JEJU TEĒ KUM JA̰A̰ 14

Pā kənī ngé gə̄ ń gāngə̄n̄ dɔdə́ ní

1Anī m-á̰a̰ Ngōn̄ batə̄ ra dɔ mbal̄ Siyo̰ tə́, ba de gə̄ 144 000 kə́ ndangən̄ rīn ō, rī Bɔbə̄n ō, nodə́ tə́ i seneé. 2Anī deē kógə̄ḿ ɔr̄ najə̄ adə̄ m-ōō ndūn dɔ rā̰ tə́ tītə̄ kōō man̄ kə́ ɓār̄ ngá̰ý beē ō, tītə̄ kōō man̄ kə́ ndang ngá̰ý beē ō. Ba ndūn ń m-ōō ní ɓār̄ tītə̄ kōō kənde gə̄ kə́ ngé kugədə́ gə̄ a ugən̄ beé. 3Dūbūú de gə̄ ní ran̄ ta kōr̄ kāgə̄ mbang tə́ ō, no yá̰á̰ kə́ kə kumuú kə́ sɔ́ gə̄ tə́ ō, no kum kɔɔ̄ gə̄ tə́ ō, ənīnəń pā kə́ kijə. De kə́ rang kə́ asə ndóō pā ní gətóo, ba i de gə̄ kə́ 144 000 gə̄ ń gāngə̄n̄ dɔdə́ dan de kə́ dɔ nang tə́ gə̄ tə́ ní tá ngóy.

4Nin̄ i ngé gə̄ ń yḛrən̄ rɔ̄də́ kə dəyá̰ gēé aĺ ní, tɔdɔ̄ nin̄-unjə̄n̄ njáý njáý. Nin̄-unən̄ gō Ngōn̄ batə̄ loo malang ń ni-aw̄ tū tə́ ní tə́. I nin̄ n gāngə̄n̄ dɔdə́ dan de gə̄ tə́ tām̄ yā Nə́ɓā tə́ ō, Ngōn̄ batə̄ tə́ ō ní. 5Najə̄ kə́ sor̄ gətóo tadə́ tə́ ō, najə̄ gətóo dɔdə́ tə́ ō.

Ngé kəla kə́ dɔ rā̰ tə́ kə́ mətá gə̄

6Anī m-á̰a̰ de kə́ dɔ rā̰ tə́ kə́ rang nēl̄ ɓōdə̄ rā̰ tə́ dɔɔ́ sa̰y. Ni-aw̄ kə Najə̄ kə́ Majə kə́ to ngándáńg yā kəda de gə̄ ń ndin̄ dɔ nang tə́ ní. Adə̄ i nápar de gə̄ malang ō, gír ɓē gə̄ malang ō, gír ta gə̄ malang ō, gír de gə̄ malang ō. 7Ni-əda kə tɔ́gəneé na: Ī-ɓōlíī Nə́ɓā ō, ɔ́siī gɔnən ō, tɔdɔ̄ kum mbang gān̄g sarya yān asə kɔ̄ɔ́. Ɔsiī nosí nang tə́ ī-rɔyīneé nge rāā dɔ rā̰ ō, dɔ nang ō, bā bo ō, ta kəɓa man̄ gə̄ ō.

8Anī de kə́ dɔ rā̰ tə́ kə́ rang kə́ nge ko̰ jōó utə̄ gōn, əda na: Babilon ń i ɓē bo ní, əsō kɔ̄ɔ́, əsō kɔ̄ɔ́! Ni-adə̄ nápar de gə̄ malang kasə nduú ń i ájə́ba kɔ̄r̄ yān ní adə̄ a̰ȳn̄.

9Anī de kə́ dɔ rā̰ tə́ kə́ rang kə́ nge ko̰ mətá utə̄ gōdə́, əda kə tɔ́gɔ́ na: Ré deē kógə̄ḿ rɔȳ dā̰ ní ō, ndíĺ yá̰á̰ kə́ ɔsə kum gotə dā̰ ní ō, adə̄ əndān̄ tə́ré yá̰a̰ yā dā̰ ní nɔtə non tə́ aláa jīn tə́ ō anī, 10kɔ́ɔ̄ a a̰ȳ kasə nduú wōn̄g yā Nə́ɓā ō. Ɓōkə́n̄ kasə nduú ní kem kópə wōn̄g yā Nə́ɓā tə́ i kanjə̄ yá̰á̰ kə́ rang kum tə́. Adə̄ yá̰á̰ kə́ tōr̄ a rāā kɔ́ɔ̄ kum hor tə́ ō, kum bursu#14.10 Bursu: Á̰a̰ī Tkg 19.24 tə́ ō, ta kum de kə́ dɔ rā̰ tə́ kə́ táĺ gə̄ tə́ ō, ta kum Ngōn̄ batə̄ tə́ ō. 11Hor ń yá̰á̰ kə́ tōr̄ rāādə́ kum tə́ ní, saan əɓa guy guy kə dɔ ɓāl̄ gə̄ ɓāl̄ gə̄. De gə̄ ń rɔȳn̄ dā̰ ní ō, ndíĺ yá̰á̰ kə́ ɔsə kum gotə dā̰ ní ō, deē ń adə̄ əndān̄ tə́ré yá̰á̰ kə́ ɔsə kum gotə rī dā̰ ní rɔ̄n tə́ ō ní, de gə̄ ń noō a ɔrə̄n̄ koō kadaá aĺ ō ndɔ̄ɔ́ aĺ ō.

12De gə̄ yā Nə́ɓā ń i ngé ra dɔ gō míndən gə̄ tə́ ō, i ngé ra dɔ taā kem Jeju tə́ ō ní, kum mbang ń toō i kum mbang kə́ kadə̄ nin̄-tə́gān̄ tadə́.

13M-ōō ndū deē kógə̄ḿ teē dɔ rā̰ tə́ əda na:

Ī-ndang najə̄ ń toō: Əla gír ngɔr ń toō tə́ ní, ngé gə̄ ń oyn̄ najə̄ yā Kɔ́ɔ̄ɓē tə́ ní, rɔ̄də́ nel̄də́. Ndíl əda na a̰á̰ā̰, ādə̄ ɔrə̄n̄ koō kəla yādə́, tɔdɔ̄ kəla rāādə́ a utə̄ gōdə́.

Əjan̄ de kə́ dɔ nang tə́ gə̄ tītə̄ loo kəja kan̄ kāgə̄ nduú beē

14Anī m-á̰a̰ kil̄ man̄ kógə̄ḿ kə́ ndaa, ba yá̰á̰ kə́ kə kumuú ń ndi dɔ tə́ ní to tītə̄ ngōn̄ deē beé. Jākā mbang kə́ rāān̄ kə lɔ́r i dɔn tə́ ō, ngorong kə́ kumən atə ngá̰ý i jīn tə́ ō. 15Anī de kə́ dɔ rā̰ tə́ kə́ rang teē kem kújə yā Kɔ́ɔ̄ɓē tə́. Ni-əga kɔŕ ngá̰ý ədań deē ń ndi dɔ kil̄ man̄ tə́ ní na kə əla ngorong yān kə́ jīn tə́ kə əjań. Tām̄ kum mbang kəja yá̰a̰ na asə kɔ̄ɔ́, tɔdɔ̄ de kə́ dɔ nang tə́ gə̄ na ton̄ kəja kɔ̄ɔ́. 16Deē ń ndi dɔ kil̄ man̄ tə́ ní, ənī ngorong yān dɔ nang tə́. Anī əjan̄ de kə́ dɔ nang tə́ gə̄ tītə̄ loo kəja kan̄ kāgə̄ nduú beē.

17De kə́ dɔ rā̰ tə́ kə́ rang teē kem kújə yā Kɔ́ɔ̄ɓē kə́ dɔ rā̰ tə́ tə́. Ngorong kə́ kumən atə ngá̰ý i jīn tə́ ō.

18Anī de kə́ dɔ rā̰ tə́ kə́ rang ḭḭ ta loo tun̄ yá̰á̰ tə́ reē. Ni-aw̄ kə tɔ́gə dɔ hor tə́. Ni əga kɔŕ ngá̰ý ədań de kə́ dɔ rā̰ tə́ kə́ nge teē kem kújə yā Kɔ́ɔ̄ɓē tə́ ń ngorong kə́ kumən atə ngá̰ý i jīn tə́ ní na: Əla ngorong yāí kə́ kumən atə ngá̰ý ní ə́jań dɔ bəra kan̄ kāgə̄ nduú gə̄ kə́ dɔ nang tə́. Tɔdɔ̄ kan̄ kāgə̄ nduú kə́ tū tə́ gə̄ ton̄ kəja kɔ̄ɔ́. 19Anī de kə́ dɔ rā̰ tə́ ní ənī ngorong yān dɔ nang tə́ əjań kan̄ kāgə̄ nduú kə́ dɔ nang tə́, ba ɓōkə́ kem bay kə́ bo ń i bay wōn̄g yā Nə́ɓā ní tə́. 20Ba mbə́rēn̄ kan̄ kāgə̄ nduú gə̄ kem bay ní tə́ gidə ɓē tə́ ndágá, adə̄ mósə teē tū tə́. Mósə́ ń teē ní ḭḭ bátə́ ugə̄ tū jámá kə́ ta sə́nda gə̄ tə́ dɔɔ́ ō, laa loo ń mósə taā ní, asə kəlā kūbə̄ dūbú sɔ́ kə kə́ kutə sɔ́sɔ́ ō.

Currently Selected:

JEJU TEĒ KUM JA̰A̰ 14: SARDC

Highlight

Copy

Compare