ESTER KƏ TA GƏREK 3
3
Míndə kasə naā aĺ to dɔ dán Haman tə́ nin̄ kə Mardose
1Gō yá̰a̰ gə̄ ń nuū ń rāān̄ yá̰á̰ tə́ ní, mban̄g Artajerses əndā Haman kə́ ngōn̄ Hamadatos ń rī tɔ̄yn na i Bugayos ní lo kəla kə́ bo tə́. Ni ɔsən kə̄ dɔɔ́ ō, əndān kété no madə̄ tan gə̄ tə́ ō. 2Ngé kəla kə́ ndogó mbangaá gə̄ malang a ɔsən̄ i nodə́ nang tə́ non tə́, tītə̄ ń mban̄g ədań ní. Banī Mardose mbātə́ kɔsə non nang tə́ no Haman tə́. 3Lo ń nuū tə́ ngé kəla kə́ ndogó mbangaá gə̄ ədan̄ Mardose na: Yá̰á̰ ń mban̄g əda ní usiī dɔ tə́ aĺ i tām̄ rí tə́? 4Nin̄ a ədanən̄ najə̄ ní i kə dɔ ndɔ̄ gə̄, banī ni mbātə́ rāā yá̰á̰ ń mban̄g əda ní kɔ̄ɔ́. Mardose ədadə́ kɔ̄ɔ́ na ni na i Jipə. 5Dan ń Haman oō kadə̄ Mardose na mbātə́ kɔsə non nang tə́ non tə́ anī, wūn̄g asən nák. 6Ni ndigə tɔ̄l̄ Jipə gə̄ malang kə́ kem ɓē kṵ yā mban̄g Artajerses tə́ kɔ̄ɔ́. 7Kem ɓāl̄ kṵ ɓē yā mban̄g Artajerses kə́ nge kṵ kutə gidə i jōó tə́ anī, Haman teē kə ndū kógə̄ḿ ō, adə̄ túgə̄n̄ wə̄lā dɔ ndɔ̄ tə́ ō, nāā tə́ ō, yā tɔ̄ləń de gə̄ kə́ gír kaa yā Mardose tə́ kɔ̄ɔ́. Wə̄lā əsō i dɔ ndɔ̄ kə́ nge kṵ kutə gidə i sɔ́ yā nāā Adar tə́. 8Lo ń nuū tə́ Haman əda mban̄g Artajerses na: Gíŕ nápar de kógə̄ḿ gə̄ i nuú, kə́ tə̄ndā tḭ̄ḭ̄n̄də́ kə̄ dan nápar de gə̄ malang kə́ kem ɓē kṵ yāí tə́. Ndū najə̄ yādə́ gə̄ ndetən̄ naā kə yā nápar de gə̄ malang aĺ i kə́ bátə́ gə̄ tə́ ō, usədə́ dɔ ndū najə̄ yā mban̄g tə́ aĺ ō. Ré mban̄g əya̰də́ adə̄ ndin̄ jəke anī, yá̰á̰ kə́ yā kadə̄ mban̄g ənge gírí gətóo. 9Ré mban̄g ndigə anī, ādə̄ tɔ̄ɔ̄ kōōdə́ kɔ̄ɔ́. Mā tā anī, m-ā m̄-ɓōkə́ sə́lē gində̄ arjā̰a̰ kə́ kɔȳn i kəlōo dūbú ɓú mətá kem lo ngɔ̄m̄ nar yā mban̄g tə́. 10Lo ń nuū tə́ mban̄g ɔr̄ kulúm kə́ jīn tə́ ənī kem jī Haman tə́, yā kadə̄ tél i tambō̰o̰ kə́ yā kɔsə tū makətūbə̄ tɔ̄l̄ Jipə gə̄ tə́. 11Gō tə́ anī mban̄g əda Haman na: Ī-ngɔ̄m̄ nar ní! Ba ī-rāā gíŕ nápar de gə̄ ń nuū yá̰á̰ ń kemií ndigə ní. 12Kə ndɔ̄ kə́ nge kṵ kutə gidə i mətá yā nāā kə́ ta kəga dɔ anī, sāān̄ ngé ndang makətūbə̄ gə̄ yā mban̄g, adə̄ ndangən̄ makətūbə̄ kə gō ń Haman ədańdə́ ní. Adə̄n̄ ngol áskar kə́ bo gə̄ ō, ngé kɔsə kum gotə mban̄g gə̄ ń tə́ndān̄də́ kə gō ngán ɓē gə̄ kógə̄ḿ kógə̄ḿ, əla gír Ḛndə tə́ bátə́ Etiyopi tə́ ní ō, adə̄n̄ ngán ɓē gə̄ kə́ ɓú kə kutə jōó kə kalən kə́ sīrí ní ō, adə̄n̄ ngār gə̄ kə́ dɔ gíŕ nápar de gə̄ tə́ kə gō taa yādə́ gēé ō, kə rī mban̄g Artajerses. 13Gō tə́ anī ndangən̄ makətūbə̄ adə̄n̄ ngé kətō makətūbə̄ yā kósə de gə̄, adə̄ aw̄nəń kem ɓē kṵ yā Artajerses tə́. Makətūbə̄ ní i yā kadə̄ de gə̄ tɔ̄ɔ̄nəń kōō Jipə gə̄ kem ndɔ̄ kə́ kógə̄ḿ beē tə́, kem nāā kə́ nge kṵ kutə gidə i jōó tə́, adə̄ i nāā Adar ō, i yā kadə̄ de gə̄ ɔynə̄ń yá̰a̰ kənge yādə́ gə̄ dɔ gúú tə́ ō.
Currently Selected:
ESTER KƏ TA GƏREK 3: SARDC
Highlight
Copy
Compare
Share
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.