ESTER KƏ TA GƏREK 2
2
Ester tél mban̄g kə́ dəyá̰
1Gō yá̰a̰ gə̄ ń nuū tə́ ní, dan ń wūn̄g yā mban̄g tetə anī, ni əda najə̄ yā Astin tṵ alé. Tɔdɔ̄ əga kemən dɔ najə̄ kɔr̄ Astin tə́ ō, dɔ sarya ń ni gān̄g dɔn tə́ ní tə́ ō. 2Anī ngé kəla yān gə̄ ədan̄ na: Ādə̄ sāān̄ ngámandə kə́ ger̄ dəngam aĺ ɓáý gə̄ ō, kə́ majə ka̰a̰də́ ngá̰ý gə̄ ō, tām̄ yā mban̄g tə́. 3Ādə̄ mban̄g tə́ndā de gə̄ kə gō ngán ɓē gə̄ malang kə́ kem ɓē kṵ yān tə́, kadə̄ gə̄rān̄ ngámandə kə́ ger̄ dəngam aĺ ɓáý gə̄, kə́ majə ka̰a̰də́ ngá̰ý gə̄ reēn̄ sedə́ kem ɓē kə́ Sujə tə́, ba kánə̄n̄də́ kem kújə yā dəyá̰ gə̄ tə́. Lo ń nuū tə́ a adə̄n̄də́ kə áji mbang kə́ ndogó mbangaá, kə́ nge ngɔ̄m̄ dəyá̰ gə̄, kadə̄ a̰a̰ gōdə́. Kadə̄ adə̄də́ yibə̄ ndum kə́ a majə rɔ̄ deē ō, kadə̄ a̰a̰ gōdə́ tū yá̰á̰ kə́ rang gə̄ tə́ ō. 4Dəyá̰ ń a nel̄ mban̄g seneé ní, a ṵṵ ɓē gotə Astin tə́. Yá̰á̰ ní nel̄ mban̄g adə̄ ni rāā tītə̄ ń nuū.
5Jipə kógə̄ḿ ndi kem ɓē kə́ Sujə tə́ nuū rīn na i Mardose. I ngōn̄ kaa Jayiros ō, Semeyas ō, Kisayas ō. Adə̄ i de kə́ gír kaa yā Benjamḛ tə́. 6Ni i de kógə̄ḿ kə́ dan de gə̄ ń ɔyn̄də́ aw̄n̄ sedə́ dɔ ɓē kə́ rang tə́ dɔ gúú tə́ ní. Nabukodonosor mban̄g kə́ Babilon ḭḭ seneé i Jerusalem n reē seneé dɔ gúú tə́ ní. 7Tá Mardose ngeé ń toō i nge kətō ngōn̄ kə́ dəyá̰ kógə̄ḿ. Ngōn̄ kə́ dəyá̰ ní i ngōn̄ nānən Aminadab. Rī ngōn̄ kə́ dəyá̰ ní na i Ester. Bɔbə̄n ō kṵ́ṵn ō oyn̄ kɔ̄ɔ́, ba Mardose ətōn i yā rāan nə̄yá̰n tə́. Ngōn̄ kə́ dəyá̰ ní mandə ngá̰ý.
8Dan ń ənīn̄ mbēr̄ yá̰á̰ ń mban̄g əda kadə̄ yā rāā ní oy anī, kánə̄n̄ ngámandə gə̄ ngá̰ý kem ɓē kə́ Sujə tə́. Deē ń əndānən̄ dɔdə́ tə́ ní rīn na i Gay. Adə̄ reēn̄ kə Ester adə̄n̄ Gay nge ngɔ̄m̄ dəyá̰ gə̄. 9Dan dəyá̰ gə̄ kə́ ndogó mbangaá tə́ ní, nel̄ Gay kə ngōmandə ní, adə̄ rāā kem majə seneé. Adə̄n yibə̄ rāā mandə kə̄ ta jī tə́ nuū ō, yá̰a̰ kəsa yān ō, ngámandə kə́ ndogó mbangaá gə̄ sīrí ō. 10Ester ɔjə gír kaan aĺ ō, gír ɓē kojən aĺ ō. Tɔdɔ̄ Mardose ɔgə̄n kəda. 11Tá kə dɔ ndɔ̄ gə̄ ń nuū ní, Mardose a dáȳ i mbée ndágə lo yā dəyá̰ gə̄ tə́ a umə̄ń yá̰á̰ ń a rāā yā rāā Ester ní.
12Dan ń nāā kə́ kutə gidə i jōó gə̄ asə anī, i kum mbang kə́ yā kadə̄ ngōmandə aw̄ń rɔ̄ mban̄g tə́. Yá̰a̰ gə̄ ń a rāān̄ yá̰a̰ kum mbang kəndā dɔ rɔ̄ danaá tə́ ní n toó: kem nāā mehḛ́ ní a ndum i yibə̄ mír ō, gō tə́ anī kem nāā mehḛ́ ɓáý tṵ ní, a ndum i nūū kāgə̄ kə́ otə majə ń a ɓārə́n̄ na i bóm ní ō, yibə̄ rāā mandə yā dəyá̰ gə̄ ō. 13I lo ń nuū tə́ n ni a aw̄ rɔ̄ mban̄g tə́ ní. Deē ń mban̄g a adə̄n ta róbə reē kə ngōmandaá ní, a ḭḭ kə ngōmandə ní i kem kújə yā dəyá̰ gə̄ tə́, yā reē seneé bátə́ kem kújə yā mban̄g tə́. 14Ni a aw̄ i lo tíbí, ba dəloí anī, a aw̄ i kem kújə yā dəyá̰ gə̄ kə́ nge kṵ jōó tə́, lo ń Gay kə́ áji mbang a ngɔ̄m̄ dəyá̰ gə̄ tū tə́ ní tə́. Lo ń nuū tə́ ngōmandə ní a tél yā kaw̄ gogə́ rɔ̄ mban̄g tə́ tṵ alé, ba ré i mban̄g nəkɔ́ n ɓārə́n kə rīneé tá.
15Dan ń Ester kə́ ngōn̄ Aminadab kə́ nān̄ Mardose təgā ndɔ̄ gə̄ kə́ yā kaw̄ń rɔ̄ mban̄g tə́ anī, yá̰a̰ gə̄ ń áji mbang kə́ nge ngɔ̄m̄ dəyá̰ gə̄ əda kadə̄ yā rāā ní, Ester mbātə́ nge kógə̄ḿ alé. Kə́ rɔ̄kum tə́ ní, de gə̄ malang ń a̰a̰n̄ Ester ní, ənīn̄ kemdə́ adə̄nən̄. 16Adə̄ Ester aw̄ rɔ̄ mban̄g Artajerses tə́ kem nāā kə́ nge kṵ kutə gidə i jōó tə́, adə̄ i kem nāā Adar tə́, kem ɓāl̄ kṵ ɓē yān kə́ nge kṵ sīrí tə́. 17Anī mban̄g gḛy Ester ngá̰ý ō, rāā majə seneé tɔȳ yā gotə ngámandə gə̄ malang ō. Ni əla jākā mbang kə́ ɔjə kadə̄ Ester i nə̄yá̰n dɔ Ester tə́. 18Gō tə́ anī, mban̄g rāā yá̰a̰ kəsa kə́ ngá̰ý ndɔ̄ sīrí tām̄ yā madə̄ tan gə̄ tə́ malang ō, de kə́ bo gə̄ tə́ malang ō, rāań rɔ̄nel̄ taā naā yādə́ kə Ester. Ni ɔr̄ ta lambóo yā ɓer̄ gə̄ malang kə́ kem ɓē kṵ yān tə́ kɔ̄ɔ́.
19Mardose a rāā kəla i ndogó mbangaá. 20Ester mbātə́ kəda rī ɓē kojən kadə̄ de gə̄ gerə̄n̄. Tām̄ Mardose ɔgə̄n kəda ō, kə ɓōĺ ndíĺ Nə́ɓā ba kə rāā yá̰a̰ gə̄ ń əda kadə̄ yā rāā ní kə ta njaá ō, tītə̄ ń ndiń seneé ní. Ester tūr̄ hálən alé.
Mardose əɓa dɔ ngé koō naā dɔ mban̄g tə́
21Áji mbang kə́ jōó gə̄ kə́ ndogó mbangaá ń nin̄ i ngol ngé ngɔ̄m̄ mban̄g ní, rɔ̄də́ nel̄də́ alé, sɔɔ̄ń ndɔ̄tə́ ń a ndɔ́tə̄n̄ kə Mardose kə̄ kété kété ní. Lo ń nuū tə́ nin̄ sāān̄ tɔ̄l̄ mban̄g Artajerses kɔ̄ɔ́. 22Banī Mardose ger̄ gō yá̰á̰ ní, adə̄ əda Ester. Anī Ester aw̄ əda mban̄g najə̄ gə̄ ń ngé koō naā gə̄ ɔrə̄n̄ ní kə ta njaá. 23Mban̄g dəje áji mbang kə́ jōó gə̄ ní najə̄, ba gō tə́ anī, ənīn̄ kəlā míndə́də́ tə́ a kə́ dṵṵ̄n̄də́ tū kāgə̄ tə́ dɔɔ́. Yā tɔ̄yń Mardose ɓáa mban̄g adə̄ ndūn kadə̄ ndangən̄ yá̰a̰ gə̄ ń rāān̄ yá̰á̰ ní, yā ngɔ̄m̄ kem kújə ngɔ̄m̄ makətūbə̄ gə̄ yā mban̄g tə́, kadə̄ əgań kem de gə̄ dɔ kəla kə́ majə gə̄ yā Mardose tə́.
Currently Selected:
ESTER KƏ TA GƏREK 2: SARDC
Highlight
Copy
Compare
Share
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.