NDŪ NAJƏ̄ 33
33
Moijə tɔ́r̄ tan dɔ gír ɓē kə́ kutə gidə i jōó gə̄ tə́
1Moijə ń i deē yā Nə́ɓā ní, kété pá tá kadə̄ oy ní, najə̄ gə̄ ń ni-ɔr̄ á tɔ́rəń tan dɔ ngán Israel gə̄ tə́ ní n toó:
2Kɔ́ɔ̄ɓē ḭḭ i mbal̄ kə́ Sinai tə́ n reē ní.
Ni-əɓa tītə̄ mbang beé dām̄ kə́ Seir tə́.
Ni-ra i mbal̄ kə́ Paran tə́ n unjə̄ń kow
dɔ gír deē yān gə̄ tə́ ní.
Ni-reē rɔ̄ ngéén gə̄ tə́
kə dūbə̄ ngé kəla kə́ dɔ rā̰ tə́ gēé gōn tə́.
Ni-əhɔ ndū najə̄ yān ń unjə̄ tītə̄ hor ní jīn tə́.
3Kɔ́ɔ̄ɓē táŕ gír ɓē gə̄ yā ngán Israel gə̄.
Ni-ngɔ̄m̄ deē yān gə̄ malang
kə́ ngé kán̄ naā ta kejən tə́ yā taāń kɔjə̄ yān gə̄.
4 Ndū najə̄ yā Nə́ɓā ń Moijə adə̄jí ní
i yá̰a̰ kənge kə́ gātə̄n i ngá̰ý tām̄ yā ngán kaa Jakob tə́.
5Gerə̄n̄ kadə̄ Kɔ́ɔ̄ɓē i mban̄g yā Yesurun#33.5 Yesurun: Á̰a̰ī Ndū 32.15.
i loo ń ngār gə̄ kə́ dɔ Israel gə̄ tə́ kánə̄n̄ naā ō,
gír ɓē gə̄ malang yā Israel kánə̄n̄ naā ō ní.
6Moijə əda ɓáý to̰ na:
Ādə̄ de kə́ gír ɓē yā Ruben tə́ gə̄ ndin̄ kə kumdə́ ō,
oyn̄ aĺ ō.
Ādə̄ deē yān kə́ sḛ́ý beē gə̄ ndin̄ kə kumdə́ kə̄ nodə́ tə́.
7Yá̰á̰ ń Moijə əda dɔ Juda tə́ ní n toó:
Kɔ́ɔ̄ɓē, ōō ɓār̄ yā Juda,
ba ī-tél seneé kə̄ rɔ̄ gír deē yān gə̄ tə́.
Ādə̄ əhɔ rɔ̄n tɔgə rɔ̄ɔń dɔ rɔ̄n tə́ ō.
Ré madə̄ ba̰ā̰ gə̄ a rɔ̄ɔ̄nən̄ anī, ī-dḭḭ̄n ō.
8Yá̰á̰ ń Moijə əda dɔ Lebi tə́ ní n toó:
Kɔ́ɔ̄ɓē, ngé kəla yāí kə́ ran̄ dɔ ndūdə́ tə́ gə̄ ń ī-nāādə́ Masa ō,
ī-gān̄g sarya dɔdə́ tə́ tām̄ yā najə̄ kə́ Meriba tə́ ō ní,
ī-ɓɔ̄də́ tumim yāí ō, urim yāí ō#33.8 Tumim ō Urim ō: Á̰a̰ī Teē 28.30; Leb 8.8; Tə́da 27.21.
9Nin̄ ɔjən̄ kə̄ ndágá kadə̄ táriīn̄ tɔȳ bɔbə̄də́ gə̄ ō,
kó̰ó̰də́ gə̄ ō, ngákó̰ó̰də́ gə̄ ō, ngáńdə́ gə̄ ō.
Tɔdɔ̄ oōn̄ taí, adə̄ rāān̄ yá̰á̰ ń ə́dádə́ ní.
Nin̄ əndān̄ kumdə́ gír madə̄ naā yāí tə́.
10I nin̄ n i ngé ndóō ngán Israel gə̄ jī-bēl̄ loo rāā yá̰a̰ yāí gə̄ ō,
ndū najə̄ yāí ō ní.
I nin̄ n i ngé ndējī yá̰a̰ tun̄ gə̄ ń sadə́ udə kó̰ní tə́ ní ō,
ngé róō dā̰ horoó dɔ loo tun̄ yá̰a̰ yāí tə́ ní ō.
11Kɔ́ɔ̄ɓē, ī-tél ādə̄də́ tɔ́gə gogə́ rang ō,
ī-ndigə kəla malang ń a rāān̄ ní ō.
Ī-taā tɔ́gə madə̄ ba̰ā̰də́ gə̄ kɔ̄ɔ́ ādə̄ asən̄ kḭḭ dɔɔ́ to̰ alé.
12Yá̰á̰ ń Moijə əda dɔ Benjamḛ tə́ ní n toó:
Benjamḛ i de kə́ Kɔ́ɔ̄ɓē tárən ngá̰ý.
Ni-ndi rɔ̄ Nə́ɓā yān tə́ kanjə̄ sōl̄ yá̰á̰ kógə̄ḿ.
Nə́ɓā ngɔ̄mən kə dɔ ndɔ̄ gə̄ ō,
Ndi i dan ngán mbal̄ yān gə̄ tə́ ō.
13Yá̰á̰ ń Moijə əda dɔ Jəjep tə́ ni n toó:
Kɔ́ɔ̄ɓē rāā majə kə dɔ nang yā Jəjep
tām̄ dɔ nang yān ənge tal kə́ dɔ rā̰ tə́ ō,
man̄ kə́ teē gíŕ nángāá ō.
14Mbang rāā adə̄ kum yá̰a̰ gə̄ əɓan̄ ō,
kōō gə̄ mbūsə̄n̄ kə dɔ nāā gə̄ ō.
15Mbal̄ kə́ bo gə̄ ō, ngán mbal̄ gə̄ ō, i gō nang yān kə́ teē yá̰á̰ ngá̰ý tə́ i jóo.
16Ādə̄ yá̰a̰ kənge gə̄ kə́ dɔ nang kə́ teē yá̰á̰ ngá̰ý ń toō tə́ ō,
kem majə yā nge ń ndi dan túpə́ kámbə́ tə́ ní ō,
əla loo kə̄ dɔ Jəjep ń kété ni i ngār yā ngákó̰o̰n gə̄ ní tə́.
17Ādə̄ de gə̄ rɔȳn̄ Jəjep.
Ni-ngan̄g tītə̄ man̄g kə́ bəra beé.
Gajən kə́ ngan̄g ngan̄g gə̄ i jōó tītə̄ gajə dɔgə.
Ni-tɔ́səń gír de gə̄ ō,
bugə́juńdə́ bátə́ aw̄ sedə́ əndādə́ ta ngóy dɔ nang tə́ ō.
Gajən kə́ kógə̄ḿ i dūbə̄ de kə́ ngá̰ý gə̄ yā Epəraim,
ba gajən kə́rēý i ɓūtə̄ de kə́ ngá̰ý gə̄ yā Manase.
18Yá̰á̰ ń Moijə əda dɔ Jabulo̰ tə́ ō Isakar tə́ ō ní n toó:
Jabulo̰, ī-rāā rɔ̄nel̄ tām̄ kəla gātə̄ yāí tə́,
ba ḭ̄ Isakar, ī-rāā rɔ̄nel̄ tām̄ ndi lɔm kem kújə tandā yāí gə̄ tə́.
19Ā ī-mērī madə̄ ɓēsí gə̄ kaw̄ sesí dɔ mbalá
kadə̄ āw̄ ī-tunī yá̰a̰ kə gō ndū najə̄ yā Nə́ɓāá.
Tɔdɔ̄ yá̰a̰ kənge yāsí sḭḭ̄ i kə́ kum bā bo tə́ ō,
i yá̰a̰ kənge kə́ teē tū nán̄g ngárə̄ḿnjēý tə́ ō.
20Yá̰á̰ ń Moijə əda dɔ Gad tə́ ní n toó:
Ādə̄ de gə̄ tɔ̄ȳn̄ Kɔ́ɔ̄ɓē nge kadə̄ Gad dɔ nang kə́ laa.
Gad to a əsa dā̰ yān kə́ əhɔn tītə̄ ɓɔl.
Ni-rə̄yā̰ kɔ̄bən ō, njar dɔn ō.
21Gad gə̄rā dɔ nang kə́ majə ngá̰ý tām̄ yān tə́.
I dɔ nang kə́ majə
tām̄ yā ngé ko̰o̰ ɓē gə̄ tə́ n ni ngɔ̄m̄ tām̄ yān tə́ ní.
Gō tə́ anī ni-aw̄ gō ngār yā ngán Israel gə̄ tə́.
Ni-rāā yá̰á̰ kə́ gōtə́ yā Kɔ́ɔ̄ɓē ō,
yá̰a̰ gə̄ ń Kɔ́ɔ̄ɓē əda kadə̄ rāān̄
tām̄ yā ngán Israel gə̄ tə́ ní ō.
22Yá̰á̰ ń Moijə əda dɔ Dan tə́ ní n toó:
Dan to tītə̄ balsáa ɓɔl kə́ ḭḭ Basan kə ngɔ̄dɔ̄ɔ́.
23Yá̰á̰ ń Moijə əda dɔ Nepətali tə́ ní n toó:
Kɔ́ɔ̄ɓē rāā majə kə Nepətalií ngá̰ý. Ni-adə̄n yá̰á̰ ngá̰ý.
Ādə̄ Nepətali ɔr̄ kem dɔ nang yān kə̄ gogə́,
kum kə̄ no ɓē tə́ ō, mbɔ́r ɓē kə́ geleé tə́ ō.
24Yá̰á̰ ń Moijə əda dɔ Aser tə́ ní n toó:
Ādə̄ Kɔ́ɔ̄ɓē rāā majə kə Aser dan ngán Jakob tə́.
Ādə̄ ngákó̰o̰n gə̄ rāān̄ tɔdɔ̄n.
Ādə̄ yibə̄ olibə yān i ngá̰ý kadə̄ asə kəla njan kum tə́.
25Ādə̄ yá̰a̰ kutə̄ ta róbə yāí gə̄ i kə gində̄ kə́ karīí
aláa i kə gində̄ nə̄ngá kasaá.
Ādə̄ tɔ́gí i rɔ̄í tə́ kə dɔ ndɔ̄ gə̄ malang ń
ā ī-ndiń kə kumií ní.
26Gō tə́ anī Moijə əda ɓáý to̰ na:
Yesurun#33.26 Yesurun: Á̰a̰ī Ndū 32.15, nə́ɓā kə́ rang kə́ to tītə̄ Nə́ɓā yāí gətóo.
Ni-al̄ kil̄ man̄ sə́ndá tə́ kə tɔ́gɔ́ əndań dɔ rā̰ gān̄g
ba mān̄ reē gōí tə́ yā dḭḭ̄.
27Nə́ɓā kə́ nge ndi ngándáńg i loo ɓɔ̄ɔ̄ rɔ̄ yāí.
Nəkɔ́ ń jóo bátə́ ɓōólaā toó ní,
tɔ́gən i ngá̰ý dɔ nang tə́ laā.
I ni n tə̄ɓā madə̄ ba̰ā̰í gə̄ noí tə́ ō, mērī tɔ̄l̄də́ kɔ̄ɔ́ ō ní.
28Ngán Israel gə̄ ənīn̄ kemdə́ báŕ báŕ
ndin̄neé tām̄ yá̰á̰ kə́ yā rāādə́ gətóo.
Ngán kaa Jakob gə̄ aw̄ ndin̄ loo kə́ yá̰á̰ kə́ majaĺ a rāādə́ tū tə́ aĺ tə́.
Nin̄ ndin̄ i dɔ nang kə́ kōō gémē ō, kāgə̄ nduú ō, a əɓan̄ tū tə́
i kə ta kūl̄ tal kə́ ngá̰ý kə́ ḭḭ dɔ rā̰ tə́.
29Israel rɔ̄í nelī
tɔdɔ̄ i ḭ̄ ngóy n i gír de gə̄ kə́ Kɔ́ɔ̄ɓē ajədə́ ní.
Ni-rāā rɔ̄n i der kə́ nge kutə̄ gidií tə́ ō,
kaskar kə́ nge tetə rɔ̄ɔ̄ kadī tə́ ō.
Dan ń madə̄ ba̰ā̰í gə̄ a reēn̄ rāāī ɓɔ́ tə́ kadə̄ ī-rajədə́ anī,
ā ī-njə̄rā loo kə́ kḭḭ kə̄ dɔɔ́ kə́ kem ɓē yādə́ gə̄ tə́.
Currently Selected:
NDŪ NAJƏ̄ 33: SARDC
Highlight
Copy
Compare
Share
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.
