NGÉ SARYA 21
21
Gír ɓē yā Benjamḛ tél ojə naā gogə́ rang
1Dan ń de kə́ dəngam kə́ Israel tə́ gə̄ ɔsən̄ dɔdə́ naā tə́ Misəpa#21.1 Misəpa: Á̰a̰ī Sar 20.1 ní, túbən̄ njadə́ ədan̄ na deē kógə̄ḿ dandə́ tə́ a adə̄ Benjamḛ deē ngōnən kə́ dəyá̰ kadə̄ taā alé. 2Ɓá tā ba ngán Israel gə̄ aw̄ kánə̄n̄ naā Betel. Nin̄ ndin̄ ta kum Nə́ɓā tə́ adə̄ loo tíbə dɔdə́ tə́. Əgan̄ kɔŕ ō, nōōn̄ ngá̰ý kə man̄ kumdə́ ō, 3ba ədan̄ na: Kɔ́ɔ̄ɓē Nə́ɓā yā Israel, i tām̄ rí tə́ ɓōólaā anī gír ɓē kógə̄ḿ gətóo dan gír ɓē gə̄ kə́ Israel tə́ ní? 4Teē kə ndō kə́ noō anī ḭḭn̄ dɔɔ́ kə gír looi ɓatə rāān̄ loo tun̄ yá̰a̰ loo ní tə́, ba róōn̄ dā̰ horoó kə taá malang ō, tunə̄n̄ yá̰a̰ tām̄ yā kem kógə̄ḿ tə́ ō dɔ tə́. 5Gō tə́ anī ngán Israel gə̄ dəjen̄ naā dɔ dáńdə́ tə́ na: Dan gír ɓē gə̄ malang kə́ Israel tə́ ní, i nge kə́ rá n aw̄ kán̄ naā Misəpa aĺ ní? Tɔdɔ̄ na n-ənīn̄ ndūdə́ adə̄ gō ngan̄g ngá̰ý n-ədan̄ na deē ń a aw̄ kán̄ naā kə́ Misəpa tə́ aĺ ní na n-a n-tɔ̄l̄nən̄. 6Kum Israel gə̄ o̰o̰də́ ngá̰ý tām̄ yā ngákó̰ó̰də́ kə́ Benjamḛ gə̄ tə́, adə̄ ədan̄ na: Ɔrə̄n̄ gír ɓē kógə̄ḿ kɔ̄ɔ́ ɓōólaā dan gír ɓē gə̄ kə́ Israel tə́. 7Tá j-ənī ndūjí ta kum Kɔ́ɔ̄ɓē tə́ kadə̄ j-adə̄ Benjamḛ gə̄ ngánjí kə́ dəyá̰ gə̄ kadə̄ taān̄ alé ní j-a jə-rāāī i ba̰ý n j-a j-əngeīń dəyá̰ gə̄ yā kadə̄ ngé gə̄ ń na̰yn̄ ní ní?
8Tā anī ədan̄ na: Dan gír ɓē gə̄ kə́ Israel tə́ ní, de kə́rēý kə́ aw̄ ta kum Kɔ́ɔ̄ɓē tə́ Misəpa aĺ i noó? Anī nin̄ a̰a̰n̄ kadə̄ de kə́ kem ɓē kə́ Yabes kə́ Galaad tə́ ní aw̄n̄ kán̄ naā alé. 9Tām̄ a̰a̰n̄də́ dan de gə̄ ń aw̄n̄ kəndā rīdə́ makətūbūú tə́ ní alé. 10Tā anī ngé kán̄ naā gə̄ əlan̄ ngé rɔ̄ɔ̄ gə̄ dūbú kutə gidə i jōó Yabes kə́ Galaad tə́ ba ədan̄də́ na: Āw̄ ī-tɔ̄lī de kə́ kemeé gə̄ kɔ̄ɔ́ malang kə kəyā kaskaraá. Ī-tɔ̄lī dəngam gə̄ ō, dəyá̰ gə̄ ō, ngán gə̄ ō. 11Ba yá̰á̰ ń ā ī-rāāī ní n toó: ī-tɔ̄lī dəngam gə̄ ō, dəyá̰ gə̄ ń gerə̄n̄ dəngam kɔ̄ɔ́ ní ō, ba ə́ya̰ī dəyá̰ kə́ ger̄ dəngam aĺ ɓáý gə̄. 12Dan de gə̄ kə́ kem ɓē kə́ Yabes tə́ ní, ngé rɔ̄ɔ̄ gə̄ əngen̄ ngámandə kə́ ger̄ dəngam aĺ ɓáý gə̄ i ɓú sɔ́. Nin̄ reēn̄ sedə́ gérger kə́ Silo tə́ dɔ nang kə́ Kanaan tə́.
13Ngé kán̄ naā gə̄ malang əlan̄ de gə̄ rɔ̄ Benjamḛ gə̄ ń ɓɔ̄ɔ̄n̄ rɔ̄də́ mbal̄ Rimon tə́ ní kadə̄ ədan̄də́ najə̄ rɔ̄ɔ̄ kə́ kadə̄ gətóo. 14Loo ń noō tə́ Benjamḛ gə̄ tél reēn̄ gogə́ ɓēé, adə̄ adə̄n̄də́ dəyá̰ gə̄ kə́ Yabes ń tɔ̄lə̄n̄də́ aĺ ní. Banī asə dɔdə́ alé. 15Kum ngán Israel gə̄ o̰o̰də́ kə Benjamḛ gēé, tām̄ Kɔ́ɔ̄ɓē ɔr̄ gír ɓē kógə̄ḿ kɔ̄ɔ́ dan gír ɓē gə̄ kə́ Israel tə́ adə̄ gotə loo ra wōȳ. 16Tā anī kum kɔɔ̄ gə̄ yā ngé kán̄ naā gə̄ ədan̄ na: Dəyá̰ Benjamḛ gə̄ gətóon̄ malang ní j-a jə-rāāī i ba̰ý n gotə de gə̄ ń na̰yn̄ ní a əngenə̄ń dəyá̰ gə̄ ní? 17Benjamḛ gə̄ ń teēn̄ ta yo tə́ ní i gáŕ kadə̄ sēlə̄n̄ kōdə́ kum kə̄ kété, yā kadə̄ gír ɓē kógə̄ḿ gətóon̄ dan madə̄ gə̄ kə́ Israel tə́ alé. 18Banī jḭḭ̄ kɔ́ gə̄ j-asiī kadə̄də́ ngáńjí kə́ dəyá̰ gə̄ kadə̄ taān̄ alé. Tɔdɔ̄ kété ní j-ənī ndūjí j-ədaī na: Ndɔ̄l i dɔ deē ń a adə̄ Benjamḛ deē ngōnən kə́ dəyá̰ kadə̄ ta ní tə́. 19Loo ń noō tə́ əga kemdə́ dɔ tə́ kadə̄ sḛ́ý ɓáa na a rāān̄ nāā yā Kɔ́ɔ̄ɓē tītə̄ kə́ kə dɔ ɓāl̄ gə̄ kem ɓē kə́ Silo tə́. Deē ra Betel anī Silo i kə̄ dām̄ mbɔ́r ɓē kə́ ko̰ó̰ tə́, ba ré ra Lebona anī i kə̄ dām̄ mbɔ́r ɓē kə́ geleé tə́. Ré deē ra dɔ róbə́ ń ḭḭ Betel a aw̄ kə̄ Sisem ní tə́ anī i kə̄ dām̄ kə́ gír ɓē tə́. 20Adə̄ nin̄ ədan̄ ngán Benjamḛ gə̄ na: Āw̄ ī-ɓɔ̄ɔ̄ī rɔ̄sí kem ndɔr̄ kāgə̄ nduú gə̄ tə́, 21ī-to ūmīiń loo. Ba ré á̰a̰ī ngán kə́ dəyá̰ gə̄ kə́ kem ɓē kə́ Silo tə́ a teēn̄ yā ndām̄ anī, ī-teē əhɔīdə́ kógə̄ḿ kógə̄ḿ kə dɔsí gēé āwī sedə́ dɔ nang kə́ Benjamḛ tə́ ādə̄ télən̄ nə̄yá̰sí gə̄. 22Ré bɔbə̄də́ gə̄ aláa ngákó̰ó̰də́ gə̄ reē nōōn̄ rɔ̄də́ rɔ̄jí tə́ anī j-a j-ədadə́ na: Jə-rāāsí ɓɔ́, ī-rāāī kem majə sedə́, tɔdɔ̄ j-ənge dəyá̰ ta rɔ̄ɔ̄ kə́ Yabes tə́ adə̄ tɔ́sə̄ dɔdə́ alé. Tá dan ń i sḭḭ̄ kɔ́ gə̄ n ādīdə́ ngáńsí kə́ dəyá̰ gə̄ kə jīsí aĺ ní i náā n a əndā najə̄ dɔsí tə́ ní?
23Ngán Benjamḛ gə̄ rāān̄ tītə̄ ń ədanə̄ń ní. Nin̄ əhɔn̄ dəyá̰ gə̄ dan ngé gə̄ ń a ndāmə̄n̄ tə́ ní adə̄ kutədə́ asə dɔdə́ ba aw̄n̄ sedə́ dɔ nang yādə́ tə́. Nin̄ tél rāān̄ ɓē yādə́ gə̄ gogə́ rang ba ndin̄ tū tə́.
24Loo ń noō tə́ ngán Israel gə̄ ń kánə̄n̄ naā ní tn̄ naā. Nin̄ kógə̄ḿ kógə̄ḿ tél aw̄n̄ kə̄ gír ɓē yādə́ gə̄ tə́ dan gír kaadə́ gə̄ tə́. Nin̄ aw̄ ndin̄ dɔ nang yādə́ gə̄ tə́.
25Dan ngeé ń noō tə́ ní mban̄g gətóo dɔ nang kə́ Israel tə́, adə̄ náā nəkɔ́ a rāā i yá̰á̰ ń kemən gḛy ní.
Currently Selected:
NGÉ SARYA 21: SARDC
Highlight
Copy
Compare
Share
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.
