JEJU TEĒ KUM JA̰A̰ 20

Ɓāl̄ kə́ dūbú gə̄

1Gō tə́ anī, m-á̰a̰ de kə́ dɔ rā̰ tə́ kógə̄ḿ ḭḭ dɔ rā̰ tə́ jə̄ngā. Kélé kutə̄ ta bəlo kə́ bo kə́ ngɔ́nən gətóo ō, súĺ kə́ ɔȳ ngá̰ý ō, i jīn tə́. 2Ni-əhɔ dā̰ kə́ to ɓōĺ ngá̰ý ń i lī kə́ jóó ō, i diabəl ō, i Sətan ō ní, do̰ō̰n kə súĺ kadə̄ rāā ɓāl̄ dūbú. 3Ni-ənīn bəlo kə́ bo kə́ ngɔ́nən gətóó tə́ ba utə̄ tan ō, rákə̄ yá̰a̰ tan tə́ adə̄ ngan̄g ō, yā kadə̄ dā̰ ní rāā nápar de gə̄ adə̄ ndúmə̄n̄ to̰ alé, bátə́ kadə̄ gír ɓāl̄ kə́ dūbú gə̄ gāngəń. Gō tə́ anī, a tútənən̄ yā kəya̰n dɔɔ́ sḛ́ý.

4Gō tə́ anī m-á̰a̰ kōr̄ kāgə̄ mbang gə̄. Ba de gə̄ ń reē ndin̄ dɔ tə́ ní, adə̄n̄də́ ta róbə kadə̄ gāngə̄n̄ sarya. Tá m-á̰a̰ de gə̄ ń tə́gān̄ míndə́də́ gángə̄n̄ kə kə̄ngāá tām̄ najə̄ kə́ kum tə́ yā Jeju tə́ ō, tām̄ najə̄ yā Nə́ɓā tə́ ní ō. De gə̄ ń rɔȳn̄ dā̰ ní aĺ ō, rɔȳn̄ ndíĺ yá̰á̰ kə́ tɔ́sə̄ kum gotə dā̰ ní tə́ aĺ ō, əndān̄ tə́ré yá̰a̰ nodə́ tə́ aĺ ō, jīdə́ tə́ aĺ ō ní, m-á̰á̰də́ ō. Nin̄-tél ndin̄ kə kumdə́ gogə́, ba o̰o̰n̄ ɓē naā tə́ kə Kərist ɓāl̄ dūbú kógə̄ḿ. 5Gotə de kə́ rang gə̄ ń oyn̄ ní, ndólə̄n̄ alé, bátə́ kadə̄ ɓāl̄ kə́ dūbú kógə̄ḿ ní təgāń. Nge ń noō i ndól̄ kə́ ta kəga dɔ yā de kə́ koy gə̄. 6Deē ń ndól̄ ndól̄ kə́ ta kəga dɔ ngeé ń toō ní, rɔ̄n nelə̄n ō, ni i deē yā Nə́ɓā ō. Yo a o̰o̰ ɓē dɔ de kə́ beē gə̄ tə́ alé, banī nin̄ i ngé tun̄ yá̰a̰ gə̄ yā Nə́ɓā ō, yā Kərist ō, a o̰o̰n̄ ɓē naā tə́ kə Kərist ɓāl̄ dūbú ō.

Tetən̄ Sətan rɔ̄ɔ̄

7Dan ń ɓāl̄ kə́ dūbú kógə̄ḿ ní asə anī, a tútən̄ súĺ kɔ̄ɔ́ rɔ̄ Sətan tə́ ō, a ɔr̄nən̄ kɔ̄ɔ́ kújə dəngáy yān tə́ ō. 8Nápar de gə̄ malang ń ndin̄ dɔ nang tə́ á i Gog nin̄ kə Magog ní, ni a teē yā kaw̄ rāādə́ kadə̄ ndúmə̄n̄. Ni a ɔsə dɔdə́ naā tə́ tām̄ yā rɔ̄ɔ̄ tə́ ō, kutə de gə̄ ní i ngá̰ý tītə̄ nán̄g ngárə̄ḿnjēý kə́ ta bā bo tə́ ō. 9Nin̄-taān̄ loo dɔ nang tə́ malang ō, gīrə̄n̄ gidə ɓē yā deē yā Nə́ɓā gə̄ ń i ɓē kə́ Nə́ɓā tárən ní əlan̄ ta naā tə́ ō. Banī hor kógə̄ḿ ḭḭ dɔ rā̰ tə́ əsō dɔdə́ tə́ o̰o̰də́. 10Diabəl ń rāādə́ adə̄ ndúmə̄n̄ ní, ənīnən̄ kum bundūm̄ hor bursu#20.10 Bursu: Á̰a̰ī Tkg 19.24 tə́ loo ń dā̰ ō, nge koō ta kə́ rɔ̄kum aĺ ō i tū tə́ ní tə́. Yá̰á̰ kə́ tōr̄ a rāādə́ kadaá ō, ndɔ̄ɔ́ ō, kə dɔ ɓāl̄ gə̄ ɓāl̄ gə̄.

Sarya kə́ ta tɔ̄l̄ ta tə́

11Gō tə́ anī m-á̰a̰ kōr̄ kāgə̄ mbang kə́ bo kə́ ndaa ō, deē ń ndi dɔ tə́ ní ō. Dɔ nang ō, dɔ rā̰ ō, a̰ȳn̄ naā kɔ̄ɔ́ ta kumən tə́ ō, əngen̄ loo tām̄ yādə́ tə́ to̰ aĺ ō. 12Anī m-á̰á̰ de kə́ koy gə̄, kə́ tɔgə gə̄ ō, kə́ dūú gə̄ ō, ran̄ kə njadə́ dɔɔ́ ta kōr̄ kāgə̄ mbang ní tə́. Teēn̄ kem makətūbə̄ gə̄, banī makətūbə̄ kə́ rang ń i makətūbə̄ ndi kə kumuú ní, i kə́ teē kem ō. Ba gāngə̄n̄ sarya dɔ de kə́ koy gə̄ tə́ sɔɔ̄ń kəla rāādə́ gə̄, kə gō yá̰a̰ gə̄ ń ndangən̄ kem makətūbə̄ gə̄ tə́ ní. 13De gə̄ ń oyn̄ kum bā bo tə́ ní bā bo teē sedə́ ō, yo teē kə de gə̄ ń oyn̄ ní ō. De gə̄ ń oyn̄ á ton̄ ɓádá ní, loo kə́ ɓádá teē sedə́ ō. Ba gāngə̄n̄ sarya dɔ de gə̄ tə́ kógə̄ḿ kógə̄ḿ i kə gō kəla rāādə́ gēé. 14Ənīn̄ yo ō, loo kə́ ɓádá ō, kum bundūm̄ hor ní tə́. Bundūm̄ hor i yo kə́ nge ko̰ jōó. 15Ba deē ń əngen̄ rīn kem makətūbə̄ ndi kə kumuú tə́ aĺ ní, a ənīnən̄ kum bundūm̄ hor tə́.

Currently Selected:

JEJU TEĒ KUM JA̰A̰ 20: SARDC

Highlight

Copy

Compare