RUTƏ 2
2
Rutə ɓur kōō kem ndɔr̄ yā Boj tə́
1Tá deē kógə̄ḿ kə́ gír kojə yā Elimelek kə́ ngaa Noemi tə́ i noó. Deē ní i de kə́ ənge yá̰a̰ ō, kə́ ngáā ō. Rīn na i Boj. 2Ndɔ̄ kə́rēý tə́ anī Rutə əda Noemi na n-sāā kaw̄ ɓur kōó gō ngé sāā kōō gə̄ tə́ kem ndɔr̄ yā deē ń a rāā kem majə seneé tə́ ní. Anī Noemi tél ədan na kə aw̄ tā.
3Adə̄ Rutə aw̄ ra a ɓur kōō gō ngé sāā kōō gə̄ tə́ kem ndɔr̄ kə́rēý tə́. Kɔ́lən majə adə̄ ndɔr̄ ní i ndɔr̄ yā Boj kə́ gír kojə yā Elimelek tə́.
4Gō tə́ anī Boj ḭḭ Betlehem reē ugə̄. Ni-əda ngé sāā kōō gə̄ na: Ādə̄ Kɔ́ɔ̄ɓē i naā tə́ sesí! Anī ngé sāā kōō gə̄ tél ədanən̄ na: Ādə̄ Kɔ́ɔ̄ɓē rāā majə seí! 5Gō tə́ anī Boj dəje ngāgəra dɔ ngé sāā kōō gə̄ na: Dəyá̰ kə́ mandə ń noō i yā náā? 6Anī ngāgəra dɔ ngé sāā kōō gə̄ tél əda na: I dəyá̰ kə́ Moab ń ḭḭ dɔ nang kə́ Moab tə́ reē kə Noemi ní. 7Ni-dəje ta róbə kə̄tó dɔ kōō gə̄ ń a tə́sō gō ngé sāā kōō gə̄ tə́ ní. Ni-ra ta kəla tə́ i kə ndɔ̄ī beé adə̄ a̰a̰ loo kə́ ɓēé alé. 8Tā anī Boj əda Rutə na: Ngōnə̄ḿ ōō a? ī-lōō kaw̄ ɓur kōó kem ndɔr̄ kə́ rang tə́. Ī-ra laā ī-rāā kəla kə ngé kəla yāḿ kə́ dəyá̰ gēé. 9Ə̄ndā kumií dɔ loo ń dəngam gə̄ a sāān̄ kōō tū tə́ ní tə́ majə ba ún gōdə́. M-ɔ̄gə̄ ngé kəla yāḿ kə́ dəngam gə̄ kɔdə rɔ̄í. Ré kəndā rāāī anī āw̄ ā̰ȳ man̄ ń ɔdə ɓōkə́n̄ kə̄ kem jóo gə̄ tə́ ní. 10Rutə ɔsə non nang tə́ no Boj tə́ ba əda na: Ī-rāā kem majə seḿ ngá̰ý i tām̄ rí tə́? Mā ń i tə̄rā ní ə̄ndā kumií dɔḿ tə́ majə i tām̄ rí tə́? 11Boj tél ədan na: Ənīmə̄n̄ gotə yá̰a̰ malang ń ī-rāā kə umií kə́ dəyá̰ gō yo ngaaí tə́ ní ō, gotə kəya̰ ń ə́ya̰ bɔbí ō, kó̰ó̰í ō, dɔ nang ń ojənī tū tə́ ní ō, ba ī-reē ī-ndiń dan de gə̄ kə́ ī-ger̄də́ kété aĺ tə́ ní ō. 12Ndə̄ngā yāḿ i kadə̄ Kɔ́ɔ̄ɓē əndā njaí tām̄ yā yá̰a̰ gə̄ ń noō tə́ malang. Kadə̄ Kɔ́ɔ̄ɓē Nə́ɓā yā Israel əndā njaí ngá̰ý kadə̄ tɔȳ dɔ. Tɔdɔ̄ ī-reē ī-ɓɔ̄ɔ̄ rɔ̄í i gír bɔ̄gə̄n tə́. 13Loo ń noō tə́ Rutə əda na: Kɔ́ɔ̄ḿ, ī-rāā kem majə seḿ! Tɔdɔ̄ najə̄ kə́ majə ń ɔ̄r̄ seḿ ní adə̄m̄ tɔ́gə. Tá mā i de kə́ m-ásə kadə ɓer̄ yāí kə́ dəyá̰ kógə̄ḿ tə́ alé.
14Dan ń mbang kəsa yá̰a̰ asə anī, Boj əda Rutə na kə reē kə əsa yá̰a̰ sedə́, kə un núsə́ mápa kə əla kum kasə nduú kə́ masə̄ tə́. Rutə ndi i kadə ngé sāā kōō gə̄ tə́, ba Boj adə̄n kōō kə́ ndaw̄. Rutə əsa ndān̄ ō, gotə̄n na̰y ō.
15Dan ń Rutə tél aw̄ gogə́ ɓur kōó anī Boj əda ngé rāā kəla yān kə́ dəngam gə̄ na: Əya̰niī ādə̄ ɓur kōō kə́ mbo̰ō̰ dūbə̄ kōō gə̄ tə́ ō, ba ī-lōōī kəla rɔ̄sɔl̄ dɔn tə́. 16Dɔ do̰ō̰ kōō gə̄ ń ā ə̄tōī ní gə̄gē ī-ró̰yī kōō kə́rēý gə̄ danaá ī-tə́nāī nang tə́ ādə̄ ɓur ba ī-lōōī ndángə̄n.
17Rutə ɓur kōō kem ndɔr̄ yā Boj tə́ bátə́ loo sɔl̄ dɔn tə́. Ba dan ń ənda kōō ń ɓur ní anī njárə̄n asə səmbē bo kógə̄ḿ.
18Ni-ɔy aw̄ń ɓēé ɔjə umən ō, gotə yá̰a̰ kəsa ń dumə̄n ní adə̄n ō. 19Umən dəjen na ké ɓur kōō i rá ɓōólaā wa, ké rāā kəla i rá wa, kadə̄ Nə́ɓā rāā majə kə deē ń əndā kumən dɔn tə́ majə ɓōólaā toó!
Anī Rutə ədan na n-rāā kəla na i kem ndɔr̄ yā deē kógə̄ḿ kə́ rīn na i Boj tə́. 20Loo ń noō tə́ Noemi əda na: M-á̰a̰ kadə̄ Kɔ́ɔ̄ɓē rāā yá̰á̰ kə́ gōtə́ kə̄ non tə́ kə ngé gə̄ ń ndin̄ kə kumdə́ ní ō, kə ngé gə̄ ń oyn̄ ní ō. Ādə̄ ni-rāā majə kə deē ń toō! Gō tə́ anī ni-əda Rutə na: Boj i ngeejí kə́ ngɔr ngá̰ý. Ni i deē kógə̄ḿ kə́ dan de gə̄ ń kadə̄ a gāngə̄n̄ dɔjí ní tə́.#2.20 Gān̄g dɔ: Kəla rāā nge gān̄g dɔ kə́rēý i mang loo ndɔr̄ yā ngeen ń əsō kem ndoō tə́ á a igə kə loo ndɔr̄ yānneé ní, kadə̄ loo ndɔr̄ ní tél toń gotoó tām̄ yā gír kojə yādə́ tə́. Á̰a̰ī Leb 25.25. Majanī kəla yān kə́rēý i kadə̄ taā dəyá̰ gotə ngeen kə́ koy kanjə̄ kojə ngōn̄.
21Anī Rutə əda na: Tá ədam̄ ɓáý to̰ na kə m̄-na̰y kə̄ loo ɓur kōō tə́ gō ngé kəla yān kə́ dəngam gə̄ tə́ bátə́ kadə̄ gír sāā kōō kə gāngəń. 22Anī Noemi əda Rutə na: Ngōnə̄ḿ, majə kadə̄ āw̄ kə ngé kəla yān kə́ dəyá̰ gēé na sōgə́ de gə̄ rāānī majaĺ kem ndɔr̄ kə́ rang tə́.
23Rutə tə́ya̰ gō ngé kəla kə́ dəyá̰ yā Boj gə̄ tə́ ɓurəń kōō bátə́ kadə̄ gír sāā kōō ɔrjə ō, gémē ō, gāngəń. Ni-ndi i kə umneé.
Currently Selected:
RUTƏ 2: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.