NGÉ SARYA 20

Israel gə̄ rɔ̄ɔ̄n̄ Benjamḛ gə̄

1Ngán Israel gə̄ malang teēn̄ gidə kógə̄ḿ kánə̄n̄ naā ta kum Kɔ́ɔ̄ɓē tə́ kem ɓē kə́ Misəpa tə́. Ḭḭn̄ i kə̄ dɔ ɓē yādə́ gə̄ tə́ malang n reēn̄ ní. Ḭḭn̄ i ɓē gə̄ ń əla gír Dan bátə́ teēń Beer Seba ní ō, ḭḭn̄ i dɔ nang kə́ Galaad tə́ ō. 2Ngār gə̄ ō, gír ɓē gə̄ ō, malang yā ngán Israel gə̄ i kum kán̄ naā yā gír deē yā Nə́ɓā gə̄ ní tə́. Ngé njə̄rā kə njaá rɔ̄ɔń kə kaskaraá gə̄ i deē dūbūú ɓú sɔ́. 3Banī ngán Benjamḛ gə̄ oōn̄ kadə̄ gotə ngán Israel gə̄ aw̄n̄ Misəpa. Ngán Israel gə̄ dəjen̄ najə̄ ədan̄ na: Ɔ́jiījí loo reē ń yá̰á̰ kə́ majaĺ ngá̰ý ń toō reē ní. 4Anī ngōn̄ Lebi ń tɔ̄lə̄n̄ nə̄yá̰n ní tél ədadə́ na: M-āw̄ kem ɓē ké Gibea yā Benjamḛ tə́ kə də̄yá̰ gidə ndogə̄ yāḿ kadə̄ m̄-ɓīī kemeé ndɔ̄ɔ́. 5Anī de kə́ kemeé gə̄ ḭḭn̄ seḿ kə rɔ̄ɔ́ ō, ndɔ̄ɔ́ anī reē gīrə̄n̄ gidə kújə́ ń m̄-to kemeé ní ō. Nin̄ sāān̄ tɔ̄lə̄m̄ ō, sāān̄ də̄yá̰ gidə ndogə̄ yāḿ dɔ gúú tə́ bátə́ adə̄ oy ō. 6M-ún nīnəń m̄-gór̄yō dugəju ba m̄-tə́lań kə dɔ nang yā ngán Israel gə̄ malang. Tɔdɔ̄ nin̄ rāān̄ i yá̰á̰ kə́ majaĺ ngá̰ý ō, kə́ to rɔ̄sɔl̄ ngá̰ý ō dɔ nang kə́ Israel tə́. 7Ngɔlaā ní sḭḭ̄ ngán Israel gə̄ malang ń ī-kńī naā ní, ɔ̄rī ní mbo̰ō̰sí tə́ ō, ə́daī yá̰á̰ kə́ dɔ tə́ ō. 8De gə̄ malang ḭḭn̄ dɔɔ́ gidə kógə̄ḿ ba ədan̄ na: De kógə̄ḿ danjí tə́ kə́ yā tél kaw̄ gogə́ kem kújə tandā yān tə́ ō, ɓēé looneé ō ní a gətóo. 9Ba yá̰á̰ ń j-a jə-rāāī kə ɓē ké Gibea ní n toó: J-a jə-túgī wə̄lā pá tá j-a j-awī yā rɔ̄ɔ̄n. 10j-a j-ɔrī de gə̄ i kə gō gír ɓē yā Israel gēé malang kadə̄ aw̄ reēn̄ kə yá̰a̰ kəsaá tām̄ yā ngé gə̄ ń a aw̄n̄ yā rɔ̄ɔ̄ ɓē kə́ Gibea tām̄ yā yá̰á̰ kə́ majaĺ ngá̰ý ń de kə́ kemeé gə̄ rāān̄ dɔ nang kə́ Israel tə́ ní. Ré de gə̄ i ɓú anī j-a j-ɔrī de gə̄ kutə danaá ō, de gə̄ i dūbú anī j-a j-ɔrī de gə̄ ɓú danaá ō, de gə̄ i dūbú kutə anī j-a j-ɔrī de gə̄ dūbú danaá ō. 11I beé n ngán Israel gə̄ malang əndānəń rɔ̄də́ naā tə́ yā kaw̄ rɔ̄ɔń ɓē kə́ Gibea ní.

12Gír ɓē gə̄ kə́ Israel tə́ əla ədan̄ de kə́ gír ɓē yā Benjamḛ tə́ gə̄ malang na: I rí kə́ majaĺ beē n rāā yá̰a̰ dansí tə́ toō? 13Ngɔlaā ní ādījí kə ngé rāā hál gə̄ kə́ Gibea ń rāān̄ yá̰á̰ ń toō ní kadə̄ j-tɔ̄l̄də́ ba j-unəń majaĺ kɔ̄ɔ́ dɔ ngán Israel gə̄ tə́. Banī ngán Benjamḛ gə̄ mbātə́n̄ koō najə̄ ń ngákó̰ó̰də́ Israel gə̄ ədan̄də́ ní. 14Nin̄ ḭḭn̄ kə̄ ɓē yādə́ gə̄ tə́ ba reē kánə̄n̄ naā kem ɓē kə́ Gibea tə́ yā rɔ̄ɔ̄ ngán Israel gə̄. 15Ndɔ̄ ń noō tə́ tə́dan̄ kutə ngán Benjamḛ gə̄ ń ḭḭn̄ kə gō ɓē gēé reēn̄ ní anī de kə́ dəngam gə̄ kə́ gerə̄n̄ rɔ̄ɔ̄ kə kaskaraá gə̄ i dūbú kutə jōó kə dūbú mehḛ́ kanjə̄ tə́da Gibea gə̄ ń go̰ rɔ̄ɔ̄ yādə́ i ɓú sīrí ní. 16Dan de gə̄ ń noō tə́ malang ní go̰ rɔ̄ɔ̄ kə́ gel gə̄ i ɓú sīrí. Nin̄ kógə̄ḿ kógə̄ḿ malang gerə̄n̄ kənī mbal̄ kem bējə̄ tə́ serəń nənga dɔ deē majə yā kɔdən kanjə̄ nalə̄n. 17De kə́ dəngam kə́ Israel tə́ gə̄ reēn̄ adə̄ tə́dan̄ kutədə́ ō. Ngé kə́ ger̄ rɔ̄ɔ̄ kə kaskaraá gə̄ i dūbú ɓú sɔ́ kanjə̄ tə́da Benjamḛ gə̄ Nin̄ i deē rɔ̄ɔ̄ gə̄ malang. 18Nin̄ aw̄n̄ Betel koō ta Nə́ɓāá yā gerə̄ń ké a ɔjə i dɔ náā dandə́ tə́ kadə̄ aw̄ kété kənī ngán Benjamḛ gə̄ rɔ̄ɔ̄ tə́ wa? Anī Kɔ́ɔ̄ɓē əda na: I Juda gə̄ n a aw̄n̄ kété ní.

19Ngán Israel gə̄ ḭḭn̄ dɔɔ́ kə gír looí ɓatə ba aw̄ rāān̄ gérger yādə́ kadə ɓē kə́ Gibea tə́. 20Nin̄ teē tə́nīn̄ rɔ̄də́ kə ta naā kumdə́ sɔɔ̄ Gibea yā rɔ̄ɔń Benjamḛ gə̄. 21Ndɔ̄ ń noō tə́ ngán Benjamḛ gə̄ teēn̄ Gibea tə́ kə̄ ndágá ba tɔ̄lə̄n̄ de ké dəngam ké Israel tə́ gə̄ dūbú kutə jōó gidə i jōó. 22-23Ngán Israel gə̄ aw̄ nōōn̄ dɔ Kɔ́ɔ̄ɓē tə́ bátə́ loo tíbə dɔdə́ tə́. Aw̄ koō ta Kɔ́ɔ̄ɓēé yā gerə̄ń ké kə n-aw̄ kə n-rɔ̄ɔ̄n̄ ngán Benjamḛ gə̄ ń i ngákó̰ó̰də́ gə̄ ní ɓáý wa. Kɔ́ɔ̄ɓē tél ədadə́ na kə aw̄ kə rɔ̄ɔ̄n̄də́. Loo ń noō tə́ ngán Israel gə̄ tél əhɔn̄ rɔ̄də́ tɔgə ba aw̄ tə́nīn̄ rɔ̄də́ gotədə́ kə́ kété ń ran̄ tū tə́ rɔ̄ɔ̄nəń ní. 24-25Ənīn̄ ngán Benjamḛ gə̄ rɔ̄ɔ̄ ɓáý to̰. Ndɔ̄ rɔ̄ɔ̄ kə́ ko̰ jōó ngeé ń noō tə́ ní, Benjamḛ gə̄ teēn̄ Gibea tə́ kə̄ ndágá ba tɔ̄lə̄n̄ ngán Israel gə̄ dūbú kutə gidə i sɔ́sɔ́ ɓáý to̰. Tɔ̄lə̄n̄ i de kə́ ger̄ rɔ̄ɔ̄ kə kaskaraá gə̄ malang. 26Tā anī de kə́ dɔ nang kə́ Israel tə́ gə̄ malang aw̄n̄ Betel. Aw̄ ndin̄ nang tə́ ta kum Kɔ́ɔ̄ɓē tə́ ba nōōn̄. Ndɔ̄ ń noō tə́ ndin̄ ɓō tām̄ yā Nə́ɓā tə́ bátə́ kadə̄ loo tíbə dɔdə́ tə́. Róōn̄ dā̰ horoó kə taá malang ō, tunə̄n̄ yá̰a̰ tām̄ yā kem kógə̄ḿ tə́ ō adə̄n̄ Kɔ́ɔ̄ɓē. 27-28Dan ń noō tə́ ní sandúkə madə̄ naā yā Nə́ɓā ndi i Betel. Ba i Pinas ngōn̄ Eleajar kə́ ngōn̄ Aaro̰ n i nge ra no sandúkə ní tə́.

Ngán Israel gə̄ aw̄n̄ koō ta Kɔ́ɔ̄ɓē tə́ yā dəjenəń ké kə n-aw̄ n-ənīn̄ ngán Benjamḛ gə̄ ń i ngákó̰ó̰də́ gə̄ ní rɔ̄ɔ̄ aké kə n-lōōn̄ gírí wa? Anī Kɔ́ɔ̄ɓē tél ədadə́ na kə aw̄ kə rɔ̄ɔ̄n̄də́, tɔdɔ̄ bírí n-a n-əlādə́ kem jīdə́ tə́. 29Ngán Israel gə̄ tə́ndān̄ de gə̄ kə gō gidə ɓē kə́ Gibea adə̄ ɓɔ̄ɔ̄n̄ rɔ̄də́. 30Ba kə ndɔ̄ kə́ nge ko̰ mətá anī aw̄ ənīn̄ ngán Benjamḛ gə̄ rɔ̄ɔ̄. Nin̄ tə́nīn̄ rɔ̄də́ banī kumdə́ sɔɔ̄ Gibea tītə̄ kə kété gə̄. 31Ngán Benjamḛ gə̄ teē reēn̄ kə̄ rɔ̄də́ tə́ yā rɔ̄ɔ̄də́. Nin̄ télən̄ kə ngán Israel gə̄ aw̄n̄ sedə́ rɔ̄ ɓē tə́ pá tá əlan̄ gír a tɔ̄lə̄n̄də́ tītə̄ kə́ kété gə̄. Ngán Israel gə̄ ń tɔ̄lə̄n̄də́ kem bembeé dɔ róbə gə̄ ń kə́rēý aw̄ kə̄ Betel ō, kə́rēý aw̄ kə̄ Gibea ō ní asən̄ kutə mətá.

32Ngán Benjamḛ gə̄ ədan̄ na n-tetən̄də́ rɔ̄ɔ̄ kɔ̄ɔ́ ɓá tītə̄ kə́ kété. Banī Israel gə̄ oōn̄ naā dɔ dáńdə́ tə́ ədan̄ na: Ādə̄ j-a̰yí naā ba ré ngɔ̄də̄n̄ gōjí anī j-awī sedə́ sa̰y rɔ̄ ɓē tə́ dɔ róbə gə̄ tə́. 33Gō tə́ anī de kə́ dəngam kə́ Israel tə́ gə̄ teēn̄ loo ndidə́ gə̄ tə́ ba ɔsən̄ dɔdə́ naā tə́ Baal Tamar. Nin̄-tə́nīn̄ rɔ̄də́ yā rɔ̄ɔ̄. Anī ngé gə̄ ń Israel gə̄ ɓɔ̄ɔ̄n̄də́ gidə ɓē tə́ ní teēn̄ rétə́ gēé Geba dām̄ kə́ no ɓē tə́. 34I beé n go̰ rɔ̄ɔ̄ gə̄ dūbú kutə reē ugə̄nəń ta ɓē kə́ Gibea tə́ ní ɔyn̄də́ i kə̄ loo gə̄ tə́ Israel tə́ malang. Rɔ̄ɔ̄ ní təngā ngá̰ý banī Benjamḛ gə̄ gerə̄n̄ yá̰á̰ kə́ to kum kaȳ aĺ ń a reē kə̄ dɔdə́ tə́ ní alé. 35-36Kɔ́ɔ̄ɓē tetə Benjamḛ gə̄ rɔ̄ɔ̄ adə̄ Israel gə̄. Ndɔ̄ noō tə́ ní ngán Israel gə̄ tɔ̄lə̄n̄ Benjamḛ gə̄ 25 100 rɔ̄ɔ̄. Nin̄ malang ní i go̰ rɔ̄ɔ̄ gə̄.

Ré ngán Israel gə̄ a̰ȳn̄ ba əya̰n̄ loo adə̄n̄ ngán Benjamḛ gə̄ kété ní anī, i tām̄ nin̄ əndān̄ kemdə́ dɔ de gə̄ ń ɓɔ̄ɔ̄n̄də́ gidə ɓē kə́ Gibea tə́ ní. 37De gə̄ ngeé ń toō ɓōkə́n̄ rɔ̄də́ kə ngɔ̄dɔ̄ɔ́ kum kə̄ Gibea. Taān̄ kem ɓē ō, tɔ̄lə̄n̄ de kə́ kemeé gə̄ malang kɔ̄ɔ́ kə kəyā kaskaraá ō. 38Ngán Israel gə̄ oōn̄ naā kə ngé gə̄ ń ɓɔ̄ɔ̄n̄ rɔ̄də́ ní kadə̄ ré udən̄ kem ɓēé anī kə rāān̄ sa hor kadə̄ əɓa kum kə̄ dɔɔ́ dɔɔ́ kadə̄ kə n-a̰a̰n̄. 39Dan ń ngán Israel gə̄ rāān̄ tītə̄ ngé ka̰ȳ rɔ̄ɔ̄ gə̄ ní, Benjamḛ gə̄ tɔ̄lə̄n̄də́ asə deē kutə mətá ō, ɔjənə̄ń na n-tetən̄də́ rɔ̄ɔ̄ kɔ̄ɔ́ ɓá tītə̄ kə́ kété gə̄ ō. 40Banī kum mbang ngeé ń noō tə́ ní, sa hor ń ngán Israel gə̄ oōn̄ naā dɔ tə́ ní, əɓa kem ɓē kə́ Gibea tə́ ngāl̄ ɓururu kum kə̄ dɔɔ́. Benjamḛ gə̄ tūrə̄n̄ rɔ̄də́ anī a̰a̰n̄ hor kə́ a o̰o̰ ɓē bəlim bəlim. 41Tā anī de kə́ dəngam kə́ Israel tə́ gə̄ tél tūrə̄n̄ rɔ̄də́ rétə́ gē kə̄ dɔ Benjamḛ gə̄ tə́ adə̄ ɓōĺ rāādə́ ngá̰ý. Tɔdɔ̄ a̰a̰n̄ kadə̄ yá̰á̰ kə́ to kum kaȳ aĺ reē dɔdə́ tə́. 42Anī nin̄ tūrə̄n̄ gándə́də́ adə̄n̄ dəngam kə́ Israel tə́ gə̄ ba a̰ȳn̄ naā kumdə́ sɔɔ̄ dəla loo. Banī ngé ngɔ̄də̄ gōdə́ gə̄ ō, ngé teē kem ɓēé gə̄ ō, ənīn̄də́ dɔ dáná ba tɔ̄lə̄n̄də́. 43Ngán Israel gə̄ gīrə̄n̄ Benjamḛ gə̄ ō, ngɔ̄də̄n̄də́ kanjə̄ kəya̰də́ kadə̄ ɔrə̄n̄ koō ō, tə́ɓān̄də́ njadə́ tə́ bátə́ ugə̄n̄ sedə́ ta ɓē kə́ Gibea tə́ dām̄ kə́ gír ɓē tə́ ō. 44Go̰ rɔ̄ɔ̄ yā Benjamḛ gə̄ dūbú kutə gidə i sɔ́sɔ́ oyn̄ malang. 45Gotə gə̄ a̰ȳn̄ naā kum kə̄ loo kə́ mángá tə́, kumdə́ sɔɔ̄ mbal̄ Rimon. Tɔ̄lə̄n̄də́ dūbú mí róbó ba ngɔ̄də̄n̄ gá̰a̰ gə̄ ugə̄n̄ sedə́ Gidom. Tá tél tɔ̄lə̄n̄də́ dūbú jōó ɓáý to̰. 46Benjamḛ gə̄ 25 000 oyn̄ ndɔ̄ ń noō tə́. I de kə́ ger̄ rɔ̄ɔ̄ kə kaskaraá gə̄ ō, i go̰ rɔ̄ɔ̄ gə̄ malang ō. 47Ba dan de gə̄ ń a̰ȳn̄ naā kə̄ dəla loo tə́ kumdə́ sɔɔ̄ mbal̄ Rimon ní, kə́ ɓú mehḛ́ gə̄ teēn̄ ta yo tə́. Adə̄ aw̄ ugə̄n̄ mbal̄ Rimon tə́. Nin̄ ndin̄ noó nāā sɔ́. 48De kə́ dəngam kə́ Israel tə́ gə̄ tél tūrə̄n̄ rɔ̄də́ kə̄ dɔ gotə ngán Benjamḛ gə̄ ń na̰yn̄ ní tə́ ba tɔ̄lə̄n̄də́ kə gō ɓē gēé kə kəyā kaskaraá. Nin̄ tɔ̄lə̄n̄ de gə̄ ō, yá̰a̰ kul̄ gə̄ ō, yá̰a̰ malang ń nin̄ əngen̄ ní ō. Gō tə́ anī tə́lan̄ hor dɔ ɓē gə̄ malang ń ugə̄n̄ tū tə́ ní.

Currently Selected:

NGÉ SARYA 20: SARDC

Highlight

Copy

Compare