JEJU TEĒ KUM JA̰A̰ 13

Dā̰ kə́ jōó gə̄

1Anī m-á̰a̰ dā̰ kógə̄ḿ teē kum bā bo tə́, gajən gə̄ i kutə kógə̄ḿ ō, dɔn i sīrí ō, yá̰á̰ súū rɔ̄ kə́ dɔ tə́ gə̄ kutə kógə̄ḿ i tū gajən gə̄ ní tə́ kógə̄ḿ kógə̄ḿ ō. Rī kógə̄ḿ kə́ to ngonjə̄ i tū gajən gə̄ ní tə́ kógə̄ḿ kógə̄ḿ ō. 2Dā̰ ń m-á̰a̰n ní to tītə̄ kagə ō, njan to tītə̄ nja dā̰ úrsə#13.2 Dā̰ úrsə: I dā̰ kə́ do̰. Ni-ra dɔɔ́ anī to tītə̄ ɓetə̄ madə beé. Ba ni tá bo ngá̰ý ō ɔȳ ngá̰ý ō. ō, tan to tītə̄ ta ɓɔl beé ō. Ba dā̰ kə́ to ɓōĺ ní adə̄n tɔ́gə ō, kōr̄ kāgə̄ mbang yān ō, tɔ́gə́ kə́ ngá̰ý kadə̄ o̰o̰ń ɓē ō. 3Əndan̄ dɔn kógə̄ḿ kə doó, adə̄ dɔn ní to ranjang tītə̄ kə́ oy kɔ̄ɔ́ beē, ba do ń asə yon ní edə̄ kɔ̄ɔ́. Loo ń noō tə́ ɔr kum de kə́ dɔ nang tə́ gə̄ malang ngá̰ý, adə̄ nin̄-unən̄ gōn. 4Nin̄-rɔȳn̄ dā̰ kə́ to ɓōĺ ní, tɔdɔ̄ ni-adə̄ dā̰ kə́ to tītə̄ kagə ní tɔ́gə, adə̄ de gə̄ rɔȳn̄ dā̰ kə́ to tītə̄ kagə ní ədan̄ na: I náā n to tītə̄ dā̰ ní ō, i náā n asə rɔ̄ɔ̄ seneé ō ní?

5Adə̄n̄ dā̰ kə́ to tītə̄ kagə ní tam ta kə́ yā ngonjə̄ń ō, tájəń Nə́ɓā ō. Adə̄nən̄ tɔ́gə́ kə́ yā rāań yá̰á̰ bátə́ nāā kutə sɔ́ gidə i jōó ō. 6Ni-tḛḛ̄ tan tájəń Nə́ɓā ō, tájəń rīn ō, loo ndin ō, tájəń ngé gə̄ ń loo ndi yādə́ i dɔ rā̰ tə́ ní ō. 7Adə̄nən̄ ta róbə rɔ̄ɔ̄ de gə̄ yā Nə́ɓā ō. Adə̄nən̄ ta róbə tetədə́ rɔ̄ɔ̄ ō, adə̄nən̄ tɔ́gə dɔ gír ɓē gə̄ tə́ malang ō, dɔ gír de gə̄ tə́ malang ō, dɔ gír ta gə̄ tə́ malang ō, dɔ nápar de gə̄ tə́ malang ō. 8Ngōn̄ batə̄ ń əjan̄ míndən ní, de kə́ dɔ nang tə́ gə̄ malang ń kété ta kəla gír kəndā dɔ rā̰ ō dɔ nang ō tə́ ɓáa rīdə́ i kə́ ndang kem makətūbə̄ ndi kə kumuú yān tə́ aĺ ní, a rɔȳnən̄.

9Deē ń i kə mbīneé anī, ādə̄ kɔ́ɔ̄ oō. 10Deē ń kadə̄ aw̄ ɓəloó anī, a aw̄ ɓəloó ō, deē ń kadə̄ oy yo kaskar anī, a oy yo kaskar ō. I yá̰á̰ ń noō n majə kadə̄ de gə̄ yā Nə́ɓā ɔjən̄ kadə̄ nin̄ i de kə́ ngé tə́gā tadə́ gə̄ ō, de kə́ ngé taā kem gə̄ ō ní.

11Anī m-á̰a̰ dā̰ kə́ rang teē gír nángāá. Gajən gə̄ i jōó ba gajən gə̄ ní ton̄ tītə̄ yā ngōn̄ batə̄ beé ō, ni-ɔr̄ najə̄ tītə̄ dā̰ kə́ to ɓōĺ ngá̰ý beē ō. 12Ni-rāā yá̰a̰ malang ta kum dā̰ kə́ kété tə́ i kə ta kūl̄ tɔ́gə yā dā̰ kə́ kété ní. Ni-rāā adə̄ de kə́ dɔ nang tə́ gə̄ malang rɔȳn̄ dā̰ kə́ kété ń do yān kə́ asə yon edə̄ kɔ̄ɔ́ ní. 13Dā̰ kə́ ko̰ jōó ngeé ń toō ní, rāā yá̰á̰ kə́ yáā gə̄, aw̄ bátə́ rāā adə̄ hor ḭḭ dɔ rā̰ tə́ əsō nang tə́ ta kum de gə̄ tə́ malang gə̄gē. 14Ni-rāā adə̄ de kə́ dɔ nang tə́ gə̄ ndúmə̄n̄ sɔɔ̄ń yá̰á̰ kə́ yáā gə̄ ń ni-rāā ta kum dā̰ kə́ kété tə́ ní. Ni-əda de gə̄ na kə rāān̄ ndíĺ yá̰á̰ kógə̄ḿ kə́ ɔsə kum gotə dā̰ ń ənge do kaskar ba tél ndi kə kumneé gogə́ ní. 15Adə̄nən̄ kadə̄ əla koō kem ndíĺ yá̰á̰ ń rāān̄ kum gotə dā̰ ní tə́, adə̄ ndíĺ yá̰á̰ ní ɔr̄ najə̄ ō, tɔ̄l̄ de gə̄ ń rɔȳnən̄ aĺ ní ō. 16Dā̰ kə́ nge ko̰ jōó ní ra kə de gēé malang, adə̄ i de kə́ dūú gə̄gē, kə́ tɔgə gə̄gē, de kə́ ngé kənge yá̰a̰ gə̄gē, kə́ ngé ndoō gə̄gē, de kə́ kɔ́ɔ̄ rɔ̄də́ gə̄gē, ɓəlo gə̄gē, kadə̄ əndān̄ tə́ré yá̰a̰ jī ko̰də́ tə́ ō, nɔtə nodə́ tə́ ō dɔ gúú tə́. 17Deē ń tə́ré yá̰á̰ ní i jī ko̰n tə́ aĺ ō, non tə́ aĺ ō ní, asə mang yá̰a̰ aĺ ō, kigə yá̰a̰ aĺ ō.

18Majə kadə̄ kum deē edə̄ loo ń toō tə́. De kə́ kur̄ dɔn i noó a asə ger̄ kum kutə yá̰a̰ yā dā̰ ní, tɔdɔ̄ kutə yá̰a̰ yā dā̰ ní i kutə yá̰a̰ yā deē. Kutə yá̰á̰ ní i 666.

Currently Selected:

JEJU TEĒ KUM JA̰A̰ 13: SARDC

Highlight

Copy

Compare