JEJU TEĒ KUM JA̰A̰ 15
15
De kə́ dɔ rā̰ tə́ kə́ sīrí gə̄ ō, yá̰á̰ kə́ tōr̄ gə̄ kə́ ta tɔ̄l̄ ta tə́ ō
1Gō tə́ anī m-á̰á̰ yá̰á̰ kə́ to kɔr kum kə́ rang kə́ bo ō, majə ngá̰ý ō, dɔ rā̰ tə́. Yá̰á̰ ní i de kə́ dɔ rā̰ tə́ gə̄ sīrí kə́ yá̰á̰ kə́ tōr̄ gə̄ sīrí i jīdə́ tə́. Tɔdɔ̄ Nə́ɓā tɔ̄l̄ ta wōn̄g yān i kə yá̰á̰ kə́ tōr̄ kə́ sīrí gə̄ ní.
2Anī m-á̰á̰ yá̰á̰ kógə̄ḿ kə́ to tītə̄ bā bo, kə́ to tītə̄ yá̰a̰ rāā wéŕ kə́ kəla naā tə́ kə horoó beē. Ba de gə̄ ń tetən̄ dā̰ ní rɔ̄ɔ̄ ō, tetən̄ ndíĺ yá̰á̰ kə́ rāā kum gotə dā̰ ní rɔ̄ɔ̄ ō, tetən̄ kutə yá̰á̰ ń ɔjə rī dā̰ ní rɔ̄ɔ̄ ō ní, ran̄ dɔ bā bo kə́ to tītə̄ yá̰a̰ rāā wéŕ tə́ ní kə kənde gə̄ yā Nə́ɓāá jīdə́ tə́. 3Nin̄-ənīn̄ pā yā Moijə nge kəla yā Nə́ɓā ō, pā yā Ngōn̄ batə̄ ō, ədan̄ na:
Kɔ́ɔ̄ɓē Nə́ɓā kə́ bo kə́ tɔ́gən i ngá̰ý,
kəla rāāí i kəla kə́ bo gə̄ ō, kə́ to kɔr kum gə̄ ō.
Mban̄g kə́ dɔ nápar de gə̄ tə́,
gō róbə yāí gə̄ i gō róbə́ kə́ gō tə́ gə̄ ō, kə́ rɔ̄kum gə̄ ō.
4Kɔ́ɔ̄ɓē, i náā n a ɓōĺ rīí aĺ ní,
i náā n a ɔsə gɔn rīí aĺ ní?
Tɔdɔ̄ i ḭ̄ kɔ́ kal kógə̄ḿ beē ngóy n i kə́ táĺ ní.
Nápar de gə̄ malang a reēn̄ yā kɔsə nodə́ nang tə́ noí tə́ yā rɔyīneé.
Tɔdɔ̄ teēn̄ kumdə́ dɔ kəla rāāí kə́ gō tə́ gə̄ tə́.
5Gō tə́ anī, m-á̰a̰ ta kújə yā Kɔ́ɔ̄ɓē kə́ dɔ rā̰ tə́ ra kə wōyōó. Ba kújə tandā ń sandúkə ndū najə̄ ndi gírí ní, i kem kújə yā Kɔ́ɔ̄ɓē ní tə́. 6De kə́ dɔ rā̰ tə́ kə́ sīrí gə̄ ń yá̰á̰ kə́ tōr̄ kə́ sīrí gə̄ i jīdə́ tə́ ní, teēn̄ kem kújə yā Kɔ́ɔ̄ɓē ní tə́. Kūbə̄ lḛ́ḛ́ kə́ unjə̄ njáý njáý ō, ndə́lē pipir ō, i rɔ̄də́ tə́. Nin̄-do̰ō̰n̄ nganjədə́ kə kəlā do̰ō̰ ɓōdə̄ kə́ rāān̄ kə lɔ́rɔ́. 7Yá̰á̰ kə́ kə kumuú kə́ sɔ́ gə̄ ní, nge kə́ kógə̄ḿ dandə́ tə́ adə̄ de kə́ dɔ rā̰ tə́ kə́ sīrí gə̄ ní kópə gə̄ kə́ rāā kə lɔ́rɔ́ sīrí, kə́ wōn̄g yā Nə́ɓā kə́ nge ndi kə kumneé kə dɔ ɓāl̄ gə̄ ɓāl̄ gə̄ rosə kem. 8Sa ń i yá̰á̰ kə́ ɔsə kum gotə kɔsə gɔn yā Nə́ɓā ō, tɔ́gən ō ní, taā kem kújə yā Kɔ́ɔ̄ɓē malang. Deē asə kudə kem kújə yā Kɔ́ɔ̄ɓē tə́ alé, bátə́ kadə̄ gíŕ yá̰á̰ kə́ tōr̄ kə́ sīrí gə̄ yā de kə́ dɔ rā̰ tə́ kə́ sīrí gə̄ ní gān̄g pá tá.
Currently Selected:
JEJU TEĒ KUM JA̰A̰ 15: SARDC
Highlight
Copy
Compare
Share
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.
