JEJU TEĒ KUM JA̰A̰ 22

1Gō tə́ anī, de kə́ dɔ rā̰ tə́ ní ɔjəm̄ man̄ bā kógə̄ḿ kə́ deē a̰ȳ anī a ndi kə kumneé. Bā ní kumən unjə̄ yáŕ yáŕ tītə̄ bətēl̄ kəristal beé ō, teē i tū kōr̄ kāgə̄ mbang yā Nə́ɓā tə́ ō, yā Ngōn̄ Batə̄ tə́ ō. 2Kāgə̄ kógə̄ḿ ra dan ɓē ní tə́ ta mba bā kə́ tɔ̄ɔ̄ dām̄ jōó tə́. Kāgə̄ ní i kāgə̄ kə́ deē əsa anī a ndi kə kumneé ō, i kāgə̄ kə́ a an̄ nja kutə gidə i jōó kem ɓāl̄ kógə̄ḿ ō. Ni a an̄ i kə dɔ nāā gə̄ ō, mbīn i dáwá kə́ yā ngáań mo̰y yā nápar de gə̄ ō. 3Ndɔ̄ĺ a gətóo.

Ba kōr̄ kāgə̄ mbang yā Nə́ɓā ō, yā Ngōn̄ Batə̄ ō, a ndi kem ɓē ní tə́ ō, ngé kəla gə̄ yā Nə́ɓā a rāān̄ kəla yā kadə̄ Nə́ɓā ō. 4Nin̄ a a̰a̰n̄ ta kumən ō, a ndangən̄ rīn nɔtə nodə́ tə́ ō. 5Loo kə́ ndɔ̄ɔ́ a gətóo ō, a sāān̄ i hor lámbá tá yā ka̰a̰ń loo aĺ ō, a sāān̄ i mbang tá yā ka̰a̰ń loo aĺ ō. Tām̄ i Kɔ́ɔ̄ɓē Nə́ɓā n i loo kə́ unjə̄ kow dɔdə́ tə́ kadə̄ a̰a̰n̄neé loo ō, nin̄ a o̰o̰n̄ ɓē i kə dɔ ɓāl̄ gə̄ ɓāl̄ gə̄ ō.

Jeju a reē

6Gō tə́ anī de kə́ dɔ rā̰ tə́ ní ədam̄ na najə̄ ń toō i najə̄ kə́ rɔ̄kum ō, asə kadə̄ deē taā kem ō. Ba Kɔ́ɔ̄ɓē Nə́ɓā ń i nge kəndā najə̄ ta ngé koō ta gə̄ tə́ ní, əla deē yān kə́ dɔ rā̰ tə́ kadə̄ ɔjə ngé kəla yān gə̄ yá̰á̰ ń a rāā yā rāā yá̰a̰ ngɔr ní.

7Á̰a̰ā̰, m-ā m̄-reē ngɔr. Deē ń ngɔ̄m̄ najə̄ kə́ ta Nə́ɓā tə́ kə́ ndang kem makətūbə̄ ń toō tə́ ní, rɔ̄n a nelə̄n.

8Deē ń oō najə̄ ń toō ō, a̰a̰ yá̰á̰ ń toō ō ní, i mā Ja̰a̰. Ba dan ń m-ōō ō, m-á̰a̰ā̰ ō anī, m-ə̄sō kə̄ nang tə́ nja de kə́ dɔ rā̰ tə́ ń ɔjəm̄ yá̰a̰ ngeé ń noō tə́ ní yā rɔȳn. 9Banī ni-ədam̄ na kə m̄-lōō rāā beé, na ni na i madə̄ kəlaḿ ō, madə̄ kəla ngákó̰ó̰ḿ kə́ ngé koō ta gə̄ ō, ngé gə̄ ń a ngɔ̄mə̄n̄ najə̄ gə̄ kə́ kem makətūbə̄ ń toō tə́ ní ō. Ba na i Nə́ɓā n majə kadə̄ m̄-rɔȳn ní.

10Gō tə́ anī ni-ədam̄ na:

Najə̄ yā Nə́ɓā ń to kem makətūbə̄ ń toō tə́ ní, kə m̄-lōō ɓɔ̄ɔ̄ dɔ. Tɔdɔ̄ kum mbang kə́ tām̄ yā yá̰a̰ gə̄ ń noō tə́ ní dɔ na i ngɔr. 11Adə̄ de kə́ nge rāā yá̰a̰ gōtə́ aĺ kə na̰y kə̄ loo rāā yá̰á̰ kə́ gōtə́ aĺ tə́ kə̄ non tə́ ō, de kə́ yḛr kə na̰y kə̄ loo rāā yá̰á̰ kə́ yḛr tə́ kə̄ non tə́ ō, de kə́ nge rāā yá̰á̰ kə́ gōtə́ kə na̰y kə̄ loo rāā yá̰á̰ kə́ gōtə́ tə́ kə̄ non tə́ ō, deē ń ɔr̄ rɔ̄n tayā tām̄ yā Nə́ɓā tə́ ní, kə na̰y kə̄ loo kɔr̄ rɔ̄n tayā tə́ tām̄ yā Nə́ɓā tə́ kə̄ non tə́ ō.

12Á̰a̰ā̰, m-ā m̄-reē ngɔr. Yá̰á̰ ń kadə̄ m-ə̄ndań nja de gə̄ kógə̄ḿ kógə̄ḿ sɔɔ̄ń kəla rāādə́ gə̄ ní, m-ā m̄-reēń jīḿ tə́. 13Mā i Alpa ō, Omega#22.13 Alpa ō, Omega ō: Á̰a̰ī 1.8 ō, nge kə́ kété ō kə́ gogə́ ō, ta kəla gír ō ta tɔ̄l̄ ta ō.

14Ngé gə̄ ń tə́gon̄ kūbə̄ ngāl̄ yādə́ gə̄ ní, rɔ̄də́ nel̄də́. Tɔdɔ̄ nin̄ a əngen̄ ta róbə kəsa kan̄ kāgə̄ ndi kə kumuú ní ō, a udən̄ kem ɓē ní tə́ kə ta róbə gə̄ ní ō. 15Banī bísə gə̄ ō, ngé rāā kəga gə̄ ō, ájə́ba gə̄ ō, ngé tɔ̄l̄ de gə̄ ō, ngé rāā ɓesə̄ gə̄ ō, de gə̄ malang ń nel̄də́ sor̄ ō, a sorə̄n̄ ō ní, nin̄ i ndágá.

16Mā Jeju, m-ə́la deē yāḿ kə́ dɔ rā̰ tə́ kadə̄ reē teē kumsí dɔ yá̰a̰ gə̄ ń noō tə́ malang kə̄ kem Egəlijə gə̄ tə́. Mā i de kə́ gír kojə yā Dabid tə́ ō, dɔgə́ loo tīī kə́ ndə́lē ō.

17Ndíl ō, dəyá̰ nong ō ədan̄ na: Ī-reē!

Deē ń oō ní, ādə̄ əda na: Ī-reē!

Ba deē ń kəndā rāān anī, ādə̄ reē ō. Deē ń ndigə anī, man̄ ń a rāā kadə̄ deē ndi kə kumneé ní, ādə̄ kɔ́ɔ̄ taā karī ō.

Kán̄ ta najə̄

18Najə̄ kə́ kem makətūbə̄ ń toō tə́ ń i najə̄ kə́ Nə́ɓā əndā ta nge koō ta tə́ ní, deē ń oō anī, mā Ja̰a̰ m̄-tāan tāā kə́ o̰o̰m̄ tɔdɔ̄ tə́ m-ə́da na: Ré deē kógə̄ḿ ənī yá̰á̰ kə́rēý dɔ najə̄ ń toō tə́ anī, yá̰á̰ kə́ tōr̄ gə̄ ń ndangən̄ kem makətūbə̄ ń toō tə́ ní, Nə́ɓā a rāā kadə̄ a reē dɔ kɔ́ɔ̄ tə́. 19Najə̄ kə́ kem makətūbə̄ ń toō tə́ ń i najə̄ kə́ Nə́ɓā əndā ta nge koō ta tə́ ní, ré deē kógə̄ḿ ɔr̄ yá̰á̰ kə́rēý tū tə́ kɔ̄ɔ́ anī, ndū kə́ kənī gə̄ ń ton̄ kem makətūbə̄ ń toō tə́ ní, Nə́ɓā a ɔr̄ dāmə̄n yā kɔ́ɔ̄ kɔ̄ɔ́ ō. Ni a əsa kan̄ kāgə̄ ndi kə kumuú ní aĺ ō, ni a udə kem ɓē yā Nə́ɓā tə́ aĺ ō.

20Deē ń əda na yá̰a̰ malang ń noō i rɔ̄kum ní əda na: A̰á̰ā̰, m-ā m̄-reē ngɔr.

Adə̄ i tītə̄ ń noō! Kɔ́ɔ̄ɓē Jeju, ī-reē!

21Ādə̄ Kɔ́ɔ̄ɓē Jeju rāā kem majə sesí malang!

Currently Selected:

JEJU TEĒ KUM JA̰A̰ 22: SARDC

Highlight

Copy

Compare