JEJU KƏ́ NGŌN̄ SIRAK 21
21
Ā̰ȳ kɔ̄ɔ́ no majaĺ tə́
1Ngōnə̄ḿ, ī-rāā majaĺ a? Ī-tél ī-rāā gogə́ tṵ aĺ ō,
yá̰á̰ kə́ gōtə́ aĺ gə̄ ń ī-rāā kété ní, ī-dəje māȳ rɔ̄ najə̄n tə́ ō.
2Ā̰ȳ kɔ̄ɔ́ no majaĺ tə́, tītə̄ lo ka̰ȳ kɔ̄ɔ́ no lī tə́ beē.
Tɔdɔ̄ ré āw̄ ngɔr rɔ̄n tə́ anī a əgaī.
Ngāngən i ngān̄g ɓɔl
kə́ a tɔ̄l̄ deē.
3Mān̄ dɔ ndū najə̄ malang to i tītə̄ kaskar kə́ tan atə dām̄ jōó beē.
Do ń ni adə̄ deē ní, dáwán gətóo.
4Rāā yá̰a̰ kə dó̰nó ō, kɔjə rɔ̄ ō, i yá̰a̰ gə̄ kə́ rāān̄ yá̰a̰ kənge yā deē adə̄ udə kɔ̄ɔ́:
a nujən̄ kújə yā nge kɔjə rɔ̄ i tītə̄ ń nuū ō.
5Ndɔ̄ȳ yā nge ndoō əsō mbī Nə́ɓā tə́ ō,
ni rāā yá̰á̰ kə́ gōtə́ yā kadə̄n kanjə̄ kɔr bā̰ā̰ ō.
6Deē ń kɔ̄lə̄n̄ seneé anī nelə̄n aĺ ngá̰ý ní, un i gō tóo nge rāā majaĺ.
Ba deē ń ɓōĺ ndíĺ Kɔ́ɔ̄ɓē ní, a tél a ndə̄ngā rɔ̄n kemən tə́ tām̄ yá̰a̰ rāan gə̄ kə́ gōtə́ aĺ tə́.
7De gə̄ malang gerə̄n̄ de kə́ nge kɔr̄ najə̄ majə.
Banī de kə́ nge gír̄ yá̰a̰ ger̄ yá̰a̰ rāan gə̄ kə́ gōtə́ aĺ.
8Nge rāā kújə kə nar yā de kə́ rangaá
to tītə̄ kə́ ɔy i kɔkərɔ kə̄ dɔ naā tə́, yā kadə̄ ndɔ̄ń tə́ anī tél bəlo yon beé.
9Ngé rāā yá̰a̰ kə gō kem ndigə yā Nə́ɓāá aĺ gə̄ ń kánə̄n̄ naā ní, ton̄ i tītə̄ mu kə́ tutə kə́ kán̄ dɔ naā tə́ beē:
ta tɔ̄l̄ tadə́ i kum hor kə́ ṵṵ biləm biləm tə́.
10Róbə yā ngé rāā majaĺ gə̄ gidə asə naā ō, kɔkərɔ gə̄ gətóon̄ tū tə́ ō.
Banī bəlo kə́ ɗúú ngá̰ý ń i lo kə́ ɓádá ní, i ta tɔ̄l̄ ta tə́.
Nge kum kedə̄ ō, de kə́ sapə ō
11Nge kun gō ndū najə̄ yā Kɔ́ɔ̄ɓē i nge kṵ ɓē dɔ gír̄ kə́ kemən tə́ ō,
ta tɔ̄l̄ ta ɓōĺ ndíĺ Kɔ́ɔ̄ɓē i kum kedə̄ kə́ deē a ənge ō.
12Deē ń jīn əhɔ bəra gōsə̄ aĺ ní, a asə ndóō yá̰a̰ ger̄ alé.
Banī jī kə́ əhɔ bəra gōsə̄ kógə̄ḿ kə́ asə rāā deē kadə̄ wurən atə̄n to nuú.
13Ger̄ yá̰a̰ yā nge kum kedə̄ to i tītə̄ man̄ bā kə́ rosə kem kārən ba teē kə̄ ndágá beē.
Kɔjə̄ yān to i tītə̄ man̄ kə́ unjə̄ njáý njáý kə́ əɓa nang tə́ beē.
14Dan wur de kə́ sapə to i tītə̄ jóó kə́ tɔ̄ɔ̄ beé,
adə̄ yá̰á̰ ń ni ndóō ní a ndi dɔn tə́ alé.
15Ré de kə́ ger̄ yá̰a̰ oō najə̄ kə́ kə kum kedēé anī,
ndigə ō, əda yān dɔ tə́ ō.
Banī de kə́ nujə kɔ̄ɔ́ ré oō najə̄ ní anī nelə̄n aĺ ō,
taā ənī kə̄ gōn tə́ kɔ̄ɔ́ ō.
16Najə̄ kɔr̄ de kə́ sapə to i tītə̄ yá̰á̰ kə́ ɔȳ kə́ to kum róbó beē.
Banī najə̄ kɔr̄ de kə́ kur̄ dɔn ger̄ yá̰a̰ nel̄ ngá̰ý.
17Loo kán̄ naā tə́ ɓáa de gə̄ a sāān̄ i koō najə̄ kɔr̄ de kə́ ngáā ō,
de gə̄ gírə̄n̄ yá̰á̰ ngá̰ý dɔ najə̄ kɔrə̄n tə́ ō.
18Kum kedə̄ to i tītə̄ ngísə́ kújə beé tām̄ yā de kə́ sapə tə́ ō,
kɔr̄ najə̄ kə́ əhɔ naā aĺ i yá̰a̰ yā de kə́ kur̄ dɔn gətóo ō.
19Tām̄ yā de kə́ sapə tə́ ɓáa yá̰á̰ ndóō i kángə́lá kə́ ənīn̄ nja deē tə́ ō,
i nə̄ngá gində̄ kə́ ənīn̄ jī deē kə́ kṵṵ́ tə́ əhɔnə̄ń ō.
20De kə́ sapə a əgō i kə̄ dɔɔ́ ō, i kə tɔ́gəneé ō.
Ba de kə́ kumən edə̄ a mūŕ i kəgō jəke.
21Tām̄ yā de kə́ ngáā tə́ ɓáa yá̰á̰ ndóō i yá̰á̰ súū rɔ̄ kə́ rāān̄ kə lɔ́rɔ́ ō,
i nə̄ngá kə́ majə kə́ jī kṵṵn tə́ ō.
22De kə́ sapə a udə kújú i bəring,
ba de kə́ ger̄ yá̰a̰ a udə i jəke.
23De kə́ mbóo a ra i ta róbə́ kújə́ tə́ n a a̰a̰ń lo kə̄ kem kújú,
ba de kə́ ngáā a ra i ndágá.
24Kəra ta róbə́ kújə́ tə́ koōń najə̄ i yá̰a̰ rāā de kə́ mbóo,
nge ń nuū i yá̰á̰ kə́ to rɔ̄sɔl̄ tām̄ yā de kə́ ngáā tə́.
25Ta ngé kɔr̄ najə̄ wa gə̄ tél a əda i yá̰á̰ kə́ de kə́ rang gə̄ ədan̄ kɔ̄ɔ́ ɓá,
ba de kə́ ngáā gə̄ mbɔ̄jə́n̄ kɔȳ najə̄ kɔr̄də́ kə yá̰a̰ mbɔ̄jə́ kɔȳ yá̰á̰.
26De kə́ sapə ɔr̄ najə̄ pá tá gír̄ yá̰á̰ ɓáý,
ba de kə́ ngáā gíŕ yá̰á̰ pá tá ɔr̄ najə̄ ɓáý.
27Dan ń nge rāā yá̰a̰ kə gō kem ndigə yā Nə́ɓāá aĺ ndɔ̄ĺ madə̄ kɔ̄lən anī,
ndɔ̄ĺ i rɔ̄n nəkɔ́.
28Nge tām̄ kə deé i nge yḛr rɔ̄n nəkɔ́ ō,
de gə̄ malang ń ndin̄ gīrə̄n̄ gidən ní nel̄də́ seneé aĺ ngá̰ý ō.
Currently Selected:
JEJU KƏ́ NGŌN̄ SIRAK 21: SARDC
Highlight
Copy
Compare
Share
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.