RUTƏ 4
4
I náā n i nge gān̄g dɔ ní
1Boj aw̄ ndi loo sarya tə́. Anī nge gān̄g dɔ ń ni-əda Rutə najə̄ yān ní a mān̄. Ni-ɓārə́n ba ədan na kə reē kə ndi laā. Anī deē ní reē ndi. 2Gō tə́ anī ni mēr̄ kum kɔɔ̄ kə́ kem ɓēé gə̄ kutə kógə̄ḿ kadə̄ reē ndin̄ sedə́. Dan ń nin̄ reē ndin̄ nang tə́ oy anī, 3əda nge gān̄g dɔ ní na: Noemi ń aw̄ dɔ nang kə́ Moab tə́ ní tél adə̄ a igə kə loo ndɔr̄ yā ngōkó̰ó̰jí Elimelek. 4Ba mā m-ə́da na m-ā m-ə́daī kadə̄ ī-ger̄ gō ō, m̄-mērī mang loo ndɔr̄ ní ta kum kum kɔɔ̄ gə̄ yā gír de gə̄ yāḿ gə̄ tə́ ō, ta kum de kə́ rang gə̄ ń ndin̄ laā tə́ ní ō. Ta róbə gān̄g dɔ loo ndɔr̄ i yāí ḭ̄ ní ré ī-ndigə anī ī-gān̄g dɔ. Ba ré i-ndigə aĺ anī ə́dam̄ ādə̄ m̄-ger̄. Tɔdɔ̄ deē ń kadə̄ gān̄g dɔ loo ndɔr̄ ní i ḭ̄ ngóy, ba ré ɔ́də aĺ tá i mā ɓáý. Anī deē ní əda na n-ndigə gān̄g dɔ loo ndɔr̄ ní. 5Anī Boj əda na: Ndɔ̄ ń ā ī-mangəń loo ndɔr̄ ní jī Noemi tə́ ní, ndɔ̄ ń noō tə́ ā ī-taā Rutə kə́ Moab ō. Rutə ń i nə̄yá̰ nge yo ní ā ī-taān yā kunəń rī nge yo dɔɔ́ kadə̄ rīn ɓārəń#4.5 Rīn ɓārəń: Rīn a ɓār̄ i dan ń a ojən̄ ngōn̄ tām̄ yān tə́ ní. Á̰a̰ī Ndū 25.5-7. dɔ yá̰á̰ kə́ gotən tə́. 6Anī nge gān̄g dɔ ní əda na: Ré i beé anī m̄-lōō gírí na sōgə́ m̄-nujə yá̰a̰ kənge yāḿ. Ta róbə gān̄g dɔ ní m̄-télən̄ m-ādī tɔdɔ̄ m-ásə alé.
7Kété dɔ nang kə́ Israel tə́ ní, ré de gə̄ a mangən̄ naā yá̰a̰, aké a adə̄n̄ naā ta róbə gān̄g dɔ yá̰a̰ anī, a rāān̄ i tītə̄ ń noō. De kógə̄ḿ a ɔr̄ sākə̄rā kə́ njan tə́ yā kadə̄ madə̄n kadə̄ gír najə̄ gāngəń. Sākə̄rā kə́ nja tə́ kə́ kɔr̄ kadə̄ deē i yá̰á̰ kə́ ɔjə kadə̄ najə̄ i kə́ kəndā naā tə́ kɔ̄ɔ́. 8Adə̄ nge gān̄g dɔ ní əda Boj na: Ī-mang loo ndɔr̄ ní tām̄ yāí tə́! Ba gō tə́ anī ɔr̄ sākə̄rā kə́ njan tə́ adə̄ Boj. 9Tā anī Boj əda kum kɔɔ̄ gə̄ ō, de gə̄ malang ń ndiń sedə́ loo sarya tə́ ní ō na: Ɓōólaā sḭḭ̄ i kə́ kum tə́ yāḿ kadə̄ yá̰a̰ malang ń i yā Elimelek ō, i yā Kilyon nin̄ kə Malon ō ní, m̄-mang jī Noemi tə́ kɔ̄ɔ́. 10Tá Rutə kə́ nə̄yá̰ Malon ń i dəyá̰ kə́ Moab ní, m̄-taā ō. Adə̄ ni i nə̄yá̰ḿ kadə̄ m-únəń rī nge yo dɔɔ́, kadə̄ rīn ɓārəń dɔ yá̰á̰ kə́ gotən tə́ ō, kadə̄ rīn gətóoń kɔ̄ɔ́ dan ngákó̰o̰n gə̄ tə́ aĺ ō, loo sarya tə́ aĺ ō. Nge ń noō ní sḭḭ̄ i kə́ kum tə́ yāḿ ō. 11Anī gír de gə̄ malang ń ndin̄ loo sarya tə́ ní ō, kum kɔɔ̄ gə̄ ō, ədan na: A̰á̰ā̰ jḭḭ i de kə́ kum tə́ yāí gə̄! Ādə̄ Kɔ́ɔ̄ɓē rāā kə dəyá̰ ń a aw̄ kújú jīí tə́ ní tītə̄ ń rāań kə Rasel nin̄ kə Lea adə̄ ojən̄ gír de gə̄ yā Israel ní! Ī-rāā yá̰á̰ kə́ de kə́ ngáā tə́ kem ɓē kə́ Epərata tə́ ō, ə̄ndā rī kem ɓē kə́ Betlehem tə́ ō! 12Ādə̄ Kɔ́ɔ̄ɓē adī ngán gə̄ kə ta kūl̄ dəyá̰ kə́ mandə ń toō kadə̄ kojə yāí toń tītə̄ kojə yā Peres ngōn̄ Juda nin̄ kə Tamar!
Boj taā Rutə ojəń Obed
13Boj taā Rutə adə̄ tél nə̄yá̰n. Kɔ́ɔ̄ɓē rāā adə̄ Rutə ndān̄ ngōn̄ ba ojə ngōn̄ kə́ dəngam. 14Anī dəyá̰ gə̄ ədan̄ Noemi na:
Ādə̄ de gə̄ ɓōkə́n̄ Kɔ́ɔ̄ɓē tɔ̄ȳ!
Ɓōólaā Kɔ́ɔ̄ɓē rāā adə̄ ī-nal̄ nge gān̄g dɔí to̰ alé.
A ɓārə́n̄ rī nge gān̄g dɔí ní dɔ nang kə́ Israel tə́.
15Ngōn̄ kaaí ní a rāā kadə̄ dɔí a ḭḭ dɔɔ́ wáńg wáńg ō,
a ngɔ̄m̄ ɓə́gáí ō.
Umií kə́ dəyá̰ i só tə́ tɔȳ ngání kə́ dəngam gə̄ sīrí.
Tɔdɔ̄ ni tariī ō, ojə ngōn̄ kaaí ń toō adī ō.
16Noemi taā ngōn̄ ní əhɔn kə̄ rɔ̄n tə́ ba tél nge ngɔ̄mən. 17Madə̄ ɓēn kə́ dəyá̰ gə̄ əndān̄ rī dɔ ngōn̄ ní tə́ ədan na: Noemi ənge ngōn̄ kə́ dəngam! Nin̄ əndān̄ rī ngōn̄ ní na i Obed. Obed i bɔbə̄ Jese kə́ bɔbə̄ Dabid.
Rī de gə̄ kə́ gír kaa yā Dabid tə́
18De gə̄ kə́ gír kaa yā Peres tə́ ń toó: Peres ojə Hesəron. 19Hesəron ojə Ram. Ram ojə Aminadab. 20Aminadab ojə Nason. Nason ojə Salma 21Salma ojə Boj. Boj ojə Obed. 22Obed ojə Jese, ba Jese ojə Dabid.
Currently Selected:
RUTƏ 4: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.