ESTER KƏ TA GƏREK 8
8
1Ndɔ̄ nəkɔ́ ń nuū tə́ yá̰a̰ kənge malang yā Haman nge tetə najə̄ ní, mban̄g Artajerses adə̄ Ester kadə̄ karī tə́. Tá ɓáý tṵ ní, mban̄g ɓāŕ Mardose, tɔdɔ̄ Ester ədan kété na Mardose na i ngeen. 2Mban̄g un kulúm ń ni ɔr̄ jī Haman tə́ ní adə̄ Mardose. Ba Ester əndā Mardose dɔ yá̰a̰ kənge malang yā Haman tə́.
Ndū najə̄ yā mban̄g kə́ rāā majə kə Jipə gēé
3Ester ɔr̄ najə̄ kə mbangá ɓáý tṵ. Ni əsō kə̄ nang tə́ njan tə́, ba dəjen kadə̄ əya̰ gíŕ yá̰á̰ kə́ to kum kaȳ aĺ ō, yá̰a̰ malang kə́ majə aĺ ń Haman ndigə rāā kə Jipə gēé ní ō kɔ̄ɔ́. 4Mban̄g əla kāgə̄ kṵ ɓē yān kə́ rāā kə lɔ́rɔ́ kum kə̄ rɔ̄ Ester tə́, anī Ester ɔsə nang ḭḭ dɔɔ́ ra kadə mban̄g tə́, 5Ba Ester əda na: Ré ī-ndigə ō, ī-rāā kem majə seḿ ō anī, ə́la ādə̄ lōōn̄ gír makətūbə̄ gə̄ ń Haman əlań kété ní tə́, adə̄ i makətūbə̄ gə̄ ń i kə́ yā tɔ̄ɔń kōō Jipə gə̄ kə́ kem ɓē kṵ yāí tə́ ní. 6Kadə̄ m-á̰á̰ gír deē yāḿ gə̄ kum yá̰á̰ kə́ to rɔ̄ tō ndoō tə́, ba m̄-tə́gā taḿ dɔ tə́ ní loon i ba̰ý? 7Mban̄g tūr̄ əda Ester na: Ré m-ādī yá̰a̰ kənge malang yā Haman ō, m̄-sāā rāā yá̰a̰ kadə̄ nelī ō, m-ādə̄ ənīn̄ kəlā míndən tə́ ba dṵṵ̄nən̄ dɔ kāgə̄ tə́ tām̄ rāā kə́ ni rāā Jipə gə̄ majə aĺ tə́ ō anī, i yá̰á̰ rí n ī-gḛy kənge ɓáý tṵ ní? 8Ta i dɔsí tə́ kadə̄ ī-ndangiī makətūbə̄ kə rīḿ, tītə̄ ń á̰a̰ī kadə̄ i yá̰á̰ kə́ majə ní. Ba ə̄ndāī tambō̰o̰ dɔ tə́ kə kulúm ta jī yāḿ. Tɔdɔ̄ yá̰a̰ malang ń ndangən̄ i kə gō ndū mbangá ō, əndān̄ tambō̰o̰ dɔ tə́ kə kulúm ta jī yāḿ ō ní, deē a tɔ́sə̄ kə̄ ndágá alé.
9Adə̄ ɓārə́n̄ ngé ndang makətūbə̄ gə̄ kə ndɔ̄ kə́ nge kṵ kutə jōó gidə i mətá yā nāā kə́ ta kəga dɔ, adə̄ i nāā Nisa̰ kə́ kem ɓāl̄ nəkɔ́ ń nuū tə́. Nin̄ ndangən̄ makətūbə̄ adə̄n̄ Jipə gə̄ ɔjənə̄ńdə́ yá̰a̰ gə̄ ń ədan̄ ngé kṵ ɓē gə̄ ō, ngé kɔsə kum gotə mban̄g gə̄ ō, kadə̄ rāān̄ ní. De gə̄ ngeé ń toō ní tə́ndān̄də́ i dɔ ngán ɓē gə̄ kə́ ɓú kə kutə jōó gidə i sīrí kə́ kem ɓē kṵ yā mban̄g tə́. Nja lo ń mban̄g ṵṵ ɓē dɔ tə́ ní, ḭḭ Ḛndə tə́ bátə́ Etiyopi tə́. Ndangən̄ makətūbə̄ adə̄n̄ ngáń ɓē gə̄ ní kógə̄ḿ kógə̄ḿ i kə taa yā de gə̄ ń ndin̄ kemeé ní. 10Ndangən̄ makətūbə̄ ní i kə rī mbangá ō, tambō̰o̰ ń əndān̄ dɔ tə́ ní, i kə kulúm jī mban̄g ō. Gō tə́ anī adə̄n̄ makətūbə̄ gə̄ ní ngé kətō makətūbə̄ najə̄ kə́ dɔ ɓē tə́ kaw̄ń gə̄ adə̄ aw̄nəń. 11Ədan̄ Jipə gə̄ kem makətūbə̄ gə̄ ní tə́ kadə̄ unən̄ gō ndū najə̄ yādə́ nin̄ kɔ́ gə̄ kem ɓē gə̄ tə́ kógə̄ḿ kógə̄ḿ ō, kadə̄ dḭḭ̄n̄ naā ō, kadə̄ rāān̄ yá̰á̰ ń kemdə́ ndigə ní kə madə̄ ba̰ā̰də́ gēé ō, 12kem ndɔ̄ kə́ kógə̄ḿ beē tə́, kem ɓē kṵ yā Artajerses tə́, kə ndɔ̄ kə́ nge kṵ kutə gidə i mətá yā nāā kə́ nge kṵ kutə gidə i jōó ń i nāā Adar ní.
Currently Selected:
ESTER KƏ TA GƏREK 8: SARDC
Highlight
Copy
Compare
Share
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.