JEJU TEĒ KUM JA̰A̰ 19

1Gō tə́ anī m-ōō kōō yá̰á̰ kə́ ɓār̄ tītə̄ ndū kósə de kə́ ngá̰ý gə̄ beé dɔ rā̰ tə́, əda na: Aleluya! Kajə ō, kɔsə gɔn ō, tɔ́gə ō, i yā Nə́ɓā yājí. 2Tɔdɔ̄ sarya gāngə̄n i rɔ̄kum ō, i kə́ gōtə́ ō. Ni-gān̄g sarya dɔ dəyá̰ ájə́ba kə́ bo ń nujə dɔ nang kə rāā ájə́ba yānneé ní ō, əndan najə̄ ɓōkə́ ń ni ɓōkə́ mósə́ ngé kəla yān gə̄ nang tə́ ní ō. 3De gə̄ ní ədan̄ ɓáý to̰ na: Aleluya! Ba sa kə́ dɔ dəyá̰ ní tə́ əɓa kum kə̄ dɔɔ́ kə dɔ ɓāl̄ gə̄ ɓāl̄ gə̄. 4Anī kum kɔɔ̄ kə́ kutə jōó gidə i sɔ́ gə̄ ō, yá̰á̰ kə́ kə kumuú kə́ sɔ́ gə̄ ō, ɔsən̄ nodə́ nang tə́ ba rɔȳn̄ Nə́ɓā ń ndi dɔ kōr̄ kāgə̄ mbang tə́ ní ba ədan̄ na: Adə̄ i tītə̄ ń noō! Aleluya!

Yá̰a̰ kəsa kə́ ndɔ̄ kaw̄ kújú yā nə̄yá̰ ngōn̄ batə̄ tə́

5Anī ndū deē kógə̄ḿ teē tū kōr̄ kāgə̄ mbang ní tə́ əda na: Sḭḭ̄ ngé kəla gə̄ malang yā Nə́ɓā yājí, adə̄ i sḭḭ̄ de kə́ dūú gə̄ ō, de kə́ tɔgə gə̄ ō ń ī-ɓōlíī ndílən ní, ī-ɓōkə́niī tɔ̄ȳ. 6Gō tə́ anī, m-ōō kōō yá̰á̰ kə́ ɓār̄ tītə̄ kōō kósə de kə́ ngá̰ý gə̄ beé ō, tītə̄ man̄ bā kə́ ngá̰ý ō, tītə̄ kōō man̄ kə́ ndang ngá̰ý ō. Kósə de gə̄ ní ədan̄ na:

Aleluya! Tɔdɔ̄ Kɔ́ɔ̄ɓē Nə́ɓā yājí kə́ bo kə́ tɔ́gən i ngá̰ý o̰o̰ ɓē. 7Ādə̄ jə-rāāī rɔ̄nel̄ ō, jə-tḭ́ḭ̄ bal walya ō, j-ɔsiī gɔnən ō. Tɔdɔ̄ kum mbang kaw̄ kújú yā nə̄yá̰ Ngōn̄ Batə̄ asə kɔ̄ɔ́ ō, nə̄yá̰n rāā rɔ̄n kɔ̄ɔ́ ō. 8Adə̄nən̄ kūbə̄ lḛ́ḛ kə́ kəlā kəjōn kídə̄ yululu ō, ndə́lē ō, unjə̄ njáý njáý ō, adə̄ əla rɔ̄n tə́. Tɔdɔ̄ kūbə̄ lḛ́ḛ i kəla kə́ gōtə́ gə̄ ń de gə̄ yā Nə́ɓā rāān̄ ní.

9Anī de kə́ dɔ rā̰ tə́ kógə̄ḿ ədam̄ na kə m̄-ndang najə̄ ń toō: Ngé gə̄ ń ɓārə́n̄də́ tū yá̰a̰ kūjə́ kaw̄ kújú yā nə̄yá̰ Ngōn̄ Batə̄ tə́ ní, rɔ̄də́ nel̄də́.

Gō tə́ anī ni-ədam̄ na najə̄ ń toō na i najə̄ kə́ rɔ̄kum yā Nə́ɓā.

10Loo ń noō tə́ m-ə̄sō m-ɔ́sə noḿ nang tə́ kə̄ njan tə́ yā rɔȳnəń, anī ni-ədam̄ na kə m̄-lōō rāā beé na ni na i nge kəla madə́ḿ ō, nge kəla madə̄ ngákó̰ó̰ḿ gə̄ kə́ ngé ngɔ̄m̄ najə̄ kə́ kum tə́ yā Jeju ō. I Nə́ɓā n kadə̄ ī-rɔȳn ní.

Tɔdɔ̄ najə̄ kə́ kum tə́ yā Jeju, i ndíĺ ń a rāā kadə̄ deē əda najə̄ kə́ Nə́ɓā əndā tan tə́ ní.

Nge kal̄ sə́ndá kə́ ndaa

11Gō tə́ anī m-á̰a̰ dɔ rā̰ ra kə wōyōó, anī sə́ndá kə́ ndaa teē. Ba deē ń ndi gidən tə́ ní, rīn na i nge ra dɔ ndūn tə́ ō, kə́ rɔ̄kum ō. Ni a gān̄g sarya ō, a rɔ̄ɔ̄ ō, i kə gō róbə́ kə́ gōtə́. 12Kumən to tītə̄ ta ndo̰ hor ō, yá̰á̰ súū rɔ̄ gə̄ i ngá̰ý dɔn tə́ ō. Ndangən̄ rī kógə̄ḿ dɔn tə́. Ba deē kógə̄ḿ kə́ ger̄ rī ní gətóo ō, banī i nəkɔ́ tá ngóy. 13Kūbə̄ ń əlan̄ rɔ̄n tə́ dɔ madə̄ gə̄ tə́ ní, i kə́ kəla kum mósə́ tə́ ō, rīn na i Najə̄ yā Nə́ɓā ō. 14Ngé rɔ̄ɔ̄ kə́ dɔ rā̰ tə́ gə̄ unən̄ gōn. Nin̄-ndin̄ i dɔ sə́ndá kə́ ndaa gə̄ tə́ ō, o̰ō̰n̄ i kūbə̄ lḛ́ḛ kə́ ndaa kə́ kəlā kəjōn kídə̄ yululu ō, unjə̄ njáý njáý ō. 15Kəyā kógə̄ḿ kə́ ta lēmbə́, kə́ yā tɔ̄ləń nápar de gə̄, teē tan tə́ ō, ni a ɔr nodə́ i kə ndéy gindīí ō. Ba a mbə́rē kan̄ kāgə̄ nduú i kem bay wōn̄g kə́ ngá̰ý yā Nə́ɓā kə́ bo kə́ tɔ́gən i ngá̰ý tə́. 16Ndangən̄ rī kógə̄ḿ tū kūbə̄ yān kə́ dɔ madə̄ gə̄ tə́ ō, dɔ ɓúrən tə́ ō. Rī ní na i mban̄g kə́ dɔ mban̄g gə̄ tə́ ō, Kɔ́ɔ̄ɓē kə́ dɔ kɔ́ɔ̄ ɓē gə̄ tə́ ō.

17Gō tə́ anī, m-á̰a̰ de kə́ dɔ rā̰ tə́ kógə̄ḿ ra kum mbang tə́ kə njan kə́ dɔɔ́. Ni-əga kɔŕ ngá̰ý ədań yel̄ gə̄ malang ń nēlə̄n̄ ɓōdə̄ rā̰ tə́ dɔɔ́ ní na kə reēn̄ kə ɔsən̄ dɔdə́ naā tə́ tām̄ yā yá̰a̰ kəsa kə́ ngá̰ý ń Nə́ɓā na a rāā tə́ ní. 18Kə reē kə əsan̄ dā̰ mban̄g gə̄ ō, dā̰ ngol áskar gə̄ ō, dā̰ de kə́ ngan̄g gə̄ ō, dā̰ sə́nda gə̄ kə ngé kal̄də́ gə̄ ō. Dā̰ de gə̄ malang, adə̄ i de gə̄ kə́ nin̄ i kɔ́ɔ̄ rɔ̄də́ gə̄ ō, ɓəlo gə̄ ō, kə́ dūú gə̄ ō, kə́ bo gə̄ ō.

19Gō tə́ anī, m-á̰a̰ dā̰ ní ō, mban̄g kə́ dɔ nang tə́ gə̄ ō, ngé rɔ̄ɔ̄ yādə́ gə̄ ō. Ɔsən̄ dɔdə́ naā tə́ yā rɔ̄ɔ̄ deē ń ndi dɔ sə́ndá tə́ ní kə ngé rɔ̄ɔ̄ yān gēé. 20Əhɔn̄ dā̰ ní ō, nge koō ta kə́ rɔ̄kum aĺ ní ō. Kété ní, nge koō ta kə́ rɔ̄kum aĺ ngeé ń toō rāā yá̰á̰ kə́ yáā gə̄ ta kum dā̰ ní tə́, góləń ngé gə̄ ń əndān̄ tə́ré yá̰a̰ yā dā̰ rɔ̄də́ tə́ ō, rɔȳn̄ ndíĺ yá̰á̰ kə́ tɔ́sə̄ kum gotə dā̰ ní ō ní. Dā̰ ní ō, nge koō ta kə́ rɔ̄kum aĺ ní ō ní, tə́nīn̄də́ kə kumdə́ kum bundūm̄ hor bursu#19.20 Bursu: Á̰a̰ī Tkg 19.24 kə́ a o̰o̰ tə́. 21Kaskar ń teē ta deē ń ndi dɔ sə́ndá tə́ ní tɔ̄l̄ gotə de kə́ rang gə̄, adə̄ yel̄ gə̄ malang əsan̄ dā̰də́ ndānə̄n̄.

Currently Selected:

JEJU TEĒ KUM JA̰A̰ 19: SARDC

Highlight

Copy

Compare