NDŪ NAJƏ̄ 26

Ndējə̄ kan̄ yá̰á̰ kə́ ta kəga dɔ gə̄ ō, kəda taā kem ō

1Ré ūgə̄ dɔ nang ń Kɔ́ɔ̄ɓē Nə́ɓā yāí adī tə́ ní, ba ī-taā ī-ndi tū tə́ anī, 2kōō yāí kə́ ta kəga dɔ gə̄ malang ní ā ī-kēgə̄ kem jángá yā kaw̄ń loo ń Kɔ́ɔ̄ɓē Nə́ɓā yāí a gə̄rā yā kəndā rīn dɔ tə́ ní tə́. 3Āw̄ ə́nge nge tun̄ yá̰á̰ ń a rāā kəla ndɔ̄ ń noō tə́ ní ba ə́dan na: M-ə́dá Kɔ́ɔ̄ɓē Nə́ɓā yāí ɓōólaā na m-ūgə̄ dɔ nang ń ənī ndūn adə̄ kaají gə̄ yā kadə̄jí ní tə́. 4Nge tun̄ yá̰a̰ a taā jáńg ń āwń ní yā kəndā no loo tun̄ yá̰a̰ yā Kɔ́ɔ̄ɓē Nə́ɓā yāí tə́. 5Loo ń noō tə́ ā ə́da ta kum Kɔ́ɔ̄ɓē Nə́ɓā yāí tə́ na:

Kaaḿ i Aram kə́ nge njə̄rā dɔɔ́. Ni-aw̄ dɔ nang kə́ Ejiptə tə́ aw̄ ndi i kə́ tə̄rā kə́ nge nam̄ tə́ kə de kə́ sḛ́ý beē gə̄ ń aw̄n̄ seneé ní. Loo ń noō tə́ ni téĺ nápar de kə́ tɔ́gə́də́ i ngá̰ý ō, kutədə́ i ngá̰ý ō. 6Banī de kə́ Ejiptə gə̄ rāān̄jí majə alé. Ənīn̄jí dan ndoō ō, tə́ndān̄ kəla kə́ ngan̄g ngan̄g gə̄ dɔjí tə́ ō. 7Loo ń noō tə́ j-əga kɔŕ kə̄ dɔ Kɔ́ɔ̄ɓē ń i Nə́ɓā yā kaají gə̄ tə́ ní, anī oō ndūjí. Ni-a̰a̰ kadə̄ jə-ndoō ō, a̰a̰ rɔ̄ tō ndoō yājí ō, a̰a̰ rāā ń rāān̄ kumjí ndoō tə́ ní ō. 8Ni-teē sejí kɔ̄ɔ́ dɔ nang kə́ Ejiptə tə́ kə ta kūl̄ yá̰á̰ kə́ to ɓōĺ gə̄ ō, yá̰á̰ kə́ bo gə̄ kə́ yā kɔjəń yá̰a̰ gə̄ ō, kə́ kɔr kum gə̄ ō. 9Ni-reē sejí laā ba adə̄jí dɔ nang kə́ mba ō, yibə̄ tejə ō, i ngá̰ý tū tə́ ń toō. 10Adə̄ ngɔlaā ní, Kɔ́ɔ̄ɓē m̄-reē kə dɔ kōō kə́ kijə gə̄ kə́ dɔ nang ń ādə̄m̄ tə́ ní m̄-ndējī.

Ā ə̄ndā dɔ kōō kə́ kijə gə̄ ní no Kɔ́ɔ̄ɓē Nə́ɓā yāí tə́ ō, ā ɔ́sə noí nang tə́ non tə́ ō. 11Gō tə́ anī yá̰á̰ kə́ majə gə̄ malang ń Kɔ́ɔ̄ɓē Nə́ɓā yāí adī ḭ̄ naā tə́ de kə́ kem kújə yāí tə́ gə̄ ní, ā ī-rāāī rɔ̄nelə̄n naā tə́ kə ngōn̄ Lebi ō, tə̄rā kə́ nge nam̄ ō ń ndin̄ dɔ nang yāí tə́ ní.

Ɓāl̄ kə́ nge ko̰ mətá

12Kem ɓāl̄ kə́ nge ko̰ mətá ń i ɓāl̄ yā dɔ yá̰á̰ kə́ nge ko̰ kutə kə́ kɔr̄ tām̄ yā Nə́ɓā tə́ ní, ré ɔ̄r̄ dɔ kōō yāí gə̄ malang ādə̄ ngōn̄ Lebi ō, tə̄rā kə́ nge nam̄ ō, ngōn̄ hal ō, dəyá̰ kə́ ngaa koy ō, ādə̄ əsa ndānə̄n̄ kem ɓē yāí tə́ oy anī, 13ə́da kə̄ ta kum Kɔ́ɔ̄ɓē Nə́ɓā yāí tə́ na: Kɔ́ɔ̄ɓē, yá̰á̰ kə́ yā ɓōĺ gidə kə́ tām̄ yā Nə́ɓā tə́ ń to kem kújə yāḿ tə́ ní, m-ādə̄ ngōn̄ Lebi ō, tə̄rā kə́ nge nam̄ ō, ngōn̄ hal ō, dəyá̰ kə́ ngaa koy ō, kə gō míndí ń ə́dam̄neé ní kanjə̄ mān̄ dɔ ndūí tə́ ō, kanjə̄ kadə̄ dɔḿ ndígə̄nal ō. 14Dan ń m̄-rāā ndoō deē yāḿ kə́ koy ní, m-ə́sá yá̰á̰ ní aĺ ō, dan ń m̄-tél de kə́ yḛr ní, m-ɔ̄r̄ yá̰á̰ kógə̄ḿ tū tə́ aĺ ō, m-ún m-ādə̄ de kə́ koy kɔ̄ɔ́ aĺ ō. M-ōō ndū Kɔ́ɔ̄ɓē Nə́ɓā yāḿ, adə̄ m̄-rāā yá̰a̰ malang ń ədam̄ kadə̄ m̄-rāā ní. 15Beé ní, ḭ̄ ń ī-ndi dɔ rā̰ tə́ kem loo kə́ táĺ yāí tə́ ní, á̰a̰ā̰ ba ī-rāā majə kə ngán Israel gə̄ ń nin̄ i gír deē yāí gə̄ ní ō, ī-rāā majə kə dɔ nang ń mba ō, yibə̄ tejə ō, i ngá̰ý tū tə́ á ə̄nī ndūí ādə̄ kaají gə̄ yā kadə̄jí ní ō.

Gír de yā Kɔ́ɔ̄ɓē gə̄

16Ɓōólaā Kɔ́ɔ̄ɓē Nə́ɓā yāí ədaī na kə ī-rāā yá̰a̰ gə̄ ń ndū najə̄ yān gə̄ ō, jī-bēl̄ loo rāā yá̰a̰ yān gə̄ ō ɔjən̄ ní. Ā ə̄ndā kumií gírí yā rāā kə gōó. Ā ī-rāā i kə ngarā̰ kemií malang ō, kə rɔ̄í malang ō. 17Ɓōólaā ī-rāā ādə̄ Kɔ́ɔ̄ɓē ənī ndūn adī, əda na ni i Nə́ɓā yāí loo ń ún gō róbə yān gə̄ ō, ōō tan ī-ngɔ̄məń ndū najə̄ yān gə̄ ō, gō míndən gə̄ ō, jī-bēl̄ loo rāā yá̰a̰ yān gə̄ ō ní. 18Ni-rāā adə̄ ə̄nī ndūí ādə̄n ō, ə́da na ḭ̄ i gír deē yān, nge ń ni ɓārə́n na i yá̰a̰ kənge yān kə́ gātə̄n i ngá̰ý ní ō, ə̄nī ndūí yā ngɔ̄məń gō míndən gə̄ malang ō. 19Rɔ̄kum, Kɔ́ɔ̄ɓē Nə́ɓā yāí ndigə kadə̄ kɔsə gɔn kə́ tām̄ yāí tə́ ō, rī ɓār̄ yāí ō, loo kə́ bo yāí ō, tɔȳ yā nápar de gə̄ malang ń ni əndādə́ ní ō, kadə̄ ḭ̄ i gír de kə́ tal kə́ tām̄ yā kəla yān tə́ tītə̄ ń ədań ní ō.

Currently Selected:

NDŪ NAJƏ̄ 26: SARDC

Highlight

Copy

Compare