ESTER KƏ TA GƏREK E
E
Makətūbə̄ kə́ ndangən̄ rāān̄nəń majə kə Jipə gēé
13 Kēē makətūbə̄ ń ndangən̄ ní n toó: Artajerses, mban̄g kə́ bo, rāā ngé kɔsə kum gotən gə̄ ń ndin̄ ta kəla tə́ kem ngáń ɓē gə̄ kə́ ɓú kə kutə jōó gidə sīrí tə́, kem ɓē kṵ ń ḭḭ Ḛndə tə́ bátə́ Etiyopi tə́ ní lápə́ya ō, rāā ɓer̄ yān gə̄ ń əhɔn̄ gōn ngan̄g ní lápə́ya ō.
14 De gə̄ ngá̰ý télən̄ ngé kɔjə rɔ̄də́ ngá̰ý gə̄, lo ń ngé rāā majə sedə́ ngá̰ý gə̄ rɔȳn̄də́ ngá̰ý ní. 15 Nin̄ sāān̄ i nujə ɓer̄ yājí gə̄ ngóy alé, banī əlan̄ gír koō naā i dɔ ngé rāā majə sedə́ gə̄ tə́. Tām̄ tɔ́gə́də́ kə́ yā kadə̄ tə́gānəń tadə́ gíŕ yá̰á̰ kə́ sɔɔ̄ kadə̄ a adə̄də́ i rɔ̄nel̄ tə́ ní gətóo. 16 Nin̄ ndadə̄n̄ de kə́ rang gə̄ ń rāān̄ majə sedə́ ní aĺ bátə́. Nin̄ əya̰n̄ adə̄ ngé kɔjə rɔ̄də́ gə̄ kə́ gerə̄n̄ yá̰á̰ kə́ majə aĺ gə̄ ɔrən̄də́ ta róbə. Nin̄ aw̄n̄ bátə́ ɔjənə̄ń na n-asən̄ teē kɔ̄ɔ́ ta yá̰a̰ rāā kə́ gōtə́ yā Nə́ɓā kə́ nge ka̰a̰ yá̰a̰ malang tə́ ō, nge kim̄ majaĺ tə́ ō.
17 Yá̰á̰ kə́ rang ń a rāā yá̰á̰ ngándáńg ní n toó ɓáý tṵ: ngé gə̄ ń kṵ ɓē i jīdə́ tə́ ní, əndān̄ kəla ndi dɔ kəla yādə́ gə̄ tə́ i dɔ madə̄ tadə́ gə̄ kə́ ənīn̄ kemdə́ adə̄n̄də́ tə́. Gō tə́ anī, əya̰n̄ adə̄ madə̄ tadə́ gə̄ ní, ṵṵn̄ ɓē dɔdə́ tə́. De gə̄ ń nuū najə̄ tɔ̄l̄ de gə̄ kə́ najə̄ gətóo dɔdə́ tə́ asə reē dɔdə́ tə́ ō, asə kadə̄ ndɔ́r̄də́ aw̄ sedə́ tū yá̰á̰ kə́ to rɔ̄ ndoō kə́ majə aĺ ngá̰ý tə́ ō. 18 Tɔdɔ̄ madə̄ tadə́ gə̄ ngeé ń toō ní, asən̄ gól̄ ngé kṵ ɓē kə́ rɔ̄kum gə̄ kə gír̄ yādə́ kə́ gō tə́ aĺ gə̄ ō, kə sor̄ kə́ a rāā yá̰á̰ kə́ majə aĺ ngá̰ý gə̄ ō.
19 A̰á̰ā̰ de kə́ nujə kɔ̄ɔ́ ngeé gə̄ ń toō, unən̄ kṵ kə́ nin̄ ṵṵn̄ ɓē əja rāānəń yá̰á̰ kə́ rɔ̄kum aĺ gə̄, rāān̄ yá̰á̰ kə́ gō tə́ aĺ kə́ majə aĺ ngá̰ý gə̄. Sḭḭ̄ ásiī ger̄ yá̰á̰ ní kə ta kūl̄ gotə najə̄ kə́ jóo gə̄ yā yá̰a̰ kāgə̄ ɓē yājí ō, kə ta kūl̄ ka̰a̰ yá̰a̰ gə̄ ń a rāān̄ yá̰a̰ ta kumsí tə́ ní ō.
20 I tām̄ najə̄ ń toō tə́ n ndɔ̄ń tə́ anī, m-ā m-ə̄ndā kumḿ gír de gə̄ malang kə́ kem ɓē kṵ yāḿ tə́ kadə̄ ndin̄ jəke ō, lápə́ya ō ní. 21 Yā kadə̄ j-ugə̄ń tū nge ń nuū tə́ ɓáa, m-ā m̄-tūr̄ gíŕ yá̰a̰ gə̄ ō, yá̰a̰ gə̄ ń sɔɔ̄ kadə̄ m-ə̄ndā maȳdə́ ní, m-ā m̄-gān̄g sarya dɔ tə́ ngándáńg kə gō róbə́ kə́ súūmú ngá̰ý ō.
22 J-a̰a̰ī yā Haman kə́ ngōn̄ Hamadatos. Ni i de kə́ Masedəwan banī ni i Persə tītə̄jī alé, ni i tə̄rā. Adə̄ kem majə ń j-awīiń ní, ni aw̄ń alé. Ɓá tā ba m-ə́wan kə̄ rɔ̄ḿ tə́. 23 M̄-tárən i tītə̄ ń m̄-tárəń nápar de gə̄ malang ní. M-āw̄ bátə́ m-ə̄ndān kadə̄ ní i bɔbə̄jí ō, ni i de kə́ bo ngá̰ý kə́ ūtə̄ gōḿ mā ō, de gə̄ malang ɔsən̄ nodə́ nang tə́ non tə́ ō. 24 Banī ni ṵṵ ɓē dɔ kɔjə rɔ̄ yān tə́ aĺ ō, rāā yá̰a̰ malang ń tɔ́gən asə ní yā taāń kṵ ɓē jīḿ tə́ kɔ̄ɔ́ ō, yā tɔ̄l̄məń ō. 25 Tɔdɔ̄ ni ɔr̄ najə̄ kə́ sor̄ gə̄ sāań kadə̄ m̄-tɔ̄l̄ Mardose kɔ̄ɔ́, Mardose ń un yá̰á̰ kə́ majə aĺ dɔḿ tə́ kɔ̄ɔ́ ō, rāā majə seḿ ngándáńg ní ō. Sāā tɔ̄l̄ Ester ń i nge rāā seḿ ō, ɔsə kílə́ḿ kem kəla mban̄g tə́ majə ngá̰ý ní ō. Ni sāā tɔ̄l̄ gír deē yādə́ gə̄ malang kɔ̄ɔ́ ō. 26 Yá̰á̰ ń ni rāā nuú gír̄ i rāā kadə̄ de gə̄ ń ɓoon̄ rɔ̄də́ tū yāḿ tə́ ní kə gətóon̄ kɔ̄ɔ́, yā kadə̄ kə n-adə̄ń Masedəwan gə̄ ɓē kṵ yā Persə gə̄. 27 De kə́ ndɔ̄ĺ i ngá̰ý dɔn tə́ ń toō, sāā tɔ̄ɔ̄ kōō Jipə gə̄ kɔ̄ɔ́. Tá mā m-á̰a̰ā̰ kadə̄ Jipə gə̄ rāān̄ yá̰á̰ kə́ majə aĺ kə deé alé. Ba a unən̄ i ndū najə̄ kə́ gōtə́ ngá̰ý gə̄ n a rāān̄nəń yá̰á̰ ní. 28 Tá ɓáý tṵ ní, nin̄ i ngáń Nə́ɓā kə́ ndi kə kumneé. Nge Ndi dɔ rā̰ tə́ ō bo ngá̰ý ō ngeé ń toō, rāā adə̄ ɓē kṵ yāḿ ndi majə ngándáńg, əla gír i ɓāl̄ yā kaaḿ gə̄ tə́ bátə́ ɓōólaā.
29 Adə̄ makətūbə̄ ń Haman kə́ ngōn̄ Hamadatos əlań adə̄sí ní, ī-lōōī kun rāań kəla. Ré ī-rāāiń kəla aĺ anī, ī-rāāī i yá̰á̰ kə́ majə. 30 Tɔdɔ̄ deē ń ndang makətūbə̄ ngeé ń toō əlań adə̄sí ní, ənīn̄ kəlā míndən tə́ ō, míndə de gə̄ malang kə́ kem gír kojə yān tə́ ō, ba tṵ́ṵ̄n̄də́ dɔ kāgāá dɔɔ́, ta róbə́ kə́ yā kudəń kə̄ kem ɓē kə́ Sujə tə́. Nə́ɓā ń i kɔ́ɔ̄ yá̰a̰ malang ní, əndan láẃ ngá̰ý tām̄ majaĺ yān tə́.
31 Makətūbə̄ ń m-ə́lań m-adə̄sí toō, ī-tə́ndāī kə̄ lo gə̄ tə́ malang. Ə́ya̰ī Jipə gə̄ ādə̄ unən̄ gō yá̰a̰ kāgə̄ ɓē yādə́ kə gō kemdə́. 32 Ī-dḭḭ̄də́ ādə̄ mbərenə̄ń ngé kənīdə́ rɔ̄ɔ̄ gə̄ kə̄ gogə́, kem nāā kə́ ngé kṵ kutə gidə i jōó tə́, adə̄ i kem nāā Adar tə́, kə ndɔ̄ nāā kə́ nge kṵ kutə gidə i mətá. I ndɔ̄ ń nuū tə́ n sɔɔ̄ kadə̄ de gə̄ tɔ̄ɔ̄nəń kōōdə́ kɔ̄ɔ́ ní. 33 A̰á̰ā̰, majə kadə̄ gír de gə̄ ń Nə́ɓā gə̄rādə́ ní oyn̄ kɔ̄ɔ́ ndɔ̄ ń nuū tə́. Banī Nə́ɓā ń i nge kṵ ɓē dɔ yá̰a̰ malang tə́ ní, tūr̄ ndɔ̄ ní adə̄ tél i ndɔ̄ rɔ̄nel̄. 34 Adə̄ ndɔ̄ kə́ bo ngeé ń toō ní, ī-rāāin̄ ndɔ̄ rɔ̄nel̄ yāsí tə́ ō, ādī i dan ndɔ̄ rāā nāā yāsí gə̄ tə́ ō. 35 Əla gír ngɔr ń toō tə́ ta kaw̄ kə̄ kété ní, ndɔ̄ ngeé ń a rāā kadə̄ a əga kem de gə̄ dɔ tə́ kadə̄ mā ō, Persə gə̄ kə́ kemdə́ majə gə̄ ō ní, jə-teē kɔ̄ɔ́ ta yá̰á̰ kə́ to yo kə́ bo ngá̰ý tə́. Ndɔ̄ ní a rāā kadə̄ de gə̄ ń oōn̄ naā dɔḿ tə́ ní, a əga kemdə́ dɔ tə́ kadə̄ a nujən̄ sák sák ō. 36 Ɓē gə̄ malang, aláa ngán ɓē gə̄ malang ń a rāān̄ yá̰a̰ gə̄ ń toō aĺ ní, m-ā m̄-bə̄gā wūn̄g yāḿ dɔdə́ tə́, adə̄ a tɔ̄lə̄n̄ de kə́ kemeé gə̄ kɔ̄ɔ́ ō, a əlan̄ hor dɔ kújə yādə́ gə̄ tə́ ō. De kə́ yā kasə kəndi kemeé a gətóo. Yel̄ gə̄gē, dā̰ kə́ bembeé gə̄gē, a nel̄də́ kə lo gə̄ ní al̄ ngá̰ý ō, a əya̰n̄ lo gə̄ ní kɔ̄ɔ́ kə́ njɔ́ḿ gə̄ tə́ ō.
Currently Selected:
ESTER KƏ TA GƏREK E: SARDC
Highlight
Copy
Compare
Share
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.