿ tḭ̄ḭ̄ ta rɔ̄ḿ kɔ̄ɔ́ ō ní?
Currently Selected:
JEJU KƏ́ NGŌN̄ SIRAK 22: SARDC
Highlight
Copy
Compare
Share
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.