JEJU TEĒ KUM JA̰A̰ 4

Rɔȳn̄ Nə́ɓā dɔ rā̰ tə́

1Gō yá̰a̰ gə̄ ń noō tə́ anī, yá̰á̰ ń m-á̰a̰ā̰ ní n toó:

Teēn̄ ta róbə́ kógə̄ḿ dɔ rā̰ tə́, anī deē ń ɔr̄ najə̄ seḿ ta kəga dɔ á ndūn ɓār̄ tītə̄ kōō bərúnjə adə̄ m-ōō ní, əda na:

Āl̄ kə̄ laā ādə̄ m-ɔ́jiī yá̰á̰ ń a rāā yā rāā yá̰a̰ gō tə́ ní.

2Anī kə̄ ta jī tə́ noō Ndíl əhɔm̄, ba yá̰á̰ ń m-á̰a̰ā̰ ní n toó: Kōr̄ kāgə̄ mbang kógə̄ḿ i kə́ kəndā dɔ rā̰ tə́ ō, deē kógə̄ḿ ndi dɔ tə́ ō. 3Ba nge ń ndi dɔ kōr̄ kāgə̄ mbang tə́ ní ndə́lē tītə̄ mbal̄ jaspə ō, mbal̄ sarduan ō, tá kə́ dēsə́ bā kə́ ndə́lē tītə̄ mbal̄ emerodə gīr̄ gidə kōr̄ kāgə̄ mbang ní ō. 4Kōr̄ kāgə̄ mbang kə́ rang gə̄ kutə jōó gidə i sɔ́ ndi gīrə̄n̄ gidə kōr̄ kāgə̄ mbang ní. Ba kum kɔɔ̄ gə̄ kutə jōó gidə i sɔ́ ndin̄ dɔ kōr̄ kāgə̄ mbang gə̄ ní tə́. Nin̄-o̰ō̰n̄ kūbə̄ kə́ ndaa ō, jākā mbang kə́ rāā kə lɔ́r i dɔdə́ gə̄ tə́ ō. 5Tel̄ man̄ gə̄ teēn̄ tū kōr̄ kāgə̄ mbang ní tə́ ō, ndū de gə̄ ɓār̄ tū tə́ ō, man̄ ndang tū tə́ ō. Hor lámba gə̄ sīrí ń i Ndíĺ kə́ sīrí gə̄ yā Nə́ɓā ní, unjə̄n̄ no kōr̄ kāgə̄ mbang ní tə́. 6Bā bo kə́ to tītə̄ yá̰a̰ rāā wéŕ kógə̄ḿ kə́ unjə̄ yáŕ yáŕ tītə̄ kəristal#4.6 Kəristal: I yá̰á̰ kə́ to tītə̄ bətēl̄ beé, ba gātə̄də́ ngá̰ý. to no kōr̄ kāgə̄ mbang ní tə́ ō.

Yá̰á̰ kə́ kə kumuú gə̄ sɔ́ kə́ kumdə́ i ngá̰ý nodə́ tə́ ō, gōdə́ tə́ ō, ran̄ dɔ kōr̄ kāgə̄ mbang ní tə́ danaá bang ō, kə gō gidií ō. 7Yá̰á̰ kə́ kə kumuú kə́ ta kəga dɔ to tītə̄ ɓɔl ō, kə́ nge ko̰ jōó to tītə̄ duĺ man̄g kə́ bəra ō, kə́ nge ko̰ mətá, ta kumən to tītə̄ ta kum deē ō, kə́ nge ko̰ sɔ́ to tītə̄ kə̄rō kə́ a nēl̄ beé ō.

8Yá̰á̰ kə́ kə kumuú kə́ sɔ́ gə̄ ní, bɔ̄gə̄də́ gə̄ i mehḛ́ mehḛ́ kə dɔdə́ gēé. Kumdə́ i ngá̰ý gidə bɔ̄gə̄də́ gə̄ ní tə́ ō, kemeé ō. Kadaá gē ndɔ̄ɔ́ gē ní, nin̄-ədan̄ kanjə̄ taā koō na:

Kɔ́ɔ̄ɓē Nə́ɓā ń i de kə́ bo kə́ tɔ́gən i ngá̰ý ní, ni i kə́ táĺ táĺ táĺ.

Ni i Nge ń ndi kété ō, ndi ngɔlaā ō, a reē ō ní.

9Kə dɔ kɔsə ń yá̰á̰ kə́ kə kumuú kə́ sɔ́ gə̄ ní a ɔsənə̄ń gɔn nge ń ndi dɔ kōr̄ kāgə̄ mbang tə́, adə̄ i nge ń ndi kə kumneé kə dɔ ɓāl̄ gə̄ ɓāl̄ gə̄ ní ō, kə dɔ rɔȳ ń nin̄ a rɔȳnən̄ ō, a ndadə̄ adə̄nən̄ ō ní, 10kum kɔɔ̄ kə́ kutə jōó gidə i sɔ́ gə̄ əsōn̄ kə̄ nang tə́ no nge ń ndi dɔ kōr̄ kāgə̄ mbang tə́ ní, nin̄-rɔȳn̄ nge ń ndi kə kumneé kə dɔ ɓāl̄ gə̄ ɓāl̄ gə̄ ní ō, nin̄-ɓōkə́n̄ jākā mbang yādə́ gə̄ nang tə́ no kōr̄ kāgə̄ mbang tə́ ō ba ədan̄ na:

11Kɔ́ɔ̄ɓē Nə́ɓā yājí, ḭ̄ ásə kadə̄ ɔsən̄ gɔnií ō, rɔȳnī ō, ásə kənge tɔ́gə ō,

tɔdɔ̄ i ḭ̄ n ī-rāā yá̰a̰ malang ní.

Ḭ̄ ī-gḛy kadə̄ yá̰a̰ gə̄ ton̄ anī, yá̰a̰ gə̄ ní i kə́ kəndādə́.

Currently Selected:

JEJU TEĒ KUM JA̰A̰ 4: SARDC

Highlight

Copy

Compare