JEJU TEĒ KUM JA̰A̰ 9

1 De kə́ dɔ rā̰ tə́ kə́ nge ko̰ mí kɔ̄ŕ bərúnjə, anī m-á̰á̰ tə́yō̰ kógə̄ḿ ḭḭ dɔ rā̰ tə́ əsō dɔ nang tə́. Adə̄n̄ tə́yō̰ ní lakélé ta bəlo kə́ bo ngá̰ý kə́ ngɔ́nən gətóo. 2Ni-teē ta bəlo ní anī, sa kógə̄ḿ teē tū tə́ tītə̄ sa hor kə́ bo ngá̰ý beē. Sa ní rāā adə̄ mbang ndul ō, loo risə til ō. 3Yim̄ gə̄ teēn̄ tū sa ní tə́, ba taān̄ loo dɔ nang tə́. Adə̄n̄də́ tɔ́gə́ kə́ to tītə̄ yā kókə́rang gə̄ kə́ dɔ nang tə́ beē. 4Ɔgə̄n̄də́ rāā yá̰á̰ kə́ majaĺ kə mu kə́ dɔ nang tə́ ō, kə mbī yá̰á̰ kə́ mbōl̄ ō, kə kāgāá ō, banī de gə̄ ń mbō̰ yā Nə́ɓā gətóo nodə́ tə́ ní tá kə rāān̄də́ yá̰á̰ kə́ majaĺ. 5Adə̄n̄də́ ta róbə tɔ̄l̄də́ alé, banī kadə̄ rāān̄də́ yá̰á̰ kə́ tōr̄ bátə́ nāā mí. Ba yá̰á̰ kə́ tōr̄ ń nin̄ a rāān̄ de gə̄ ní, to i tītə̄ kókə́rang kə́ əga deē adə̄ tōrə̄n beé. 6Kem ndɔ̄ gə̄ ngeé ń noō tə́ ní, de gə̄ a sāān̄ yo, ba a əngen̄ aĺ ō, a gḛyn̄ yo, ba yo a a̰ȳdə́ kɔ̄ɔ́ ō.

7Ba yim̄ gə̄ ní ton̄ tītə̄ sə́nda gə̄ kə́ rákə̄n̄ yá̰a̰ rɔ̄də́ tə́ əndānəń dɔdə́ danaá tām̄ yā rɔ̄ɔ̄ tə́ beē. Yá̰á̰ kə́ tītə̄ jākā mbang kə́ rāā kə lɔ́r gə̄ i dɔdə́ gə̄ tə́ ō, ta kumdə́ to i tītə̄ ta kum deē beé ō. 8Nənga dɔdə́ to i tītə̄ nənga dɔ de kə́ dəyá̰ beé ō, ngān̄gdə́ to i tītə̄ ngān̄g ɓɔl beé ō. 9Kūbə̄ ń əlan̄ ta nganjədə́ tə́ ní, to i tītə̄ kə́ rāā kə gindīí beē ō, kōō bɔ̄gə̄də́ ɓār̄ tītə̄ kōō púsə́ sə́ndá kə́ ngá̰ý gə̄ kə́ a̰ȳn̄ ngɔ̄də̄ ta kaw̄ kə̄ ta rɔ̄ɔ̄ tə́ beē ō. 10Kə̄ládə́ to tītə̄ kə̄lá kókə́rang beé ō, gənadə́ i ta tə́ ō. Tɔ́gə́də́ ń kadə̄ a rāān̄neé de gə̄ yá̰á̰ kə́ tōr̄ nāā mí ní, i tū kə̄ládə́ tə́ ō. 11Mban̄g kə́ dɔdə́ tə́ i de kə́ dɔ rā̰ tə́ kə́ ndi i kem bəlo kə́ bo ngá̰ý kə́ ngɔ́nən gətóó tə́. Rīn kə́ kə ta Hebəro na i Abado̰ ō, kə́ kə ta Gərek na i Apolyon ō. Kum rī ní na i nge nujə yá̰a̰.

12Yá̰á̰ kə́ majaĺ kə́ ta kəga dɔ mān̄ kɔ̄ɔ́, ba kə́ rang gə̄ jōó a utə̄n̄ gō ɓáý.

13 De kə́ dɔ rā̰ tə́ kə́ nge ko̰ mehḛ́ kɔ̄ŕ bərúnjə, anī m-ōō ndū deē ɓār̄ tū gajə gə̄ kə́ dɔ loo tun̄ yá̰á̰ kə́ rāā kə lɔ́rɔ́ ń ra no Nə́ɓā tə́ ní. 14Ni-ɔr̄ najə̄ kə de kə́ dɔ rā̰ tə́ kə́ nge ko̰ mehḛ́ ń bərúnjə i jīn tə́ ní, ədan na kə tútə de kə́ dɔ rā̰ tə́ kə́ sɔ́ gə̄ ń do̰ō̰n̄də́ dɔ bā Opəratə ń i bā kə́ bo ní tə́. 15Anī tútən̄ de kə́ dɔ rā̰ tə́ kə́ sɔ́ gə̄ ń əndān̄ dɔdə́ danaá tām̄ yā kum mbang ō, ndɔ̄ ō, nāā ō, ɓāl̄ ō ń kadə̄ tɔ̄lə̄n̄neé de gə̄ tə́ ní. Ré gángə̄n̄ deē ndul gə̄ gír loo mətá anī, gírən kə́ kógə̄ḿ ní nin̄-tɔ̄lə̄n̄də́ malang kɔ̄ɔ́. 16Ngé rɔ̄ɔ̄ yādə́ gə̄ kə́ ngé kal̄ sə́nda gə̄ ní, m-ōō kutədə́: I dūbú kutə jōó nja i ngá̰ý. 17Sə́nda gə̄ ō, ngé kal̄də́ gə̄ ō ń m-á̰á̰də́ ní ton̄ i beé: Kūbə̄ gində̄ kə́ nganjədə́ gə̄ tə́ to i tītə̄ hor beé ō, ndul tītə̄ mbal̄ sapir beé ō, ɓálən to i tītə̄ ɓál bursu#9.17 Bursu: Á̰a̰ī Tkg 19.24. beé ō. Dɔ sə́nda gə̄ ní to i tītə̄ dɔ ɓɔl beé, ba hor ō, sa hor ō, bursu ō, teē tadə́ tə́. 18Ré gángə̄n̄ deē ndul gə̄ gír loo mətá anī, yá̰á̰ kə́ tōr̄ kə́ mətá gə̄ ń i hor ō, sa hor ō, bursu ō kə́ a teē ta sə́nda gə̄ tə́ ní, tɔ̄l̄ gírən kə́ kógə̄ḿ kɔ̄ɔ́ malang. 19Tɔdɔ̄ tɔ́gə́ sə́nda gə̄ ní to i tadə́ tə́ ō, kə̄ládə́ tə́ ō. Tām̄ kə̄ládə́ gə̄ ton̄ i tītə̄ lī gə̄ beé, kə dɔdə́ gēé ta tə́, yā rāań de gə̄ yá̰á̰ kə́ tōr̄.

20Ba gotə de gə̄ ń yá̰á̰ kə́ tōr̄ tɔ̄l̄də́ aĺ ní, tūrə̄n̄ gidədə́ kɔ̄ɔ́ ta ɓesə̄ gə̄ ń nin̄ kɔ́ gə̄ túdə̄n̄ kə jīdə́ ní tə́ alé. Nin̄-lōōn̄ gír rɔȳ ndíĺ kə́ majaĺ gə̄ tə́ aĺ ō, gír rāā ɓesə̄ lɔ́r gə̄ tə́ aĺ ō, ɓesə̄ gində̄ arjā̰a̰ gə̄ tə́ aĺ ō, ɓesə̄ gində̄ nə̄ngá kasə gə̄ tə́ aĺ ō, ɓesə̄ mbal̄ gə̄ tə́ aĺ ō, ɓesə̄ kāgə̄ gə̄ tə́ aĺ ō. Ɓesə̄ gə̄ ní asən̄ ka̰a̰ loo aĺ ō, koō loo aĺ ō, njə̄rā aĺ ō. 21Nin̄-ndə̄ngān̄ rɔ̄də́ tām̄ tɔ̄l̄ ń nin̄-tɔ̄lə̄n̄ de gə̄ tə́ ní aĺ ō, tām̄ rāā kəga yādə́ gə̄ tə́ aĺ ō, tām̄ sāā naā loo kaya tə́ yādə́ gə̄ tə́ aĺ ō, tām̄ ɓogə yādə́ gə̄ tə́ aĺ ō.

Currently Selected:

JEJU TEĒ KUM JA̰A̰ 9: SARDC

Highlight

Copy

Compare