JEJU TEĒ KUM JA̰A̰ 21

Dɔ rā̰ kə́ kijə ō dɔ nang kə́ kijə ō

1Gō tə́ anī m-á̰a̰ dɔ rā̰ kə́ kijə ō, dɔ nang kə́ kijə ō. Tɔdɔ̄ dɔ rā̰ kə́ kété ō, dɔ nang kə́ kété ō ní, gətóon̄ kɔ̄ɔ́ ō, bā bo gətóo kɔ̄ɔ́ ō. 2Anī m-á̰a̰ ɓē yā Nə́ɓā ń i Jerusalem kə́ kijə ní, ḭḭ dɔ rā̰ tə́ a risə kə̄ nang tə́. Ni-majə ngá̰ý tītə̄ dəyá̰ kə́ súū rɔ̄n tām̄ yā ngaan tə́ beē. 3Gō tə́ anī, m-ōō ndū deē kógə̄ḿ teē tū kōr̄ kāgə̄ mbang tə́, əda na: Loo ń Nə́ɓā ndi tū tə́ kə de gēé ní n toó. Ni a ndi sedə́. Nin̄ i gír deē yān gə̄ ō, ni i Nə́ɓā ń ndi sedə́ ní ō. 4Ni a ɔl̄ man̄ nōō kə́ kumdə́ tə́ kɔ̄ɔ́ ō, deē a oy to̰ aĺ ō. Kəhɔ ndoō a gətóo ō, kɔŕ a gətóo ō, rɔ̄ tōr̄ a gətóo ō, tɔdɔ̄ yá̰á̰ kə́ jóo gə̄ mānə̄n̄ kɔ̄ɔ́.

5Anī nge ń ndi dɔ kōr̄ kāgə̄ mbang tə́ ní əda na: Á̰a̰ī, yá̰a̰ malang i kə́ m̄-rāā kijə. Ba nge ń ndi dɔ kōr̄ kāgə̄ mbang tə́ ní əda ɓáý to̰ na:

Ī-ndang najə̄ ń toō. Tɔdɔ̄ i najə̄ kə́ rɔ̄kum ō, asə kadə̄ deē əndā kemən dɔ tə́ ō.

6Ba əda ɓáý to̰ na:

I kə́ rāā kɔ̄ɔ́ ɓá. Mā i Alpa ō, Omega ō, ta kəla gír ō, ta tɔ̄l̄ ta ō. Deē ń kəndā man̄ rāān anī, m-ā m-ādə̄n man̄ kə́ teē ta kəɓan tə́ karī, kadə̄ ré a̰ȳ anī, ndi kə kumneé. 7Deē ń tetə rɔ̄ɔ̄ anī, a ənge man̄ ní. Mā i Nə́ɓā yān ō, ni i ngōnə̄ḿ ō. 8Ba yā ngé ɓōĺ gə̄ ō, ngé ra dɔ ndūdə́ tə́ aĺ gə̄ ō, de kə́ háĺdə́ majaĺ ngá̰ý gə̄ ō, ngé tɔ̄l̄ de gə̄ ō, ngé sāā naā loo kaya tə́ gə̄ ō, ngé kəga gə̄ ō, ngé rāā ɓesə̄ gə̄ ō, ngé sor̄ gə̄ malang ō ní, loo yādə́ i kum bundūm̄ hor bursu#21.8 Bursu: Á̰a̰ī Tkg 19.24. kə́ a o̰o̰ tə́. I loo ngeé ń noō n i yo kə́ nge ko̰ jōó ní.

Jerusalem kə́ kijə

9Anī de kə́ dɔ rā̰ tə́ kógə̄ḿ, kə́ dan ngé kə́ sīrí gə̄ ń kópə kə́ sīrí gə̄ kə́ yá̰á̰ kə́ tōr̄ kə́ ta tɔ̄l̄ ta tə́ gə̄ rosən̄ kem i jīdə́ tə́ ní, reē rɔ̄ḿ tə́ ba ədam̄ na:

Ī-reē na m-ā m-ɔ́jiī kə dəyá̰ nong yā Ngōn̄ batāá.

10Ni-un ndílə́ḿ aw̄ń dɔ mbal̄ bo kógə̄ḿ kə́ ngāl̄ kum kə̄ dɔɔ́ tə́, ba ɔjəm̄ ɓē yā Nə́ɓā ń i Jerusalem ní. Ɓē ní ḭḭ rɔ̄ Nə́ɓā tə́ dɔɔ́ a risə kum kə̄ nang tə́. 11Kɔsə gɔn yā Nə́ɓā nəkɔ́ rāā adə̄ ɓē ní ndə́lē tītə̄ mbal̄ kə́ gātə̄n i ngá̰ý ń i mbal̄ jaspə kə́ ndə́lē tītə̄ kəristal kə́ unjə̄ yáŕ yáŕ beē ní. 12Ndogə̄ mbal̄ kə́ nder̄ ba ngāl̄ ngá̰ý kum kə̄ dɔɔ́ gīr̄ gidə ɓē ní ō, ta róbə gə̄ kə́ yā kudəń kə̄ kem ɓē ní tə́ i kutə gidə i jōó gə̄ ō, de kə́ dɔ rā̰ tə́ gə̄ kutə gidə i jōó ran̄ ta róbə gə̄ ní tə́ ō. Ndangən̄ rī gír ɓē kə́ kutə gidə i jōó gə̄ yā ngán Israel gə̄ tū ta róbə gə̄ ní tə́ ō. 13Ta róbə i mətá dām̄ kə́ gír ɓē tə́ ō, i mətá dām̄ mbɔ́r ɓē kə́ ko̰ó̰ tə́ ō, i mətá dām̄ mbɔ́r ɓē kə́ geleé tə́ ō, i mətá no ɓē tə́ ō. 14Nja ndogə̄ mbal̄ ní i kutə gidə i jōó ba ndangən̄ rī ngámbang kəla kə́ kutə gidə i jōó gə̄ yā Ngōn̄ batə̄ tū njan gə̄ ní tə́.

15 De kə́ dɔ rā̰ tə́ ń ɔr̄ najə̄ seḿ ní, yá̰a̰ mbɔ̄jə́ ngāl̄ yá̰á̰ kógə̄ḿ i jīn tə́. Yá̰á̰ ní i tə̄ɓā lɔ́ŕ kə́ yā mbɔ̄jə́nń ɓē ō, ta róbə gə̄ kə́ yā kudəń kə̄ kem ɓēé ō, yā mbɔ̄jə́nń ndogə̄ mbal̄ kə́ gidə ɓē tə́ ō. 16Ɓē ní i ɓē kə́ kílən i sɔ́. Ngālə̄n ō laan ō asən̄ naā. De kə́ dɔ rā̰ tə́ mbɔ̄jə́ ngāl̄ ɓē ní kə tə̄ɓā ní anī, ngālə̄n i kəlā kūbə̄ mehḛ́. Ngālən ō, laan ō, ngālə̄n kə́ kə̄ dɔɔ́ ō, asən̄ naā. 17Ni-mbɔ̄jə́ ndogə̄ mbal̄ kə́ gidə ɓē ní tə́, anī ngālə̄n asə kíl deē 144. De kə́ dɔ rā̰ tə́ mbɔ̄jə́ i tītə̄ ń deē ndul gə̄ a mbɔ̄jə́n̄neé yá̰á̰ ní. 18Əndān̄ ndogə̄ mbal̄ ní i kə mbal̄ jaspə ō, rāān̄ ɓē ní i kə lɔ́ŕ kə́ unjə̄ njáý njáý tītə̄ kəristal kə́ unjə̄ yáŕ yáŕ beé ō. 19Súūn̄ nja ndogə̄ mbal̄ kə́ gidə ɓē ní tə́ i kə mbal̄ gə̄ kə́ gātə̄də́ i ngá̰ý gə̄. Súūn̄ njan kə́ ta kəga dɔ i kə mbal̄ jaspə, kə́ nge ko̰ jōó i kə mbal̄ sapir, kə́ nge ko̰ mətá i kə mbal̄ kalsedəwan, kə́ nge ko̰ sɔ́ i kə mbal̄ emerodə, 20kə́ nge ko̰ mí i kə mbal̄ sarduan, kə́ nge ko̰ mehḛ́ i kə mbal̄ kornalin, kə́ nge ko̰ sīrí i kə mbal̄ kərijolitə, kə́ nge ko̰ sɔ́sɔ́ i kə mbal̄ beril, kə́ nge ko̰ ndōhó i kə mbal̄ topajə, kə́ nge ko̰ kutə i kə mbal̄ kərijopəraj, kə́ nge ko̰ kutə gidə i kógə̄ḿ i kə mbal̄ hiyasḛt, kə́ nge ko̰ kutə gidə i jōó i kə mbal̄ ametist. 21Rāān̄ bápə ta róbə́ kə́ kutə gidə i jōó gə̄ i kə məde kutə gidə i jōó gə̄. Rāān̄ bápə́ kógə̄ḿ i kə məde kógə̄ḿ. Ba ndágə loo kə́ kem ɓēé i kə́ rāā kə lɔ́ŕ kə́ unjə̄ njáý njáý tītə̄ kəristal kə́ unjə̄ yáŕ yáŕ beē.

22M-á̰á̰ kújə yā Kɔ́ɔ̄ɓē kem ɓē ní tə́ alé. Tɔdɔ̄ kújə yā Kɔ́ɔ̄ɓē kə́ kem ɓē ní tə́ i Kɔ́ɔ̄ɓē Nə́ɓā kə́ bo kə́ tɔ́gən i ngá̰ý ō, i Ngōn̄ Batə̄ ō. 23Ɓē ní sāā i mbang ō nāā ō tá kadə̄ loo unjə̄ń kemeé alé. Tɔdɔ̄ kɔsə gɔn yā Nə́ɓā rāā adə̄ loo unjə̄ kow kemeé ō, lámbá kə́ kemeé i Ngōn̄ Batə̄ ō. 24Nápar de gə̄ a njə̄rān̄ i kə ta kūl̄ loo yān kə́ unjə̄ kow ō, mban̄g kə́ dɔ nang tə́ gə̄ a reēn̄ kə kɔsə gɔn yādə́ gēé kem ɓē ní tə́ ō. 25Deē a utə̄ ta róbə́ kə́ kem ɓē ní tə́ alé, tām̄ loo kə́ ndɔ̄ɔ́ gətóo. 26A reēn̄ kə kɔsə gɔn yā nápar de gēé ō, rɔȳ yā nápar de gēé ō, kem ɓē ní tə́. 27Yá̰á̰ kə́ yḛr a udə kem ɓē ní tə́ aĺ ō, de kə́ nge rāā yá̰á̰ kə́ majaĺ ngá̰ý ō, de kə́ nge sor̄ ō, a udən̄ kem ɓē ní tə́ aĺ ō. I ngé gə̄ ń ndangən̄ rīdə́ kem makətūbə̄ ndi kə kumuú yā Ngōn̄ Batə̄ tə́ ní ngóy n a udən̄ kem ɓē ní tə́ ní.

Currently Selected:

JEJU TEĒ KUM JA̰A̰ 21: SARDC

Highlight

Copy

Compare