ESTER KƏ TA GƏREK 1
1
Mban̄g Artajerses rāā yá̰a̰ kəsa kə́ ngá̰ý ɓārə́nń de gə̄
18 Yá̰á̰ ń toō rāā yá̰a̰ i ɓāl̄ yā Artajerses tə́. Artajerses ngeé ń toō, ɓē kṵ yān i dɔ ngán ɓē gə̄ malang kə́ ɓú kə kutə jōó kə kalən kə́ sīrí tə́, bátə́ ugə̄ń dɔ nin̄ dɔ nang kə́ Ḛndə tə́. 19 Dan ngeé ń nuū tə́ ní, lo ń mban̄g Artajerses reē ndi dɔ kōr̄ kāgə̄ mbang yān tə́ kem ɓē kə́ Sujə tə́, 20 adə̄ i kem ɓāl̄ kṵ ɓē yān kə́ nge kṵ mətá tə́ anī, rāā yá̰a̰ kəsa kə́ ngá̰ý tām̄ yā madə̄ tan gə̄ tə́ ō, gotə gíŕ nápar de gə̄ malang tə́ ō, de kə́ bo gə̄ kə́ Persə tə́ ō, tām̄ yā Medə gə̄ tə́ ō, ngār gə̄ kə́ dɔ ngé kṵ ɓē gə̄ tə́ ō. 21 Gō tə́ anī, kem ndɔ̄ ɓú kə kutə sɔ́sɔ́ ní, mban̄g ra i dan kɔjə de gə̄ yá̰a̰ kənge kə́ kem ɓē kṵ yān tə́ tə́ ō, dan rāā tə́ kadə̄ de gə̄ udən̄ kem rɔ̄nel̄ kə́ ngá̰ý ń yá̰a̰ kənge a adə̄ deē tə́ ní ō. 22 Gō yá̰a̰ kəsa ngeé ń toō tə́ anī, mban̄g rāā yá̰a̰ kəsa kə́ ngá̰ý kə́ rang ndogó mbangaá ndɔ̄ mehḛ́ tām̄ yā gíŕ nápar de kə́ ngá̰ý gə̄ ń ndin̄ kem ɓēé tə́ ní. 23 Súūn̄ kem ndogə̄ yā mban̄g i kə kūbə̄ lḛ́ḛ́ ō, ta kūbə̄ musəlin kə́ hɔɔ́lɔ̄ pél pél gə̄ ō, tṵ́ṵ̄n̄ kūbə̄ gə̄ ní dɔɔ́ i kə kəlā lḛ́ḛ gə̄ ō, kəlā kūbə̄ kə́ kərē ning gə̄ ō, bēl̄ gə̄ ń tṵ́ṵ̄n̄ kəlā gə̄ ní tū tə́ ní, i kə́ rāā kə lɔ́r ō, gində̄ arjā̰a̰ ō, tṵ́ṵ̄n̄ kəlā gə̄ ní i tū mbal̄ marbər tə́ ō, yá̰á̰ kə́ to tītə̄ kem ngɔ́ɔ́ kə́ngɔĺ ō, albátər ō, kə́ tɔ́səń adə̄ ra kə ngālāá ɓururu. Tə́ndān̄ yá̰a̰ kəndi kə́ to ngol gə̄ kə́ rāān̄ kə lɔ́r ō, gində̄ arjā̰a̰ ō, do nang kə ɓatə̄ kə mbal̄ gə̄ kə́ gātə̄də́ i ngá̰ý ń i emerodə ō, marbər ō ní tə́. Gō tə́ i bájo gə̄ kə́ kɔsə ta kə yá̰á̰ kə́ ndə́lē gə̄ ō, i hútə̄ kāgə̄ rojə kə́ tínə̄n̄ kə gō gidə lo gə̄ ō, 24 kopə lɔ́r gə̄ ō, kopə gində̄ arjā̰a̰ gə̄ ō ní, səmbē kə́ laa kógə̄ḿ i danaá. Tə́lan̄ mbal̄ kə́ gātə̄də́ i ngá̰ý gə̄ tū tə́ ō, gātən i gində̄ arjā̰a̰ kə́ kɔȳn mān̄ kəlōo ɓú sɔ́sɔ́ ō. Kasə nduú kə́ majə kə́ mban̄g nəkɔ́ a ā̰ȳ i ngá̰ý ō. 25 Yá̰á̰ kəsa kə́ rāā ngá̰ý ngeé ń toō ní, de gə̄ a əsan̄ i kə gō kem ndigə yādə́, tītə̄ ń mban̄g ndigəń ní. Mban̄g adə̄ ngol ngé nə̄ɓō de gə̄ yá̰a̰ kəsa ndūn, kadə̄ rāān̄ yá̰a̰ i kə gō kem ndigə yāneé ō, kə gō kem ndigə yā de gə̄ kógə̄ḿ kógə̄ḿ ō. 26 Anī Astin ń i nə̄yá̰ mban̄g ní rāā yá̰a̰ kəsa kə́ ngá̰ý tām̄ yā dəyá̰ gə̄ tə́ ndogó mbangaá, lo ń mban̄g Artajerses ndi tū tə́ ní tə́. 27 Kə ndɔ̄ kə́ nge kṵ sīrí anī, rɔ̄ mban̄g nelə̄n. Anī əda Haman ō, Bajan ō, Tara ō, Borajə ō, Jatolta ō, Abataja ō, Taraba ō, ń nin̄ i áji mbang kə́ sīrí gə̄ ń a rāān̄ kəla yān ní, 28 kadə̄ aw̄ reēn̄ kə nə̄yá̰neé ba əndānən̄ non tə́ dɔ kōr̄ kāgə̄ mbang tə́ ō, kə tə́lan̄ yá̰á̰ súū rɔ̄ kə́ ɔjə kadə̄ ni i mban̄g kə́ dəyá̰ dɔn tə́ ō, yā kadə̄ de kə́ bo gə̄ ō, gíŕ nápar de gə̄ ō, a̰a̰n̄ mandən. Kumən na i dəyá̰ kə́ mandə ngá̰ý. 29 Banī Astin ń i nə̄yá̰ mban̄g ní, mbātə́ reē kə áji mbang gēé. Lo ń nuū tə́ tōr̄ mban̄g ngá̰ý ō, wūn̄g rāan ō. 30 Ni əda madə̄ tan gə̄ na: Astin tūr̄ əda i beé a? I beé ɓá ní, ə̄ndāī maȳ najə̄ ń nuū ō, ī-gāngī sarya kə́ dɔ tə́ ō. 31 Anī, Arkesayos ō, Sarsatayos ō, Maleseyar ō ń, i de kə́ bo gə̄ yā Persə gə̄ ō, Medə gə̄ ō ní, ndɔ́tə̄n̄ kə̄ rɔ̄n tə́. Nin̄ i ngé ra ngɔr rɔ̄n tə́ gə̄ ō, ngé ndi kété lo sarya tə́ kadə mban̄g tə́ ō. 32 Nin̄ ɔjənən̄ yá̰á̰ kə́ yā rāā kə Astin kə́ nə̄yá̰ mban̄g kə gō ndū najə̄ ń ədań ní. Tɔdɔ̄ ni mbātə́ rāā yá̰á̰ ń mban̄g ə̄ndā ta áji mbang gə̄ tə́ kadə̄ ədanən̄ ní. 33 Lo ń nuū tə́ Mukayos un najə̄ ɔr̄ ta kum mban̄g tə́ ō, de kə́ bo gə̄ tə́ ō, əda na: I mban̄g ngóy n nə̄yá̰n rāan nja bə̄yā̰ kə́ gogə́ tə́ ní alé, banī i de kə́ bo gə̄ malang ō, ngé kṵ ɓē gə̄ malang yā mban̄g ō. 34 Tām̄ mban̄g ədadə́ yá̰á̰ ń nə̄yá̰n ədan kété ní ō, lo tūr̄ ń dəyá̰ tūrən najə̄ tə́ ní ō. Anī Mukayos ɔr̄ najə̄ ɓáý əda na: Ré ni tūr̄ əda mban̄g Artajerses najə̄ i beé anī, 35 gotə nə̄yá̰ de kə́ bo gə̄ kə́ Medə tə́ ō, Persə tə́ ō malang ní, dan ń oōn̄ najə̄ ń ni tūr̄ əda mban̄g Artajerses ní anī, a nāān̄ kəla rɔ̄sɔl̄ kə́ beē dɔ ngaadə́ gə̄ tə́ ō. 36 Ré mban̄g ndigə anī, ādə̄ teē kə ndū kógə̄ḿ ndogó mbangaá ō, kadə̄ ndangən̄ ndū ní dan ndū najə̄ gə̄ yā Medə gə̄ tə́ ō, Persə gə̄ tə́ ō, kadə̄ lo tūrən kə́ rang gətóo. Ba kadə̄ nə̄yá̰ mban̄g aw̄ rɔ̄ mban̄g tə́ tṵ aĺ i kə́ bátə́ gə̄ tə́ ō, kadə̄ mban̄g əndā rīī ń na i nə̄yá̰ mban̄g ní dɔ dəyá̰ kə́ rang kə́ ngáā tɔȳn tə́ ō. 37 Kadə̄ ndū najə̄ ń mban̄g teēń ní kōon ɓār̄ ō, kadə̄ un rāānəń kəla kem ɓē kṵ yān tə́ ō. I beé tá dəyá̰ gə̄ malang a rɔȳn̄ ngaadə́ kə́ ndoō ngá̰ý gə̄ ō, kə́ ngé kənge yá̰á̰ ngá̰ý gə̄ ō. 38 Najə̄ ní nel̄ mban̄g ngá̰ý ō, de kə́ bo gə̄ ō. Adə̄ mban̄g rāā yá̰á̰ ń Mukayos əda ní. 39 Ni ndang makətūbə̄ əlań kem ngán ɓē yān gə̄ tə́ malang ō, ndang kə gō taa gə̄ kə́ kem ngán ɓē gə̄ ní tə́ ō. Adə̄ dəyá̰ gə̄ ndin̄ kem kújə́ yādə́ gə̄ tə́ i kə ɓōĺ ndíl ngaadə́ gə̄ kemdə́ tə́.
Currently Selected:
ESTER KƏ TA GƏREK 1: SARDC
Highlight
Copy
Compare
Share
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.