ESTER KƏ TA GƏREK 7
7
Rāān̄ kem majə kə Haman tṵ aĺ ō, ni oy ō
1Mban̄g nin̄ kə Haman reēn̄ lo yá̰a̰ kəsa kə́ ngá̰ý ń mban̄g kə́ dəyá̰ rāā tə́ ní. 2Kem ndɔ̄ kə́ nge kṵ jōó ngeé ń nuū tə́ ní, ta tɔ̄l̄ ta yá̰a̰ kəsa tə́ anī, mban̄g əda Ester na: Ester, mban̄g kə́ dəyá̰, i rí n rāā yá̰a̰? Yá̰á̰ ń tōr̄ rɔ̄í ní i rí? Yá̰á̰ ń ī-dəje ní i rí? Ká i núsə ɓē kṵ yāḿ gə̄gē anī, m-ā m-ādī. 3Mban̄g kə́ dəyá̰ dal əda na: Ré mban̄g rāā kem majə seḿ anī, ādə̄ əya̰m̄ ādə̄ m̄-ndi kə kumḿ ō, əya̰ gír deē yāḿ gə̄ adə̄ ndin̄ kə kumdə́ ō, yá̰á̰ ń m̄-dəje ní n nuú. 4Tām̄ mā ō gír deē yāḿ gə̄ ō ní, igən̄ sejí kɔ̄ɔ́ yā tɔ̄ɔ̄ kōōjí ō, kɔy yá̰a̰ yājí dɔ gúú tə́ ō. Yā rāājí jḭḭ gē ngáńjí gē ɓəlo tə́ ō, kadə̄ jə-tél ngé kəla kə́ dəngam gə̄ ō, kə́ dəyá̰ gə̄ ō. Banī m-ə́nda mbīḿ dɔ tə́ kɔ̄ɔ́, tɔdɔ̄ nge tetə najə̄ kə́ beē ní, asə kadə̄ ndi ndogó mbangaá alé.
5Anī mban̄g əda na: I náā n nāā rāā yá̰á̰ kə́ beē ní? 6Ester tūr̄ əda na: I madə̄ ba̰ā̰ kógə̄ḿ! I Haman ń i de kə́ nge rāā háĺ ní! Lo ń nuū tə́ kem Haman nujə sák sák kɔ̄ɔ́ ta kum mban̄g nin̄ kə nə̄yá̰neé tə́.
7Mban̄g ḭḭ kɔ̄ɔ́ ta yá̰a̰ kəsa tə́ ba aw̄ kem ndɔrɔ́. Anī Haman rāā nə̄yá̰ mban̄g ɓɔ́, tɔdɔ̄ ni a̰ā̰ kadə̄ ni ndi i kem yá̰á̰ kə́ tōr̄ rɔ̄ tə́.
8Dan ń mban̄g aw̄ kem ndɔrɔ́ ba tél dɔ tə́ reē anī, Haman əsō i dɔ kāgə̄ ndi kə́ ngāl̄ tə́ suruk n to a rāań nə̄yá̰ mban̄g ɓɔ́ ní. Kə ta jī tə́ nuū mban̄g əda na: Ī-ndigə sāā nə̄ya̰ḿ dɔ gúú tə́ kem kújə yāḿ tə́ tṵ a! Haman oō najə̄ ní anī, rɔ̄n sɔlə̄n ngá̰ý adə̄ ni tūr̄ kumən kɔ̄ɔ́. 9Tá Bugatan ń ni i áji mbang kógə̄ḿ kə́ dan madə̄ gə̄ tə́ ní, əda mban̄g na: Kāgə̄ tɔ̄l̄ deē ń Haman udə tām̄ yā Mardose nge kɔr̄ najə̄ yā mban̄g tə́ ní i nuú. I kāgə̄ tɔ̄l̄ deē kə́ ngālən asə métər kutə jōó gidə i mí n udən̄ ɓē Haman ní! Anī mban̄g əda na: Ə̄nī kəlā míndən tə́ ba ī-dṵṵ̄in̄ dɔɔ́! 10Adə̄ ənīn̄ kəlā míndə Haman tə́ ba aw̄ dṵṵ̄nən̄ dɔ kāgə̄ tɔ̄l̄ deē ń udən̄ tām̄ yā Mardose tə́ ní. Lo ń nuū tə́ wūn̄g yā mban̄g tetə.
Currently Selected:
ESTER KƏ TA GƏREK 7: SARDC
Highlight
Copy
Compare
Share
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.