JEJU KƏ́ NGŌN̄ SIRAK 16
16
Kem majə yā Nə́ɓā ō, háĺ kə́ ngan̄g ngá̰ý yān ō
1Ī-lōō gḛy kaw̄ kə ngáń kə́ teē yá̰a̰ aĺ gə̄ ngá̰ý.
Ngání kə́ ngé rāā yá̰a̰ kə gō kem ndigə yā Nə́ɓāá aĺ gə̄ ní, ī-lōō rāā rɔ̄nel̄ tām̄ yādə́ tə́.
2Ká ré nin̄ i ngá̰ý gə̄gē anī, ī-lōō rāā rɔ̄nel̄ tām̄ yādə́ tə́,
lo ń ɓōlə́n̄ ndíĺ Kɔ́ɔ̄ɓē aĺ ní.
3Ī-lōō kəndā kemií dɔ ndidə́ kə kumdə́ tə́ ō,
kəndā tɔ́gí dɔ kutədə́ kə́ i ngá̰ý tə́ ō.
Kojə ngōn̄ kógə̄ḿ i sóótə́ tɔȳ kojə ngáń kə́ ngé rāā yá̰a̰ kə gō kem ndigə yā Nə́ɓāá aĺ gə̄ dūbú ō,
koy deē i sóótə́ tɔȳ kojə ngáń kə́ tītə̄ ń nuū gə̄ ō.
4De kógə̄ḿ beē kə́ kur̄ dɔn to nuú rāā adə̄ de gə̄ rosən̄ lo kem ɓēé.
Banī gír kaa ngé rāā yá̰a̰ kə gō kem ndigə yā Nə́ɓāá aĺ gə̄ a udə kɔ̄ɔ́.
5M-á̰á̰ yá̰á̰ kə́ tītə̄ ń nuū gə̄ ngá̰ý kə kumḿ ō,
yá̰á̰ kə́ to kɔr kum gə̄ kə́ tɔȳ nge ń nuū gə̄ ń rāān̄ yá̰á̰ ní, m-ōō najə̄n kə mbīḿ ō.
6Ngé rāā majaĺ gə̄ ń kánə̄n̄ naā ní, hor yā Nə́ɓā a mbutə bup yā kṵ dandə́ tə́.
Hor wūn̄g yān ṵṵ kósə de gə̄ kə́ əsōn̄ wūn̄g.
7De kə́ ngāl̄ ngá̰ý kə́ kété jóo gə̄ ní, ni māȳ rɔ̄n dɔdə́ tə́ alé.
Nin̄ əsōn̄ wūn̄g i tām̄ tɔ́gə́də́ tə́.
8Ni əya̰ ɓē ń Lotə ndi kemeé ní alé,
tɔdɔ̄ kɔjə rɔ̄ yā de kə́ kemeé gə̄ nelə̄n aĺ ngá̰ý.
9Gír de kə́ yā kadə̄ tadə́ tḭ̄ḭ̄ kɔ̄ɔ́ gə̄ ń i Kanaan gə̄ ní, kumən ṵṵn tām̄ yādə́ tə́ alé,
adə̄ i gír de gə̄ ń tɔ̄lə̄n̄də́ kɔ̄ɔ́ malang tām̄ majaĺ yādə́ gə̄ tə́ ní.
10Ngé rɔ̄ɔ̄ kə njadə́ gə̄ ń i deē dūbú ɓú mehḛ́ ní, kumən ṵṵn tām̄ yādə́ tə́ aĺ ō.
Nin̄ kánə̄n̄ naā sɔɔ̄ń i kem ngān̄g yādə́.
11Ká ré i de kə́ kal kógə̄ḿ beē n rāań dɔ ngan̄g gə̄gē,
ré kɔ́ɔ̄ ənge ndéy najə̄n tə́ aĺ anī, i yá̰á̰ kə́ to kɔr kum.
Tɔdɔ̄ ka̰a̰ kum tō ndoō ō, wūn̄g ō, i kem Kɔ́ɔ̄ɓē tə́.
Ni asə māȳ rɔ̄n ngá̰ý, banī ni ɔjə wūn̄g yān kə̄ ndágá ō.
12Hálən kə́ ngan̄g gə̄ i ngá̰ý, tītə̄ ń kem majə yān i ngá̰ý ní ō.
Ni a gān̄g sarya dɔ de gə̄ tə́ i kə gō kəla rāādə́ gēé.
13Nge rāā majaĺ a teē kum tə́ kə yá̰á̰ ń ni un ní alé.
Tə́gā ta yā nge rāā yá̰a̰ kə gō ń Nə́ɓā ndigə ní, gotə i rɔ̄sɔl̄ alé.
14Nə́ɓā ndi dɔ rɔ̄n tə́ ngándáńg yā kɔjə kem majə yān kə̄ ndágá.
Banī yá̰á̰ ń a rāān̄ kə de gé kógə̄ḿ kógə̄ḿ ní, i kə gō yá̰á̰ ń nin̄ kɔ́ gə̄ rāān̄ ní. #16.14 Kem makətūbə̄ kə́ ngá̰ý gə̄ tə́ ní, kəlān kə́ nge kṵ kutə gidə i mí ō, mehḛ́ ō gətóo tū tə́.
Lo teē jī Kɔ́ɔ̄ɓē tə́ ka̰ȳ gətóo
17Ī-lōō kəda najə̄ ń toō: M-ā m̄-ɓɔ̄ɔ̄ rɔ̄ḿ kɔ̄ɔ́ kadə̄ Kɔ́ɔ̄ɓē a̰a̰m̄ alé.
I náā kə́ ndi dɔɔ́ nú n a əga kemən dɔḿ tə́ ní?
Deē a̰a̰m̄ mā gerə̄m̄ dan kósə de kə́ ngá̰ý gə̄ tə́ alé.
Yá̰á̰ kə́ Nə́ɓā rāā gə̄ ń i ngá̰ý ní, mā i náā dan yá̰a̰ gə̄ ní tə́?
18Dɔ rā̰ ō, lo gə̄ kə́ dɔ rā̰ tə́ kə́ nin̄ i sa̰y tɔȳ madə̄ gə̄ ō,
gír ɓūl̄ bā bo gə̄ ō, dɔ nang ō ní, dan ń Kɔ́ɔ̄ɓē a̰a̰də́ anī yéȳn̄.
19Mbal̄ bo gə̄ ō gír gisə dɔ nang ō ní,
ré Kɔ́ɔ̄ɓē a̰a̰də́ anī ndewn̄.
20Banī yá̰a̰ gə̄ ń nuū malang ní, deē gír̄ yá̰a̰ dɔ tə́ alé.
Yá̰á̰ ń Kɔ́ɔ̄ɓē rāā ní, i náā n usən dɔ tə́ ní?
21Yá̰a̰ gə̄ ngá̰ý kə́ Nə́ɓā rāādə́ ton̄ i lo ɓɔ̄ɔ̄ tə́,
tītə̄ nél man̄ kə́ ngá̰ý kə́ deē ger̄ gō ta reēn aĺ beē.
22Kəla rāan gə̄ kə́ gōtə́ ní, i náā n i nge kənī mbī de gə̄ tə́ kété ní?
I náā n ndi ngóōdə̄ ní? Madə̄ naā yān ní i sa̰y ngá̰ý.
23Deē ń kur̄ dɔn gətóó ní, a gír̄ yá̰a̰ i tītə̄ ń nuū.
De kə́ ɓodə aláa de kə́ ndúm̄, a gír̄ i yá̰á̰ kə́ to mbóo gə̄.
Makətūbə̄ kə́ nge kṵ jōó yā yá̰á̰ ndóō gə̄
Nə́ɓā əndā yá̰a̰ gə̄ i kə gō naá jere jere
24Ngōnə̄ḿ, ōō najə̄ yāḿ ba ī-taā yá̰a̰ ger̄ yāḿ ō,
ə̄ndā kumií gír najə̄ kɔrə́ḿ tə́ ō.
25M-ā m̄-teē kə yá̰á̰ ndóō kə́ asə kə gō tɔ́gə deé kə̄ ndágá.
M-ā m̄-ndóōī yá̰á̰ ń m̄-ger̄ ní kə gōó majə.
26Ta kəla gíŕ tə́ ní, dan ń Kɔ́ɔ̄ɓē rāā yá̰a̰ yān gə̄ oy anī,
tə́ndādə́ lo yādə́ gə̄ tə́.
27Ni rāā adə̄ yá̰a̰ njə̄rā kə gōó majə dan tíyō̰ gə̄ tə́ i kə́ márwāy gə̄ tə́.
Ni adə̄də́ ndū najə̄ gə̄ kadə̄ unən̄ gō, i ta kəla gíŕ tə́ bátə́ ta tɔ̄l̄ ta tə́.
Nin̄ əsan̄ yá̰a̰ nja kógə̄ḿ aĺ ō, ɔrə̄n̄ koō aĺ ō,
əya̰n̄ ta kəla yādə́ kɔ̄ɔ́ nja kógə̄ḿ aĺ ō.
28Tíyō̰ kə́ ɔsə madə̄n gətóo ō,
nin̄ mbātə́n̄ najə̄ yā Kɔ́ɔ̄ɓē nja kógə̄ḿ aĺ ō.
29Kutə̄ gō anī Kɔ́ɔ̄ɓē a̰a̰ lo kə̄ dɔ nang tə́,
ba rāā majə ngá̰ý kə dɔ nangaá.
30Ni rāā adə̄ dā̰ kə́ tayā tayā gə̄ taān̄ lo dɔ nang tə́ ō,
ré oyn̄ anī tél aw̄n̄ gogə́ dɔ nang tə́ ō.
Currently Selected:
JEJU KƏ́ NGŌN̄ SIRAK 16: SARDC
Highlight
Copy
Compare
Share
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.