NDŪ NAJƏ̄ 25

Loo gān̄g sarya

1Ré de gə̄ kɔ̄lə̄n̄ naā ba aw̄n̄ saryaá anī, deē ń najə̄ gətóo dɔn tə́ ní a ədan̄ na najə̄ gətóo dɔn tə́ ō, deē ń najə̄ i dɔn tə́ ní a ədan̄ na najə̄ i əhɔn tə́ ō. 2Ré deē ń najə̄ i dɔn tə́ ní asə kadə̄ ənge ndéy anī, nge gān̄g sarya a mēr̄ laan nang tə́ ō, a mēr̄ kadə̄ əndanən̄ ta kumən nəkɔ́ tə́ kadə̄ asə kum gotə yá̰á̰ ń rāā ní ō. 3A əndanən̄ i jī kutə sɔ́, ba kadə̄ mān̄ dɔ loo ń noō alé na sōgə́ ənge do kə́ majaĺ ngá̰ý ō, əlan̄ rɔ̄sɔl̄ dɔ ngōkó̰ó̰í tə́ ta kumií tə́ ō.

Man̄g kə́ a səɓā kōō

4Ā ə́la bendə ta man̄g kə́ a səɓā kōō tə́ alé.

Dəyá̰ kə́ ngaa koy kə́ ngōnən gətóo

5Ré ngákó̰o̰ naā kə́ dəngam gə̄ ndin̄ loo kógə̄ḿ ba nge kə́ kógə̄ḿ oy ba ngōnən gətóo anī, nə̄yá̰n a taā de kə́ rang alé. I ngōkó̰o̰ ngaan n a taān ní, tām̄ nge ń noō i kəla kə́ sɔɔ̄ dɔn. 6Ngōn̄ kə́ ta kəga dɔ ń a ojə ní a əndān̄ rī nge yo dɔn tə́ kadə̄ rīn toń ngándáńg dan ngán Israel gə̄ tə́.

7Ba ré ngōkó̰o̰ nge yo ní ndigə taān aĺ anī, dəyá̰ ní a aw̄ rɔ̄ kum kɔɔ̄ gə̄ tə́ loo sarya tə́ yā kədadə́ na:

Ngōkó̰o̰ ngaaḿ ndigə kojə ngōn̄ seḿ kadə̄ rī ngōkó̰o̰n ɓārəń ngándáńg dan ngán Israel gə̄ tə́ alé ní, ni-mbātə́ i kɔjə kadə̄ ni i ngōkó̰o̰ ngaaḿ. 8Kum kɔɔ̄ gə̄ kə́ kem ɓē ní tə́ a ɓārə́n̄ dəngam ní yā kɔr̄ najə̄ seneé. Ni a ra loo ń noō tə́ yā kədań na ngur taān na rāān alé. 9Anī nə̄yá̰ ngōkó̰o̰ dəngam ní a aw̄ rɔ̄n tə́ ta kum kum kɔɔ̄ gə̄ tə́ yā kɔr̄ sākə̄rā kə́ njan tə́ ō, yā tībə̄ hōr̄ kumən tə́ ō. Ba gō tə́ anī a əda na:

Yá̰á̰ ń a rāān̄ kə dəngam kə́ mbātə́ kojə ngōn̄ kadə̄ ngōkó̰o̰n ní n noó. 10Loo ń noō tə́ a ɓārə́n̄ gír kojə yā dəngam ní dɔ nang kə́ Israel tə́ na i gír kojə yā dəngam ń ɔrə̄n̄ sākə̄rā njan tə́ ní.

Yá̰á̰ kə́ kɔgə̄ rāā loo rɔ̄ɔ̄ naā tə́

11Ré dəngam gə̄ jōó ra a rɔ̄ɔ̄n̄ naā, ba nə̄yá̰ nge kə́ kógə̄ḿ aw̄ rɔ̄də́ tə́ yā kɔr̄ ngaan kɔ̄ɔ́ jī nge tə̄ndān tə́, ba ré dəyá̰ ní əla jīn əhɔń ndam aláa mɔtə nge rɔ̄ɔ̄ ngaan ní anī, 12kumií a o̰o̰ī tām̄ yā dəyá̰ ní tə́ alé: Ā ī-gān̄g jīn kɔ̄ɔ́.

Háĺ kə́ loo rāā gātə̄ tə́

13Ā ə̄tō mbal̄ gində̄ gə̄ kə́ yā kɔjəń kɔȳ yá̰á̰ gír naā tə́ jōó kadə̄ kógə̄ḿ i kə́ bo ō, kə́rēý i kə́ dūú ō, kem ngong yāí tə́ alé. 14Ā āw̄ kə kār̄ tɔ́r̄ yá̰á̰ gír jōó kadə̄ kógə̄ḿ i kə́ bo ō, kə́rēý i kə́ dūú ō, kújú gōí tə́ alé. 15Mbal̄ gində̄ kə́ yā kɔjəń kɔȳ yá̰a̰ yāí, a to i kə taá ō, kə gōó ō. Kār̄ tɔ́r̄ yá̰a̰ yāí a to i kə taá ō, kə gōó ō, kadə̄ ī-ndiń ta kaw̄ jóo dɔ nang ń Kɔ́ɔ̄ɓē Nə́ɓā yāí adī tə́ ní. 16Tɔdɔ̄ deē ń rāā yá̰á̰ kə́ gōtə́ aĺ kə́ tītə̄ ń noō ní, i de kə́ to yḛr ta kum Kɔ́ɔ̄ɓē Nə́ɓā yāí tə́.

Amalek gə̄ i madə̄ ba̰ā̰ Israel gə̄

17Ādə̄ əga kemií dɔ yá̰á̰ ń Amalek gə̄ rāān̄ seí róbó dan ń ī-teēń kɔ̄ɔ́ kem ɓē kə́ Ejiptə tə́ ní. 18Nin̄ ɓōlə́n̄ Nə́ɓā alé, adə̄ dan ń kɔr asiī nák á tɔ́gí gətóó ní, ran̄ róbó ngóōnī ba nujən̄ kə de gə̄ ń njadə́ na̰y gogə́ gōí tə́ ní kɔ̄ɔ́ malang. 19Dan ń Kɔ́ɔ̄ɓē Nə́ɓā yāí a əndāī loo kə́ madə̄ ba̰ā̰í gə̄ malang ń gīrə̄n̄ gidií ní asən̄ kɔdə rɔ̄í tū tə́ aĺ tə́ ō, a əndāī dɔ nang ń adī kadə̄ ī-ndi lɔm tū tə́ tə́ ní ō anī, ā ī-tɔ̄l̄ Amalek gə̄ kɔ̄ɔ́ malang kadə̄ əga kem deē kógə̄ḿ kə́ dɔ nang tə́ dɔdə́ tə́ to̰ alé. Ādə̄ dɔí ndígə̄nal alé.

Currently Selected:

NDŪ NAJƏ̄ 25: SARDC

Highlight

Copy

Compare