NGÉ SARYA 19
19
Benjamḛ gə̄ kə́ Gibea tə́ rāān̄ yá̰á̰ kə́ majaĺ ngá̰ý
1Dan ngeé ń noō tə́ ní mban̄g gətóo dɔ nang kə́ Israel tə́. Ngōn̄ Lebi kógə̄ḿ kə́ ndi i ta ngóy dɔ nang kə́ mbalá yā Epəraim tə́ taā də̄yá̰ gidə ndogə̄ kem ɓē kə́ Betlehem tə́, dɔ nang kə́ Juda tə́. 2Də̄yá̰ gidə ndogə̄ ní rāā rāȳ#19.2 Rāā rāȳ: Gərek əda na əsō na i wōn̄g, ba Hebəro əda na rāā na i rāȳ. adə̄ əya̰n ba aw̄ ndi ɓē bɔbə̄neé Betlehem na sɔ́. 3Dəngam ní əsō róbó yā kaw̄ gō nə̄yá̰n ní tə́ kəsōn naā tə́ ba tél reē seneé gogə́ ɓēé. Nge kəla yān kógə̄ḿ dānə̄n ō, aw̄ kə kərō gə̄ jōó ō. Də̄yá̰ gidə ndogə̄ ní adə̄ ngaan udə kem ndogó yā bɔbə̄neé. Dan ń bɔbə̄ dəyá̰ a̰a̰ umən ní anī tə́nī tan kə rɔ̄nelēé. 4Əhɔn mbā adə̄ ndi looneé ndɔ̄ mətá. Nin̄ kə nge kəla yānneé əsan̄ yá̰a̰ ō, a̰ȳn̄ ō, ton̄ kə̄ noó ɓīīnəń ō. 5Teē kə ndɔ̄ kə́ nge ko̰ sɔ́ anī ḭḭn̄ dɔɔ́ kə gír looí ɓatə. Ba dan ń ngōn̄ Lebi ní a rāā yā kɔr̄ dɔɔ́ anī, bɔbə̄ dəyá̰ ní ədan na kə əsa yá̰á̰ sḛ́ý kadə̄ tɔ́gə̄n kə to pá tá kə aw̄n̄ ɓáý. 6Loo ń noō tə́ nin̄ jōó mbak tél ndin̄ nang tə́ ba əsan̄ yá̰a̰ ō a̰ȳn̄ ō. Gō tə́ anī bɔbə̄ dəyá̰ əda umən na: m̄-sāā kadə̄ ī-ɓīī laā ɓáý kadə̄ rɔ̄í nelē ní. m̄-rāāī ɓɔ́ ba ī-ndigə gōḿ tə́. 7Dəngam ní sāā kaw̄ tā, ba dan ń umən na̰y kə̄ loo dəjen tə́ kadə̄ kə ɓīī na i mbé gáŕ tā ní, tél lōō mbā ní ba to kə̄ noó. 8Teē kə ndɔ̄ kə́ nge ko̰ mí anī, ni-ḭḭ dɔɔ́ kə gír looí ɓatə yā kaw̄. Anī bɔbə̄ dəyá̰ ní ədan na: m̄-rāāī ɓɔ́, ə́sá yá̰á̰ pá tá āw̄. Ba ī-ngóōī ādə̄ loo sɔl̄ pá tá. Loo ń noō tə́ nin̄ əsan̄ yá̰a̰ naā tə́ mbak. 9Dan ń dəngam ní sāā kɔr̄ dɔɔ́ kə də̄yá̰ gidə ndogə̄ yān ō, nge kəla yān ō anī, bɔbə̄ dəyá̰ ədan na: Loo a sɔl̄ i mbéé ní ī-ɓīī ɗer, ba dəloí anī ā ɔ̄rī dɔɔ́ yā kadə̄ ā ūgə̄ ɓēé. 10Dəngam ní ndigə ɓīī alé, adə̄ ɔr̄ dɔɔ́ kə də̄yá̰ gidə ndogə̄ yān ō, kərō yān kə́ jōó gə̄ ń yá̰a̰ kətō i gidədə́ tə́ ní ō. Aw̄ əndān̄ dɔ ɓē kə́ Yebus ń i Jerusalem ní. 11Dan ń ugə̄n̄ kə̄ gidə ɓēé ngɔr anī, loo sɔl̄ ngá̰ý kɔ̄ɔ́ Nge kəla ní əda kɔ́ɔ̄n na: Ādə̄ j-dəbaī ɓē yā Yebus gə̄ ń ra noó tə́ ba jə-ɓīī. 12Ba kɔ́ɔ̄n tél əda na: J-a jə-dəbaī ɓē yā tə̄rā gə̄ ń noó tə́ alé, tɔdɔ̄ nin̄ i ngán Israel gə̄ alé, j-awī Gibea. 13Gō tə́ anī əda nge kəla yān na: J-awī Gibea aláa Rama. Ɓē kə́ jōó gə̄ ń noō j-aw̄ ɓīī kem nge kə kógə̄ḿ tə́. 14Adə̄ nin̄ mānə̄n̄ dɔɔ́. Aw̄n̄ bátə́ ré ugə̄n̄ kadə̄ ɓē kə́ Gibea tə́ ngɔr, dɔ nang yā Benjamḛ tə́ anī mbang udə rititi. 15Loo ń noō tə́ tɔ̄ɔ̄ aw̄n̄ kem ɓē kə́ Gibea tə́ yā kaw̄ ɓīī. Nin̄ udən̄ kem ɓēé ō, aw̄ ndin̄ ndagə looó ō, banī de kə́ kadə̄ əhɔdə́ mbā looneé gətóo.
16Anī de kə́ dəngam kógə̄ḿ kə́ tɔgə ɓə́ga tél ndɔrɔ́ loo tíbí a aw̄ kə̄ ɓēé. Deē ní i de kə́ gō nang kə́ mbalá yā Epəraim tə́, ba ndi i Gibea ń i ɓē kə́ de kə́ kemeé gə̄ i Benjamḛ gə̄ ní. 17Deē ní ɔr̄ dɔn dɔɔ́ anī a̰a̰ mbā ra ndágə loo kə́ kem ɓēé tə́. Ni-dəjen na ké ḭḭ i rá ō, ké aw̄ i kə̄ rá ō wa? 18Mbā tél ədan na: J-ḭḭ i Betlehem kə́ Juda tə́, ba j-a j-aw̄ i kə̄ ta ngóy dɔ nang kə́ mbalá yā Epəraim ń i ɓē yāḿ ní tə́. M-ḭ́ḭ mbā tə́ i Betlehem kə́ Juda tə́. M-ā m̄-tél m-ā m-āw̄ i kə̄ gogə́ ɓēé, banī de kə́ yā kadə̄ əhɔm̄ mbā ɓēé yān tə́ gətóo. 19Nə́ngētə́ jə-nal̄ yá̰a̰ kəsa tá, ba j-ətō mu ō, mə́ro ō, tām̄ yā kərō yājí tə́ ō, mápa ō, kasə nduú ō, tām̄ yāḿ tə́ ō, tām̄ yā nə̄yá̰ḿ tə́ ō, nge kəla yāḿ tə́ ō. Jə-nal̄ yá̰á̰ kógə̄ḿ alé. 20De kə́ tɔgə ɓə́gá ní tél ədan na: Ādə̄ kemií sɔl̄ lɔm. Yá̰á̰ ń ī-nal̄ ní m-ā m-ādī, ba ī-lōō kəto ndágə looó ndɔ̄ɔ́. 21Ni-aw̄ sedə́ ɓēé looneé ō, adə̄ kərō gə̄ mə́ro ō. Mbā gə̄ tə́gon̄ njadə́ ba əsan̄ yá̰a̰ ō, a̰ȳn̄ ō.
22Dan ń ndin̄ a əsan̄ yá̰a̰ kə rɔ̄nelēé anī, de kə́ kem ɓēé kə́ ngé rāā hál gə̄ reē gīrə̄n̄ gidə kújə əlan̄ ta naā tə́, ba əndan̄ ta róbə kə ngangá ngá̰ý. Nin̄ ədan̄ de kə́ tɔgə ɓə́gá ń i kɔ̄ɔ́ kújə́ ní na: Deē ń udə looí laā ní ī-teē seneé kə̄ rɔ̄jí tə́ laā ādə̄ jə-ɓīī seneé. 23Kɔ́ɔ̄ kújə́ ní teē ndágá ba ədadə́ na: Madə́ḿ gə̄, m̄-rāāsí ɓɔ́, ī-lōōī rāā yá̰á̰ kə́ majaĺ. Dəngam ń toō əla dɔn gíŕ kújə yāḿ tə́ kɔ̄ɔ́ ɓá ní, ī-lōōī rāā yá̰á̰ kə́ ta rɔ̄sɔl̄ tītə̄ ń noō. 24Ngōnə̄ḿ ké dəyá̰ kə́ ger̄ dəngam aĺ ɓáý i laā. M-ā m̄-teē seneé ndágá yā kadə̄sí kadə̄ ī-rāāī yá̰á̰ ń kemsí ndigə ní seneé. Ba ī-lōōī rāā háĺ kə́ ta rɔ̄sɔl̄ beé kə dəngam ń toō. 25Banī de gə̄ ní ndigən̄ koō najə̄ yān alé. Taā anī dəngam ní əhɔ də̄yá̰ gidə ndogə̄ yān teē seneé ndágá adə̄də́. Nin̄ sāānən̄ dɔ gúú tə́ ndɔ̄ɔ́ bátə́ loo tīī. Ta gír loo unjə̄ wororo anī əya̰nən̄ ba aw̄n̄. 26Dan ń mbang rāā yā kəɓa anī, dəyá̰ ní reē əsō ta kújə yā dəngam ń ngaan to kújə yān tə́ ní. Ni to kə̄ ta kújə́ tə́ noō adə̄ loo tīī unjə̄ dɔn tə́. 27Ngaan ḭḭ dɔɔ́ teē ta kújə ba teē ndágá yā kɔr̄ dɔɔ́ kaw̄. Anī a̰a̰n to ta kújə́ tə́ ba ɓōkə́ jīn kə̄ ta róbə́ kújə́ tə́. 28Ni ədan na: Ḭ́ḭ dɔɔ́ ādə̄ j-aw̄. Banī dəyá̰ ní tūrə̄n najə̄ tə́ alé. Loo ń noō té dəngam ní un nīń nə̄yá̰n dɔ kərō yān tə́, ba aw̄ seneé ɓēé. 29Dan ń ugə̄ ɓēé anī, un kəyā ba górīyō də̄yá̰ gidə ndogə̄ yān ní naā tə́ dugəju dugəju gír loo kutə gidə i jōó ba tə́lan kógə̄ḿ kógə̄ḿ kə gō dɔ nang yā ngán Israel gə̄ malang. 30De gə̄ malang ń a̰a̰n̄ yá̰á̰ ń noō ní ədan̄ na: Əla gír ndɔ̄ ń ngán Israel gə̄ teēnəń kɔ̄ɔ́ kem ɓē kə́ Ejiptə tə́ bátə́ ɓōólaā ní, yá̰á̰ kə́ beé rāā yá̰á̰ ɓá a? Ə̄ndāī ma̰ȳ najə̄ ń noō ō, ōōī yā naā ō, ba ə́daī yá̰á̰ kə́ dɔ tə́.
Currently Selected:
NGÉ SARYA 19: SARDC
Highlight
Copy
Compare
Share
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.
