JEJU KƏ́ NGŌN̄ SIRAK 17
17
Yá̰á̰ ń majə kadə̄ de gə̄ tél adə̄n̄ Nə́ɓā gogə́ ní
1Kɔ́ɔ̄ɓē ɔy i nang n rāań deē ní ō,
rāā adə̄ deē tél aw̄ gogə́ tū tə́ ō.
2Ni adə̄ de gə̄ ndɔ̄ gə̄ kóndóńg wań ō, adə̄də́ dɔ kāgə̄ lo
kə́ kadə̄ ṵṵnə̄ń ɓē dɔ yá̰a̰ gə̄ kə́ dɔ nang tə́ tə́ ō.
3Adə̄də́ tɔ́gə́ kə́ tītə̄ yān nəkɔ́ beē ō,
rāādə́ adə̄ teēnən̄ ō.
4Ni rāā adə̄ yá̰a̰ malang kə́ ndi kə kumneé ɓōĺdə́ ngá̰ý,
yā kadə̄ nin̄ ndin̄ dɔ dā̰ kə́ bembeé gə̄ tə́ ō, yel̄ gə̄ tə́ ō. #17.4 Kem makətūbə̄ kə́ ngá̰ý gə̄ tə́ ní, kəlān kə́ nge kṵ mí gətóo tū tə́.
6Ni adə̄də́ wīī dɔdə́ kadə̄ gír̄nəń yá̰a̰ ō, adə̄də́ ndo̰də́ ō, kumdə́ ō,
mbīdə́ ō, dan wurdə́ kadə̄ gír̄nəń yá̰a̰ ō.
7Ni adə̄də́ yá̰a̰ ger̄ ō, kur̄ dɔdə́ ō, adə̄ rosə kemdə́.
Ni ɔjədə́ yá̰á̰ kə́ majə ō, kə́ majə aĺ ō.
8Ni rāā adə̄ ɓōlə́n̄ ndílən kemdə́ tə́,
yā kɔjəńdə́ kadə̄ kəla rāan gə̄ i kəla kə́ bo ngá̰ý gə̄. #17.8 Kem makətūbə̄ kə́ ngá̰ý gə̄ tə́ ní, kəlān kə́ nge kṵ ndōhó gətóo tū tə́.
10Anī nin̄ a tɔ̄ȳn̄ rīn kə́ táĺ,
yā kənīń gotə majə kə́ kəla rāan gə̄ majən̄ ngá̰ý.
Ndū najə̄ kə́ dɔ madə̄ naā tə́
11Ni adə̄də́ yá̰a̰ ger̄ dɔ tə́ ɓáý tṵ.
Rāā kem majə sedə́, adə̄də́ ndū najə̄ ń a rāā kadə̄ ndinə̄ń kə kumdə́ ní.
12Ni əhɔ madə̄ naā kə́ a to ngándáńg sedə́ ō,
ɔjədə́ yá̰a̰ gə̄ ń ni ra dɔ tə́ yā rāā ní ō.
13Kumdə́ a̰a̰ majə kə́ kɔsə go̰n yān majə ngá̰ý ō,
mbīdə́ oō ndūn kə́ to kɔsə go̰n ō.
14Ni ədadə́ na: Yá̰a̰ malang kə́ gōtə́ aĺ ní, ī-ngɔ̄mī rɔ̄sí najə̄n tə́.
Ni ɔjə de gə̄ kógə̄ḿ kógə̄ḿ yá̰a̰ gə̄ kə́ kadə̄ rāān̄ kə de gə̄ madə̄də́ gēé.
Yá̰á̰ kə́ Kɔ́ɔ̄ɓē a̰ā̰ aĺ gətóo
15Gō róbə yādə́ gə̄ ton̄ ta kumən tə́ kə kum mbang gə̄ malang.
Yá̰á̰ kə́ kumən a̰ā̰ aĺ gətóo. #17.15 Kem makətūbə̄ kə́ ngá̰ý gə̄ tə́ ní, kəlān kə́ nge kṵ kutə gidə i mehḛ́ gətóo tū tə́.
17Kɔ́ɔ̄ɓē tə́ndā ngār gə̄ kógə̄ḿ kógə̄ḿ dɔ gíŕ nápar de gə̄ tə́,
banī Israel i yān nəkɔ́. #17.17 Kem makətūbə̄ kə́ ngá̰ý gə̄ tə́ ní, kəlān kə́ nge kṵ kutə gidə i sɔ́sɔ́ gətóo tū tə́.
19Yá̰a̰ rāādə́ gə̄ malang ton̄ ta kumən tə́ njóý njóý, tītə̄ lo kə́ kadaá beē.
Kumən a̰a̰ háĺdə́ ngándáńg lo njə̄rādə́ gə̄ tə́.
20Yá̰a̰ rāādə́ kə́ gōtə́ aĺ kə́ ni a̰ā̰ aĺ gətóo.
Majaĺ yādə́ gə̄ malang ton̄ ta kumən tə́. #17.20 Kem makətūbə̄ kə́ ngá̰ý gə̄ tə́ ní, kəlān kə́ nge kṵ kutə jōó gidə i kógə̄ḿ gətóo tū tə́.
22Tām̄ yā Kɔ́ɔ̄ɓē tə́ ɓáa majə kə́ rāā kə deé, to i tītə̄ mbō̰ kə́ kɔr ta yá̰a̰ kənge kə́ deē a ɔdə rɔ̄ aĺ tə́ beé ō,
i yá̰á̰ kə́ najə̄n ngan̄g tītə̄ njár̄ kum deē beé ō.
23Ta tɔ̄l̄ ta anī, ni a ḭḭ dɔɔ́ yā kəndā njadə́.
Ni a əndadə́ najə̄ yá̰á̰ kə́ gōtə́ aĺ gə̄ ń rāān̄ tə́ ní.
24Banī ngé gə̄ ń ndə̄ngān̄ rɔ̄də́ tām̄ yá̰a̰ rāādə́ kə́ gōtə́ aĺ tə́ ní, ni adə̄də́ ta róbə́ tél reē gogə́.
Ngé gə̄ ń jīdə́ ur̄ wak ní, ni əla go̰ kemdə́ tə́.
Ɓārə́n̄ de gə̄ kadə̄ tél reēn̄ gogə́ rɔ̄ Nə́ɓā tə́
25Ī-tūr̄ kumií kə̄ rɔ̄ Kɔ́ɔ̄ɓē tə́, ba ə́ya̰ majaĺ kɔ̄ɔ́ ō,
ī-ra ta kumən tə́ ī-ndɔ̄yń ō. I tītə̄ ń nuū n ā ī-rāań kadə̄ yá̰a̰ rāāí kə́ majə aĺ ngá̰ý téləń kə̄ nang tə́ ní.
26Ī-tél ī-reē gogə́ rɔ̄ Nge Ndi dɔ rā̰ tə́ tə́, ba ī-tūr̄ gidií kɔ̄ɔ́ ta yá̰a̰ rāā kə́ gōtə́ aĺ tə́.
Ādə̄ yá̰á̰ ń i yá̰á̰ kə́ to yḛr kum ní, nelī aĺ ngá̰ý.
27De gə̄ ń ndin̄ kə kumdə́ á a ndadə̄n̄ Nge Ndi dɔ rā̰ tə́ ní,
i náā n a tɔ̄ȳn ɓádá kum gotədə́ ní?
28Dan ń deē oy kɔ̄ɔ́ anī, ndadə̄ gətóo kɔ̄ɔ́ ō.
I dan ń ni ndi kə kumneé ō, rɔ̄n ngan̄g ō ní n ni asə tɔ̄ȳ Kɔ́ɔ̄ɓē ní.
29Kem majə yā Kɔ́ɔ̄ɓē i ngá̰ý.
Ngé gə̄ ń tūrə̄n̄ rɔ̄də́ kə̄ rɔ̄n tə́ ní, ni māȳ rɔ̄n dɔdə́ tə́!
30Deē asə rāā yá̰a̰ malang alé,
tām̄ ngōn̄ deē i yá̰á̰ kə́ a oy.
31I rí n ndə́lē tɔȳ mbang ní?
Ɓá tā ba mbang əngen̄ naā kə nāá nja i ngá̰ý, adə̄ kumən risə tíl.
Deē ń gír̄ rāā yá̰á̰ kə́ majə aĺ ní, to i tītə̄ ń nuū ō.
32Ɓūtə̄ tíyō̰ gə̄ malang kə́ dɔ rā̰ tə́ ní, Nə́ɓā əndā kumən gíŕdə́ tə́.
Banī rāān̄ de gə̄ malang i kə nángāá ō, kə būú ō!
Currently Selected:
JEJU KƏ́ NGŌN̄ SIRAK 17: SARDC
Highlight
Copy
Compare
Share
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.