RUTƏ 3
3
Rutə to kem gár̄ yā Boj tə́
1Ndɔ̄ kə́rēý tə́ anī Noemi əda Rutə na: Ngōnə̄ḿ, i yāḿ kadə̄ m̄-sāā loo ndi lɔm kə́ majə tām̄ yāí tə́ aĺ a? 2Boj ń āw̄ kə ngé kəla yān kə́ dəyá̰ gēé ní i ngeejí. Ni a ənda kōō ɔrjə kə́ kem gár̄ yān tə́ ndɔ̄ɔ́ ɓōólaā. 3Ní, ī-ndogə̄ man̄ ō, ī-ndum ítər ō, ə́la kūbə̄ rɔ̄í tə́ ō, ba āw̄ loo kənda kōō tə́. Ba ī-lōō kadə̄ gerī bátə́ ādə̄ ré əsa yá̰a̰ ō, aȳ yá̰a̰ ō oy pá tá. 4Dan ń a to nang tə́ anī ā ī-ger̄ loo ń a to tū tə́ ní. Loo ń noō tə́ āw̄ ún ta kūbə̄ kə́ dɔ njan tə́ ba ə̄ya̰ njan ādə̄ to ndágá karī. Gō tə́ anī ī-to nang tə́ njan tə́. Nəkɔ́ a ɔjiī yá̰á̰ kə́ yā kadə̄ ī-rāā. 5Rutə tél ədan na: M-ā m̄-rāā yá̰a̰ malang ń ɔ́jəm̄ ní.
6Rutə aw̄ loo kənda kōō tə́ ba rāā yá̰a̰ malang ń umən ədan ní.
7Boj əsa yá̰a̰ ō, a̰ȳ yá̰a̰ ō, adə̄ rɔ̄n nelə̄n. Gō tə́ anī aw̄ to ta kōō yān kə́ kán̄ dɔ naā tə́ tə́. Rutə aw̄ rɔ̄n tə́ jəke, un kūbə̄ kə́ dɔ njan tə́ kə̄ gogə́ ba to nang tə́.
8Dan ndɔ̄ tɔyɔ́ anī Boj ḭḭ óý óý dɔ ɓīī tə́, nōr̄ kum kə̄ kété anī a̰a̰ de kə́ dəyá̰ to nang tə́ njan tə́. 9Boj əda na: I ḭ̄ náā n toó? Anī dəyá̰ ní əda na: I mā Rutə nge kəla yāí ba ə̄nī ta kūbə̄#3.9 Ə̄nī ta kūbə̄: Kənī ta kūbə̄ dɔ dəyá̰ tə́ i ndigə taān. Á̰a̰ī Ndū 23.1 ō Eje 16.8 ō. yāí kə̄ dɔ nge kəla yāí tə́ tɔdɔ̄ ḭ̄ i nge gān̄g dɔ.
10Tā anī Boj əda na: Ngōnə̄ḿ, ādə̄ Kɔ́ɔ̄ɓē rāā majə seí. Yá̰á̰ kə́ gōtə́ ń ī-rāā gō gogə́ laā ní majə tɔȳ kə́ kété. Tɔdɔ̄ ḭ̄ ī-sāā balsáá kə́ ngé kənge yá̰a̰ gə̄ aĺ ō, kə́ ndoō gə̄ aĺ ō. 11Beé ní ngōnə̄ḿ, ī-lōō ɓōĺ. Yá̰a̰ malang ń ā ə́dá ní m-ā m̄-rāā tām̄ yāí tə́. Tɔdɔ̄ de kə́ kem ɓēé gə̄ malang gerə̄n̄ kadə̄ ḭ̄ i dəyá̰ kə́ ngáā. 12Mā i nge gān̄g dɔí ō, ɓá tā ba nge ngaaí kə́rēý kə́ ngɔr ngá̰ý tɔȳm̄ kə́ nge gān̄g dɔí ō ndi noó. 13Ī-to laā ādə̄ loo tīī dɔí tə́ ɗer. Bírí dəloí j-a j-a̰ā̰ ké a gān̄g dɔí aké a gān̄g aĺ wa. Ré ndigə gān̄g dɔí anī ādə̄ gān̄g. Ba ré ndigə aĺ anī, tītə̄ ń Kɔ́ɔ̄ɓē ndiń kə kumneé noō, mā m-ā m̄-gān̄g dɔí! Ba ī-to kə̄ nang tə́ ādə̄ loo tīī dɔí tə́.
14Adə̄ Rutə to nang tə́ nja Boj tə́ bátə́ ta gír loo tə́. Dan ń loo to pipitə ɓáý á deē a̰a̰ madə̄n a gerə̄n aĺ noō anī Rutə ḭḭ dɔɔ́ kɔ̄ɔ́. Tɔdɔ̄ Boj əda na: Ādə̄ deē ger̄ kadə̄ Rutə reē kem gárāá alé. 15Boj əda Rutə na: Ādə̄m̄ kūbə̄ ń ī-seĺ dɔí tə́ noō ba ə́hɔ ta. Anī Rutə əhɔ ta kūbə̄ ní. Boj mbɔ̄jə́ kōō ɔ́rjə kem kórō kutə̄ kógə̄ḿ ɓōkə́ kem kūbə̄ ní tə́ ba əndā dɔ Rutə tə́ adə̄ aw̄ń ɓēé rɔ̄ 16umən tə́. Noemi dəje Rutə na: Ḭ̄ i náā ngōnə̄ḿ?
Loo ń noō tə́ Rutə ɔjə Noemi gotə yá̰a̰ malang ń dəngam ní rāā tām̄ yān tə́ ní. 17Ba Rutə əda ɓáý to̰ na: Adə̄m̄ kōō ɔ́rjə kə́ kem kórō kutə ń toō ba ədam̄ na m-ā m̄-tél yā kaw̄ gogə́ ɓē uməḿ jīḿ karī alé. 18Noemi əda Rutə na: Ngōnə̄ḿ, ī-ndi jəke á̰a̰ń ta tɔ̄l̄ ta yá̰á̰ ní. Ré dəngam ń noō əndā najə̄ ní naā tə́ ɓōólaā pá tá a ɔr̄ koō ɓáý.
Currently Selected:
RUTƏ 3: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.