JEJU KƏ́ NGŌN̄ SIRAK 18
18
Kɔ́ɔ̄ɓē i de kə́ bo
1Nge ndi ngándáńg rāā yá̰a̰ malang kanjə̄ kəya̰ kógə̄ḿ.
2I Kɔ́ɔ̄ɓē kal kógə̄ḿ beē ngóy n a ədan̄ najə̄ yān kə mbērēé na ni i kə́ súūmú ní.#18.2 Kem makətūbə̄ kə́ ngá̰ý gə̄ tə́ ní, kəlān kə́ nge kṵ mətá gətóo tū tə́.
4Yá̰á̰ ń ni a rāā yā rāā ní, əda de kógə̄ḿ kadə̄ əda najə̄n kété alé.
Ní, náā n asə teē dɔ kəla rāan kə́ bo gə̄ tə́ ní?
5I náā n asə mbɔ̄jə́ tɔ́gən kə́ ngá̰ý ní?
I náā n asə kɔjə gotə yá̰a̰ gə̄ ń ni rāā kə ta kūl̄ kem majə yāneé ní?
6Deē asə kɔr̄ yá̰á̰ kógə̄ḿ tū tə́ aĺ ō, kənī yá̰á̰ kógə̄ḿ dɔ tə́ aĺ ō.
Kəla rāan gə̄ kə́ majə ngá̰ý kə́ to kɔr kum gə̄ ní, lo teē dɔ tə́ gətóo.
7Dan ń deē ɔjəń na gír gān̄g anī, i lo ń nuū tə́ n a əga i gíŕ ɓáý ní.
Ba lo ń ré deē dəba anī, i lo ń nuū tə́ n ni ger̄ lo ń ni i tū tə́ aĺ ní.
Deē i rí?
8Deē i rí? Rāān̄ deē i yā rāań rí?
Yá̰á̰ kə́ majə, aláa kə́ majə aĺ ń deē rāā ní, kumən na i rí?
9Ré ni rāā ɓāl̄ ɓú anī, ndɔ̄n gə̄ i ngá̰ý.
10Ɓāl̄ kə́ kóndóńg wań gə̄ ń nuū, ré deē əndādə́ kadə ndɔ̄ gə̄ kə́ ta ngóýdə́ gətóó tə́ anī,
to i tītə̄ man̄ bā bo kə́ əsō sḛ́ý beē ō, tītə̄ kum nán̄g ngárə̄ḿnjēý kə́ kal kógə̄ḿ beē ō.
11I tām̄ najə̄ ń nuū tə́ n Kɔ́ɔ̄ɓē tə́gā tan dɔ de gə̄ tə́ ō,
kumən ṵṵn ngá̰ý tām̄ yādə́ tə́ ō ní.
12Ni a̰a̰ ta tɔ̄l̄ tadə́ ō, ger̄ kadə̄ ta tɔ̄l̄ tadə́ to kum tō ndoō ngá̰ý ō.
I tām̄ najə̄ ń nuū tə́ n ni māȳ rɔ̄n dɔdə́ tə́ nja ngá̰ý ní.
13Kum deē ṵṵn kə deē madə̄neé,
banī kum Kɔ́ɔ̄ɓē ṵṵn kə de gə̄ malang.
Ni gɔríyɔ̄ deē ō, ɔjə deē yá̰a̰ ō, ndóō deē yá̰a̰ ō,
tél reē kə deé gogə́ ō, tītə̄ nge ngɔ̄m̄ yá̰a̰ kul̄ gə̄ beé.
14Ngé ndigə kadə̄ ɔjəńdə́ yá̰a̰ gə̄ ō, rāā yá̰a̰ gə̄ ń ni ra dɔ tə́ ní kə rɔ̄ tḭ̄ḭ́ ō ní,
ni a̰a̰ kum tō ndoō yādə́.
Lo rāā kə deé kə́ majə
15Ngōnə̄ḿ, ī-rāā majə kə deé kanjə̄ kɔ̄l̄ seneé dɔ tə́.
Ré ādə̄ deē yá̰a̰ karī anī, ī-lōō kədan najə̄ kə́ tōr̄ wurən dɔ tə́.
16Tal i yá̰á̰ kə́ rāā adə̄ kəngā mbang kə́ rɔ̄ deē tə́ teē kɔ̄ɔ́ aĺ a?
Adə̄ najə̄ asə rāā kəla kə́ majə tɔȳ kadə̄ karī ō.
17Najə̄ i yá̰á̰ kə́ majə tɔȳ kadə̄ karī kə́ ngá̰ý aĺ a?
De kə́ nge rāā majə kə deé ɓoodə́ naā tə́ jōó mbak tá adə̄ deē.
18Dan ń de kə́ mbóo a kɔ̄l̄ anī, míndən ɓār̄ gōsə̄ alé.
Kadə̄ karī yā nge nii, i yá̰á̰ kə́ a rāā deē kadə̄ nūū kə man̄ kumneé.
Kəndā kum kedə̄ dɔ rɔ̄ tə́ yā ngé kum kedə̄ gə̄
19Ī-dəje najə̄ ōō pá tá ɔ̄r̄ najə̄ ɓáý ō,
kété pá tá kadə̄ moy rāāī ní, á̰a̰ gō rɔ̄í ādə̄ majə ō.
20Ə̄ndā ma̰ȳ najə̄ kɔrí kété pá tá kadə̄ rāān̄ sarya seí ɓáý,
lo ń nuū tə́ kum mbang dəjeī gíŕ yá̰a̰ rāāī gə̄ tə́ anī, ā ə́nge māȳ rɔ̄.
21Ī-lōō ngóō kadə̄ əsō moy pá tá ī-ger̄ majaĺ yāí ɓáý.
Lo ń ré ī-rāā majaĺ anī, ī-ndə̄ngā rɔ̄í tāmən tə́ kə̄ ta jī tə́ nuū.
22Dan ń kum mbang rāā yá̰á̰ ń ə̄nī ndūí yā rāā kadə̄ Kɔ́ɔ̄ɓē ní asə anī,
ī-rāā yá̰á̰ ní ba ī-lōō ngóō kadə̄ yo reē tá.
23Ə̄ndā dɔ rɔ̄í danaá kété pá tá kadə̄ ə̄nī ndūí ādə̄ Kɔ́ɔ̄ɓē ɓáý.
Ī-lōō kadə̄ ī-to tītə̄ de kə́ nge nāā Kɔ́ɔ̄ɓē beé.
24Ādə̄ əga kemií dɔ wūn̄g ń a to kem ndɔ̄ gə̄ kə́ ta tɔ̄l̄ ta tə́ ní.
Ādə̄ əga kemií dɔ ndéý ń a to dan ń Nə́ɓā a tūr̄ gidən kɔ̄ɔ́ taí tə́ ní.
25Dan ń yá̰a̰ kəsa yāí i ngá̰ý anī, ādə̄ əga kemií dɔ ɓōō kə́ a əsō tə́.
Dan ń yá̰a̰ kənge yāí i ngá̰ý anī, ādə̄ əga kemií dɔ ndoō kə́ al̄naā kə́ a rāāī tə́ ō, yá̰á̰ kə́ ā ī-nal̄ tə́ ō.
26Əla gír ta gír lo tə́ bátə́ kadə̄ lo tíbəń ní, mbang tūr̄ ō,
yá̰a̰ malang mān̄ láẃ ngá̰ý ta kum Kɔ́ɔ̄ɓē tə́ ō.
27De kə́ nge kum kedə̄ əndā kum kedə̄ dɔ rɔ̄n tə́ tū yá̰a̰ gə̄ tə́ malang.
Dan ń majaĺ to anī, ni mbātə́ rāā.
28Deē ń kur̄ dɔn to nuú ní, ger̄ kum kedə̄ ō,
rɔȳ deē ń ənge kum kedə̄ ní ō.
29Ngé ger̄ kɔr̄ najə̄ majə gə̄ kə́ kur̄ dɔdə́ to nuú gə̄ ní, ɔjən̄ kum kedə̄ yādə́ kə̄ ndágá.
Nin̄ tə́dan̄ kāgə̄ najə̄ kə́ majə gə̄ ngá̰ý tītə̄ man̄ kə́ a edə beé.
Kadə̄ deē ṵṵ ɓē dɔ rɔ̄n tə́
30Ī-lōō kəya̰ rɔ̄í kadə̄ ngur yá̰á̰ kə́ majə aĺ ndɔ́rī aw̄ seí ō,
kadə̄ ndə̄ngā yá̰á̰ ndɔ́rī gon tə́ ō.
31Ré ī-rāā yá̰á̰ kə́ majə aĺ gə̄ ń ngurən rāāī ní anī,
ā ī-tél kur̄ kəgō yā madə̄ ba̰ā̰í gə̄.
32Ī-lōō kadə̄ rāā dúnya̰ i rɔ̄nel̄ yāí,
ré i beé aĺ anī yá̰á̰ kə́ tōr̄ gə̄ ń a utə̄n̄ gō ní, a reēn̄ dɔí tə́.
33Ī-lōō rāā yá̰a̰ kəsa kə́ ngá̰ý kə nar kə́ tə̄nāá kənīń ndoō dɔ rɔ̄í tə́,
lo ń yá̰a̰ gətóo kem ngong nar yāí tə́ ní.
Currently Selected:
JEJU KƏ́ NGŌN̄ SIRAK 18: SARDC
Highlight
Copy
Compare
Share
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.