JEJU TEĒ KUM JA̰A̰ 5
5
Makətūbə̄ ō, Ngōn̄ batə̄ ō
1Anī m-á̰a̰ makətūbə̄ kógə̄ḿ kə́ ndangən̄ yá̰a̰ kemeé ō, gidə tə́ ō, kə́ ɔsən̄ mbō̰ tū tə́ gír loo sīrí ō, jī ko̰ nge ń ndi dɔ kōr̄ kāgə̄ mbang tə́ ní. 2Gō tə́ anī m-á̰a̰ de kə́ dɔ rā̰ tə́ kógə̄ḿ kə́ tɔ́gən i ngá̰ý əda kə tɔ́gɔ́ na:
I náā n asə kɔr̄ mbō̰ kə́ tū makətūbə̄ ń toō tə́ ba teē kemən ní?
3Ba deē kógə̄ḿ kə́ dɔ rā̰ tə́ aké kə́ dɔ nang tə́, aké kə́ gíŕ nángāá, kə́ asə teē makətūbə̄ ní, aké ka̰a̰ kem ní, gətóo. 4Adə̄ m̄-nōō ngá̰ý tɔdɔ̄ de kə́ asə teē makətūbə̄ ní, aláa ka̰a̰ kə kumneé ní, gətóo. 5Banī deē kógə̄ḿ kə́ dan kum kɔɔ̄ gə̄ tə́ ədam̄ na kə m̄-nōō alé. Na kə m-á̰a̰ā̰, na ɓɔl kə́ gír ɓē yā Juda tə́ ń i de kə́ gír kaa yā Dabid tə́ ní, na tetə rɔ̄ɔ̄ yā kɔsəń mbō̰ kə́ sīrí gə̄ kə́ tū makətūbə̄ ní tə́ kɔr̄ ō, na tetə rɔ̄ɔ̄ yā teēń kemən ō.
6Ba m-á̰a̰ Ngōn̄ batə̄ kógə̄ḿ ra kə njan kə́ dɔɔ́ dɔ kōr̄ kāgə̄ mbang ní tə́ danaá bang ō, dan yá̰á̰ kə́ kə kumuú kə́ sɔ́ gə̄ ní tə́ ō, dan kum kɔɔ̄ gə̄ ní tə́ ō. To tītə̄ kə́ əjan̄ míndən beé ō, gajən gə̄ i sīrí ō, kumən gə̄ i sīrí ō. Kumən kə́ sīrí gə̄ ní, i Ndíĺ kə́ sīrí gə̄ yā Nə́ɓā ń əlan̄də́ adə̄ aw̄n̄ kə̄ loo gə̄ tə́ malang dɔ nang tə́ ní. 7Ngōn̄ batə̄ ní njə̄rā kə̄ kété yā taā makətūbə̄ kə́ jī ko̰ nge ń ndi dɔ kōr̄ kāgə̄ mbang tə́ ní. 8Ba dan ń ni-taā makətūbə̄ ní oy anī, yá̰á̰ kə́ kə kumuú kə́ sɔ́ gə̄ ní ō, kum kɔɔ̄ kə́ kutə jōó gidə i sɔ́ gə̄ ní ō, əsōn̄ kə̄ nang tə́ non tə́. Kənde i jīdə́ gə̄ tə́ kógə̄ḿ kógə̄ḿ ō, kópə gə̄ kə́ rāā kə lɔ́rɔ́ kə́ ítər rosə kem gə̄ i jīdə́ gə̄ tə́ ō. Yá̰a̰ gə̄ ń noō i ndɔ̄ȳ yā de gə̄ kə́ ɔrə̄n̄ kam̄də́ tām̄ yā Nə́ɓā tə́. 9Nin̄-ənīn̄ pā kə́ kijə ń toō:
Ḭ̄ ásə taā makətūbə̄ ní,
ba kɔsə mbō̰ kə́ ta tə́ kɔr̄.
Tɔdɔ̄ əjan̄ míndí adə̄
ī-gān̄g dɔ gír ɓē gə̄ malang ō,
dɔ de gə̄ kə́ ta yādə́ gə̄ i tayā tayā malang ō,
gíŕdə́ i tayā tayā malang ō,
nápardə́ i tayā tayā malang ō,
ādə̄ Nə́ɓā kə ta kūl̄ mósí.
10Ī-rāādə́ adə̄ télən̄ de kə́ kem ɓē ko̰o̰ tə́ gə̄ ō,
télən̄ ngé tun̄ yá̰a̰ gə̄ ō, tām̄ yā Nə́ɓā yājí tə́.
Adə̄ nin̄ a o̰ō̰n̄ ɓē dɔ nang tə́.
11Anī m-á̰a̰ de kə́ dɔ rā̰ tə́ gə̄ kə́ nin̄ i ngá̰ý ō, m-ōō ndūdə́ ō. Dūbūúdə́ i nja kutə kə̄ gogə́, ran̄ gīrə̄n̄ gidə kōr̄ kāgə̄ mbang ní ō, yá̰á̰ kə́ kə kumuú kə́ sɔ́ gə̄ ní ō, kum kɔɔ̄ gə̄ ní ō. 12Nin̄-unən̄ ndūdə́ kə̄ dɔɔ́ ngá̰ý ədan̄neé na:
Ngōn̄ batə̄ ń əjan̄ míndən ní,
asə kənge tɔ́gə ō,
yá̰a̰ kənge ō, kum kedə̄ ō, ngan̄g ō,
rɔȳ ō, kɔsə gɔn ō, tɔ̄ȳ ō.
13Ba yá̰a̰ malang kə́ dɔ rā̰ tə́ ō, dɔ nang tə́ ō, gíŕ nángāá ō, dɔ bā bo tə́ ō, kum bā bo tə́ ō ní, m-ōō ndūdə́ ədan̄ na:
Tɔ̄ȳ ō, rɔȳ ō, kɔsə gɔn ō, tɔ́gə ō,
i yā nge ń ndi dɔ kōr̄ kāgə̄ mbang tə́ ní ō, i yā Ngōn̄ batə̄ ō,
kə dɔ ɓāl̄ gə̄ ɓāl̄ gə̄.
14Anī yá̰á̰ kə́ kə kumuú kə́ sɔ́ gə̄ ní ədan̄ na: Adə̄ i tītə̄ ń noō. Loo ń noō tə́ kum kɔɔ̄ gə̄ ní əsōn̄ kə̄ nang tə́ rɔȳnəń.
Currently Selected:
JEJU TEĒ KUM JA̰A̰ 5: SARDC
Highlight
Copy
Compare
Share
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.
