NDŪ NAJƏ̄ 32

1Dɔ rā̰, ī-nēl̄ mbīí ōoń najə̄ kɔrə̄ḿ.

Dɔ nang, ōō yá̰a̰ gə̄ ń m-ā m-ə́dá ní.

2Ādə̄ yá̰á̰ ndóō yāḿ gə̄ edən̄ tītə̄ man̄ ō,

ādə̄ najə̄ kə́ taḿ tə́ teē tītə̄ tal kə́ a tə́sō ō,

i tītə̄ man̄ kə́ edə dɔ mbī kámbə́ tə́ ō, dɔ mu tə́ ō.

3M-ā m-ə́da rī Kɔ́ɔ̄ɓē kə̄ ndágá wáńg,

Ngán Israel gə̄, ɔ́siī gɔn Nə́ɓā yājí.

4Kɔ́ɔ̄ɓē i mbal̄, kəla rāān i kə́ majə ɔtə̄ kə taá.

Tɔdɔ̄ gō róbə yān gə̄ malang i kə́ súmūú.

Nə́ɓā i nge ra dɔ ndūn tə́, yá̰á̰ kə́ gōtə́ aĺ gətóo kemən tə́.

Ni i de kə́ gōtə́ ō, kə́ súmūú ō.

5Ta kumən tə́ ɓáa sḭḭ̄ i yá̰á̰ kə́ nujə kɔ̄ɔ́ gə̄.

Sḭḭ̄ i ngánən gə̄ to̰ alé sɔɔ̄ń majaĺ yāsí.

Sḭḭ̄ i ngáń kə́ nujə kɔ̄ɔ́ gə̄,

ī-tɔ̄ɔ̄ī kɔ̄ɔ́ gō róbə́ kə́ súmūú tə́.

6Sḭḭ̄ gír de kə́ mbóó kə́ ger̄ yá̰a̰ aĺ gə̄,

deē a rāā háĺ kə́ beé kə Kɔ́ɔ̄ɓēé a?

I ni n i bɔbə̄sí kə́ nge kəndāsí ní aĺ a?

I ni n rāā adə̄ sḭḭ̄ i gír deē yān gə̄ ní aĺ a?

7Ādə̄ əga kemsí dɔ ndɔ̄ kə́ kété gə̄ tə́.

Ādə̄ əga kemsí dɔ ɓāl̄ gə̄ ń mānə̄n̄ tə́ ní.

Ī-dəjeī bɔbə̄sí gə̄ anī, a ɔjən̄sí.

Ī-dəjeī kum kɔɔ̄ yāsí gə̄ anī, a ədan̄sí.

8Dan ń Nə́ɓā kə́ dɔɔ́ sa̰y ngá̰ý

gán̄g dɔ nang adə̄ nápar de gə̄ ō,

ɔr̄ kam̄ de gə̄ naā tə́ ō ní,

əndā dɔ nin̄ loo yā gír de gə̄

i kə gō kutə ngán Israel gēé.

9Tɔdɔ̄ yá̰a̰ yā Kɔ́ɔ̄ɓē i gír deē yān gə̄,

tá Jakob i yá̰a̰ kənge yān.

10Kɔ́ɔ̄ɓē ənge gír deē yān gə̄ i kem dəla loo tə́,

loo kə́ tal̄ gə̄ a nōn̄ tū tə́ tə́.

Ni-a̰a̰ gōdə́ ō, ɔjədə́ yá̰a̰ ō,

Ni-ngɔ̄m̄də́ tītə̄ loo ngɔ̄m̄ kumən beé ō.

11Tītə̄ ń kə̄rō a nēləń dɔ ngánən tə́

ba a mērə̄n̄də́ kḭḭ bɔ̄gə̄,

aké a jā̰a̰ń bɔ̄gə̄n gíŕdə́ tə́ yā kɔgə̄ńdə́ kəsō ní,

Kɔ́ɔ̄ɓē to i tītə̄ ń noō tām̄ yā deē yān gə̄ tə́ ō.

12Kɔ́ɔ̄ɓē ɔr no gír deē yān gə̄ i kə kérneé,

kanjə̄ nə́ɓā kə́ rang seneé.

13Ni-əndādə́ dɔ loo kə́ kḭḭ kə̄ dɔɔ́ gə̄ tə́ kem ɓēé,

kadə̄ əsan̄ kan̄ yá̰a̰ kə́ kem ndɔrɔ́ gə̄

Ni-adə̄də́ yibə̄ tejə kə́ teē mbo̰ō̰ mbal̄ gə̄ tə́ adə̄ o̰o̰n̄.

Adə̄də́ yibə̄ olibə kə́ teē dɔ mbal̄ tə́.

14Adə̄də́ yibə̄ man̄g gə̄ ō, mba batə̄ gə̄ ō,

yibə̄ ngán batə̄ gə̄ ō, yibə̄ bal batə̄ gə̄ kə́ Basan ō,

yibə̄ bal bə̄yā̰ gə̄ ō, ndujə̄ gémē kə́ lándə̄ ō.

Nin̄-a̰yn̄ kasə kan̄ kāgə̄ nduú yādə́ gə̄ ō.

15Dan ń Yesurun#32.15 Yesurun: I rī tɔ̄ȳ Israel. Kumən na i de kə́ sew. əsa yá̰a̰ ndān̄ anī, rāā dɔ ngan̄g.

Dan ń əndā mbólən ō, bo lúbə́ lúbə́ ō anī,

əya̰ Nə́ɓā kə́ nge kəndān kɔ̄ɔ́.

Ni-əla rɔ̄sɔl̄ dɔ mbal̄#32.15 Mbal̄ ní i Kɔ́ɔ̄ɓē. Á̰a̰ī Teē 32.4; Tkg 49.24 kə́ nge ngɔ̄mən tə́ ō, nge kajən tə́ ō,

16Israel gə̄ rāān̄ yá̰á̰ kə́ majaĺ gə̄ ngá̰ý adə̄n̄neé Kɔ́ɔ̄ɓē wōn̄g ō.

Nin̄ ndɔ̄ȳn̄ ɓesə̄ gə̄ adə̄ tōr̄ Kɔ́ɔ̄ɓē sedə́ ngá̰ý ō.

17Nin̄ tunə̄n̄ yá̰a̰ adə̄n̄ ndíĺ kə́ majə aĺ gə̄ ń nin̄ i Nə́ɓā aĺ ō ní,

nin̄ gerə̄n̄də́ nja kógə̄ḿ aĺ ō,

ɓesə̄ kə́ kijə gə̄ ń kaadə́ gə̄ gerə̄n̄ gíŕdə́ aĺ ō ní.

18Ngán Israel gə̄, mbal̄ ń ojəsí ní sḭḭ̄ ī-rāāniī nja bə̄yā̰ kə́ gogə́ tə́.

Dɔsí ndígə̄nal dɔ Nə́ɓā ń i bɔbə̄sí tə́ ní.

19Dan ń Kɔ́ɔ̄ɓē a̰a̰ yá̰á̰ ń

ngán Israel gə̄ rāān̄ ní anī,

ni kídə̄də́.

Ngánən kə́ dəngam gə̄ ō, kə́ dəyá̰ gə̄ ō,

rāān̄ yá̰a̰ adə̄ wōn̄g rāān sedə́ ngá̰ý.

20Adə̄ ni-əda na: M-ā m̄-tūr̄ gidəḿ tadə́ tə́ kɔ̄ɔ́,

ba m-ā m-á̰á̰ ké ta tɔ̄l̄ tadə́ a to i ba̰ý wa.

Tɔdɔ̄ nin̄ i ngáń kə́ nujə kɔ̄ɔ́ gə̄.

I ngán gə̄ kə́ deē a ənī kemən adə̄də́ alé.

21Nin̄ rāān̄ adə̄

m̄-rāā jang kə yá̰á̰ ń i nə́ɓā aĺ ní,

rāān̄ adə̄ wōn̄g rāām̄ kə ɓesə̄ gēé.

Banī mā m-ā m̄-rāā kadə̄ nin̄ a rāān̄ jang

kə de gə̄ kə́ nin̄ i gír de kə́ rɔ̄kum aĺ gə̄ ō,

kadə̄ rāān̄ wōn̄g kə nápar de kə́ ger̄ yá̰a̰ aĺ gə̄ ō.

22Rɔ̄kum, wōn̄g yāḿ ḭḭ seḿ,

o̰o̰ loo tītə̄ hor bátə́ teē gō ngé ń ɓádá tə́.

O̰o̰ dɔ nang ō, kan̄ yá̰a̰ gə̄ malang kə́ dɔ nang tə́ ō,

o̰o̰ loo bátə́ teē ngəra mbal̄ gə̄ tə́ nang tə́.

23M-ā m̄-kán̄ yá̰á̰ kə́ tōr̄ gə̄ kə̄ dɔdə́ tə́.

M-ā m̄-túr̄də́ kə kum gərā yāḿ gēé.

24Dan ń ɓō a taā tɔ́gə́də́ kɔ̄ɔ́ ō,

mo̰y gajə ō, mo̰y ngāl̄bɔ̄gīí ō, a taān̄ tɔ́gə́də́ kɔ̄ɔ́ ō anī,

m-ā m̄-sə̄lā dā̰ kə́ do̰ gə̄ dɔdə́ tə́ ō,

m-ā m̄-ɓōkə́ lī kə́ kongdə́ majaĺ gə̄ dɔdə́ tə́ ō.

25Kəyā kaskar a tɔ̄l̄ de gə̄ ndágá ō,

ɓōĺ a tɔ̄l̄ de gə̄ kújú ō.

Balsáa a oy ō, ngōmandə a oy ō,

ngōn̄ kásə̄ a oy ō, de kə́ tɔgə ɓə́ga a oy ō.

26m̄-gír̄ i nujə sedə́ kɔ̄ɔ́ malang ō,

rāā kadə̄ əga kem de gə̄ dɔdə́ tə́ to̰ aĺ ō.

27Ba m̄-ɓōĺ i najə̄ kadə̄ madə̄ ba̰ā̰də́ gə̄ gerə̄n̄ aĺ ba ḭḭ ədan̄ na,

i nin̄ n na n-rāān̄ yá̰a̰ gə̄ ń noō malang ní ba na i mā alé.

28Ngán Israel gə̄ i nápar de kə́ ger̄ yá̰a̰ aĺ gə̄.

Kur̄ dɔdə́ gətóo.

29Ré nin̄ i de kə́ ngáā gə̄ anī,

a gerə̄n̄ loo ń yá̰a̰ gə̄ ń noō malang a aw̄n̄ sedə́ kə̄ tū tə́ ní.

30Loo kadə̄ de kə́ kógə̄ḿ beē tə̄ɓā Israel gə̄ dūbú ō,

kadə̄ de kə́ jōó beē gə̄ tə̄ɓān̄ Israel gə̄ dūbú kutə ō,

kanjə̄ kadə̄ i mā Kɔ́ɔ̄ɓē ń i mbal̄ yādə́ ní n m-ə́ládə́ kem jī

madə̄ ba̰ā̰də́ gə̄ tə́ ní i ba̰ý?

31Tɔdɔ̄ mbal̄ yā madə̄ ba̰ā̰jí gə̄ to tītə̄ mbal̄ yājí alé.

Nge ń noō ní nin̄ kɔ́ gə̄ gerə̄n̄ ō.

32Kāgə̄ nduú yādə́ teē i dan kāgə̄ nduú gə̄ kə́ Sodom tə́,

teē i kem ndɔr̄ gə̄ kə́ Gomor tə́.

Kan̄ kāgə̄ nduú yādə́ gə̄ i kan̄ gə̄ kə́ yá̰á̰ kə́ yā yḛl deē i tū tə́.

Dɔ bəra nduú yādə́ gə̄ i dɔ bəra nduú kə́ katə̄ kárárá gə̄.

33Kasə nduú yādə́ to tītə̄ kong lī,

majaĺ tītə̄ kong lī hir beé.

34Yá̰á̰ ń mā Kɔ́ɔ̄ɓē m-ə̄ndā dɔ danaá jəke loo mundə̄ tə́ ní n toó,

yá̰á̰ ń m̄-ngɔ̄m̄ tām̄ yādə́ tə́ ní n toó.

35Dal ba̰ā̰ i yāḿ, m-ā m-ə̄gādə́ tām̄ kəla rāādə́ gə̄ tə́

ndɔ̄ ń nin̄ a əsōn̄neé tə́ ní.

Tɔdɔ̄ ndɔ̄ yá̰á̰ kə́ to kum kaȳ aĺ yādə́ dɔ i ngɔr.

36Kɔ́ɔ̄ɓē a gān̄g sarya kə́ gōtə́ yā kadə̄ deē yān gə̄ ō,

kumən a o̰o̰n tām̄ yā ngé kəla yān gə̄ tə́ ō,

loo ń ni a a̰a̰ kadə̄ tɔ́gə́də́ gətóo ō,

yá̰á̰ kə́ yā kadə̄ əndān̄ tɔ́gə́də́ dɔ tə́ gətóo ō, yá̰á̰ kə́ yā kɔsə

kíĺdə́ kə̄ dɔɔ́ gətóo ō ní.

37Loo ń noō tə́ a dəje tadə́ a əda na:

Ɓesə̄ gə̄ ń ī-sāāī loo ɓɔ̄ɔ̄ rɔ̄ yāsí gíŕdə́ tə́ ní nin̄ i rá?

38Sḭḭ̄ ūlīdə́ kə dā̰ kə́ tun̄ gə̄ ō,

ādīdə́ kasə nduú gə̄ kadə̄ a̰ȳn̄ ō ní,

ādə̄ ɔjən̄ rɔ̄də́ kə̄ ndágá ba ajən̄sí ō, ngɔ̄mə̄n̄sí ō tā.

39Beé ní ī-gerī kadə̄ i mā n i Nə́ɓā ní,

ba nə́ɓā kə́ rang gətóo kadəḿ tə́.

I mā n i nge rāā kadə̄ deē oy ō, kadə̄ deē ndi kə kumneé ō ní.

I mā n i nge kadə̄ deē do ō, nge rāā kadə̄ do edə̄ ō ní.

I náā n asə taā deē jīḿ tə́ kəya̰n dɔɔ́ ní?

40M-ɔ́y jīḿ kə̄ dɔɔ́ ba m-ə̄nī ndūḿ kə najə̄ ń toō:

m̄-ndi kə kumḿ ngándáńg.

41Ré m-ɔ́l kum kaskar yāḿ adə̄ atə ō, ndə́lē pipir ō,

ré m-ún sarya kə̄ jīḿ tə́ ō anī,

m-ā m̄-dal ba̰ā̰ dɔ madə̄ ba̰ā̰ḿ gə̄ tə́ ō,

de gə̄ ń imə̄mə̄n̄ ní m-ā m-ə̄gādə́ ō.

42Gərā yāḿ gə̄ a a̰ȳn̄ mósə kadə̄ rāādə́ kə́ kasə tə́ ō,

kaskar yāḿ a əsa dā̰ yā ndān̄ ō.

Adə̄ i mósə de gə̄ ń tɔ̄lə̄n̄də́ ní ō,

de gə̄ ń əhɔn̄də́ ta rɔ̄ɔ̄ tə́ ní ō,

ngol áskar gə̄ yā madə̄ ba̰ā̰ gə̄ ō.

43Ādə̄ nápar de gə̄ malang

tɔ̄ȳn̄ gír de gə̄ yā Kɔ́ɔ̄ɓē.

Tɔdɔ̄ Kɔ́ɔ̄ɓē a dal ba̰ā̰ mósə́ ngé rāā kəla yān gə̄.

Ni a rāā kadə̄ ba̰ā̰ əsō dɔ madə̄ kɔ̄lən gə̄ tə́.

I beé n a utə̄ń dɔ majaĺ yā dɔ nang yān ō,

dɔ majaĺ yā gír deē yān gə̄ ō ní.

44Moijə nin̄ kə̄ Hose#32.44 K. 44: Hose i deē ń Moijə tūr̄ rīn na i Jojue ní. Á̰a̰ī Tə́da 13.16 ngōn̄ Nun reē ran̄ no gír de gə̄ tə́ ba unən̄ ndūdə́ kə̄ dɔɔ́ tə́dan̄neé pā ní malang adə̄ oōn̄.

45Dan ń Moijə tə́da najə̄ gə̄ ní malang adə̄ ngán Israel gə̄ oy anī, 46ni ədadə́ na:

Yá̰á̰ kə́ yā rāā gə̄ ń ɓōólaā m-ɔ́jə́sí kadə̄ ī-rāāī ní, ī-lōōī rāā yá̰á̰ kógə̄ naā tə́. Ba ɔ́jiī ngáńsí gə̄ ō, ngán kaasí gə̄ ō, ādə̄ əndān̄ kumdə́ gíŕ yá̰a̰ malang ń ndū najə̄ yā Nə́ɓā əda kadə̄ yā rāā tə́ ní ba rāān̄. 47Tɔdɔ̄ yá̰á̰ kə́ yā rāā gə̄ ń m-ɔ́jə́sí ní i yá̰á̰ kə́ kanjə̄ kumən alé, tām̄ ā ī-ndiī kə kumsí i kə ta kūl̄də́ ō, ā ī-ndiī ɓāl̄ ngá̰ý dɔ nang ń ā āwī yā taā gidə bā Jurdḛ kə́ dām̄ kə́ nú tə́ ní i kə ta kūl̄də́ ō.

Kɔ́ɔ̄ɓē əda najə̄ koy Moijə

48Ndɔ̄ nəkɔ́ ń noō tə́ Kɔ́ɔ̄ɓē əda Moijə na:

49Āw̄ dɔ mbal̄ Abarim gə̄ ń ran̄ kə ta naá tə́ ní, ba āl̄ ta tél mbal̄ Nebo ń ra sɔɔ̄n̄ ta naā kə ɓē kə́ Jeriko dɔ nang kə́ Moab tə́ ní, ba á̰a̰ dɔ nang kə́ Kanaan ń m-ādə̄ ngán Israel gə̄ kadə̄ i yá̰a̰ kənge yādə́ ní. 50Gō tə́ anī óy dɔ mbal̄ ní tə́ āw̄ gō kaaí gə̄ tə́ tītə̄ ń ngōkó̰ó̰í Aaro̰ oyń dɔ mbal̄ Hor tə́ ba aw̄ń gō kaan gə̄ tə́ ní. 51Tɔdɔ̄ sḭḭ̄ kə ngōkó̰ó̰í Aaro̰ ī-rāāī yá̰á̰ kə́ gōtə́ aĺ seḿ ta kum ngán Israel gə̄ tə́ Kades, kem dəla loo kə́ Təsin tə́, ta man̄ kə́ Meriba tə́. Ndɔ̄ ń noō tə́ ní sḭḭ̄ ɔ́jiī kə̄ ndágá ta kum ngán Israel gə̄ tə́ kadə̄ mā i de kə́ táĺ alé. 52Adə̄ ā ī-ra i sa̰y n ā á̰a̰ń dɔ nang ń m-ādə̄ ngán Israel gə̄ ní, ba ā āw̄ tū tə́ alé.

Currently Selected:

NDŪ NAJƏ̄ 32: SARDC

Highlight

Copy

Compare