NDŪ NAJƏ̄ 2
2
1Gō tə́ anī jə-tél j-uniī róbə́ kə́ kem dəla loo tə́, ba j-awī kumjí sɔɔ̄ bā tə̄ɓā gə̄ tītə̄ ń Kɔ́ɔ̄ɓē ədam̄neé ní. Jə-njə̄rāī dan i ngá̰ý tá jə-gōngī gidə mbal̄ kə́ Seir ɓáý.
Israel gə̄ əndan̄ nang kə́ Edom ō, Moab ō, Amon ō, gāngə̄n̄
2Gō tə́ anī Kɔ́ɔ̄ɓē ədam̄ na:
3Ə̄nīī gir̄ gində̄ gidə mbal̄ ń toō tə́ dan i jóó ngá̰ý ní ī-tūrī rɔ̄sí āwī kumsí sɔɔ̄ loo kə́ dām̄ mbɔ́r ɓē kə́ ko̰ó̰ tə́. 4Ə́dá gír de gə̄ najə̄ ń toō:
Ā ī-teēī dɔ nang kə́ Seir tə́, loo ń ngákó̰ó̰sí kə́ ngán Esau gə̄ ndin̄ tū tə́ ní. Nin̄ a ɓōlə́n̄sí, ba ī-lōōī kənīdə́ rɔ̄ɔ̄, 5tɔdɔ̄ m-ā m-ādə̄sí yá̰á̰ kógə̄ḿ dɔ nang yādə́ tə́ alé, loo kə́ yā kadə̄ ə̄ndāīneé njasí gə̄gē a m-ā m-ādə̄sí alé. Tām̄ mbal̄ kə́ Seir ní m-ādə̄ i Esau. 6Ā ī-mangiī yá̰a̰ kəsa yādə́ i kə naraá tá ā ə́saī ō, man̄ yādə́ gə̄gē ā ī-mangiī i kə naraá tá ā ā̰yī ō. 7Tām̄ Kɔ́ɔ̄ɓē Nə́ɓā yāsí rāā majə sesí tū kəla rāāsí gə̄ tə́ malang dan ń ə́ndaī dəla loo kə́ bo ngá̰ý ń toō ī-gāngī ní ō, əndā kumən gōsí tə́ ō. Kɔ́ɔ̄ɓē njə̄rā sesí ɓāl̄ kutə sɔ́ ngɔlaā ō, ī-nalī yá̰á̰ kógə̄ḿ aĺ ō. 8Dan ń j-əya̰ī gō nang kə́ Seir ń ngákó̰ó̰jí kə́ ngán Esau gə̄ ndin̄ tū tə́ ní, j-uniī róbə́ ń ḭḭ Elat ō, Esion Geber ō, ba aw̄ kə̄ Araba ní. Jə-ndaī noó jə-tūrī rɔ̄jí j-awī kum kə̄ dəla loo kə́ Moab tə́. 9Anī Kɔ́ɔ̄ɓē ədam̄ na:
Ī-lōōī sāā ta Moab gə̄ ō, ī-lōōī kənīdə́ rɔ̄ɔ̄ ō, tām̄ m-ā m-ādə̄sí yá̰á̰ kógə̄ḿ dɔ nang yādə́ tə́ alé, tɔdɔ̄ dɔ nang kə́ Ar ní m-ādə̄də́ i nin̄ ngán kaa Lot gə̄. 10Kété ní i Emi gə̄ ń i gír de kə́ tɔ́gə́də́ i ngá̰ý gə̄ ō, kutədə́ i ngá̰ý ō, ngālə̄n̄ tītə̄ Anak gə̄ ō ní n ndin̄ dɔ nang kə́ Ar tə́ ní. 11De kə́rēý gə̄ rāān̄də́ i Repay gə̄ tə́ tītə̄ yā Anak gə̄, banī Moab gə̄ a ɓārə́n̄də́ na i Emi gə̄. 12Banī dɔ nang kə́ Seir ní, i Hori gə̄ n ndin̄ tū tə́ kété tá kadə̄ ngán kaa Esau gə̄ reē taān̄ jīdə́ tə́ ō, tɔ̄lə̄n̄də́ kɔ̄ɔ́ malang ō, ba ndin̄ gotədə́ tə́ ní. Ngán Israel gə̄ rāān̄ i tītə̄ yādə́ n ndin̄neé dɔ nang ń Kɔ́ɔ̄ɓē adə̄də́ tə́ ní. 13Ba ngɔlaā ní ə̄sōī róbó, ī-teēī wól man̄ Jered kə̄ gidə kə́rēý tə́. Adə̄ jə-teēī wól man̄ Jered kə̄ gidə kə́rēý tə́. 14Jə-njə̄rāī dɔ dán loo ń ḭḭ Kades Barnea bátə́ ugə̄ń wól man̄ Jered tə́ ní ɓāl̄ kutə mətá gidə i sɔ́sɔ́ tá jə-teēī wól man̄ Jered kə̄ gidə kə́rēý tə́ ɓáý. Dan ngeé ń noō tə́ ní de kə́ tɔgə gə̄ ń ta kɔr̄sí dɔɔ́ anī asən̄ kaw̄ rɔ̄ɔ̄ tə́ ní, oyn̄ kɔ̄ɔ́ malang tītə̄ ń Kɔ́ɔ̄ɓē túbəń njan kété ní#2.14 K. 14: Á̰a̰ī Tə́da 14.21-23.. 15Kɔ́ɔ̄ɓē nəkɔ́ əndā jīn gōdə́ tə́ tə̄ɓańdə́ kem ɓēé kɔ̄ɔ́ bátə́ adə̄ təgān̄neé malang. 16Dan ń gír de gə̄ ń toō gān̄g kɔ̄ɔ́ malang anī, 17Kɔ́ɔ̄ɓē ədam̄ na:
18Ɓōólaā ā ī-mānī dɔ nang kə́ Moab tə́, ā ī-teēī i kem ɓē kə́ Ar tə́. 19Ā ūgī dɔ nang yā ngán Amon ń ra nosí tə́ ní. Ī-lōōī sāā tadə́ ō, kənīdə́ rɔ̄ɔ̄ ō. Na m-ā m-ādə̄sí yá̰á̰ kógə̄ḿ dɔ nang yā ngán Amon gə̄ tə́ alé. Tām̄ nin̄ i ngán kaa Lot gə̄ ō, dɔ nang ń noō m-ādə̄də́ i nin̄ ō. 20De gə̄ rāān̄ dɔ nang ní i dɔ nang yā Repay gə̄ tə́, tɔdɔ̄ i nin̄ n ndin̄ tū tə́ kété ní. I Repay gə̄ ń noō n Amon gə̄ a ɓārə́n̄də́ na i Jamjum gə̄ ní. 21I de kə́ tɔ́gə́də́ i ngá̰ý gə̄ ō, kutədə́ i ngá̰ý ō, ngālə̄n̄ ngá̰ý tītə̄ Anak gə̄ ō. Banī Kɔ́ɔ̄ɓē nujə sedə́ kɔ̄ɔ́ malang no Amon gə̄ tə́, adə̄ Amon gə̄ taān̄ dɔ nang yādə́ ndin̄ tū tə́. 22Kɔ́ɔ̄ɓē rāā i beé kə ngán Esau gə̄ ń ndin̄ dɔ nang kə́ Seir tə́ ní ō. Ni-nujə Hori gə̄ kɔ̄ɔ́ malang nodə́ tə́, adə̄ ngán Esau gə̄ taān̄ dɔ nang yādə́ ndin̄ tū tə́ bátə́ ɓōólaā. 23Ba Abit gə̄ ń ndin̄ loo gə̄ kə́ Gaja tə́ ní, de gə̄ kə́ ḭḭn̄ Kapətor reē nujən̄ sedə́ kɔ̄ɔ́ malang ba ndin̄ gotədə́ tə́.
24Gō tə́ anī Kɔ́ɔ̄ɓē əda na:
Ɔ̄rī dɔɔ́ āwī, ī-teēī wól man̄ Arnon. M-ā m-ə́la mban̄g Sihon kə́ Hesəbon ń ni i Amor ní jīsí tə́ kadə̄ ī-taāī dɔ nang yān. Ə́laī gír taā dɔ nang yān, ə̄nīniī rɔ̄ɔ̄. 25Əla gír ɓōólaā ní m-ā m̄-rāā kadə̄ gír de gə̄ malang kə́ dɔ nang tə́ gə̄ a ɓōlə́n̄sí ō, kadə̄ kə̄ngā sāā a əgadə́ tām̄ yāsí tə́ ō. Ré nin̄ a oōn̄ kōōsí anī, ɓōĺ kə́ ngá̰ý a rāādə́ kadə̄ a ndewn̄ jik jik.
Israel gə̄ taān̄ ɓē ko̰o̰ yā mban̄g Sihon
26Adə̄ m̄-ndi i kem dəla loo kə́ Kedemot tə́, ba m-ə́la kəla rɔ̄ Sihon mban̄g kə́ Hesəbon tə́ m-ə́danneé jəke m-ə́da na: 27Əyá̰jí ādə̄ jə-mān̄ dɔ nang yāí tə́. J-a j-un i róbə kɔsə yā mānəń ní. J-a jə-tɔ̄ ko̰ó̰ aĺ ō, geleé aĺ ō. 28J-a jə-mang yá̰a̰ kəsa jīí tə́ i kə naraá tá j-a j-əsa ō, j-a jə-mang man̄ jīí tə́ i kə naraá tá j-a j-a̰ȳ ō. Yá̰á̰ ń jə-sāā ní i kadə̄ ə́yá̰jí ādə̄ jə-mān̄ dɔ nang yāí tə́ ngóy, 29tītə̄ ń ngán kaa Esau gə̄ ń ndin̄ dɔ nang kə́ Seir tə́ ō, de kə́ Moab gə̄ ń ndin̄ kem ɓē kə́ Ar tə́ ō, əya̰n̄neéjí adə̄ jə-mānəń ní. Gō tə́ anī j-a jə-teē bā Jurdḛ yā kaw̄ dɔ nang ń Kɔ́ɔ̄ɓē Nə́ɓā yājí adə̄jí tə́ ní. 30Banī Sihon mban̄g kə́ Hesəbon ɔgə̄jí mān̄ dɔ nang yān tə́. I Kɔ́ɔ̄ɓē Nə́ɓā yāsí n rāā adə̄ kemən ngan̄g, yā kadə̄ ī-taāīneé dɔ nang yān ndɔ̄ ń noō tə́ ní. 31Tā anī Kɔ́ɔ̄ɓē ədam̄ na:
Á̰a̰ā̰ m-ə́lá gír kəlā mban̄g Sihon kə ɓē yānneé kem jīí tə́ kɔ̄ɔ́ ɓá ní, ə́lá gír taā dɔ nang yān. 32Sihon teē kə gír deē yān gēé malang reē rɔ̄ɔńjí loo ń a ɓārə́n̄ na i Yahas ní tə́. 33Banī Kɔ́ɔ̄ɓē Nə́ɓā yājí əlan kem jījí tə́ adə̄ jə-tetəniī rɔ̄ɔ̄ kə ngánən gə̄ gə̄gē, gír deē yān gə̄ gə̄gē malang. 34Jə-táāī ɓē yān gə̄ kɔ̄ɔ́ malang ba jə-bāāī dɔdə́ j-adī Kɔ́ɔ̄ɓē. Jə-tɔ̄lī de kə́ kemeé gə̄ kɔ̄ɔ́ malang, dəngam gə̄ ō, dəyá̰ gə̄ ō, ngán gə̄ ō. J-əya̰ī deē kógə̄ḿ adə̄ ndi kə kumneé alé. 35Ba yá̰a̰ gə̄ ń j-ɔyiīdə́ tām̄ yājí tə́ ní i yá̰a̰ kul̄ gə̄ ō, yá̰a̰ kənge gə̄ kə́ kem ɓē gə̄ ń jə-táāī tə́ ní ō ngóy. 36Əla gír dɔ ɓē kə́ dɔ gɔ́sə man̄ Arnon tə́ ń rīn na i Aroer ní ō, dɔ ɓē ń ndi kum wól loo tə́ ní ō, bátə́ ugə̄ń dɔ nang kə́ Galaad tə́ ní, ɓē kə́ dum̄jí gətóo. Kɔ́ɔ̄ɓē Nə́ɓā yājí əla ɓē gə̄ ń noō malang kem jījí tə́. 37I dɔ nang yā ngán Amon gə̄ ngóy n j-ugī tū tə́ aĺ ní. Adə̄ i dɔ gɔ́sə man̄ Yabok malang ō, ɓē gə̄ kə́ dɔ mbalá ō, loo malang ń Kɔ́ɔ̄ɓē Nə́ɓā ɔgə̄jí ní ō n j-ugī tū tə́ aĺ ní.
Currently Selected:
NDŪ NAJƏ̄ 2: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.