NDŪ NAJƏ̄ 34

Moijə oy

1Moijə ḭḭ ndágə loo gə̄ kə́ Moab tə́ aw̄ dɔ mbal̄ Nebo tə́, aw̄ al̄ ta tél mbal̄ Pisga ń ra sɔɔ̄n̄ ta naā kə ɓē kə́ Jeriko ní tə́. Kɔ́ɔ̄ɓē ɔjən gō nang kə́ Galaad bátə́ teē gō nang yā Dan tə́. 2Ɔjən gō nang yā Nepətali ō, yā Epəraim ō, yā Manase ō, yā Juda ō, bátə́ teēń bā bo kə́ no ɓē tə́. 3Ɔjən gō nang kə́ Negeb ō, gō nang kə́ Jeriko ō ń i ɓē kə́ kāgə̄ túmbur gə̄ i ngá̰ý tū tə́ ní, kum wól bā Jurdḛ tə́ bátə́ teēń Soar. 4Tā anī Kɔ́ɔ̄ɓē ədan na:

Dɔ nang ń m-ə̄nī ndūḿ dɔ tə́ m-ādə̄ Abəraham ō, Isaak ō, Jakob ō, m-ə́dádə́ na, m-ā m-ādə̄ ngán kaadə́ gə̄ ní n toó. M-ɔ́jiī ḭ̄ kadə̄ á̰a̰ā̰ kə kumií, ba ā ə̄ndā njaí tū tə́ alé.

5Adə̄ Moijə ń i nge kəla yā Kɔ́ɔ̄ɓē ní oy i loo ń noō tə́, dɔ nang kə́ Moab tə́, tītə̄ ń Kɔ́ɔ̄ɓē ədań ní. 6Nə́ɓā nəkɔ́ dubə̄n wól loo kə́ dɔ nang kə́ Moab tə́ ń sɔɔ̄n̄ ta naā kə ɓē kə́ Bet Peor ní. Ba bátə́ ɓōólaā gə̄gē ní, loo ń dɔ ɓádən i tū tə́ ní deē ger̄ alé.

7Dan ń Moijə oy ní, ɓālə̄n i ɓú kə kutə jōó. Kumən a̰a̰ loo majə ɓáý ō, tɔ́gən təgā aĺ ɓáý ō n oyń ní. 8Ngáń Israel gə̄ nōōn̄ Moijə ndɔ̄ kutə mətá ndágə loo gə̄ kə́ Moab tə́ pá tá kadə̄ asədə́ ɓáý.

9Ndíl kum kedə̄ rosə kem Jojue ngōn̄ Nun, tɔdɔ̄ Moijə əndā jīn dɔn tə́. Ngán Israel gə̄ oōn̄ tan, adə̄ rāān̄ yá̰a̰ i kə gō ndū ń Kɔ́ɔ̄ɓē ədań Moijə ní.

10Ngé koō ta gə̄ ń utə̄n̄ gō Moijə dɔ nang kə́ Israel tə́ ní, nge kə́ to tītə̄n gətóo. Tām̄ dan ń Kɔ́ɔ̄ɓē ɔr̄ najə̄ seneé ní a̰a̰n̄ ta naā ō#34.10 K. 10: Á̰a̰ī Tə́da 12.5-8, 11əlan dɔ nang kə́ Ejiptə tə́ rāā yá̰á̰ kə́ yáā gə̄ tə́ ō, yá̰á̰ kə́ kɔr kum gə̄ tə́ ō, ta kum mban̄g Parao̰ tə́ kə de kə́ bo yān gēé ō#34.11 K. 11: Á̰a̰ī Teē 3.20; 7.3—12.31; 14.15-31; Ndū 4.34; 6.22; 7.19, ta kum de gə̄ malang kə́ dɔ nang yā mban̄g Parao̰ tə́ ō. 12Moijə rāā yá̰a̰ kə tɔ́gə́ kə́ to ɓōĺ ngá̰ý ta kum ngán Israel gə̄ tə́ malang ō.

Currently Selected:

NDŪ NAJƏ̄ 34: SARDC

Highlight

Copy

Compare